351 grazie

O ringrazii di cûr ducj chei che in cheste aventure eletorâl mi son stâts dongje, mi àn sopuartât e supuartât, chei che mi àn judât, chei che a àn lavorât cence comparî e "last, but not least" chei che mi àn votât e fat votâ.

Personalmentri o soi content dai 351 eletoris e eletôrs che mi àn dade fiducie puartantmi al 5,01% rispiet a la medie provinciâl de liste fermade al 2,07%. Duncje o ai fat plui dal dopli, rivant a jessi il secont par numar di vôts te mê liste.
Nol jere facil, ma in mancul di un mês di campagne eletorâl chest risultât al va parsore di ce che mi spietavi: ve ca i risultâts tal colegjo 20 di S.Denêl.
Al displâs che il 2,07% complessîf dal Maf nol à puartât la elezion di nancje un conseîr, ma mi consoli cu la vitorie al prin colp dal President Fontanini (ve ca la composizion dal gnûf consei provinciâl).
Tornant al aspiet principâl, grazie pardabon a ducj voaltris!

Apel finâl

Al mancje pôc a la fin di cheste campagne eletorâl e mi somee doverôs sierâle cul apel finâl, domandant la vuestre fiducie.
Parcè votâmi me?
Parcè che o pues meti dongje l'entusiasim di un zovin e une esperience concrete fate in prime linie: o ai 36 agns, 11 ju ai passâts in aministrazion comunâl e par 4 e mieç o ai lavorât pal President de Regjon. Cheste esperience mi à permetût di cognossi di dentri la nestre struture istituzionâl a plui nivei: comunâl, provinciâl e regjonâl.
Parcè che o ai voie e ideis par continuâ a dâ servizi al gno teritori, siôr di culture, ambient, storie... intune peraule: "un patrimoni" come pôcs altris in dute la Provincie.
Parcè che o pensi di vê imparât une maniere di lavorâ che e sta de bande de int e che o ai cirût di dimostrâ ancje ta chescj dîs: informazion direte, coinvolziment e confront diret, rapuart cu lis istituzions e cognossince personâl des situazions dal teritori.
Parcè che tai ultins agns o ai vude la pussibilitât di aprofondî tematichis che mi àn fat cjapâ cussience dal sens di identitât dal Friûl, che o metarai a disposizion de comunitât provinciâl par dâ fuarce ai nestris comuns che no puedin jessi bandonâts denant dal centralisim di Triest.
Cun chest spirt o intint frontâ la esperience di conseîr provinciâl se o pensais che o podedi jessi la persone juste. Lu fasarai par puartâ la vuestre vôs in Consei Provinciâl e par chest us domandi di meti dome une X sul simbul dal Moviment Autonomist Furlan, il gno non al è za scrit su la schede zale pes elezions provinciâls dulà che o soi candidât pal Maf tal colegjo eletorâl n.20 di S.Denêl (comuns di Forgjarie, Maian, Ruvigne e S.Denêl) (fracait su la foto e cjalait ben la imagjin chi dongje).
Grazie.

Apontament cu la storie

La nestre zone e je siore di testemoneancis storichis che a confermin la impuartance dai nestris paîs. Us segnali par chest l'event che si tignarà sabide ai 20 di Avrîl aes 5 dopomisdì tal Hospitale di S. Zuan a S. Tomâs, une struture storiche di nivel internazionâl che e je testemoneade za intun document dal 1199. Par cui che nol cognossès la funzion dal Hospitale e jere une struture gjestide di un ordin religjôs che te Ete di Mieç e deve bon acet ai viandants che a percorevin la Vie dal Tiliment in direzion Gjermaniis - Rome - Jerusalem. Za di cualchi an la struture e je interessade di une azion di recupar e valorizazion. In particolâr, la gjestion des iniziativis e je de Associazion Amici dell'Hospitale che mi disevin che ta chescj mês a son rivâts a viodi chest sît passe 1000 personis, ancje dal forest, tra turiscj, oms des istituzions e rapresentants religjôs ancje de Austrie. Par plui informazions us consei di lâ a lei il lôr blog e se o vês ocasion lait a viodi chest puest, cjamât di storie e inserît intun contest ambientâl invidiabil come lis culinis che a fasin di corone a la zone.
Se o rivarai a jentrâ in consei provinciâl mi impegnarai par dâ vôs al patrimoni storic ambientâl de nestre zone par podê meti in vore politichis di promozion turistiche comprensoriâl che a puedin dal sigûr rapresentâ une forme di economie gnove e moderne.

O ai cirût di esponi in part il program pes Elezions provinciâls 2013 dulà che o soi candidât pal Maf tal colegjo eletorâl n.20 di S.Denêl (comuns di Forgjarie, Maian, Ruvigne e S.Denêl).

Sanitât e servizis sociâi

Ce che te sanitât si faseve te zone di riferiment dal Ospedâl di S.Denêl za 20 agns indaûr, vuê come vuê in altris bandis de Regjon e dal rest di Italie inmò sal insumiin. Nol è un slogan, ma la veretât, risultât no dome di un sisteme istituzionâl virtuôs, ma ancje di
une sensibilitât particolâr de nestre int.
E je vere che la gjestion dal Ospedâl e dal sisteme sanitari al è di competence de Regjon, ma la Provincie di Udin e à une funzion di sigure impuartance tal operâ tal sociâl, come che par agns al à fat l'assessôr Adriano Piuzzi.
Une conferme di cheste particolâr vocazion dal nestri teritori e ven di 3 realtâts come il Samaritan a Ruvigne, la fondazion Pontello a Pêrs di Maian e Casa Elena a S.Denêl: trê struturis di primarie impuartance tal sostegnî i disabii e lis lôr fameis. Se o sarai elet in consei provinciâl la mê azion e sarà ancje tal dâ vôs a chestis e a dutis chês realtâts che a lavorin par garantî a lis personis mancul fortunadis servizis e assistence, par dâur la pussibilitât di frontâ la vite cun dignitât e cence pôre .

Di chei altris ponts che o volarès realizâ, us scrivarai tai prossims dîs, cirint di esponi cussì il program pes Elezions provinciâls 2013 dulà che o soi candidât pal Maf tal colegjo eletorâl n.20 di S.Denêl (comuns di Forgjarie, Maian, Ruvigne e S.Denêl). 

A proposit di traspuart public

Une des miôr manieris di cognossi lis robis al è chel di vivilis in prime persone. Cussì di cuant che o ai tornât a doprâ la coriere par lâ a vore, mi soi inmò plui convint che il traspuart locâl al merte di jessi tignût di voli e favorît. La Provincie e à une funzion di control sul servizi furnît dal gjestôr privât ancje se la azion e je une vore condizionade dal finanziament che al rive de Regjon: i km di corsis programadis par cuvierzi il teritori a dipendin di tropis risorsis che a rivin di Triest. Ma pal utent dal servizi al è indispensabil vê un contat plui dongje cu lis istituzions: si imagjinaiso di scugnî rapuartâsi cun Triest par une segnalazion o par un sugjeriment suntun linie di autobus Maian-Udin?
Se o sarai elet in consei provinciâl mi impegnarai par rindi inmò plui fuart il leam cul teritori, par podê mantignî un contat strent tra cui che al da e cui che al ricêf il servizi di traspuart public. Tal stes timp al sarà impuartant cirî di dialogâ in maniere atente cu la Regjon par garantî lis risorsis necessariis par sodisfâ al miôr la domande.

Di chei altris ponts che o volarès realizâ, us scrivarai tai prossims dîs, cirint di esponi cussì il program pes Elezions provinciâls 2013 dulà che o soi candidât pal Maf tal colegjo eletorâl n.20 di S.Denêl (comuns di Forgjarie, Maian, Ruvigne e S.Denêl). 

Pe nestre dignitât

Abram Lincoln al diseve che "la democrazie e je il guvier dal popul, pal popul" e mi somee une buine rispueste a cui che al volarès fâ des provinciis un ent di secont nivel, ven a stâi "no elet dal popul". Gjavâ al popul il dirit e la pussibilitât di sielzi i siei rapresentants ancje a nivel provinciâl nol fâs l'interès dal popul.
E te stesse maniere il popul al à dirit di vê ducj i mieçs par podê sintîsi al stes nivel di chei altris popui, cence sintîsi di mancul, cu la stesse dignitât. Ve alore che ancje la traduzion di chestis frasutis, dopradis su la pagjine di Facebook dal Moviment Autonomist Furlan, a àn cheste funzion: fin cumò la plui part des informazions che nus rivin dal forest, se no son te version origjinâl, a son intune lenghe difarente de nestre. Ma si pues doprâ il concet globâl, cence dismenteâsi de realtât locâl.
E se o sarai elet in Consei provinciâl mi impegnarai par dâ al nestri popul e ae nestre lenghe la dignitât che a mertin, no cun chê di sierâsi, ma di cjalâ e dialogâ cui altris ae stesse altece.

Di chei altris ponts che o volarès realizâ, us scrivarai tai prossims dîs, cirint di esponi cussì il program pes Elezions provinciâls 2013 dulà che o soi candidât pal Maf tal colegjo eletorâl n.20 di S.Denêl (comuns di Forgjarie, Maian, Ruvigne e S.Denêl).