Vuê o ai voie di ringraziâ Carli Pup che mi à fat cognossi miôr Bobby Sands.Di fat us segnali e us consei ancje a voaltris cheste publicazion curade di Carli "Il diari di Bobby Sands", edizions Kappavu.
Par jessi precîs no si trade dome de traduzion furlane dal militant republican irlandês, ma ancje un biel struc di storie su la Irlande.
Une pagjine interessante di storie resinte inmò pôc cognossude, pardabon emozionante.
Cun di plui, lis pagjinis dal diari a comunichin dute la dramaticitât, ma ancje la dignitât e la braure di un om muart pai siei ideâi e pe libertât dal so popul.
Une vore biele la conte che e siere il libri e che e fevele di une lodule, tant che simbul di libertât.
Post
3 commenti:
ve chi une cerce de conte che us disevi...
La lodule e il combatent pe libertât
di Bobby Sands
Une volte gno von mi disè che impresonâ une lodule al è un dai piês ats criminâi che si pues fâ parcè che la lodule e je un dai simbui di libertât e di felicitât plui grancj che a son. Dispès al fevelave dal spirt de lodule, riferintsi ae storie di un om che al veve impresonât intune piçule scjaipule un dai amîs che al amave tant.
La lodule, che e pative par vê pierdût la libertât, no cjantave plui di cûr e no veve nancje plui nuie ce jessi contente. L’om che al veve fat cheste atrocitât, cemût che al contave gno von, al pratindeve che la lodule e fasès dut ce che lui al voleve, ven a dî cjantâ di cûr, ubidî ai siei desideris e mudâ la sô nature par contentâ il morbin e il vantaç dal om.
La lodule si refudà e l’om al deventà trist e violent. Al tacà a sfuarçâ la lodule par che e cjantàs, ma par fuarce di robis no ‘nt ve risultât. Alore al cjapà misuris ancjemò plui duris. Al taponà la scjaipule cuntune tele nere gjavant al uciel la lûs dal soreli. I fasè patî la fam e al lassà che si infraidissi inte scjaipule cragnose, ma l’uciel al refudà ancjemò di molâ. Alore l’om le sassinà.
Cemût che al diseve, a reson, gno von, la lodule e veve un spirt, il spirt de libertât e de resistence. E bramave di jessi libare e e murì impen di adatâsi al tiran che al cirive di stramudâle cu la torture e cu la preson. Jo o sint di vê alc in comun cun chest uciel e cu la torture, la preson e il sassinament che al à patît. La lodule e veve un spirt che nol è facil di cjatâlu, ancje tes cussì clamadis creaturis superiôrs, i oms.
(…)
Il rest lu cjatais tal libri! buine leture!
Posta un commento