26 gennaio 2009

Spietant la Zornade de Memorie

Doman e je la zornade de memorie, l'aniversari de liberazion dal cjamp di stermini di Auschwitz. Ma no vin di dismenteâ che nol covente lâ in Polonie o in Gjermanie par viodi testemoneancis di ce che il nazisim e il fassisim a àn fat. Vêso mai stât a Triest li de Risiere di San Sabba? Se la rispueste e je no, us consei di fâ une visite: jo o ai stât un Istât e cuant che o pensi a ce che o ai viodût mi vegnin inmò i sgrisui. E se o pensi che dut chest al è a une ore di strade di cjase mê, mi vegnin i sgrisui inmò di plui.
L'articul 1 de leç 211 dal 2000 al dîs "La Republiche taliane e ricognòs la zornade dai 27 di Zenâr, date che a son stâts butâts jù i cancei di Auschwitz, "Zornade de Memorie", cun chê di ricuardâ la Shoah (stermini dal popul ebraic lis leç raziâls, la persecuzion taliane dai citadins ebreus, i talians che a àn patide la deportazion, la prisonie, la muart, e ancje chei che, ancje in cjamps e posizions diferents, si son oponûts al progjet di stermini, e metint in pericul la lôr vite a àn salvât altris vitis e protezût i perseguitâts".
A scuele o vevi let "Se questo è un uomo" di Primo Levi, une testemoneance tragjiche di ce che al è stât. Come che tragjiche e emotivementri pardabon fuarte e je stade le cognossince direte di Boris Pahor (te foto cun me), un scritôr sloven di Triest che al à vivude su la sô piel la deportazion e che mi àn lassât dentri un alc di indescrivibil.
Dome a distance di passe 50 agns Pahor al à vût il just ricognossiment ancje dal public in Italie cun Necropoli. Cumò al è in librarie cuntun altri libri che si intitule "Qui è proibito parlare" une altre testemoneance che e fevele dal sintiment antisloven che al à caraterizât il Fassisim a Triest. Ma o scuen dî che inmò vuê chest sintiment a Triest al è inmò. E plui o voi di chês bandis e plui mi rint cont che e je vere.

1 commento:

kristiantom ha detto...

magari solo a Trieste ...purtroppo ancora oggi c'è ancora qualcuno che la pensa così a Ts, Go, Ud e altrove...
In qualsiasi caso complimens par l'incontri che as tu avut col "zovin" Pahor (un mito per la sua età) eeeeeeeeeee
parcè no, ancia tanc augurs in anticip par doman ;-)

Mandi
Kristian