31 marzo 2009

Fieste de Patrie dal Friûl

Cheste e je la setemane de Fieste dal Friûl che e cole ai 3 di Avrîl cuant che a colaran i 932 agns de costituzion dal Stât Patriarcjâl di Aquilee (1077).
Chest aniversari al ricuarde cuant che l’Imperadôr Indrì IV, tornant di Canossa, li che i jere stade gjavade la scomuniche di Pape Gregori VII, al ven salvât dal so amì Siart di Beilstein, Patriarcje di Aquilee, che lu jude a scjampâ de vuaite dai nobii che lu menaçavin. Par ringraziâlu de fedeltât e dal jutori prestât, ai 3 di Avrîl dal 1077 l’Imperadôr Indrì IV al firme la bole imperiâl che e conferìs al Patriarcje Siart il podê temporâl: pe prime volte la aree, che e cjape dentri i teritoris dal Friûl, Cjargne, Cjadovri, e ancje zonis che vuê a son in Austrie, Slovenie e Istrie, e je governade di une autoritât locâl e autonome che e à sede a Aquilee.
Chest an la fieste dai 3 di Avrîl e je inmaneade de Provincie di Udin, dal Comun di Buie e dal Istitût Ladin Furlan “pre Checo Placerean” cu la partecipazion de Provincie di Pordenon, de Regjon Autonome Friûl-Vignesie Julie, de Agjenzie Regjonâl pe Lenghe Furlane, des Diocesis di Gurize, Concuardie-Pordenon e Udin, de Universitât dal Friûl, dal Ufici Scolastic Regjonâl, de Parochie e de Pro Loco di Buie.
Ve chi il program complet.

1 commento:

Christian Romanini ha detto...

Us propon chest intervent ripublicât tal 2008 su La Patrie dal Friûl


IL FERÂL
di pre Antoni Beline

La zornade dai 3 di Avrîl e je une date simboliche e significative pal Friûl. Pre Antoni nol pierdeve anade par scrivi in merit di cheste date. Ancje in chest articul si cjate dute la energjie e la passion che lui al meteve tal scombati pe dignitât, pe identitât, pe autonomie dal Friûl e de sô int. Pre Antoni cence filet te lenghe al scjasse la aghe tal stomi soredut ai inteletuâi de glesie e de scuele, prins responsabii che no àn fat nuie par sveâ e dâ dignitât al nestri popul. Mi pâr che nol è gambiât propit tanton!

3 DI AVRÎL: FIESTE NAZIONÂL
I talians a àn fat fieste fin chê altre dì pe uniche vitorie che a àn vude te lôr storie e nissun nol podeve dî un et: ni che si fasevin ridi fasint fieste par une vuere che ur jere costade tancj muarts e tancj disordins e nancje che a jerin «nostalgjics tirant fûr une robe viere. Se o fevelìn de fondazion di Rome, po, che si sa ducj che e je une storie no plui sigure di chê di “Capuceto Rosso” e a vevin metude ancje une zornade par no lavorâ in chê dì, ai 21 di Avrîl, nus somee di vê ben plui dirits nô furlans di fâ une sagre a furlan vie, vadì sot vôs, cence sunsûr, rumiant e osteant e ancje bevint un bon taiut, par ricuardâ une date che no si cjatile scrite sun nissun libri di scuele dai nestris fruts e che no le san dibot nissun mestri o professôr: ni chei di çampe, ni chei di mieç, ni chei di gjestre, ni chei fûr di trop, ni chei fûr di scuare: 3 di avrîl dal 1077.

II FRIÛL STÂT SPOTIC
In chê dì, in chel mês e in chel an al sucedè un gran fat, che al veve tacât prime, parcè che lis datis dai grancj aveniments si à di cjapâlis cuntun cimi di sintiment: a son dome l'ultin scjalin di un calvari o di un troi tacât cetant prime. Po ben, ai 3 di Avrîl l'imperadôr, sant om, Rico IV, al volè pandi il so agrât viers il patriarcje Sigjeart che i jere restât fedêl dome lui te lote acanide jenfri l'imperi e il pape pe cuistions des inviestiduris, vadì cui che al jere paron. Ciert che Rico IV i premeve, oltri che ringraciâ, ancje tignîsi vierte la puarte. Par chel i storics di cumò a disin che al fo un at «pulitic» e di interès. Sigûr. Nissun nol mene la code dibant. Però lui almancul al à paiât i siei interès, a la cuâl che la Russie, par esempli e paie la fedeltât dai siei gastalts cui cjars armâts o la Glesie catoliche butant jù il Patriarcjât di Aquilee. Par chel si pues dîsij un requie al imperadôr e al Patriarcje e ai Furlans che a sielzerin il troi de reson e no chel dal plui fuart. Pal pape e par Matilde nol covente preâ parcè che ju àn fats sants i lôr seguaçs.
In chê dì duncje il Friûl al deventà il Ducât de Patrie dal Friûl, cun ducj i dirits di un stât spotic. Al jere simpri un feut dal imperi, come che a jerin i reams de Gjermanie, ma in pratiche al jere paron cjase sô. E cheste paronance e durà, come che si sa, fint al 1420, cun tant di parlament, di codiç di leçs e di libertâts che e jere une robonone par chei timps, che no jerin nassûts ni i partîts dai proletaris par difindi il puar, ni il partît liberâl par difindi i siôrs, ni i sindacâts par dâ reson a di chei che a berlin di plui ancje cuant che a àn tuart. No si fevelave di classis, in chê volte, ma di popui. Peraule salacor plui a la buine, ma tant plui biele e plui juste. Parcè che il Friûl al jere (e al è) un popul, une int, une gjernazie, une nazion, cjapade dentri mo di chel mo di chel altri, ma simpri une nazion. Par chel si à di fâ fieste e di fermâsi a cjalâ ce grancj che o jerin, cun dutis lis pecjis di ogni timp e di ogni ete e di ogni guvier.

LA SOTANANCE Dl VUÊ
Cert che, fasint un parangon tra la indipendence di in chê volte e la sotanace di cumò al è di domandâsi cemût mai che si sin ridusûts propit cussì in bas. Causis and è tantis e spiegâ dut al è un afâr seri. Strucant, si podarès dî che la robe e à tacât a lâ mâl cuant che si son intivâts a trai insieme chei di fûr e chei di dentri. l forescj a jerin i patriarcjis guelfs, che a menarin dongje une fulugne di bassarûi e di talianots che a raspavin il lidric furlan prime ancjemò che al tacàs a butâ fûr. Po dopo la nobiltât locâl, ingolade dai bêçs dai venezians par che a vendessin il lôr popul. E po, di dentri, ancje la int: cun chê rassegnazion, cun chê flaperie e ancje cul pierdisi a cuistionâ par fufignis e par tendinis cuant che la cjase e cjapave fûc.
Vuê o sin compagn. O vin nemîs di fûr, scomençant da la ltalie che al è il nemì plui dongje e periculôs. In cent e passe agns no si è nancje domandade se e jere a cjase nestre e se e veve di fâ une politiche che o fossin stâts dacuardi ancje nô. Vevie chê di fâ lis sôs buladis jù pe Libie o pe Abissinie o chês plui dongje? A decidevin a Rome e i furlans a partivin cjantant. Volevie doprâ i nestri cjamps pe sô difese? Bastave bati un telegram e fâ rivâ une carete di carabinîrs cu la baionete in cane. Volevie lâ a provâ la glace de Russie e fâ murî la sô e nestre int venti là? Bastave une cartuline. Vevie di paiâ i siei debits e lis sôs salocadis? Bastave meti sù tassis e pignorâ la nestre robe.
A àn capît che o sin un popul che al ubidìs. In plui a àn capît che o sin un popul stupit, che si pues messedâlu tant che il pan te vintule. E di fat nissun nol è plui bulo di nô e no si ten in bon di vê riscjade la vite pes pantianis espansionistichis di chest baracon là che al regne chel che al berle di plui. La ltalie e sa di podê contâ sul sotanisim de nestre int.

I VÊRS RESPONSABII
Ma la vere colpe no je la int, che chê, magari cussì no, e va daûr. l vêrs responsabii a son i furlans che a àn vude la disgracie di studiâ cui sudôrs de lôr int: o feveli dai predis, dai mestris, dai miedis, dai scrivants, dai politicants e vie. Tune peraule, di ducj chei che, vint studiât, a varessin vude la pussibilitât di judâ la lôr int a dismovisi, a dî di no, a ribelâsi. Inaltrò, a cjâf dai moviments di liberazion cuintri de opression dai prepotents, si cjate impreteribil la glesie e la scuele: dutis dôs glesiis e dutis dôs scuelis. Po ben, in Friûl la glesie no à mai riscjât une barufe a fonts uso Sigjeart, che al à mandât su la ostie il pape parcè che al jere cuintri dal ben de sô int. Chi di nô par no lâ in rotis e à simpri zuiât l'ultin rimpin: la sflocje de comunion e de romanitât che, cuinçade cu la talianitât, al devente un messedot che ti incjoche sù e ti stupidìs che tu vâs ancje a murî, dopo, par une bufule. Compagn la scuele. Cumò i mestris si lamentin che no àn puest, che i bassarûi ju invadin. Magari piês! A àn ruvinade dute la nestre int fasintju fevelâ lôr, te lenghe dai invasôrs. E ancjemò ur àn fat capî ai gjenitôrs plui sempios che i fruts a restavin sierâts fevelant dome par furlan o ancje par furlan. E cussì ur àn gjavade la lenghe, ur àn tirade vie la cussience dal lôr jessi popul, ur àn svinidride la anime. Lazarons!

CE FÂ?
Batintsi cuintri di cheste int e cuintri des trainis dai politicants e cuintri dai patriots bausârs e purcjinei che a vuelin fânus jessi plui talians di ce che o sin par vendinus par dibant. E visaitsi che la storie si ripet. A'nd è coladis barachis plui grandis di chês da la ltalie.
Po ben, daûr di nô o vin bielzà il spieli de nestre autonomie nazionâl. Baste jessi prin di dut e sore dut e a ducj i coscj FURLANS!!!

Editoriâl da La Patrie dal Friûl di Març dal 1979, n. 3