26 aprile 2007

Su lis olmis di pre Toni

Un mâr di int cul grop in cuel e à saludât pre Toni, tal so ultin viaç tal grim de tiere e dal Signôr.
E cumò no nus reste che tirâ drets sul troi che nus à segnât, cirint di no pierdi la lûs dal so ferâl.
Par ricuardâlu, nuie di miôr che lei lis sôs peraulis e par chest o met achì la sô ultime "olme" publicade su la Vita Cattolica e sul sît di Glesie Furlane te ultime sabide de sô esistence terene.

La rivelazion des Scrituris

O vevi juste celebrade la pasche cu lis mês comunitâts, cuant che, a colp, mi à brincât il mâl e o soi tornât a plombâ tal scûr orent dal vinars sant, cu la vite ti sta bandonant e la sensazion di jessi rivât insomp (o dapît) de tô corse. Cjantantmi ingredeât tes cjadenis dal mâl fisic e psicologjic, dute la mê vision sflandorose, positive, pascâl de esistence, cu la sigurece che dut al finis in glorie e che no esist situazion o condizion che no vegni riscatade e nobilitade de vitorie di Crist, si è sfantade come un bugjel di biciclete cuant che s’intive tun claut. Anche parcè che, cjalant e sintint i miei compagns di sventure, ognun cu la sô crôs e cui siei dubits, ancje jo mi confusionavi e o scomençavi a clopuçâ.
Sore dut un, tant provât de vite e deludût di dut, mi à impressionât e dibot metût in crisi. Fevelant dal dolôr ch’al è tun ospedâl e in proporzion ben plui grande e tragjiche tal mont, al sostignive che nol po esisti un Creadôr ch’al à fatis lis robis cussì malamentri e un Signôr che nol rive a paronâ il mâl, a judâ lis sôs creaturis, a salvâlis di tantis soferencis e de robe plui assurde, la muart. Muart e Diu a son incompatibii, parcè che Diu al è vite e autôr di vite, cu la cuâl che la muart, ogni muart e dut ce ch’al puarte a la muart, a son la negazion de vite. Jessint om di culture, mi à tirât fûr ce che Fedor Dostoevskij (1821-1881) al à scrit a proposit des soferencis di un frut, vignût tal mont cence domandâ e che al patis cence vê fat o mertât nuie. Seont il gran scritôr rus, un frut malât al vanifiche dute la dogmatiche. E a mi, romantic ancje tal ospedâl, mi è vignût tal cjâf Oscar Wilde (1854-1900) là ch’al dîs che lis lagrimis di un frut tun curtîl scûr di Londre i gjavin al soreli dut il so sflandôr. Jentrant in confidence, mi à contât di un zovin di Tresesin, muart cualchi an indaûr, ch’al à tribulât tant, ma tant prime di murî scanât di dolôr e cunsumât dal mâl, che ducj si domandavin invelegnâts cemût che un Signôr, s’al jere, al faseve o al lassave tribulâ in chê maniere selerade une puare anime nocente. “Se ancje, come ch’al dîs lui, i dan il paradîs, rivarano cincuante paradîs a rifondilu dal mâl ch’al à frontât in chest mont?”.
O sai che a son lis solitis, classichis obiezions su la contraditorietât fra Diu e il mâl, che un cualunche scuelâr di teologjie, e tant miôr un teolic, tes distrighe. Però une robe e je fevelâ di Diu e di mâl di front a un tai di vin o tun incuintri culturâl e une robe e je fâti chestis domandis biel che il mâl ti sfruçone dì par dì. Resonant, e resonant ben, il mâl e la muart a son la sconfite di Diu e il plui gran acusadôr cuintri di lui e de sô esistence e provedence. Nol è di maraveâsi se, denant dal mâl personâl e dal mont, plui di un si cjate a scûr e al rinunce a cirî ce che, seont lui, nol esist.
No volevi fâ un contraditori cuntun che al sfladassave come me. Un bon rapuart uman al vâl plui di une discussion teologjiche astrate. Mi è vignût però tal cjâf il câs dai doi dissepui di Emaus e des peraulis che ur dîs il compagn mistereôs e providenziâl: “Il Crist no vevial forsit di patî dut chest e dome cussì jentrâ te sô glorie? E scomençant di Mosè e di ducj i profetis, ur spiegà ce che dutis lis Scrituris a disevin di lui” (Lc 24, 26-27). Se la soference e je viodude e vivude seont la rude razionalitât e je un scandul e une assurditât. Se invezit si va plui indenant e si le cjale seont la rivelazion des Scrituris, alore e devente la strade privilegjade e sigure par jentrâ in glorie.

pre Toni Beline, ai 21 di Avrîl dal 2007

4 commenti:

Renzo Tondo ha detto...

Però io i varès cualchi riserve su la so maniere di interpreta il ruolo di plevan, pur non iessint io di glesie. I preferis abondantementi ricuarda Toni come un dai inteletuai plui libars e stimolanz dal Friul..... che come preedi!

Christian Romanini ha detto...

Mandi Renzo,
no capìs la risierve che tu âs.
Jo o pues dome dî che lu ai sintût pocjis voltis a dî messe, ma che o ai sintût ce che i siei parochians di Treli, Val e Rualp... i siei parochians di Visepente e Vilevuarbe... e chei che a levin a scoltâ lis sôs messis e lis sôs predicjis: glesie simpri plene di int!
Al veve une vision alte de Glesie: lu al amave la sô mission e al veve un rapuart tribulât cu la gjerarcjie propit parcè che la gjerarcjie si jere e si je slontanade dai principis des scrituris che lui al veve studiât e al cognossove benon.
Ciert nol jere il "Don Abbondio" di Manzoni, ma al jere no dome un inteletuâl, ma ancje un grant om di Glesie.

Christian Romanini ha detto...

Dome un grant predi al podeve fevelâ cussì in glesie: scoltait la predicje

don Federico Grosso ha detto...

O crôt ch'o piardaressin une dimension fondamentâl di pre Antoni s'o dismenteassin ch'al jere un grant predi e ch'al veve braure di jessilu. No stin a fâ il stes erôr ch'e vevin fat cun don Milani, chel di crodi ch'al fos dome un agjtatôr sociâl o un inteletuâl anticonformist. Tant Milani che Beline e son stâts grancj predis e dut ce che an fat lu an fat parce ch'e jerin prin di dut predis!