Fats e no "parole"

Vuê si son vudis lis celebrazions uficiâls dai 3 di Avrîl, aniversari de nassite dal Stât Patriarcjâl di Aquilee (1077), ma tra tantis cjacaris, pôcs fats: no ai viodût altris che si presentin ai eletôrs dome par furlan. Jo ai decidût di fâ par furlan ancje il gno materiâl promozionâl di cjarte, in coerence cun chest blog, faceboook, twitter e i intervents publics come la presentazion de coalizion fate martars passât. No ai pôre di fâlu parcè che o vin di jessi braurôs di ce che o sin: une plante e cres sane e fuarte dome se e à lidrîs profondis. Us ricuardi lis peraulis di pre Checo Placerean “Nol è lecit plui, par chei che a vuelin ministrâ la nestre tiere, di no vê coragjo, parcè che chel che nol à coragjo pe nestre int al è un che nol servìs la nestre int, ma al servìs un altri paron”.
E se o sarai elet in Provincie di Udin mi impegnarai par dâ al nestri popul e ae nestre lenghe la dignitât che a mertin, no cun chê di sierâsi, ma di cjalâ e dialogâ cui altris ae stesse altece.

Di chei altris ponts che o volarès realizâ, us scrivarai tai prossims dîs, cirint di esponi cussì il program pes Elezions provinciâls 2013 dulà che o soi candidât pal Maf tal colegjo eletorâl n.20 di S.Denêl (comuns di Forgjarie, Maian, Ruvigne e S.Denêl).