23 aprile 2007

Mandi Pre Toni

Usgnot passade al è mancjât Pre Toni Beline. (te foto, pre Toni di frut)
Vuê in Patrie si sintìn ducj vuarfins e il Friûl al è plui puar.
O vin pierdût une grande persone, une inteligjence fine, un furlanist che cun passion al à puartât indevant la lote par un Friûl plui furlan.
No vin vût tant timp par cognossisi, ma di cuant che la prime volte o ai fevelât cun lui a Visepente cuant che o ai tacât a colaborâ cu La Patrie dal Friûl, mi à insegnât tant.
Joibe passade o ai stât a cjatâlu a cjase sô: al jere di pôc tornât a cjase dal ospedâl...
Al jere strac, ma nol veve voie di fermâsi: simpri a pensâ a progjets, ideis, il prossim numar de Patrie ancje se chel ultin al jere a pene stât stampât.
Usgnot passade però, al à scugnût rindisi ancje lui, spirt libar, spirt fuart, spirt sclet, spirt furlan!

Mandi pre Toni e grazie di dut.

Il funerâl al è miercus ai 25 di Avrîl a Visepente aes 17.00.

2 commenti:

Christian Romanini ha detto...

La sô ultime interviste sul setemanâl IL FRIULI 24/11/2006

marilenghe
I sessante agns de Patrie

La Patrie dal Friûl, il mensîl dut par furlan nassût tal 1946, al à fat fieste pai siei prins 60 agns.
Il 2006 al è stât un an impuartant e par viodi di fâ un belanç di cheste lungje ativitât o vin stât a fevelâ cun pre Toni Beline, diretôr de riviste.
- Pre Toni, che nus conti alc di se.
“O soi nassût a Vençon ai 11 di Fevrâr dal 1941 e o soi deventât predi dal 1965. O ai tacade la mê cariere (a cessecûl) a Codroip, considerât in chei agns un puest di sigûr avignî. Po o soi lât a sierâmi insom des monts, a Sant Martin di Rualp e Val, in comun di Darte, e li o ai vude come une seconde nassite culturâl e spirtuâl, parcè che o ai tacât a volêi ben e a spindi la mê vite pal popul e pe glesie furlane. Par custions di salût, dopo 14 agns mi soi sbassât a Visepente, là che o lavori di 24 agns. O fâs prin di dut il predi, ma o scrîf libris, o partecipi a la vite culturâl dal Friûl. O speri di jessi ricuardât pe traduzion de Bibie par furlan”.
- Pre Toni, 60 agns par une persone a son za un travuart che le puarte viers la pension, ma par un mieç di informazion, soredut in lenghe, a son un sucès no di pôc. Ce significhial chest par lui?
“Il paragon cuntune persone fisiche al ten e nol ten. La persone fisiche e à un so timp plui o mancul lunc ma limitât, biel che un sfuei al à di compagnâ il timp di une comunitât, che no devente mai viele, ma si modifiche saldo. Par chel si pues dî che ancje pal gjornâl i agns a passin, ma si è simpri come a la prime dì. Il sucès nol è tant te durade, ma tal interpretâ cun fedeltât e libertât il moment che tu vivis. Un gjornalist seri nol varès di contentâsi di fâ di nodâr o di cronist, ma al varès di fâ di profete, anticipant i timps e judant a lâ de bande juste. Il sucès po nol sta tal vê ducj de tô bande, ma di jessi tu de bande de libertât, paiant il presit che al covente”.
- Ricuardìn i trê personâçs che a àn fondade tal 1946 la Patrie dal Friûl…
“Pre Bepo Marchet e Feliç Marchi a son dôs grandis personalitâts, che si completin in maniere positive e armoniche. Marchet al à une preparazion culturâl di prin ordin e un penâl, soredut te part polemiche, che nol à confronts. Marchi al è l’anarchic che al cjale la realtât di là e fûr dal sisteme e soredut al à intuizions origjinâls e grant fiât. Lui al da la idee o la cuintriidee e pre Bepo le documente cui fats de storie e le vivifiche cu la sô passion e passionalitât. Marchi, cence Marchet, nol varès podût esternâ lis sôs ideis autonomistichis e Marchet, cence Marchi, nol varès vude dute chê sgrimie. Marie Del Fabbro, femine di Marchi, e faseve la sô part cirint di pasâ i doi leons e metint chel fregul di feminilitât, di umanitât e di sintiment che al coventave par no colâ tal ecès”.
- La Patrie dal Friûl e à compagnât la seconde metât dal “Secul curt” dal Friûl: cuâl isal stât il moment plui esaltant di chescj 60 agns?
“Di sigûr tai prins agns, dal 1946 al 1950. Il Friûl al jere par tiere e si veve une dibisugne tremende di sperance, di stimul, di spirt. La autonomie e jere la strade plui induvinade e la int le sintive come il moment providenziâl pal riscat di une tiere eternementri sotane. Al varès podût deventâ, cun plui serietât e inteligjence di chel talian, il nestri resuriment”.
- E invezit lis dificoltâts plui significativis?
“Di ordin nazionâl e internazionâl. La nestre tiere (no ancjemò regjon) e jere a cunfin cul mont comunist, cu la “cente di fier”, che nus incjantonave. Tocjave jessi talianons e catolicons, che al è juste il contrari de autonomie. Po a àn cjapât pît i partîts, soredut la Democrazie cristiane e il partît comunist che, par resons contrariis, a jerin insensibii e contraris a ogni discors di lenghe, culture, autonomie furlane. E il Friûl nol contave nuie a confront cun Triest, la citât martare di salvâle a ogni cost”.
- Chestis dificoltâts sono stadis superadis? Cemût staie la Patrie dal Friûl vuê?
“Se o sin ancjemò a contâse al vûl dî che no son stadis superadis. A dî la veretât il concet di autonomie nol sarà mai superât, parcè che al è un concet dinamic, no static. La Patrie e sta vonde ben ma e à di stâ miôr parcè che il lavôr al è tant”.
- E il mont de informazion?
“Nol è interessât a la cuistion parcè che nol è interessât il paron. O intint soredut il paron politic, tant a nivel centralistic che di periferie”.
- Ce vuelial dî fâ informazion in lenghe minoritarie (che però in Friûl, minoritarie no je) intun mont che al fevele parsore i confins midiant dai mieçs di comunicazion modernis come internet e vie indevant?
“Al vûl dî fedeltât a la idee di fonde e grande libertât e creativitât tal doprâ lis possibilitâts tecnologjichis di vuê. O vin di promovi la idee di un Friûl che nol cîr di salvâsi a ducj i coscj de modernitât, ma che al sa frontâ e confrontâsi ancje cu la globalitât. Tignìn a ments che la globalitât cence il localisim e je une scjatule vueide. Cussì come l’inglês cence lis lenghis e lis culturis locâls”.
- Dopo chescj prins 60 agns, ce prospetivis pal avignî de Patrie?
“Mi sint di dî che il discors de autonomie, de autocussience dai furlans nol è finît. Al à ancjemò di scomençâ. No sin duncje a la fin di une stagjon culturâl, ma al inizi. Nus sta a nô interpretâ e madressi cheste dibisugne magari subcussient di identitât, cirint di vierzi stradis gnovis, plui che salvâ robis validis, ma passadis”.
- E ce si spietial pal Friûl tal 2007?
“O spieti che e cjapi pît la Assemblee des Pronviciis Furlanis e che la regjon e vedi la onestât e il coragjo di dânus un statût che al ricognòs la divierse condizion e vocazion dal Friûl e di Triest e nol sacrifichi simpri une regjon par une citât, ancje se metropolitane. Ma chest nus sta soredut a nô furlans, che no vin plui nissun alibi”.

Christian Romanini

Luca Peresson ha detto...

Mandi Pre Toni