La nestre Fieste Nazionâl: vierzìn i voi!

Ai 3 di Avrîl di ogni an si celebre la fieste de Patrie dal Friûl, ricuardant la nassite dal Stât Patriarcjâl di Aquilee.
Il contest
L’Imperadôr Indrì IV, tornant di Canossa, li che i jere stade gjavade la scomuniche di Pape Gregori VII, al ven salvât dal so amì Siart di Beilstein, Patriarcje di Aquilee, che lu jude a scjampâ de vuaite dai nobii che lu menaçavin. Par ringraziâlu de fedeltât e dal jutori prestât, ai 3 di Avrîl dal 1077 l’Imperadôr Indrì IV al firme la bole imperiâl che e conferìs al Patriarcje Siart il podê temporâl: pe prime volte la aree, che e cjape dentri i teritoris dal Friûl, Cjargne, Cjadovri, e ancje zonis che vuê a son in Austrie, Slovenie e Istrie, e je governade di une autoritât locâl e autonome che e à sede a Aquilee.
Lis funzions dal Patriarcjât
Il storic Gian Carlo Menis, te sô “Storie dal Friûl”, al scrîf «Si costituive cussì un vast e compat teritori che al veve di sotstâ ae uniche jurisdizion feudâl dal Patriarcje. Intune peraule al vignive fondât chel “principatus Italiae et Imperii”, politic-eclesiastic, che al sancive une realtât sociâl za consolidade mediant di un lunc procès storic e che, di li indevant, par trê secui e mieç, e varès unît i furlans in formis simpri plui elevadis di vite civîl».
Il Parlament dal Friûl, un dai prins in Europe
Il Stât Patriarcjâl si à di ricuardâlu ancje par un altri impuartant orghin istituzionâl: Il Parlament dal Friûl che al clamave adun rapresentants de glesie, de nobiltât e dai comuns. No je date precise che e documenti la fondazion di cheste istituzion, volude dal Patriarcje ancje par limitâ lis pressions de nobiltât. Ma al è sigûr che il Parlament dal Friûl al nassè ben prime dal 1215, cuant che in Ingletiere e fo scrite la Magna Charta Libertatum, il document che al fasarès tacâ la ete de democrazie parlamentâr.
Ma in Friûl o sin rivâts almancul 20 agns prime!
Il 3 di Avrîl in dì di vuê
Ricuardâ une date al à un valôr simbolic, ma no si pues fermâsi a une semplice celebrazion. Al à di jessi un moment par resonâ su la nestre storie, cence nostalgjiis anacronistichis, ma cu la cussience che il Stât Patriarcjâl al rapresente il prin e il plui lunc (al durà fintremai al 1420) esempli di autoguvier dal nestri teritori.
Ve chi ce che al diseve ancje Pre Checo Placerean.

Curiositâts: candidâts zovins e furlans

Come che o ai za dit se o fos a stâ a Udin o darès la mê preference a Simone Bressan (liste PdL), un gno amì che come me ancje se nol è di çampe, al pense che la tutele de lenghe furlane e sedi une robe juste. Mi à plasût che al à preparât ancje i santuts par furlan.
Une altre candidade, simpri mê amie, ma di chê altre bande e je Federica Angeli (liste çampe Arc di Sant Marc). Ancje jê e à fat i santuts par furlan. E no dome e pense e e dîs che la tutele linguistiche e je une robe impuartant: ancje lu dimostre cui fats e cun fuarce. E par chest o segnali une iniziative che e je previodude par vinars ai 4 di Avrîl: fracait chi par lei il program. Brave Federica!
Dut câs, o fâs une racomandazion finâl. Se tu sês un eletôr di Udin e tu âs a cûr la tutele de lenghe furlane ancje pal to comun, tu âs 2 sieltis intes elezions comunâls: se tu sês di centridrete vote Simone Bressan; se tu sês di centriçampe vote Federica Angeli (liste çampe Arc di Sant Marc).

Ringraziaments transoceanics

Vuê Luca mi à fat une biele sorprese publicant il video dal Sindic di Sant Durì: une biele sodisfazion personâl. Grazie Luca.
Ma il grazie e un cjâr salût lu mandi ancje e soredut al siôr Sindic di Sant Durì e a ducj i furlans argjentin di là jù.

Ce sdrondenade...

O rivi dome cumò a scrivi alc. Par dut il dì o ai scugnût cirî di ripiâmi di ce che o ai let sul gjornâl di vuê... sperant che al fos un pes di Avrîl.
Parcè che par me nol è just e no condivît ce che Renzo Tondo (te foto) vuê al à dit a proposit di lenghe furlane.
Secont me, i bêçs pe tutele de lenghe furlane no son bêçs strassâts. Tantis realtâts europeanis ancje se a son plurilengâls, a son un grum svilupadis dal pont di viste economic, culturâl e turistic: Catalogne, Paîs Basc, Lussemburc, Irlande, Gales, e vie indevant. Pal svilup economic il plurilinguisim nol è avonde, ma dal sigûr al jude: e za chest al varès di fâ rifleti su la sô impuartance, e su chê des risorsis di investî parsore. No par câs, i paîs a pene nomenâts a investissin une vore di plui di bêçs di ce che no fâs la nestre regjon. Investî risorsis tal pluirilinguisim no dome al cree puescj di vore leâts in maniere direte a chest cjamp, ma al met in vore un circul virtuôs che al zove ae inovazion e al svilup di un indot une vore larc. Intune economie globalizade come la nestre, il plurilinguisim al rapresente un vantaç che al permet di caraterizâ i prodots cence il pericul di omologâsi: par fâ un tant no coventin finanziaments a ploie, ma une politiche linguistiche serie. Ve che alore, investî ta chest cjamp, plui che util, al somee necessari.
E no baste dome la famee. Daûr di diviersis ricercjis di nature sociolinguistiche, tai ultins agns la lenghe furlane e à pierdût l’un par cent dai fevelants ogni an. Il furlan al à pierdût plui teren tai ultins cuarante agns che no tai cuatri secui prime. Chest al dipent massime dai gambiaments radicâi che a àn segnât tal stes periodi no dome la societât furlane, ma il mont intîr. In dì di vuê i mieçs di comunicazion a àn une presince mai cussì fuarte, la scolarizazion e rive pardut e i percors formatîfs a domandin timps simpri plui luncs, cualsisedi ativitât e à di passâ par procès che a domandin un ûs grandonon di documents e materiâi scrits. Tune realtât come cheste, pensâ che une lenghe e puedi sorevivi cence une sô presince publiche e uficiâl te scuele, tai mieçs di comunicazion, te aministrazion publiche e je, te miôr des ipotesis, pure utopie e, te piês, une semplice façade par platâ la volontât di copâ une lenghe.

O scuen ametilu: o soi restât mâl pes declarazions che o ai let... cussì mâl che il Luca, mi à dedicât ancje un post...