06 maggio 2006

Friûl resurît: 1976-2006

Cjalâ denant, ma cuntun ricuart par chei che 30 agns indaûr come vuê a son stâts puartâts vie e no son plui...
Mi plâs cheste poesie dal gno amì Roberto Ongaro:

RICUARDE FURLAN
Lis cjasis sdrumadis a nulivin di muart,
ferîts di ogni bande, berghei, polvaron,
la int disperade e sgjerfave tra i claps,
scunide, avilide, cun disperazion.

Parsot e rugnave, feride, la tiere,
scjassant il Brancot ogni cualchi minût,
maseriis e sanc a passavin pes stradis,
il mont al diseve "Il Friûl al è pierdût!"

No vevin fats conts cu la antighe Gjernazie
di int di fature, usade al sudôr,
usade a lis vueris, a lis invasions,
che cence vaî e sopuarte il dolôr.

Tornâts di ogni dontri a la tiere dai vons,
un clap dongje l'altri, sudant ogni dì,
i fîs di chê tiere cetant sfortunade,
il vieri Friûl a àn fat resurî.

4 commenti:

nangank ha detto...

cjar Christian,
dopo ve domandat scuse pal furlan aprossimativ, ti fas i complimens pal blog. I soi rivat achi cirint sui motors "majano 1976", parce che e volevi viodi des fotos dal nestri pais prime e dopo di che zornade. I soi un giovin di Majan, "anzi" di susans, nassut dopo el teremot, e mi cjati par lavor a Taiwan: no podevi domanda material al le me famee, e cussi e ai tacat a cirj..ti torni a fa i complimens pal blog, che par me al rappresente une pagine vierte su majan e sul friul..
bon lavor e mandi

Christian Romanini ha detto...

mandi nangank: grazie pes bielis peraulis. o speri di fâti sintî in tic plui dongje cjase ancje cun chest blog. ten di voli maian e bon lavôr ancje a ti. trop ti fermistu a Taiwan?

ps
nol covente scusâsi pal furlan, mi pâr che chi no sin a scuele e nissun ti judiche ni sul furlan, ni su la gramatiche, ni su la ortografie, ni su nuie altri: chi ce che al conte a son i contignûts des discussion. inmò mandi

nangank ha detto...

mandi christian,

ti ringrassi pe rispueste, e pal to blog che insieme a chel di tondo mi permet di tignimi in contat cu le realtat furlane,e di viodi che taliane cun tun par di ocjai furlans. I volevi ancje aprofita par domanda' le to opinion su tun argoment che ai sintut pe television, timp fa: qualchidun al diseve che el friul post-teremot al e' deventat el friul dai murs als doi metros ator des cjases, dai portons simpri seras: si sono seradis ancje les "cuscienses"?

mandi

PS: i starai a taiwan almancul fin ancjemo un an. Cheste ai e', come le nestre, une cjere di granc e picjul, ma quotidians, teremos..ma mi par che mancje l'epopee de ricostrusion che e vin no..mah!?

Christian Romanini ha detto...

Nangank,
se si son sieradis lis cussiencis no lu sai, parcè no ai il tiermin di paragon cun prime. jo o soi nassût dopo e no sai se prime i portons e lis cussiencis a jerin vierts. lu domandi ancje jo... ce che mi semee (par sintût dî) al è che prime dal taramot al jere plui presint un sens di comunitât e un leam tra la int. po al è rivât il taramot e te dificoltât ducj si son judâts une vore, l'un cul altri; ma passât il moment, cul lâ dai agns e de ricostruzion, cu la panse plene, si à tacât a sintî mancul la bisugne di stâ dongje. ma cheste e je dome la impression che plui di cualchidun mi à dade e duncje o domandi: ise vere?