Scritôrs o letôrs?

Vuê o ai voie di fevelâ di un gno passetimp. Se no si à capît, mi plâs scrivi e mi plâs soredut lei, ancje se in efiets il timp nol è plui tant come che al podeve jessi cualchi an indaûr. Però rispiet a chê volte, o ai scuviert un mont: i libris in lenghe furlane. O miôr: ju cognossevi ancje prime, ma forsit, cuant che no savevi ni lei ni scrivi par furlan, mi limitavi a cognossiju di lontan e se o cjatavi alc di curt lu frontavi. Se invezit o cjatavi un libri o une conte lungje mi fermavi cence rivâ insom, ma no par colpe dal autôr, ma parcè che o jeri analfabet te mê lenghe, parcè che la scuele di un stât, che al à pôre de ricjece dade de diviersitât linguistiche, e à simpri preferît no spacâsi masse par insegnâ la lenghe locâl al popul, che invezit al varès vût di jessi unît "intune arme, intune lenghe, intun altâr..." (almancul cussì mi somee che al disès Manzoni). Cumò a son lis leçs di tutele, ma la situazion no je masse gambiade parcè che la plui part de int e je analfabete te lenghe furlane e duncje si spavente, e bute in bande, e cjale cuntun tic di sogjezion i libris in lenghe furlane, la sô lenghe... O al limit si ferme a lei alc di curt: cualchi poesie, cualchi conte curte, cualchi... blog. Dut chest mi è vignût iniments fevelant cuntun amì a proposit de crisi dai premis leteraris: chest an il Sant Simon nol è stât assegnât e ancje sul gjornâl si al let cualchi considerazion in mert (cjalait il prin coment).
Un popul che nol lei, al è dificil che al tachi a scrivi. E je vere che magari autôrs di gale a son za rârs di se: tal articul si ricuarde Pasolini pe poesie, ma si dismentee pre Antoni Beline pe prose. Jo stes no ai rivât inmò a lei ducj i libris che al à scrit pre Toni. Trops di chei che a lei chest blog lu àno za fat? La rispueste a cheste ultime domande e je la rispueste secont me al parcè che i primis leteraris a son in crisi. Fintremai che no si varà un public di letôrs, al sarà dificil vê une cressite. E di chest no si pues fâ une colpe a la int. Ma no si pues sierâ i voi devant de responsabilitât di cui che al à la pussibilitât di produsi. Mi plasarès che ancje i autôrs a frontassin il marcjât dal libri in lenghe furlane e lu fasessin no contentantsi di produsi art, ma spindintsi par promovi la lôr produzion. Nol baste scrivi un biel libri se dopo nissun lu lei. E par tirâ dongje il letôr tocje ingolosîlu, magari prin cun alc di acessibil ancje in tiermins di lungjece e dopo lant a proponi tescj cun snait e cun elements che a podedin plasê ai zovins: tal cine par furlan si à viodût, ma te leterature mi ven tal cjâf Donald dal Tiliment, Niari, il stes pre Toni al scriveve "...et incarnatus est", test teologjic une vore profont e dificil, ma al veve tacât tradusint e proponint al so popul lis flabis di Fedro (il prin lavôr par furlan) o Pinochio o tescj man a man simpri plui articolâts. Dome puartant par man la int pas dopo pas, si podarà vê un public che al cres e al domande simpri plui libri e cun nivel simpri plui grant. Se invezit si bandone la int, no stin a lamentâsi se dopo i premis leteraris no vignaran plui assegnâts.