Pedalant in Patagonie cun Max Mauro

Cun plasê o fasìn ancje cheste segnalazion: forsit o vês sintût che Max Mauro, gjornalist curiôs e ciclist aventurîr, al à di pôc publicât “Patagonia controvento - Viaggio a pedali lungo il Camino Austral e la Terra del Fuoco”: un viaç inte Americhe Latine cuntun mieç lent e indipendent: la biciclete! Une pedalade dilunc un continent par cognossi no dome un puest che al sa inmò di aventure, ma soredut oms e memoriis dal passât. 1800 km ae discuvierte di int, ma ancje di se stes. Di lei!
(edicicloeditore 2006, chi in bande la cuviertine).

Max Mauro e Arbe Garbe a Rivis Darcjan

Dal Comun di Rivis Darcjan-Assessorât ae culture nus rive cheste segnalazion: sabide ai 18 di Març aes 21.00 li dal Centri Civic in place a Rivis, Max Mauro al presente il so libri “La mia casa è dove sono felice” (ed. Kappa Vu 2005, chi in bande la cuviertine). Cun lui a saran i Arbe Garbe, che in formazion acustiche a compagnaran cun musichis a teme cheste biele serade di leterature e riflession su la migrazion. Un apontament di no pierdi!

Il Tiliment al passe ancje par Bruxelles

Fevelìn in tic di Ambient: lunis passât i Sindics di Ruvigne, Pinçan, Spilimberc, Sant Denêl e Dignan a son stâts a Bruxelles par fevelâ dal Tiliment e par manifestâ la lôr (ma che e je ancje la mê) contrarietât ae realizazion des cassis di espansion tal Tiliment. Chi in bande e je la simulazion de prime casse (indi àn di fant 3). Grazie ae associazion Assieme per il Tagliamento, par vêmi prestade la foto. Lait a viodi il lôr sît intenet www.assiemeperiltagliamento.org.
Salvìn il Tiliment! Tiliment libar!
NO CASSIS DI ESPANSION TAL TILIMENT!

Temperadure in aument ancje in place a Maian / 3

Finalmentri e je domenie: la prime di chest blog. E cul aiaron e je rivade ancje la uficializazion des candidaturis.
A Maian a saran in 4 a cori par deventâ Sindic.

Chi sot i nons dai candidâts pe incarghe di Prin Citadin di Maian e lis listis di riferiment:

1. Claudio Zonta: poiât di FI-AN-UDC, Majano al Centro, Lega Nord;
2. Patrick Bortolotti: poiât di Patrick per Majano;
3. Margherita Plos: poiade di Alternativa Sociale;
4. Lieto Molinaro: poiât di Unione per Majano, la Nuova Majano, Vivere Majano.

Buine corse a ducj!

Temperadure in aument ancje in place a Maian / 2

Come che o disevi chê altre dì, no dome Zonta e Molinaro si contindaran la poltrone di Sindic di Maian: ancje Margherita Plos si è candidade pe corse al puest di Prin Citadin.
Ma sino sigûrs che nol sedi inmò cualchidun?...

O soi tornât in piste!

Mandi a ducj,
doman sabide ai 11 di Març a scjadin i tiermins pe presentazion des listis dai candidâts pe elezions comunâls dai 9 e 10 di Avrîl dal 2006: al è ancje il gno non.
Parcè che o ai inmò alc di dî e soredut voie di fâ par Maian e pe int dal gno paîs!
Forsit e je la decision plui dificile... Ma mi plasin lis sfidis, soredut chês cun me stes!