30 aprile 2010

Auguris al gno nevodut e a mê sûr

Juste un an indaûr o deventavi barbe di Gioele, nassût te stesse dì di sô mari, ven a dî mê sûr. Augurons!!

28 aprile 2010

La braure dal Barça

Vuê e je la zornade de semifinâl di cope tra Barça e Inter. No fâs pronostics, ma o segnali la iniziative dal Barcelone che al à fat une biele maiute pe partide e... cuale lenghe aial doprât pal messaç? La sô lenghe: il catalan!
Par savênt di plui, fracait chi.

23 aprile 2010

3 agns che nus à lassâts

Trê agns indaûr, come vuê, pre Antoni al lassave cheste esistence par lâ te lûs eterne. Usgnot a Visepente e domenie a Vençon al sarà ricuardât. Ma jo lu sint simpri presint, come se no nus ves mai lassâts, parcè che la semence e à di murî par dâ gnove vite, e i siei insegnaments a restin e a restaran, come che al à scrit tal so cumiât (fracait chi par savênt di plui).

"Vivêt a lunc, vivêt cun dignitât, vivêt di furlans. Vivêt pal vuestri ben, vivêt pal ben de glesie, vivêt pal ben dal nestri Friûl. Cence fâ i prepotents e cence vendisi, lavorant e pratindint, galantoms cun Diu e cul mont. Intun timp cussì birbant e galiot, us racomandi di no pierdi ni la memorie ni la tramontane ni la voe di fâ. Se no rivais a gambiâ il mont, cirît che il mont no us gambii vualtris. Se no rivais a salvâlu, metêtle dute par che no us sassini. Che al puedi benedîus Diu e la storie, come che cumò us benedis pe ultime volte e cun dut il cûr il vuestri puar predi e fradi".

21 aprile 2010

Odissee, biel event

O ai stât a la prime de Odissee, opare teatrâl cjapade de traduzion dal classic omeric di Sandri Carrozzo e Pierluigi Visintin. Nissun dai doi al à podût jessi, ma ju ai sintûts ducj i doi presints.
No soi un espert e duncje no ai pretesis… mi limiti a regjistrâ lis mês impressions a cjalt.
Il spetacul mi à plasût e mi à convint ancje la sielte di fâ recitâ i personaçs ancje tes varietâts de lenghe furlane a seconde des zonis di provenience. E cui si freial se o vin scugnût ancje becâsi cualchi batude in triestin (i triscj Proci che a smicjin Penelope e il ream di Ulìs; lis Sirenis tentadoris che dopo vê cirût di striâ Odisseu cjantant in maniere maraveose par furlan, dopo si lamentin par triestin)… jo o varès fat vulintîr di mancul di cheste sielte, ma amen...
O ai viodût moments une vore profonts (l’episodi di Polifem, la stesse sene des Sirenis tal prin an) cuntune fuarce emotive inmò plui coinvolzent tal secont at, che mi à plasût tant di plui (une piçule critiche tal prin at che ogni tant al sbrissave in maniere pericolose un tic masse tal ridicul…).
Mi à fat vignî i sgrisui pe emozion cuant che o ai viodude la Novella Cantarutti lei un pas de traduzion: biele cheste sielte di inserî tocs di leture, pardabon emozionant chest omaç a la grande scritore mancjade che nol è tant.
O soi lât a cjase content di vê viodût un biel spetacul ma ancje di jessi stât testimoni di un moment impuartant pal Friûl: il teatron di Udin al à dât acet a une opare in lenghe furlane che e à viodût impegnadis une vore di personis.
E cui che nol jere si è pierdût un event.
Mi auguri che pal avignî si continui, magari evitant di sierâ lis oparis par furlan intun calendari specific, ma miscliçant lis lenghis, insiemit, tu calendari unic di dute la stagjon.
Compliments a cui che al à volût cheste iniziative e al à fat in maniere che e deventi realtât.

19 aprile 2010

Odissee

O sin rivâts a la zornade de prime tant spietade: martars ai 20 di Avrîl aes 9 mancul un cuart di sere e larà in sene al teatri Zuan di Udin la "Odissee", traduzion par furlan dal innomenât test omeric voltât par furlan di Carrozzo e Visintin.
Ducj i detais dal spetacul
ju cjatais chi (fracait il link).

15 aprile 2010

Donait il 5 par 1000 a La Patrie dal Friûl

Ancje chest an, cu la declarazion dai redits tu puedis dâi une man
a «La Patrie dal Friûl» il mensîl dut in marilenghe dal 1946.
Nol coste nuie: baste meti il numar 01299830305
te casele juste e firmâ la destinazion dal 5 par 1000.
LOTANT PAR UN FRIÛL PLUI FURLAN, TU STÂS MIÔR ANCJE TU
Grazie!

07 aprile 2010

Un cuc indaûr

Ve ca une biele serade a Sedean sul teme de storie de nestre tiere: apontament joibe ai 8 di Avrîl aes 20.45 par un viaç storic pardabon interessant cun Venusia Dominici, Massimo Garlatti-Costa e Carli Pup.

06 aprile 2010

Baudelaire

Content al è cui che, lassâts daûr i ingôs e i dolôrs che a pesin cu la lôr cjame su la esistence fumatose, al pues cun ale vigorose slançâsi viers i cjamps luminôs e serens; cui che i siei pinsîrs, come lodulis, a saetin in libertât viers il cîl de buinore; cui che al svole su la vite e al capìs cun facilitât il lengaç des rosis e des robis mutis.

Charles Baudelaire

02 aprile 2010

Precisazions

Une des notiziis che vuê a àn plui spazi sui gjornâi di chi e no dome (al è un articul ancje su Repubblica) e je chê de proteste leghiste in consei regjonâl cuintri lis celebrazions dai 150 agns de Unitât di Italie che a saressin in program tal 2011. No jentri tal mert dal dibatiment, ma o cjali la storie e o provi a resonâ cul gno cjâf. Come furlan o riten plui concret e responsabil cjalâ i numars e lis datis: il jessi "pressapochist" nol è dal nestri popul.
Buine part dal Friûl storic al è colât sot dal Ream di Italie tal 1866 (fracait il link) e duncje chest an che al ven nol è nissun “150m talian” pal nestri teritori, che se mai al è stât concuistât ben 5 agns dopo dal 1861.
Cun di plui, la zone dal confin, e mi riferìs tant par semplificâ a buine part de contee di Gurize, ma no dome, e je deventade taliane dome dopo de fin de prime vuere mondiâl dal 1915-18 (che tancj a celebrin come “Grande Guerra”, ma che in sostance e je stade dome une grande tragjedie che e à fat murî miârs e miârs di zovins).
O sieri lassant fâ fieste il prossin an a cui che al vûl, ma se propit propit nol pues fâ di mancul, i ten a visâlu che chi di noaltris dut câs al fasarà fieste pai 145 agns de colade dal Friûl sot dai Savoia (sì, la famee di chel siôr, cualchidun lu clame princip dismenteantsi che i titui nobiliârs mi somee che a son stâts abolîts, che e à domandât a la Republiche taliane un mega risarciment pai 54 agns di esilii… ma a saressin ancje altris episodis di podê ricuardâ...).
Forsit forsit prime di fâ fieste, al bastarès almancul lei ben i fats de storie e no i proclamis de propagande nazionaliste taliane.
Invezit o torni a ricuardâ che secont me une vere fieste nazionâl furlane e je chê dai 3 di Avrîl, che e ricuarde la nassite dal Stât Patriarcjâl di Aquilee, une forme di guvier nestri nassût tal 1077 e che al cjapave dentri i teritoris fint in Cjadovri e chei che cumò a son Austrie, Slovenie e Istrie.
Buine fieste nazionâl furlane a ducj.

ps: se mai tal 2011 a colin i 500 agns dal riviel contadin de Joibe Grasse dal 1511... chê sì che e je une date impuartante e un aniversari di ricuardâ pal popul furlan che si è ribelât cuintri dai nobii che lu tibiavin.

01 aprile 2010

Fevelant a Colonia Caroya/2

Vie pe mê permanence a Colonia Caroya o soi stât ospit ancje di une biele iniziative culturâl: il grup "Fevelant".
O vin fat une lungje fevelade sul Friûl, su la storie, su ce che a fasin lôr ta chestis ocasions li che si cjatin e a fasin chest laboratori che al cjape dentri zovins e mancul zovins, cu la bandiere cu la Acuile di Betrant picjade tal mûr e il mate cjalt su la taule (in prin plan)... masse biel il Friûl declinât in forme Argjentine.
Sabide cheste al sarà il tierç incuintri e come che us disevi, a ricuardaran la Fieste dai 3 di Avrîl.