10 dicembre 2008

La impuartence di une date

Il President de Provincie di Udin le à butade a la fieste pai 20 agns dal Istitût ladin furlan: Fâ une fieste de braure furlane.
Ancje jo o soi convint che par un popul al sedi impuartant vê une date di celebrâ, par ricuardâ e par fâ cressi la cussience (cence però fermâsi dome a une date sul lunari!).
Par dî la veretât une fieste cussì e je za chê dai 3 di Avrîl e mi à fat plasê lei tal comunicât de Provincie che no si tocjarà il valôr e la impuartance di chê date li. Duncje, volint jessi propositîf no mi displâs che si feveli ancje di altris datis e stant che il President Fontanini nol à inmò decidût mi permet di sugjerî la date dai 27 di Fevrâr dal 1511, che za di cualchi an a Radio Onde Furlane a àn batiade Zornade furlane dai dirits e che e cole par ricuardâ il grant riviel contadin de joibe grasse dai 1511 cuant che il popul, vint cjapade cussience de sô fuarce, al à brusât i cjistiei dai siorons di in chê volte che lu oprimevin.
Par lei il comunicât de Provincie di Udin, lait sul prin coment. E voaltris ce proponêso?

8 commenti:

Christian Romanini ha detto...

Fontanini al propon la “fieste de braure furlane”

La gnove è je vignude fûr un ocasion de fieste pai vincj agns dal Istitût ladin-furlan Pre Checo Placerean. Prometût ancje un finanziament par inmaneâ un puartâl web, che al fasi cognossi la storie e lis oparis dal predi furlanist



E je tante int ator pal mont che e fâs de braure une bandiere, un element di identitât: parcè i furlans no puedino fâ ancjetant? Sal à domandât il president de Provincie di Udin, onorevul Pieri Fontanini che, in ocasion de fieste pai 20 agns dal Istitût ladin-furlan Pre Checo Placerean, che si è tignude a Cjase Turoldo a Coder di Sedean, al à proponût la “Fieste de braure furlane”.

Intindude tant che ocasion di riflession par un popul che, disvinidrît il sotanesim, al cjale a la Europe des Regjons cun gnûf slanç e cu la cussience des propriis capacitâts. “Pal moment e je dome une propueste, ma se o cjatarai adesions e condivision la iniziative e sarà inviade”. Dut chest cence tirâ vie nuie a la Fieste storiche dai 3 di Avrîl.

“Tal gno impegn – a son simpri peraulis di Fontanini – o cîr in ducj i mûts di puartâ indenant cheste gnove filusumie, ven a stâi la gole di jessi furlan e di meti in vore i dirits che altris popui cun feveladis regjonâls - come i catalans – a doprin”.

“Par dutis chestis identitâts, che al è sbaliât clamâlis minorancis stant che a son invezit comunitâts cun feveladis mancul pandudis, si sta dant di fâ Aureli Argemi, cu ‘la Cjarte dai dirits dai popui’ in vie di realizazion”.

Tal cors de serade dal ventenâl, il president Fontanini al à ancje anunciât che la Provincie e darà il so contribût al Istitût ladin-furlan par inmaneâ un puartâl web dedicât a Pre Checo Placerean, par fâ cognossi la storie e lis oparis di chest predi che al à fat tant par inviulâ la identitât dal popul furlan. “lis sôs predicjis ancje in dì di vuê – al à dit insom il president de Provincie – a mantegnin une cjarie di atualitât e a fasin bulî sù emozions in chei che lis scoltin”.

ILfurlanist ha detto...

Se propit a covente une gnove date, jo o propon che e sedi in estât, cussì si pues fâ une biele fieste. Vonde fevrârs e avrii varis.

Se no 'nd cjatais une, jo o soi nassût il 15 di jugn ;-)

ninine ha detto...

Grant Fontanin! =)
e il 12 di Lui che a son Ss Ermacure e Fortunât?

thermonuke ha detto...

el cuatri di novembre?

Christian Romanini ha detto...

Mandi Thermo
mi displâs par te ma ai 4 di Novembar i àn za pensât i talians. Ancje se no mi somee che al sedi tant ce fâ fieste ta chê date.

thermonuke ha detto...

Sot dai austriacs difat cumo tu eris plui content...

cui sonin i talians Metternich di farle :-)

Christian Romanini ha detto...

Thermo, mi displâs ma no coli te nasse de polemiche: no sai se o sarès plui o mancul content sot dai Austriacs. Però di une robe o soi convint: di "Grande" tai events belics dal 15-18 e je dome la tragjedie di centenârs di miârs di zovins mandâts a murî tes trinceis plenis di pedoi e malatiis dal front. E massime tes nestris monts al capitave che int che fint a cualchi mês prime e condivideve la vite cuotidiane cui austroungarics e je stade costrete a sparâsi. Cun di plui no stin a dismenteâ che al è capitât ancje che cui che al cirive di salvâsi o nol voleve continuâ la bataie, si cjatave daûr di se i Carabinîrs che ur tiravin te schene... I muarts di chê vuere, sedi colâts sot de bandiere taliane sedi colâts dot de bandiere austroungariche, a van ricuardâts e rispietâts, ma ancje difindûts di une cierte fastidiose retoriche celebrative che e dopre chês vitimis par fâ une sorte di esaltazion nazionalistiche. Cumò mi disistu ce che al è di cussì legri par fâ fieste?

Christian Romanini ha detto...

Ma no stin a lâ fûr dal teme dal post... dopo che o ai let lis propuestis, mi tache a fâ gole ancje a mi une date tal cjalt dal Istât...

Altris propuestis?