Moviment Autonomist Furlan: o soi candidât pe Provincie di Udin

O torni a cjapâ in man chest blog par dâus une notizie eletorâl.
Come che o podês lei sul sît de Regjon, o soi candidât conseîr pe Provincie di Udin te liste dal Moviment Autonomist Furlan par sostignî il President Fontanini.
Il colegjo eletorâl che mi è stât afidât al è il numar 20, chel di S.Denêl (ven a stâi i comuns di Forgjarie, Maian, Ruvigne e S.Denêl).
Il sisteme di elezion pes provinciâls al è UNINOMINÂL dongje dal simbul dal Moviment Autonomist Furlan al è za scrit il non dal candidât in liste: al baste segnâ une X sul simbul.
O ringrazii chês personis che in pocjis oris mi àn permetût di cjapâ sù lis firmis che a coventavin pe presentazion de liste.
Stait colegâts pai prossims inzornaments.

Novitât

Par tancj mês no ai plui scrit su chest blog... o pensi che o vedis ancje capît il parcè...
O torni a cjapâ in man il lapis dome par visâus che o soi tornât in vore come blogarin ca di ca: http://romanini-udine.blogautore.repubblica.it/

Ringraziament

Us ringraziìn di cûr par vênus stât dongje tal moment de pierdite dal nestri GIAN CARLO
Denise, Sonia e Christian Romanini

Mandi Papà

O vevin di clamâti par fâti i auguris, ma o vin scugnût vignî a cjoliti e dîti "Mandi, si tornarìn a viodi di une altre bande".
Salude nono Rino, none Fenisie e barbe Gjino.
Recuie.

30

Robert Gerard “Bobby” Sands – Roibeard Gearóid Ó Seachnasaigh

09.03.1954 – 05.05.1981

Par Bobby Sands la lodule e jere un dai simbui de libertât. Si pues sierâle intune scjaipule, torturâle e fâi dut il mâl pussibil, ma no cjantarà mai par cui che le à impresonade. Se si vûl sintîle a cjantâ, bisugne lassâle libare.
Bobby Sands al è muart 30 agns indaûr. Cun lui a àn pierdût la vite altris nûf volontaris republicans. E je une feride che e bruse ancjemò. Dut câs, la lodule e va dilunc a cjantâ e, se si le scolte ben, si visisi che e cjante propit la sô cjançon di libertât:

Tiocfaidh ár lá – La nestre dì e vignarà

Se o vês gust di lei inmò alc, fracait su http://www.bobbysandstrust.com/ e ancje chi.