29 giugno 2009

Michael Jackson

Par fevelâ si varès di cognossi.
Dal sigûr l'artist nol à bisugne di presentazions e, ancje se jo no soi mai stât un so fan, tantis sôs cjançons tornadis a scoltâ ta chescj dîs, no mi sunavin gnovis.
Ma forsit, di un artist tant cognossût si sa pardabon pôc, come om.
Tra dut ce che al è stât dit, mi à fat tante impression il drame di un frut che nol à vivût di frut, cressût simpri sot des lûs dal spetacul. E chel zovin che al à sfondât, cuant che tancj de sô etât massime vuê a àn cif&çaf a rivâ a la fin dal mês?... Viodût di di fûr al veve dut, ma dentri? Mi à fat tant dûl provâ dome a imagjinâ il torment interiôr di un om che nol à mai vivude une vite sô, condizionât de famee (e di ce che o ai capît, massime dal pari), ma un eterni spetacul. Un om che al veve cirût di deventâ ce che nol jere, dineant lis sôs lidrîs trasformant il so aspiet par scjampâ. No ai voie nancje di comentâ i fats di cronache judiziarie. E a la fin, il tragjic balet dai numars al à fat capî che ancje la sigurece economiche no jere plui tant "sigure"...
Cumò il torment al è finît, forsit. Ma, come che o disevi, par fevelâ si varès di cognossi.
Cussì o preferìs tasê e impiâ la radio... une robe però mi sint di dî cun sigurece: se un artist al à di provocâ emozion, scoltant cheste o soi convint che lui lu è stât, e ancje grant.
Recuie.


Michael Jackson - Heal The World

1 commento:

ninine ha detto...

Ancje jo no lu cognòs cussì ben par podê fevelâ, ma o ai voie di ricuardâlu par chel grant artist che al è stât, e chest nissun al po gjavaial. Dut ce che al è daûr de sô vite nol è ni plui ni mancul di ce che si po viodi daûr la vite di tancj altris artiscj. Forsit propite chei plui grancj invezit a àn vût storiis brutis e dificilis a lis spalis, e al è forsit chest che ju à fats deventâ cussì grancj.
Se o pensi a dut ce che al à passat inte sô infanzie e te sô vite, almancul ce che si cognòs, o provi une grande pene, lassaitlu in pâs almancul cumò.
Mandi Jacko.