Pre Toni ricuardât in consei comunâl

Tal ultin consei comunâl o ai volût ricuardâ pre Toni Beline e o scuen ameti che vie pe sentade no soi stât dome jo a fâ riferiment a chest grant personaç dal nestri Friûl.
Us met achì il gno intervent che al à viert l'ultin consei comunâl (intant che o fasevi chest intervent, e je stade distribuîde a ducj i conseîrs une copie dal ultin numar da “La Patrie dal Friûl”):

"O volarès domandâ dome cualchi minût par ricuardâ une figure fondamentâl par dut il Friûl e i furlans: pre Toni Beline, mancjât ai 23 di Avrîl dal 2007.
Pre Toni cualchi volte al vignive ancje a Maian a cjatâ une sô sûr che e je nestre concitadine.
La muart di chest predi, inteletuâl, furlanist e lasse un grant vueit no dome par chei che lu àn cognossût, ma soredut par dut il popul furlan che, ancje se no ducj si rindin cont, al è restât plui puar.
La maniere piês par ricuardâlu al sarès limitâsi a sempliç discors di circostance, dismenteantsi di ce che al à dit, scrit e puartât indevant.
Ta chest moment storic li che ancje in Regjon si à tacât a discuti di gnovis leçs che in cualchi câs (baste viodi la propueste 257 de Zonte Illy) a pucin di vecjo plui di chês che a son za in vore, al sarès stât impuartant vêlu inmò cun nô cu lis sôs riflessions e invîts a no vergognâsi de nestre identitât furlane e tant mancul de nestre lenghe, invidantnus a jessi braurôs di ce che di plui fuart e biel o vin te nestre culture: la nestre lenghe furlane.
O ai vude la furtune di cognossilu di persone tai ultins mês de sô vite e mi auguri che il testament che nus à lassât al podedi jessi pardabon chê semence che e cressarà simpri plui ancje cumò che lui al à lassât cheste esistence terene. In cheste ete globalizade e cu la tendince a omologâsi, ducj, ancje i singui comuns e i singui conseîs comunâi a àn il dovê di difindi la identitât de nestre int, tacant dai plui piçui za tes scuelis, parcè che al è di bant cjalâsi ator pal mont se no si cognòs di dulà che si ven. Dal sigûr, cjapant cussience de nestre realtât nus sarà ancje plui facil frontâ lis grandis sfidis ator pal mont.
Come che al à dit ancje di resint il president de Sardegne Soru “No capìs parcè che noaltris o vin la responsabilitât di protezi un nuraghe, di protezi e salvâ cualchi piere di une citât puniche e magari o vin di lâ a pierdi une robe vive tant che la lenghe, che e fevele di nô cetant plui di un muret punic: e fevele di un popul e di une storie cent mil voltis di plui di cuatri pieris metudis in rie”. E o soi convint che ancje pre Toni le varès pensade te stesse maniere ancje se noaltris no vin i nuraghis, parcè che no je une cuestion ni di colôr politic ni di origjins, ma di valôrs di fonde di un popul, che al sedi sart o furlan, ma tal stes câs popui cuntun element identitari ben definît, ma in pericul.
Grazie par chest spazi che mi è stât dât in memorie di pre Toni Beline".