Auditorium: usgnot aes 20.30 confront tra i candidâts sindics

Come che al è za stât anticipât sedi su gjornâi sedi su altris post (grazie a chei che a àn ricuardade la notizie) usgnot in auditorium al è il confront tra i 4 candidâts. Anìn a scoltâ.

Gnovis in curve: risultâts de domenie

Biele domenie pes nestris scuadris di balon: il Maian al à vinçût a Tavagnà 2 a 0 (gol di Caricchia e Floreani).
Ancje l’Udin, dopo 102 dîs di magre, al à tornât a vinci fasint 2 goi (Di Natale e Felipe) al Parme: alè Udin!

Karol Wojtyla: 18/05/1920 - 02/04/2005

Un an indaûr al murive il Pape Zuan Pauli II: al è stât il prin Pape che al à saludât il Friûl e i furlans te nestre marilenghe.
Chei cuarante mil che ai 3 di Mai dal 1992 a jerin a Udin, a àn sintût chestis peraulis: "Fradis Furlans: us saludi te vuestre marilenghe e us invidi a tignî dûr, cu lis tradizions, la fede cristiane e i valôrs dal fogolâr e a fâju cressi tal cûr dai vuestris fîs”.

Bruno Lauzi in Marilenghe

O soi a pene tornât dal Auditorium Zanon di Udin li che pe Fieste dal Friûl al è stât fat un biel conciert di musiciscj e cjantautôrs furlans.
Ospit de serade al è stât Bruno Lauzi che al à presentât il so prin CD par Furlan: Bruno Lauzi in Marilenghe.
E je stade une emozion scoltâ un grant de musiche taliane (e no dome) cjantâ il so repertori par furlan. Grazie a Bruno Lauzi e Alberto Zeppieri.
La serade e sarà trasmetude di Telefriuli te trasmission "Musicafè" in dôs puntadis: vinars ai 7 e ai 14 di Avrîl.
Cui che al à gust di vê il CD, al pues domandâlu ae Associazion Numar1 .

Di Maian a Milan: Maxpola

Stant che cualchidun si è lamentât, ve chi une segnalazion che mi à fat Maxpola. Nol è sparît, dome che al è un tic cjapât: ve chi.
Dut câs, chei che no son inmò stâts a dâ un cuc al so sît, us segnali il leam chi in bande: a mi mi fâs murî di ridi cheste sezion...

Su internet: enciclopedie par Furlan

Si impensaiso di Wikipedia? Sì, chê dal troll… E je ancje la version par furlan… no dal troll, ma de enciclopedie: furlane e libare…
Ve chi.