Lu ringrazii parcè che cognossilu e je stade une robe tant impensade e tant biele: o ai vût l'onôr di cjatâmi a cuatri voi cun Toni Capuozzo (te foto), innomenât gjornalist Mediaset, simpri une vore braurôs dal so leam cul Friûl.Il dut al è sucedût li de ostarie "Da Pozzo", in plaçâl Cella, li che si vevin dât apontament par une sabide a buinore. O ai provât a domandâi se nus podave regalâ a noaltris da "La Patrie dal Friûl" l'editoriâl dal mês di Mai, numar dedicât al taramot: e nus à dit di sì confermantnus di jessi un nestri letôr!
“La fuarce e la fragjilitât”, cussì il titul dal editoriâl (fracait chi par leilu in anteprime), e je une riflession sul taramot, chel furlan dal 1976 e chel abrucês dai 6 di Avrîl di chest an. Tes peraulis di Capuozzo si cjatin tancj ricuarts di chel 6 di Mai in Friûl che al à segnade la storie de nestre tiere.
Inmò grazie di cûr a Toni Capuozzo!
Post
1 commento:
Simpri leade a la esperience dal taramot, de ricostruzion furlane e ai resint fats dal Abruç, chê di Franceschino Barazzutti, za sindic de ricostruzion a Cjavaç e vuê president de Associazion dai sindics dal taramot dal 1976 e dai comuns de ricostruzion, che al conte la sô esperience direte intune interviste che i ai fat jo: une testemoneance siore di informazions e cualchi stocade (ancje cognossi Franceschino Barazzutti e je stade une biele esperience).
Tes peraulis sedi di Capuozzo sedi di Barazzutti al è presint il ricognossiment a la funzion che e à vût Glesie Furlane (www.glesiefurlane.org) tal tignî dongje lis comunitâts ta chei tragjics moments.
No dome, tra lis novitâts ancje la gnove rubriche di Dree Valcic, za colaboradôr de riviste che di chest numar al firme “Lint Autonomiste”, une riflession su la situazion politiche regjonâl cuntun tai autonomist: la prime e je dedicade a lis candidaturis pes elezions europeanis.
E po dopo tante atualitât e aprofondiments simpri cuntun voli furlanist, “par un Friûl plui furlan”.
La riviste si pues cjatâle tes miôr ediculis e librariis, o ricevile a cjase par abonament o leile su Internet (www.lapatriedalfriul.org) li che dopo dai 15 dal mês si cjatin ducj i contignûts dal mês prime: di fat a son a pene stâts publicâts ducj i articui di Avrîl dal “Speciâl Erois Furlans”.
Posta un commento