Furlan e Universitât

Vuê e je stade la cerimonie di consegne dai atestâts pai cors di furlan inmaneâts de Universitât di Udin midiant dal Cirf (Centri Interdipartimentâl di Ricercje su la culture e la lenghe dal Friûl) cu la colaborazion de Societât Filologjiche Furlane.
Il Magnific Retôr Furio Honsell (te foto mi consegne l'atestât dal Cors di Traduzion) al à fat un discors une vore biel e plen di significât.
Intant al à fevelât par furlan puartant i salûts te nestre lenghe (lui al è de Ligurie) e po al à dite une altre biele robe: "Cuant che o sint i fruts che a fevelin par furlan mi si vierç il cûr parcè che vê la pussibilitât di cressi intune regjon plurilengâl al permet di consolidâ un sisteme di aprendiment che al facilite la formazion e la istruzion. Chest al è un patrimoni che no podìn permetisi di pierdi!" O fâs presint che al à simpri doprade la prime persone: "la nestre realtât", "no podìn pierdi il nestri patrimoni culturâl", "la nestre Universitât dal Friûl".
Cumò mi domandi:
Ce si puedial zontâ se ancje di di fûr si rindin cont de impuartance di fevelâ plui lenghis e nus disin di no molâ?
Ancje la mê mestre des elementârs ur diseve ai gjenitôr "I fruts a àn di fevelâ furlan e a scuele a àn la pussibilitât di imparâ une altre lenghe: il talian e lis mestris a son achì ancje par chel, ma no vin di dismenteâ il furlan!" No stin a cjalâ i esemplis negatîfs come che al à fat cualchidun ancje tai post precedents: se cualchidun nol à vude la pussibilitât di une istruzion, no podìn dâ la colpe al furlan. La colpe e je di cui che no i à dât la pussibilitât di imparâ a fevelâ un bon talian: tropis voltis no si sintial a fevelâ chei talianots che ur disin ai fruts "Sta tento a non sbrissiare!" Chest al fâs dan, no il furlan!