Vuê o ai voie di fevelâ di une cuestion une vore delicade che e cjape dentri aspiets emotîfs e di ricuart.A Maian in vie Rome, di front de farmacie, agns indaûr al è stât realizât un monument par ricuardâ lis diviersis vitimis che li a son stadis par cause dal taramot dai 6 di Mai dal 1976.
Di fat, ta chê aree al jere un dai doi condominis che a son colâts ta chê sere. Par volê de fameis la zone e je stade dedicade ae lôr memorie cu la costruzion di un monument che al presente diviers simbui: la aghe che e rapresente la vite, i mûr che a simbolizin l'edifici ceh al jere prime, une frase di Pasolini e vie indevant.
Cul timp chest monument al à tacât a vê cualchi problemut e dopo che il comun al à za proviodût ae sistemazion dal implant idraulic, cumò e sarès la ocasion par dâi une sistemade complessive.
O vin fat une comission e nus àn dit cuâl che al sarès l'intervent, che mi cjate dacuardi su cuasi dut.
I lavôrs (in dut 30.000 euros) a previodaressin la sistemazion dal implant di iluminazion (cuasi 15.000 euros), la sistemazion dal vert e la rifrescjade dai mûrs perimetrâi.
Come che o ai za dit, mi semee just meti a puest chel simbul che al à chê di ricuardâ i tancj muarts che a son stâts a Maian ai 6 di Mai dal 1976 (in dut 131, il secont numar di vitimis dopo Glemone). Cun di plui o pensi che al sedi impuartant fâ capî e insegnâ ai fruts des scuelis ce che al è sucedût e parcè che al è stât fat chest monument.
Mi è vignude cualchi perplessitât cuant che o ai sintût che si volarès meti une lapide in piere di Torean (alte 60 cm, lungje 520 cm e di spessôr 3 cm) cui nons dai 131 muarts incidûts (cu lis letaris dai nons altis 3 cm). Il cost di cheste lapide al varès di jessi di 5000 euros (1/6 dal totâl de spese: intun prin moment a vevin pensât di fâle di bronç, ma e sarès vignude a costâ inmò di plui) e e varès di jessi metude li che al è il salt di aghe. Tal cimitieri di Maian, intune capele, e je une lapide similâr cun za ducj i 131 nons des vitimis.
O ripet: o soi convint ancje jo che chest spazi al vedi di jessi mantignût in ordin, ma secont me forsit si podarès valorizâ la memorie in maniere plui eficace cun altris iniziativis e no tornant a scrivi in nons suntun piere, che tra l'altri e je za presinte tal cimitieri. Pluitost o condividarès di plui un panel (magari cuntune planimetrie e lis didascaliis) che al fasi capî lis motivazions e la simbologjie doprade pe realizazion dal monument stes.
Cumò o volarès sintî di bande dai letôrs se a condividin cheste sielte, parcè che se ancje mi soi declarât perplès su cheste sielte, se mi ven motivade e mi jude a capî, o pues simpri sclarîmi lis ideis e magari valutâ in maniere divierse cheste part di intervent.
(te foto: i funerâi fats tal cimitieri di Maian juste cualchi zornade dopo de scosse sismiche)
Post
5 commenti:
In 24 oris mi spietavi cualchi coment su chest argoment, ma si viôt che la cuestion no provoche discussion.
O soi un tic sorprindût, ma si viôt che al è just cussì.
Chest mi da di pensâ...
Mah, quantomeno dal punt di viste estetic, no crot che le piere di Torean si sposaress ben cui murs blancs dal monument. Cal e' di une bielece minimaliste, mi par di ricuarda'.
Ovviamentri, d'acordo cun tun panel cal spieghi el monument.
mandi
Al e un argoment un tic delicadut.
Ancje parce discuti de estetiche dal monument al podaress semea mancja di rispiet a ce che al rapresente.
Personalmentri al di la di un gust estetic che forsite no capiss, o cjati che sia un panel che al spieghe che une lapide cui noms al zovares a da un tic di "scaralitat" al luc (no impuarte se je ancje tal simiteri).
Daspes difat, forsit no savint, o no capint, tu viodis cui che lu sgambie par un luc ricreatif, rimpinades in bici e vie indenant.
Grazie a Forestpark e Thermo pal contribût.
Ancje jo no puartarès la discussion sul cjamp dal aspiet estetic.
Propit parcè che o pensi che al sedi necessari fâ capî a chei che a passin ce che al significhe chest monument, o soi plui favorevul a meti une panel che al descrivi cuntune biele spiegazion la simbologjie dai elements presints tal monument stes. O ai pôre che meti une lastre sot dal salt di aghe, cui nons incidûts, nol sarès tant eficaç.
Cun di plui si podarès ancje pensâ une maniere par limitâ la jentrade des bicicletis che ancje a mi mi dan fastindi di viodi a cori jù pe rive di piere li che cor la aghe o jù pal pradessut in bande.
I volevi di' che, par ce che mi riguarde, une aggiunte di une opere internamentri al sito dal momument ne ruvinaress le simmetrie e le cromatiche, che e son pars i crot fondamentai dal progjet di chel che cu an disegnat.
Un panell esterno cal sclarissi el significat de localizzazion dal monument, puitost che le so simbologie, mi semearess plui che avonde. Lassin che ognun al rifletti un poc privatamentri sul significat dal monument, puitost che dai une spiegazion precuete de simbolgje.
E no crot che une bariere pes bicicletes e saress di grande utilitat sei i ciclist, o i lor gjenitors, no capissin le importance dal rispiett pai monumens.
Nol sara' mico un atri sintomo dal disagjo giovanil a Majan e dulintor?
Buine
Posta un commento