Diari di Viaç - Canadà

Luca, Carlo e Giusy a son partîts par Toronto (te foto) in Canadà pe cuarte pontade di Farcadice. Luca mi mande cheste mail, tant che une sorte di diari di "Diari di viaç": une anticipazion golose e preziose di un grant biel lavôr su la emigrazion furlane. Grazie Luca.

ai 26 di Avost dal 2007
E je la cuarte dì di intervistis e ripresis a Toronto. E pe cuarte volte, dopo de Argjentine, Belgjiche e Sudafriche, o scuvierzìn une emigrazion sorprendentementri divierse. A son tantis lis robis che ti smaravein a Toronto: la prime, in ordin di timp, e je la sensazion di no vê mai capît ad in plen il concet di multiculturalisim. Lant pes stradis de citât al è impussibil no restâ sorprindûts di cemût che etniis diviersis, lenghis diviersis, grafiis diviersis su pes tabelis e insegnis des buteghis (caratars latins, grêcs, asiatics) a convivin “in maniere naturâl” delineant o afermant une teorie de diference. Îr, intune interviste nus àn dit: «La diference tra i Stâts Unîts e il Canadà e je semplice: cuant che tu ti traferissis tai Stâts Unîts tu deventis “american”, cuant che tu ti trasferissis in Canadà tu deventis un "canadês che al ven di...”». Nissun in Canadà ti domandarà di dismenteâ il to passât. Par un canadês e je propit cheste la ricjece. Cui che al associe a cheste imagjin la imagjin de Italie tant che stât regjonâl si fâs cualchi domande... o no?
Luca