17 marzo 2010

Que linda que es, esta Colonia que tanto querés

No rivi inmò a capî ben dal dut ce che o stoi vivint ta chestis zornadis...
o ai fat une dì di viaç par avion, par lâ di chê altre bande dal mont e mi somee di jessi in Friûl...
o doi la man a la int per presentâmi e mi sint a rispuindi: o soi Copetti... Bergagna... Roya... Toso... Londero... Cargnelutti... Visintin... Cemût vadie?
o se a son plui zovins, tor de mê etât o jù di li, "Hola, que tal? Yo soi Copetti... Bergagna... Roya... Toso... Londero... Cargnelutti... Visintin..." e ti san a memorie ducj i nons ancje dai nonos e dai nonos bis origjinaris di Glemone, Udin, Osôf, Prât di Cjargne... che a son partîts in nâf di Gjenue tal 1878... zoventût che ti domande di fevelâur par furlan parcè che no lu fevelin, ma a volaressin recuperâ la lenghe che a sintivin a fevelâ dai nonos...
cjatâsi tal mieç de campagne sconfinade, tun vignâl che no tu rivis scuasit a viodi dulà che al finìs e cjatâ un siorut di non Marcetti (il cognon al è scrit Marchetti, ma pronunciât a la castiliane) che al rive cul tratôr, ti salude par castilian "Hola, que tal?" e cuant che i domandi "Mandi, ma lui fevelial par furlan?" e lui ti rispuint "Sigûr, cun plasê, cemût staiso?" e al tache a contâ "O soi partît dal puart di Gjenue a 12 agns cun mê mari tal 1949 e no soi plui tornât...", fevelanti par passe une ore dai cjamps, dal lavôr, de ue che chest an e à cjapade la ploie e al à pierdût passe la metât de produzion, ma il guvier no i darà un franc... e vignî a savê di sô fie, dopo che si sin saludâts e lu vin lassât che al continuàs a lavorâ, che ancje par jê che no fevele une peraule, e jere la prime volte in dute la sô vite che e sintive a fevelâ so pari par furlan...
cognossi il sindic di un comun dongje, Jorge Roberto Visintin, che ti dîs: "Puedio fâus viodi il gno paîs, lu clamìn San Durì, come la frazion di Flaiban"...
Dut chest ti fâs sintî tal cûr emozions che no tu rivis a descrivi fint insom... e ti ven un grop...
Forsit al è il câs di tornâ a scrivi une des primis riis di chest post:
o ai fat une dì di viaç par avion, par lâ di chê altre bande dal mont e O SOI in Friûl...
Lait a viodi alc di plui, fracant chi: www.entract.it/farcadice.html
Grazie Colonia Caroya!

2 commenti:

ninine ha detto...

Ce emozions! No viôt la ore di podê lâ ancje jo!
Diviertissiti...ma viôt di tornâ prest par contâmi dut!! =)

Mario ha detto...

Ciao a tutti. Siamo tornati a Montevideo dopo una grande festa dei 132 compleanno di Colonia Caroya. Un abbraccio a tutti gli amici incontrati in quel bel cjanton furlan di Argentina! Mandi !