05 maggio 2007

Lunis o soi a Radio Onde Furlane

Lunis ai 7 di Mai aes 10.00 o sarai ospit a Radio Onde Furlane cun Marino Plazzotta par fevelâ de Patrie dal Friûl di Avrîl, ma soredut di pre Toni Beline e dal ultin libri: La fatica di essere prete.

4 commenti:

Christian Romanini ha detto...

Dal setemanâl IL FRIULI dai 27 di Avrîl dal 2007
Pagjine Marilenghe

Muart di un grant furlanist

Il Friûl al à pierdût une des vôs plui vivarosis e origjinâls dal panorame furlanist di vuê.
Te gnot tra domenie ai 22 e lunis ai 23 di Avrîl al è muart Pre Toni Beline, om di glesie, scritôr, tradutôr, insegnant, gjornalist, diretôr dal mensîl “La Patrie dal Friûl”, ma soredut om di culture, sostignidôr de identitât furlane.
Al jere nassût a Vençon ai 11 di Fevrâr dal 1941 intune famee no siore, ma te dificoltât di vivi al veve cjatât la fuarce par temprâ cuarp e spirt.
La sô vocazion e jere stade scuasit imediade e intun ricuart al contave che la sô strade su la vie dal Signôr i fos parfin stade anunciade intun sium a sô mari, che cuant che lu spietave e veve insumiât un predessut denant dal altâr. Chel predessût, lu varès savût une vore di agns dopo, al jere propit lui. Al jere jentrât in 'seminari di frut e ai 29 di jugn dal 1965 al jere stât ordenât predi.
Al veve tacât il so ministeri a Codroip, ma za tal 1968 al jere stât trasferît in mont par viodi des animis des parochiis di Val, di Rualp e di Treli in Cjargne, li che al restà fintremai al 1982. Di in chel an al fo nomenât ae vuide de parochie di Visepente e po dopo al veve cjapât ancje chê di Vilevuarbe, in comun di Basilian.
La sô produzion leterarie e conte cetancj titul, ma dal sigûr chel che al fasè grant scjas al fo “La Fabriche dai predis” un test di denuncie, li che pre Toni al contave sclet e cu la fuarce di un discors simpri rampit e clâr, lis dificoltâts e i difiets no propit de glesie, ma dal 'seminari e de gjerarchie eclesiastiche.
Pre Toni, adun cuntun altri grant furlanist, Pre Francesc Placerean, al veve ancje voltât par furlan la Bibie publicade tra il 1984 e il 1993, par dâ la pussibilitât al popul furlan di podê cognossi la peraule dal Signôr te marilenghe. Chest so impegn a pro de tutele e de valorizazion de lenghe furlane al fo, dongje de vocazion, il grant fûc che al animà la sô ativitât di om di culture. Anzit a jerin un dut la sô fede e il so lotâ pe identitât furlane, che lu puartarin a jessi cofondadôr di “Glesie Furlane” (www.glesiefurlane.org), la associazion di predis e laics che e je presint tal panorame des ativitâts culturâls in Friûl ancjemò dai prins agns ’70 dal secul passât. Pôcs agns daspò dal Concili Vatican II (1962-1965) e jere nassude la dibisugne di cognossi miôr la storie e la vite dal nestri popul furlan par che la glesie e sedi plui incjarnade, par che il Vanzeli e la fede a vedin il savôr de nestre tiere; par che la nestre lenghe, il nestri cjant, la nestre vite a jentrin a plen dirit te liturgjie. E chest cuintri i insegnaments dal 'seminari, che al veve cirût di “taiâ” la lenghe furlane, cence però rivâ a fâlu. L'obietîf di pre Toni e di cheste Associazion al jere e al è chel di cognossi e valorizâ cun ricercjis, publicazions, incuintris dut ce che al rivuarde la dimension religjose te culture furlane cirint tant traviers lis fonts storichis che la realtât contemporanie. O ricuardìn ancje lis traduzions dal Lezionari (2001) e dal Messâl par furlan, aromai di mês in spiete de aprovazion de Conference episcopâl taliane (Cei), che e continue a tardâ la autorizazion dome parcè che, secont cualchidun, la gnove version no podarès vignî fûr prime par furlan che par talian.
La sô opare di inteletuâl no si limità aes scrituris sacris e si taià fûr une posizion di grande impuartance tal panorame culturâl leterari furlan. Al vincè il premi Sant Simon di Codroip dôs voltis: tal 1981 cul libri “pre Pitin”, la biografie di un “soldât sempliç” dal Signôr, e tal 1999 cu la “Trilogjie”. Tal 2000 al rivà ancje il ricognossiment dal premi Epifanie di Tarcint.
Dal 1979 al 1988 al veve vût la prime esperience di diretôr dal mensîl “La Patrie dal Friûl”, che, dopo di une parentesi di cualchi an, al veve tornât a cjapâ tal 1999 tignude fin che il Signôr lu à clamât a se, biel che tai ultins mês la riviste e veve cjapât la strade di une gnove stagjon che lu veve jemplât di gjonde e gnove fuarce.
Lis sôs ultimis fadiis editoriâls a son stadis une version ilustrade e in rime de Bibie, che e sarà publicade midiant dal intervent finanziari de Regjon F-VJ (e no de Curie, ndr) e un lunc libri interviste curât di Marino Plazzotta, colaboradôr da “La Patrie dal Friûl” e di “Video Tele Carnia”, che al jere za pront par jessi distribuît, ma che Pre Toni nol à vût il timp di viodi stampât “Mi à simpri preocupât chest so spirt simpri critic e cence pôre cuintri i mâi di une gjerarchie eclesiastiche che no i plaseve” al à comentât il curadôr de publicazion.
“Chest al è il so testament spirituâl...” nus à dit Giovanni Santarossa de cjase editore “Biblioteca dell'Immagine” che al continue cun comozion “Tal libri che si intitule “La fatica di essere preti” Pre Toni al conte de sô fadie fisiche, che te malatie lungje di agns no à cidinât la sô vôs: Pre Toni si è viert fevelant dal so amôr totâl pe Glesie”. Un amôr mal paiât de gjerarchie ecclesiastiche che plui di une volte lu à lassât bessôl a combati lis sôs bataiis.
“Dopo che al veve stât la ultime volte in ospedâl, ricoverât a Pasche, mi jeri racomandât cun lui: Pre Toni, tenti cont... il Friûl al à bisugne di te!” al ricuarde Pre Romano Michelotti, so grant amì e colaboradôr. Un pâr di setemanis indaûr il so fisic za provât de malatie, al veve tignût bot e al jere rivât a tornâ a cjase, par continuâ te sô opare a pro dal Friûl. E si jere di gnûf metût in vore, screant il “Ferâl”, une gnove rubriche, une lûs che e varès vût di segnâ la strade par un Friûl plui furlan, rignuvint la sô bataie di une vite pe lenghe e pe identitât dal popul furlan che nol à di molâ, come che nol molave lui.
Ma cheste volte Pre Toni Beline no je à fate e si è diret te Cjase dal Signôr, li che dal sigûr al à tornât a cjapâ sù chei discors cun Pre Checo Placerean e cun ducj chei grancj furlaniscj che a àn lassât vuarfin chest Friûl masse adore... Cun Gjo Pre Toni, predi a to mût par furtune dal Friûl.

Christian Romanini

Christian Romanini ha detto...

Su la pagjine MARILENGHE dal MV di vuê ai 8 di Mai dal 2007

Al è mancjât ai 23 di Avrîl il scritôr e studiôs che al à ancje voltât la “Bibie” in marilenghe

CUN PRE TONI SI DISTUDE UNE LÛS

La muart di Beline e lasse un vueit inte nestre culture
La Glesie furlane e piert un predi libar


di CHRISTIAN ROMANINI

Il Friûl al è plui puar: ai 23 di Avrîl dal 2007 pre Toni Beline al à lassât cheste vite terene par lâ incuintri al Signôr. Cun se, come che al à dit ancje il Bons. Pieri Brollo, al veve un passepuart sigûr pal paradîs: la traduzion de Bibie par furlan. Ma no dome.
Nassût ai 11 di Fevrâr dal 1941 a Vençon, al veve za di piçul cognossût il misteri de fede e la sô vocazion, fuarte e profonde lu veve puartât frut in Seminari, cuintri dutis lis dificoltâts, ancje economichis, che a semeavin no volê permetii di cjapâ la sô strade.
La infanzie e la formazion tal Seminari lu àn fat scuintrâ cu lis regulis di un sisteme, che mâl si adatave a un spirt fin e critic come il so. Cheste esperience i à fat scrivi un dai siei libris che plui a àn scjassât la gjerarchie clericâl furlane e che i à costât no pôcs problemis, fin al ritîr dal libri che in pôc timp dopo de publicazion no si lu à plui cjatât tes librariis. Come che al à dit il Vescul emerit Bons. Alfredo Battisti vie pal funerâl dai 25 di Avrîl «il so stîl polemic e jere la risulte di un amôr deludût» no de fede e de glesie, ma dal sisteme in se, masse voltis plui atent ai siei ecuilibris internis che no ae cure des animis de int.
Int che in grant numar e à volût saludâlu, jemplant la Glesie e la place di Visepente cuntune comozion straordenarie. Come che straordenari al jere lui, ancje se plui di cualchidun al preferive tignilu intun cjanton. Ma nol è mai stât sbandonât ni dai siei amîs e ni dai siei parochians. Lu àn testemoneât in tancj e cu lis sôs ultimis parochiis di Visepente e Vilevuarbe, in chê dì dal funerâl, dopo 25 agns di cuant che pre Toni al veve lassât la Cjargne, e jere ancje la int di Treli, Val e Rualp, che no àn dismentât chel predi rivât cussì zovin tai lôr paîs, ma che al à savût dâur une grande dignitât.
Come ducj i oms cun dotis gjeniâls e ecezionâls che mâl si adatin dentri dai confins de normalitât, spes al jere stât definît «discomut», ma il patrimoni che pre Toni al lasse al Friûl al è inestimabil.
«Al pâr scuasit un segnâl che l’ultin so libri La fatica di essere prete (Biblioteca dell'Immagine) al sedi jessût juste 4 dîs dopo de sô muart, metint adun e voltant par talian une schirie di intervistis che al veve fat par Video Tele Carnia: cetant che o vin vût di insisti e sfuarçâlu par publicâ un libri par talian – al dîs Marino Plazzotta, curadôr di cheste publicazion che e rapresente il so testament spirituâl».
Nol à rivât a viodilu publicât, come che nol à rivât a viodi autorizât il Messâl par furlan, un altri cjapitul impuartant te sô lungje opare a pro de lenghe furlane, che pre Toni al à difindût e valorizât come pôcs. Sul mensîl La Patrie dal Friûl tal so prin editoriâl, ricuardât di Zuan Pieri Biasat vie pal funerâl, tal dicembar 1978 al scriveve: «O sin furlans di lenghe furlane, che a son convints di fâ part de nazion furlane. Che al è come dî che o sin un popul, une etnie, une nazion, che dopo tancj parons che a àn balinât di chestis bandis dilunc i secui, cumò di cent agns indaûr o sin cjapâts dentri tal tramai dal Stât talian».
Se come che si lei tes scrituris, «la semence, par sflurî e dâ pomis, e à di murî», la sperance plui grande e je che ce che pre Toni al lasse su cheste tiere nol sedi dome un ricuart, ma al permeti al popul furlan di no dismenteâ il so esempli rivant a puartâ indevant la bataie che chest grant furlanist al à combatût dute une vite a pro de nestre lenghe e de nestre identitât.

thermonuke ha detto...

MAJAN:
Ogni tant o pensi che tu sedis veramentri inteligjent, o stevi pensant ce che tu as fat cun chist blog, crop che ti a rindut, parsore di ogni spiete, in termins di vots, di visibilitàt e forsite, cui po dilu?, al a puartat ancje che grampe di votos che us a fat vinci les elezions, podopo, sigur cujl jutori di cualchi lôf trist..., tu as alciat un biel poc di polvar, un ajaron talmentri gnuf, disturbant e travolgint che ni di ca, ni di là, a Majan e savavin cemut fa a parasi.
Tu lu as fat cussi ben, grazie siguramentri ancje al capo ufici marketing de provence, che tu as iludut ancje i toi aversaris politics che saressin stats bongs di gjesti un imprest come il to, di naviga a velis displeadis tal tulignot che tu par prin tu as mot, di riva a seai definitivamentri les gjambes ae to coalizion.
Mai ilusion e je stade vendude tant ben e tant grande, ur si e voltat cuintri el imprest, e an sbregadis lis velis (periodo di lunerosse le metafore mi plas).

Cumo tu as (e ves) decidut che al e timp di calme, no sofle nancje une bueresele, el aversari al e indaur e daur a discuti se rema o la a motor parceche lis velis e son a comeda....e intant vualtris e veis dute le calme par decidi el skipper, el timonir, chel che al tire e chel che al sburte.

Chi tal fratim si ten la calme, no si tabae di Majan nancje par sbagli, notizis e vegni dadis le di dopo (rene, bar.bi, protezion civil etc...) si rimpinis su par filosofies furlainstes.

Par rispiet par Don Bellina, di cui no saj avonde, no mi impaci te retoriche che je plote chi e sul furlanist ancje se mi par dute cheste aure mistiche di "santo subito" e sedi un tic masse.

Eco dute cheste laude par diti ce?
che se, come che tu as mitut tal titul dal blog, tu fasis tos lis peraulis:
«O sin furlans di lenghe furlane, che a son convints di fâ part de nazion furlane. Che al è come dî che o sin un popul, une etnie, une nazion, che dopo tancj parons che a àn balinât di chestis bandis dilunc i secui, cumò di cent agns indaûr O SIN CJAPATS DENTRI TAL TRAMAI DAL STAT TALIAN

Par me tu ses fur strade e so fos in Berlusconi o vingares ca di Arcore a cjapati a pidades tal cul!




A meno che no tu ti sedis stufat de me presince e tu stedis cirint di stufami.... e alore o scuen torna a laudati parceche tu stas rivant benissim!

Christian Romanini ha detto...

Mandi Thermo, di dut il discors che tu fasis o pues moviti dome une critiche. Chest blog nol è fat par slontanâ nissun, al è fat par fevelâ di ce che al sucêt a Maian e dulintor, ma simpri cui miei voi e cun ce che al rivuarde il gno mût di viodi. Plui di cualchidun al à tignût a fâmi presint che chest nol pues jessi considerât tant che un imprest istituzionâl. Benon, anzit une riflession cussì le cjapi come un compliment, parcè che dute la int che e passe a dâ un cuc par chi, lu fâs par lei ce che o dîs jo e no une istituzion. Ergo: la robe mi fâs plasê dopli. Pes pidadis tal cûl, amen: a 'nd ai cjapadis tantis e no mi spavente di cjapantindi altris ancje se o soi convint che il Silvio, om di comunicazion, al presearès une esperience come chest blog, che se ancje al è limitât a une realtât locâl, al rive e clamâ une atenzion no propit indiferente.