Dal Messaggero di îr - pagjine marilenghe

Ai 6 di Mai dal 1350, te plane di Sant Zorç da la Richinvelde, intune vuaite tindude cun viltât di bande di cualchi famee di nobii furlans, al murive il Patriarcje Bertrant. Al veve novante agns (al jere nassût tal 1260 in France) e la scusse fuarte di difensôr de fede e dal Friûl, che e veve vinçût il timp e tantis bataiis, no rivà a difindisi des invidiis e des tristeriis di une cierte nobiltât furlane, che salacor e veve plui a cûr i siei interès che no chei de nestre Tiere. Chescj nobii mâl a sopuartavin il rigôr di un Patriarcje forest, francês come Zuan XXII di Quercy, il Pape che lu veve nomenât, che al rivà a dâ al guvier di chest teritori stabilitât e disvilup.
Al jere il 1334, cuant che za in là cui agns, indi veve aromai 74, in pôcs dîs de sô nomine, al jentrà in Friûl par sentâsi a cjâf dal Patriarcjât di Aquilee. Ancje se part de nobiltât e la int di chenti i de il benvignût e i si mostrâ amie, di bot al dovè ancje scuintrâsi cul Leon di Vignesie, la Acuile imperiâl e dute chê araldiche bestialitât che e cirive di tignî cont dome dal ben des lôr sachetis che no dal ben dal Friûl. Al diseve ben pre Josef Marchet tal 1950 “Aes fìestis che son stadis o che vignaran fatis chest mês in memorie di Bertrant di Sant-Geniès, nissun plui di noaltris al podarès da un consens intîr e cjalt. Parcè che di ducj i parons che, par un viers o par chel altri, a governarin il Friûl, il Patriarcje caorsin al fo vadì l'unic che al mostrà di capî ben la situazion gjeografìche e etniche de nestre Regjon e che al cirî di adatâ dute la sô ativitât e la sô pulitiche aes esigjencis che nassevin di cheste situazion”. No dome: di fat Bertrant, om di grant rigôr spirituâl al scugnî meti ordin ancje te Glesie stesse. In pôcs agns le clamà adun plui voltis dant regulis fuartis pe condote dal clericât e si impegnà cetant pe incressite dai ordins monastics.
Cun man ferme (la stesse che dispès e tignive ben strente la spade, ancje sot Nadâl, come che al sucedè a Gurize tal 1340) al à tignût a fâ cressi cheste Tiere che lu veve adotât. Inmò une volte, come che dispès al capite ancje in dì di vuê, al à scugnût jessi un che nol jere furlan a fânus cirî di capî cetant valôr e ce grandece che al veve (e al à) il nestri Friûl.
Se al podès jevâsi sù di chê arcje li che al polse tal Domo di Udin, al viodarès un Friûl une vore difarent di chel che al à lassât, no son dubis: un teritori ancje plui piçul dal so Patriarcjât, une regjon risuride dal ultin Orcolat dal 1976, une gnove Universitât dal Friûl, che e istruìs la zoventût di chenti e no dome: lui, che al jere stât professôr di dirit, dal sigûr al varès gust di viodi cheste vivarositât academiche.
Ma salacor, une robe lu disturbarès plui di chês altris: un Friûl che masse dispès no si vise des sôs tradizions, des sôs ricjecis culturâls, dal valôr de sô storie e che si lasse cjapâ masse voltis di altris interès che no son chei dai Furlans e de nestre Tiere.
E se si inacuarzès che la sô abilitât diplomatiche no fos avonde par fâ capî chest principi (come che pal passât tantis voltis no à bastât…), nol varès un moment di esitazion tal tornâ a cjapâ sù inmò une volte chê spade!
Al è dovê di ducj i Furlans dimostrâ che la braure di chest nestri popul e la culture "di popui" che e je la carateristiche di fonde dal nestri patrimoni storic e tradizionâl a àn di jessi plui fuarts di ducj i puars individualisims, i stes (par un ciert pont di viste) che àn copât Bertrant di Saint Geniès.
A distance di 656 agns de sô muart, e sarès la maniere miôr par memoreâ chest nestri Grant Patriarcje!