Ritrat

O sieri l'an cuntune citazion di pre Josef Marchet (te foto), cu la sperance che l'an che al rive al puarti un pocje di lûs a chest Friûl, par che si rindi cont di ce fuarce che al à dentri, cence dibisugne di lâ a cîri di fûr idui che no i coventin.

Il talian, e ancje il furlan intalianât, al è masse tacât ai siei idui, par fermâsi a cjalâ di ce paltan che a son fats: i coste mancul fature sierâ i voi e tornâ a butâsi in zenoglon; al à fam di peçots, di bandierinis, di galiardets, di nastrins, di patachis, di filistrins; al à sêt di peraulis, di bufulis, di mitologjiis, di sflocjis, di bausiis; al à bisugne di jessi talpinât e coionât. Tant che un vueli uciel di scjaipule, che se lu molin, al fâs une svoletade pal bearç e po al torne di bessôl inte sô preson.

pre Josef Marchet - Patrie dal Friûl, Setembar 1951

Une sperance pal an che al ven

Sperant che l'an gnûf nus fasi un biel regâl, us met chi une biele cjançon che e fevele di pâs. Mi somee une biele maniere par sierâ un an e vierzint un gnûf.

<br/><a href="http://video.msn.com/video.aspx?vid=0681ba9b-9bad-4ce1-886f-7f459bc7fb65" target="_new" title="ai preat la biele stele">Video: ai preat la biele stele</a>

O AI PREÂT LA BIELE STELE

O ai preât la biele stele,
ducj i sants dal Paradîs.
Che il Signôr al fermi la vuere
e il gnò ben al torni in paîs.
Ma tu stele, biele stele
va palese il gno destin.
Va daûr di chê montagne
là che al è il gno curisin.

Interviste su Teleudine/ter

Dopo de prime pontade a TeleUdine e seconde pontade, ve ca la tierce e ultime part de interviste.
Un grazie e un salût a dute la redazion.

Consei pe leture: Pinochio

Ta chestis zornadis fredis, ce isal di miôr di un bon libri let tal cliput dongje de stue? E alore ve ca un consei, tornant a proponi la rubriche di "pagjine7".
Buine leture cu "Lis baronadis di Pinochio" voltadis par furlan di pre Antoni Beline.

Cjariât di christianromanini

Ps: un grazie al costumist pe maiute e un grazie a la regjiste pe assistence tecniche! =)

Rat-man a scuele

Il Consorzi universitari furlan al à publicât un posterlibri di Sandri Di Suald (che o ringrazii par vêmi mandât la imagjin dal poster) che al insegne a dissegnâ i fumuts. E lu fâs par furlan cun Ratman.
Un biel progjet pes scuelis.

Une c***de sul comò

O ai stât a viodi il cine di Aldo, Giovanni e Giacomo "Il Cosmo sul comò" casualmentri cu la Ninine, mê sûr e gno cugnât, Laura e Max. A part cualchi batude e cualchi espression pardabon simpatichis, tal complès il cine no mi à plasût gran: masse voltis lent, masse batudis scontadis, nancje di meti, par esempli, cun Tre uomini e una gamba o i spetacui dal vîf.
Mi soi ancje indurmidît e mi àn pocât parcè che o ronfavi!

Bon Nadâl cul Puccipresepi

Cuant che lu ai viodût mi soi ribaltât dal ridi. E cussì o ai voie di condividi cun voaltris cheste gjonde te zornade che al è nassût il Bambin Jesù, par che e sedi fieste vere e in ligrie.
Ve ca il Puccipresepi e cun di plui in version furlane!
E ringraziant chei mats dai Corona's o auguri a ducj i letôrs dal blog un Bon Nadâl!

Pinsîr di Nadâl

Doman e je la dì de Fieste: in spiete di saludâ il Bambin Jesù, ta cheste vilie us regali a ducj voaltris une des plui bielis preieris di Nadâl che o cognossi.

Pinsîr di Nadâl
Ven jù Signôr
dal to cîl di glorie,
ven a comedâ la nestre storie.

Ven jù Signôr
in cheste puare tiere,
là che a regnin
svindic, fam e vuere.

Ven jù Signôr
a sfantâ la pôre e il scûr,
a morestâ e a sclipî il nestri cûr.

Ven jù ancje vuê
come chê dì a Betlem,
ven a viodi dal puar
e di chel che al zem.

Ven jù in chest mont
simpri plui forest:
dome cu la tô gracie
si podarà meti in sest.

Ven jù Signôr
dal to biel cîl stelât,
ven a viodi dal mont
che al è malât.

Ven jù Signôr
a fânus il grant regâl
dal perdon e de pâs
come tal prin Nadâl.

pre Antoni Beline

Scjassade a Traversetolo

Vuê dopomisdì al è stât un taramot a Traversetolo (te foto la cjartine de zone cul cerclut sul epicentri), paîs che di agns al è leât a Maian cuntun pat di amicizie. La scosse e je stade di 5,2 grâts Richter: o ai fat cualchi telefonade e mi àn dit che al somee che nissun si sedi fat mâl... dome tante pôre e cualchi dam tai edificis plui vecjos.

Regalaitlu a Nadâl

Jo lu ai za fat, fasêtlu ancje voaltris: regalait il Dizionari Ortografic Furlan di Sandri Carrozzo: il prin dizionari par furlan in grafie uficiâl realizât de Serling e de Coop di Informazion furlane.
Une biele idee par un regâl di Nadâl furlan!

O soi "balât"

Come cuant che o jeri frut... mi soi inmalât sot fiestis: ogni volte che al ven dongje Nadâl, mi bechi il rafredôr e cussì o ai stât dute la domenie sierât in cjase a stranudâ =(
E vuê mi tocje ancje di lâ a Triest... etciù!

A proposit di cine

O feveli inmò di cine stant che Dicembar al è un mês avonde plen di novitâts: mostre dal Cine furlan (cun tancj compliments al Brâf furlan pe vitorie) e pes jessudis di diviers films... par esempli la setemane passade al è vignût fûr "Come Dio comanda" di Salvatores che al à zirât ancje a Maian.
Tal trailer si viôt ancje la nestre scuele!
Trentespagnolets i à dedicât une sintetiche recension, ma ancje al nestri Thermo al à voie di dî la sô plui che sul cine, suntune recension che nancje a mi nol è che mi vedi esaltât. Ma ancje jo come lui, no ai viodût il cine: Thermo, magari o lin a viodilu insiemit, no? =)

Alc&ce

Ve chi, in regâl cu la Vite Catoliche, il gnûf numar di Alc&cè, il gjornalut par fruts dut in marilenghe curât de brave Erika Adami, realizât cul contribût de Arlef.
E la cuviertine no podeve no jessi dedicade al Nadâl.
Par sugjeriments e curiositâts sul gjornalut, si pues scrivi une e-mail a Erika Adami, coordenadore de riviste, ae direzion: adami@lavitacattolica.it

Il diari di Tosoni

Al è vignût fûr l'ultin numar pal 2008 dal Diari diret di Mauro Tosono (te foto, la prime pagjine). Par lei il pdf, fracait chi.

Dut un cine!

La Patrie di Dicembar e je on line. O podês lei il numar fracant chi.

Il speciâl di chest numar al è dedicât al cine.

Us segnali une biele interviste al prof. Remo Cacitti.

Biel di lei ancje "il Ferâl" cuntun editoriâl di pre Toni su pari Turolt.

Marcjât de solidarietât

Come ogni an a Sant Tomâs il grup dai zovins dal paîs al fâs il marcjât de solidarietât. I fonts che si cjapin sù a son destinâts a la "Cjase Famee Luigi Scrosoppi" une struture che e da une famee cui che nol pues plui vênt une sô.
L'apontament cu la solidarietât al è par domenie ai 21 tor 2 e mieze fint 9 di sere.
Tal prin coment, us met cualchi element di plui par cognossi la iniziative.

Interviste su TeleUdine/bis

Dopo de prime pontade a TeleUdine, ve ca la seconde part des intervistis li che o soi ancje jo.

Conciert di Nadâl

Ve ca l'invît de Corâl di Maian che come ogni an e fâs i auguris di Nadâl e bon Principi cuntun biel conciert. Di cualchi an al è ancje il premi "Une vôs par ducj" che la famee di Franco Maschio e dediche a la memorie dal nono Pippo.
L'apontament al è par sabide a lis 20.45 no tal auditorium di Maian, ma TE GLESIE DI MAIAN. Ancje se in glesie al è plui grant, us consei dut câs di rivâ adore parcè che pal solit e rive tante tante int.

Pre Toni su VTC

Come che nus segnale Marino, ve ca une pagjine dal sît di Video Tele Carnia dedicade a pre Antoni. La pagjine si clame "Cirint lis olmis di Diu" e e presente 2 intervents (intro di Celestino Vezzi e une riflession di pre Romano) cun 7 filmâts curts li che si sint a fevelâ pre Antoni di:

1° Cirint lis olmis di Diu

2° La famee

3° I vecjos

4° I cunfins

5° La tiere

6° La scuele

7° La muart

La tô cjançon

Int di Maian tra i delegâts dal Pdl

Sul Messaggero di vuê a son stâts publicâts i delegâts dal Fvg pal prin congrès dal Pdl.
O ai viodût che e je ancje int di Maian: viodìn se o ricognossês ancje voaltris cualchidun tra i 61 che il partît (?) al à nomenât. Forsit, ancje se si spietave la fusion di diviers sogjets politics, cualchidun si è za fondût...
Ve ca i nons: Lorenzo Bosetti, Astrid Burelli, Mattia Callegaro, Alessandro Caragnano, Jacopo Chiaruttini, Claudia Collorone, Franco Costantini, Vittorio Covella, Giacomo Crismale, Antonio D’Alfonso, Sergio Dapiran, Giancarlo De Zorzi, Giovanni Di Meo, Bruno Eva, Roberto Facchin, Alvise Faotto, Alan Gadler, Clara Gallosi, Ettore Ganz, Giovanna Iesse, Lauretta Iuretig, Thomas Jansen, Bedel Kobla, Giancarlo Laboranti, Paolo Lazzeri, Chiara Liut, Rocco Lo Bianco, Emanuele Loperfido, Giorgio Maranzana, Livio Maraspin, Sergio Mari, Paola Marsich, Davide Mauro, Franca Montini, Carlo Muset, Francesca Musto, Fernando Padelletti, Gianluca Papallo, Debora Petri, Guido Pilutti, Margherita Plos, Rita Rapotez, Matteo Rizzato, Walter Santarossa, Roberto Santin, Manlio Savorgnan, Adriano Schreiber, Moreno Sfiligoi, Pierpaolo Silli, Walter Stringaro, Andrea Tognato, Raffaella Tomada, Paolo Turozzi, Roberta Vlahov, Natale Zaccuri, Renata Zampa, Roberta Zanet, Gianluigi Zanusso, Denis Zigante, Nevio Zorzetto, Daniele Zotto.

Lunis a Manià cun Robin Williams par furlan

Si visaiso che ancje Robin Williams al à cognossût la lenghe furlane e il mert al è di Anna Galliena in Being Human (Le cinque vite di Hector) di Bill Forsyth (1993)? Se la rispueste e je no, al è il moment di lei La Patrie dal Friûl di Dicembar, che e propon un speciâl sul Cine in lenghe furlane. La sielte di fevelâ de “setime art” e ven par vie che a Dicembar si davuelç la premiazion dal Concors par Senegjaturis Cinematografichis inmaneât dal Cec di Udin, che al organize ancje la Mostre dal Cine Furlan.
Ma no dome cine: il nestri diretôr Dree Venier al interviste il professôr Remo Cacitti, autôr di un dai libris insom aes classifichis di vendite dal moment, scrit cun Corrado Augias: “Inchiesta sul cristianesimo - Come si costruisce una religione”. Te interviste il prof. Cacitti al dîs “Glesie Furlane e je une associazion di predis e di laics che e opare tal plen spirt dal ultin Concili Vatican II: e je la glesie – in câs – che e sta tradint chel Concili”.
Dut chest e tant altri si podarà sintî e lei ancje a Manià li de sale “Antonio Centa” dal teatri “Verdi” ai 15 di Dicembar a lis 8 e mieze di sere, cuant che il Comun de “capitâl dai curtìs” al ospitarà la presentazion dal Numar: a intervegnarìn jo, Alex Olivetto, Massimo Garlatti-Costa, regjist e autôr dal documentari "Friûl viaç te storie" che al sarà proietât vie pe serade.
La riviste e je disponibil intes miôr ediculis e librariis. Par savê cemût abonâsi o viodi i numars passâts si pues visitâ il sît www.lapatriedalfriul.org .

Gramatiche fonetiche furlane

Mi veve dit che si jere maridât in Catalogne, ma tai ultins timps al è simpri ator par presentâ libris. L'ultin e je la "Gramatiche fonetiche furlane" di Sandri Carrozzo. Apontament par sabide ai 13 di Dicembar a lis 5 e mieze in Regjon a Udin.
Par savê alc di plui, fracait chi.

Daniele inmò a Rome

E continue la cronache de esperience dal grup di furlans a la cunvigne dai emigrants che si davuelç ta chescj dîs a Rome. Nestri corispondent al è Daniele Martina di Gjenue che dopo de prime pontade, nus inzorne su ce che al è sucedût îr.

Rome, ai 12 di Dicembar

Zornade penze chê di îr. Dopo un cafè otim bevût li dal storic bar Giolitti ufiert dal president dal Fogolâr di Rome Adriano Degano, il grup si è metût in file par jentrâ a Montecitorio. Cui che come me al vîf la politiche cun passion e interès, passâ la soie di chê sale al è stât une grande emozion. Mi soi sentât intun puest centrâl e cun chei altris o ai assistût cun atenzion ai intervents di Franco Frattini, Gianfranco Fini, Renato Schifani e Giorgio Napolitano. A la fin de assemblee la nestre ativiste dal Fogolâr furlan di Santo Domingo, la simpatiche e biele Sandy Gobet e je lade in Rai par une interviste, intant che la segretarie dal Senatôr Ferruccio Saro nus spietave me, Ilaria, Walter e Igor. Nus à fat visitâ lis stanziis dal Senât e dopo nus à compagnât al riceviment cul parlamentâr di Martignà. A lis 4 e mieze dal dopomisdì a son tacadis lis voris li de FAO, ocasion par cognossi i furlan Marco Bravin di Mendoza, Aljandro Borghese di Cordoba, la za nomenade Sandy di Santo Domingo, la venite (ma amie dai furlans!) Sarah Bianquin Chiapinoto di Santa Maria in Brasîl. Tai voi di Sandro Faner dal Fogolâr furlan di Bahia Blanca o ai viodût dute la maravee di jessi rivât pe prime volte in Italie e il desideri di lâ il prime pussibil a Aquilee, tiere dai siei vons. Tal dopomisdì une biele fevelade tra di nô e l'Assessôr regjonâl Roberto Molinaro disponibil a scoltânus e a conseânus. Dopo une cene intun piçul ristorant, une sane durmide par frontâ vuê lis voris di comission e in serade grant gale cun specialitâts regjonâls (di chestis, tantis a son furlanis!).
Di Rome un “Mandi di cûr!”

Daniele Martina
(al continue...)

La impuartence di une date

Il President de Provincie di Udin le à butade a la fieste pai 20 agns dal Istitût ladin furlan: Fâ une fieste de braure furlane.
Ancje jo o soi convint che par un popul al sedi impuartant vê une date di celebrâ, par ricuardâ e par fâ cressi la cussience (cence però fermâsi dome a une date sul lunari!).
Par dî la veretât une fieste cussì e je za chê dai 3 di Avrîl e mi à fat plasê lei tal comunicât de Provincie che no si tocjarà il valôr e la impuartance di chê date li. Duncje, volint jessi propositîf no mi displâs che si feveli ancje di altris datis e stant che il President Fontanini nol à inmò decidût mi permet di sugjerî la date dai 27 di Fevrâr dal 1511, che za di cualchi an a Radio Onde Furlane a àn batiade Zornade furlane dai dirits e che e cole par ricuardâ il grant riviel contadin de joibe grasse dai 1511 cuant che il popul, vint cjapade cussience de sô fuarce, al à brusât i cjistiei dai siorons di in chê volte che lu oprimevin.
Par lei il comunicât de Provincie di Udin, lait sul prin coment. E voaltris ce proponêso?

Furlan in Argjentine

Us segnali une iniziative che si fasarà doman a Udin:

La Fondazion CRUP
Vie Manin, 15 - Udin

la Universitât dal Friûl - CIRF
Vie Petracco, 6 - Udin

e la CLAPE - Friûl dal Mont
Vie del Sale, 9 - Udin

A àn cetant plasê di invidâUs al incuintri di studi di joibe ai 11 di Dicembar cu ven,
li de sale riunions de Fondazion CRUP di Udin, in vie Manin 15, a tacâ des 11.00 sul argoment:

Fevelâ furlan in Argjentine

Imagjinis e impressions di un viaç di ricercje in Argjentine, in preparazion de tesi di lauree di Sofia Solayne Noboa Feliz in Lenghis e Leteraturis forestis, puartade indevant cu la assistence de Prof. Rizzolatti, diretore dal CIRF.

Sofia, partide ai 9 di Otubar e tornade ai 15 di Novembar di chest an, e à contatât cuasi 150 fameis di emigrâts furlans residents a Buenos Aires, a Cordoba e a Colonia Caroya. Cun lôr, e à compilât un cuestionari di pueste, e regjistrât imagjins e intervistis une vore significativis.

La Sô presince e sarà cetant preseade.

Salûts di rispiet,
Dot. Silvano Antonini Canterin
Prof. Piera Rizzolatti
Siôr Gianpaolo Della Schiava

Segretarie dal incuintri:
CLAPE – Friûl dal Mont
Vie Sottomonte 30
33011 – Dartigne
mail: info@clape.it
sît: www.clape.it

Daniele, un furlan a Rome

O vin un corispondent inviât a Rome: Daniele Martina, furlan spilimbergês di Gjenue. Chi us met il so rapuart de trasfierte pe riunion che e je a Rome cun ducj i migrants.

A lis sîs di buinore di un miercus di Dicembar, cjamât di ploie, Rome e jeve ben planc tal gran "va e ven" di taxi che a corin come jeurs jù pes stradis inmò desiertis e cuviertis di piere.

Ca di dôs oris si cjatarìn in cuatricent e forsit ancje di plui li de Cjamare dai Deputâts dulà che o sarìn ricevût dal President de Repubbliche e di chei dai doi rams dal Parlament. Îr vie pe fare di acreditament dal palaç grandonon de Fao, progjetât par jessi sede dal “Ministeri pe Afriche orientâl taliane”; si respirave un aiar che al travanave ligrie messedade cun preocupazion. La ligrie e jere di nô zovins, la novitât di jentrâ pe prime volte in chel che il nestri Pisolini al definive “Il Palaç”, l’entusiasim di dâsi dongje e cognossisi. Pôris par un avignî malsigûr e pôc clâr, in spiete par chel che al vignarà fûr di cheste conference, cu la sperance di evitâ lis solitis frasis fatis e la retoriche vetero-tricoloriste, un miscliç pericolôs di stereotips esaltâts a la massime potence cuant che a son i mondiâi di balon. Noaltris furlans come simpri dividûts in Stâts difarents si sin riunîts fûr, a la stazion Termini o ai spietât Walter Matiussi delegât de Efasce e Ilaria Cigar di Triest. Dopo une gulizion svelte svelte cuntun panin cu la porchete, si sin sistemâts tai albiercs e a lis 3 e mieze di dopomisdì (miezore prime dal previst) o jerin za li de Fao contents e curiôs come fruts tal prin dì di scuele. A spietânus al jere Igor Cerno de Union Emigrants Slovens. Grande e je stade la sorprese cuant che li dal banc des informazions o ai sintût a fevelâ par furlan: e jere Michela une zovine ativiste dal Fogolâr Furlan di Rome, origjinarie di Flaiban. La nestre amie e domandave di partecipâ a la manifestazion, e dopo un pocje di resistence, i responsabili i àn dât il permès. Une furlane di plui, la scuadre e cjape farce!!! A viodile cussì la nestre delegazion no sarà numerose, i Comitèes dal forest a àn nomenâts pôcs furlans, ancje se la nestre e je une des diasporis plui organizadis, cun centenârs di Fogolârs, Fameis, Circui, Club e vie indevant. Pôcs ma cun tante voie di tignî alte la bandiere blu cu la acuile zale che e bat tal cûr e tancj programs tal cjâf.
Mandi Friûl.

Scritôrs o letôrs?

Vuê o ai voie di fevelâ di un gno passetimp. Se no si à capît, mi plâs scrivi e mi plâs soredut lei, ancje se in efiets il timp nol è plui tant come che al podeve jessi cualchi an indaûr. Però rispiet a chê volte, o ai scuviert un mont: i libris in lenghe furlane. O miôr: ju cognossevi ancje prime, ma forsit, cuant che no savevi ni lei ni scrivi par furlan, mi limitavi a cognossiju di lontan e se o cjatavi alc di curt lu frontavi. Se invezit o cjatavi un libri o une conte lungje mi fermavi cence rivâ insom, ma no par colpe dal autôr, ma parcè che o jeri analfabet te mê lenghe, parcè che la scuele di un stât, che al à pôre de ricjece dade de diviersitât linguistiche, e à simpri preferît no spacâsi masse par insegnâ la lenghe locâl al popul, che invezit al varès vût di jessi unît "intune arme, intune lenghe, intun altâr..." (almancul cussì mi somee che al disès Manzoni). Cumò a son lis leçs di tutele, ma la situazion no je masse gambiade parcè che la plui part de int e je analfabete te lenghe furlane e duncje si spavente, e bute in bande, e cjale cuntun tic di sogjezion i libris in lenghe furlane, la sô lenghe... O al limit si ferme a lei alc di curt: cualchi poesie, cualchi conte curte, cualchi... blog. Dut chest mi è vignût iniments fevelant cuntun amì a proposit de crisi dai premis leteraris: chest an il Sant Simon nol è stât assegnât e ancje sul gjornâl si al let cualchi considerazion in mert (cjalait il prin coment).
Un popul che nol lei, al è dificil che al tachi a scrivi. E je vere che magari autôrs di gale a son za rârs di se: tal articul si ricuarde Pasolini pe poesie, ma si dismentee pre Antoni Beline pe prose. Jo stes no ai rivât inmò a lei ducj i libris che al à scrit pre Toni. Trops di chei che a lei chest blog lu àno za fat? La rispueste a cheste ultime domande e je la rispueste secont me al parcè che i primis leteraris a son in crisi. Fintremai che no si varà un public di letôrs, al sarà dificil vê une cressite. E di chest no si pues fâ une colpe a la int. Ma no si pues sierâ i voi devant de responsabilitât di cui che al à la pussibilitât di produsi. Mi plasarès che ancje i autôrs a frontassin il marcjât dal libri in lenghe furlane e lu fasessin no contentantsi di produsi art, ma spindintsi par promovi la lôr produzion. Nol baste scrivi un biel libri se dopo nissun lu lei. E par tirâ dongje il letôr tocje ingolosîlu, magari prin cun alc di acessibil ancje in tiermins di lungjece e dopo lant a proponi tescj cun snait e cun elements che a podedin plasê ai zovins: tal cine par furlan si à viodût, ma te leterature mi ven tal cjâf Donald dal Tiliment, Niari, il stes pre Toni al scriveve "...et incarnatus est", test teologjic une vore profont e dificil, ma al veve tacât tradusint e proponint al so popul lis flabis di Fedro (il prin lavôr par furlan) o Pinochio o tescj man a man simpri plui articolâts. Dome puartant par man la int pas dopo pas, si podarà vê un public che al cres e al domande simpri plui libri e cun nivel simpri plui grant. Se invezit si bandone la int, no stin a lamentâsi se dopo i premis leteraris no vignaran plui assegnâts.

Il Presepe di Franco Maschio a Udin

Aromai e je une tradizion. Lant sù a Maian, cuant che si rive su la curve di Deveà, prin de Farbe, e je une plaçute li che ogni an Franco Maschio (te foto) al prepare il so presepe. Chest an il presepe lu prepare a Udin, sot dal palaç dal Municipi cu la poie de Provincie di Udin. Compliments a Franco, ma ancje al president Fontanini par regâl che al à volût fâ ai furlans.

Interviste su TeleUdine

O soi stât contatât di TeleUdine. Chi us met il link li che si pues viodi la mê interviste dentri dal program Oblò: cun me a son stadis intervistadis ancje altris personis che forsit o cognossês...
Un grazie a la redazion di TeleUdine che mi à dât cheste oportunitât.

Dof su cjarte

Tancj si lamentin che cumò i dizionaris par furlan in grafie uficiâl a son dome sui discuts: "Al coventarès un ancje su cjarte!". Osservazion juste! E duncje ve chi la rispueste: come che nus vise Sandri Carrozzo, miercus che al ven ai 10 di Dicembar, a sîs di sere, li de Sale Cunvignis de Fondazion CRUP, in vie Manin 15, si presentarà il gnûf dizionari talian-furlan / furlan-talian de Serling e di Informazion furlane.
A fevelaran la prof.e Silvana Schiavi Fachin, Antonio Buiani e Sandri Carrozzo.
Il dizionari al è in vendite a 48 euros, ma par cui che al va a la presentazion o lu ordene prin des fiestis di Nadâl al è scontât a 40 euros.

Musiche e Premi Friûl

Cualchi zornade indaûr us ai fevelât dal Premi Friûl e de Rassegne Musiche.
Teleudine nus conte cemût che e je lade cuntun servizi specific, e invezit chi sul Gazzettino o cjatais l'articul.

Iniziativis di solidarietât

Lunis e je la fieste de Madone e come ogni an la Pro Majano e coordine lis iniziativis di solidarietât (te foto, i HARMONY GOSPEL SINGERS) inmaneadis par cjapâ sù fonts che a laran a la fondazion “Città della Speranza” pe realizazion de "Torre di Ricerca", prin centri european di ricercje su dutis lis patologjiis pediatrichis e a la Vie di Nadâl di Davian.

Ve chi il calendari complet.

A 20 agns de censure

Tal 1988 il grup di studi "Glesie local" al publicave un document cul titul "Puedie nassi une gnove zornade pe glesie?". La riflession e fo censurade. Forsit che i vescui e dut l'implant de jerarchie clericâl no vessin gradît un atac cussì decîs? Dopo vincj agns di chel at, domenie ai 7 di Dicembar Glesie furlane e à inmaneade une cunvigne su chel document. Si cjatisi a Vençon in domo (te foto) pal Gjespui cjantât e dopo a intervignaran pre Tonin Cappellari, prof. Maria Cristina Bartolomei, pre Nicolino Borgo e Federico dai Ros.

Sperant te cure definitive

Vuê e je la zornade cuintri dal Aids. No stin a dismenteâsi!

Sant'Andree il Diretôr su la bree

Tancj auguris di bon onomastic al nestri Dreetôr.
In spiete, ma cence grandis sperancis, che al torni...

I 20 agns dal Istitût ladin furlan

Vinars ai 5 di Dicembar h. 20.30 a Cjase Turoldo di Coder di Sedean FIESTE pai 20 agns di ativitât dal Istitût Ladin Furlan “Pre Checo Placerean”.
Intant de serade si podarà sintî la vive vôs di pre Checo (te foto) cuant che, tal Istât dal 1976, dopo dal taramot, al fevelà a Aquilee cuntun discors memorabil.
Fracait chi par lei dut il program.

Cui vinçaraial chest an?

A tornin il Premi Friûl e la rassegne Musiche dal Comun di Udin. Dal sigûr chest al è un dai apontaments plui impuartants pe Musiche furlane li che si sint gnovis propuestis e confermis di sigûr valôr. L'an passât, il Premi Friûl 2007 al è stât vinçût di R.esistence in Dub (fracait chi par gjoldisi une biele cerce de lôr musiche) e chi sot us met un lôr toc live di chê sere. Apontament duncje al Palamostre a Udin usgnot e doman a lis 9 di sere.

Grignei di scuele

De mestre Lorele la Morete us ai za fevelât.

Ma stant che secont me la scuele e je un argoment fondamentâl par lavorâ in teme di tutele de lenghe furlane, mi plâs presenta ancje a voaltris chest biel progjet de scuele di Codroip.

Grignei di scuele che e dopre un blog come imprest didatic ancje par furlan: compliments a la mestre Lorele e bulos ducj chei fruts che si son butâts te Rêt.

E se us interesse di lei cualchi biele considerazion su la scuele, scrite di pre Antoni Beline, us torni a visâ di dismenteâsi di "Une scuele pai furlans" o il speciâl de Patrie di Otubar 2007 dedicât propit a chest argoment (te foto la cuviertine).

O deventi barbe!

Îr o ai stât a cjatâ mê sûr e stant che al jere un tic di timp che o volevi dîlu, cumò lu dîs: o deventi barbe!
O soi contenton!
Al è inmò ce spietâ, ma cumò si tache ancje viodi un pocje di panzute :)
Mê sûr mi à ancje dit che no volaran savê se e sarà une frute o se al sarà un frut: l'impuartant al è che e/al stedi ben e jo o condivît cheste idee.
Auguris duncje a la future mame, al futûr papà e a la future gneçute o futûr nevodut.

Zornade cuintri de violence su lis feminis

Vuê o torni a proponi un test che o vevi scrit l'an passât... parcè che ciertis robis a restin simpri validis.
O dedichi ancje jo un pinsîr a la zornade internazionâl cuintri de violence su lis feminis.
Lis statistichis a disin che in Italie une femine su trê e patìs violence (lei dut l'articul sul Corriere).
Sperant che nol vedi mai di coventâ, o segnali a dutis lis feminis che a lei chest blog, un servizi che ur dâ la pussibilitât di cjatâ cualchidun che lis scolti. No stait a tignî dentri ciertis robis brutis che us àn fat: ancje se al pues semeâus dificil, insormontabil, o vês di denunciâ cui che us à fat e us fâs dal mâl.
Parcè che se cualchidun al alce lis mans (no dome tal sens fisic: tantis altris a son lis formis di violence) su lis feminis, nol merte nissun dûl o justificazion... nol merte nancje di jessi clamât om.

Pre Toni e Don Milani

La Morete nus segnale une serade cuntun arlêf di don Lorenzo Milani (te foto di Wikipedia). Ancje pre Toni al veve spes iniments chest predi che al veve fondade une scuele a Barbiana. Jo us segnali Trilogjie tormentade, un libri (premi Sant Simon 1999) che pre Toni al à scrit su don Milani, Oscar Wilde e Pieri Pauli Pasolini.

Consei comunâl

La setemane che e ven al è consei comunâl. Tra i diviers ponts tal ordin dal dì o vin in particolâr la jentrade dal conseîr che al cjaparà il puest di puar Enrico e une propueste di IntesaperMajano par fermâ la cuistion dal recupar dal Ospedâl di Sant Zuan a Sant Tomâs. A pene che sul sît dal comun e sarà publicade la convocazion, o fasarai un link.

Ve chi la convocazion dal consei comunâl.

E je rivade la Patrie di Novembar

Pai 30 agns de nassite, chest mês su La Patrie o fevelìn di Universitât. Us segnali ancje un biel incuintri cun Boris Pahor e une interessante interviste a Adriano Luci (cun me te foto), president di Confindustrie di Udin.

No taiâ la lenghe

Il Comitât 482 al à scrit un comunicât comentant la propueste che e jere stade fate di bande dal consei regjonâl in mert a la riduzion des spesis dal consei. Cun plasê o publichi cheste note dal Comitât e o ricjapi un biel post di Sandri che nus fâs capî ce che al significhe che in Friûl a son plui lenghis (come che si viôt te foto).

Furlan in TV par mût di dî

Alc nus veve za dit Luca a proposit dal Tg realizât de Provincie di Pordenon. Jo mi soi permetût di lâ a viodi plui a fonts ce iniziative che e jere e o ai scrit un articul publicât su Il Friuli di vinars ai 14 di Novembar dal 2008.
Te foto: Elena Zanussi, la sporteliste de Provincie di Pordenon che une vore ben e à conduzût par furlan il notiziari in cuistion.

Leçs raziâls

Par cui che al ves cualchi dubi o no si fos fat un judizi clâr sul Fassisim... o segnali che vuê a colin i 70 agns de promulgazion de decret dal re pe difese da la raze taliane che si zonte a altris documents che jo personalmentri no rivi a justificâ. par cheste e altris motivazions o condani cence "se" e cence "ma" il Fassisim e mi vegnin i sgrisui cuant che o sint ciertis declarazions che a nasin un tic di nostalgjie cence une condane ferme.

In ricuart di cui che nol è plui

Vuê si ricuardin lis vitimis de strade. Come ducj o ai ancje jo personis che a son partidis e no son plui tornadis parcè che la lôr strade si è fermade. E vuê, ma no dome vuê, come l'an passât, un pinsîr al è par lôr, par che lis fameis e i amîs no vedin plui di patî la mancjance di une muart su la strade: un apel a ducj par evitâ lis muarts des stradis.

Ator di me

Alessandro Venuti mi à mandât l'invît par cheste mostre su Renato Mertens che si fasarà a Colorêt in Cjistiel.
Jo lu ringrazii par vêmi visât e o slargji l'invît a ducj i letôrs dal blog.
Par altris info: fracait chi.
(te foto un biel crocifìs)

Bal par...

Lenghe furlane a Triest

MINI-MU Parc dai frutins di Sant Zuan
v. E. Weiss, 15 – trieste – tel 040392113 – info@mini-mu.it

Us segnali cheste iniziative che si tignarà a Triest:
Provincie di Triest Aziende pai Sarvizis Sanitaris Triestine N.1 Grop Imagjine di Triest

Inaugurazion Sabide ai 15 di novembar 2008 aes 17

Mini-Mu
tant che plui piçul
tant che piçul museu
tant che piçul munari
tant che Parc dai frutins Sant Zuan là che no si fâs nuie
tant che museu mitût adun dai frutins

aes 17.15 A tachin i salûts
Maria Teresa Bassa Poropat
Presidente de Provincie di Triest

Franco Rotelli
Diretôr de Aziende Sanitarie Triestine n.1

Maurizio Fanni
President dal Grop Imagjine

aes 17.30 Elena Bertocchi:
Presentazion di Mini-Mu
fare dal nulla mostre di voris di Bruno Munari
te colezion di Adalberto Mestre

Intervents di artiscj

Esplorazions di colôr

Mini-Mu e promôf une dinamiche educative che:

e da al frut e ai plui zovins une funzion centâl e ative te gjestion dal imparâ
e môf la naturâl curiositât dai fruts e dai zovins lant daûr a la lôr voie di scuverte dal mont e di sè e e ufrìs ocasions par incressi la lôr imagjinazion e creativitât
e coinvolç la famee tes ativitâs di istruzion e di zûc e je cetant atente ai dibusgns e ai interès no dome dai fruts ma ancje de lôr comunitât, brincant gnûfs obietîfs e tacantsi ai stimui culturâi dal tessût socjâl tal cuâl e si poe


Domenie ai 16 di novembar 2008 aes 10

Une zornade al Mini-Mu cun Riccardo Dalisi


Presentazion dal catalic de mostre “Tra i Vetri” (omaggio a Bruno Munari) “ cu lis esperiencis creativis di Adriano Bon, Bruno Chersicla, Isidoro Dalcol, Riccardo Dalisi, Matteo Fanni Canelles, Gruppo &, Paolo Cervi Kervischer, Jasna Merkù, Enzo Navarra, Renzo Possenelli, Mario Sillani, Studio Openspace, Giorgio Valvassori, Franco Vecchiet

Presentazion dal libri di Riccardo Dalisi: “lo schizzismo”, Editore Corraini, 2008

Laboratoris cun Riccardo Dalisi che al larâ indenant ancje tal dopodimisdì

Dalisi si è indreçât ai frutins, ai fruts e ai students dal cuartîr Traiano a Napoli, sogjets inmò libars dal condizionament e in stât di vê un sintî gjenuin e dret su la realtât e di rispuindi a ce che ju coinvolç cun animazion, intun rapuart difarent jenfri l’om e lis tecnichis e jenfri la culture e la creativitât.

Di resint (2008) Dalisi al à elaborade la tecniche dai schiribiçs par produsi sponte, ideis e visions che e van oltri la dibisugne di clarece e di coerente dal sogjet, di grant interès tant che metodi indreçât ai procès educatîfs dai zovins che a son in situazion di disasi. Al à publicade cheste metodologjie cul editôr Corraini.

Sostegn
Regjon Autonome Friûl - Vignesie Julie, Cassa di Risparmio del Friuli - Venezia Giulia, Assicurazioni Generali, Cooperative Operaie di Trieste Istria e Friuli

Patrocini
Comun di Triest
Ministeri de Istruzion, de Universitât e de Ricercje
Ufici Scolastic de regjon dal Friûl - Vignesie Julie; Direzion Gjenerâl

Disastris!

Vuê us segnali une notizie pardabon avilente che e je sucedude dongje Spilimberc e che o ai let sul blog de Ninine.
Dal sigûr al è impuartant dâ un bon servizi di racuelte des scovacis, fâ funzionâ i ospedâi, asfaltâ lis stradis, ma se i aministradôrs publics a vessin di viodi dome di pocets, tombins, asfalts, e vie indevant... nol coventarès un consei comunâl: al bastarès dopleâ l'ufici tecnic e nomenâ un bon comissari. Se la classe dirigjente si permet di butâ vie lis lidrîs, al è dibant programâ l'avignî: nol è doman par un popul cence memorie.

Te foto di Wikipedia: Aquilee.

Da la malte al malto

Grazie a Mauro Missane che lu à intervistât par radio e ai Fantats furlans, o ai savût che esist al Bire di Meni.
Ce aie di particolâr?
Che e je artesanâl.
Che e je furlane.
Che il so produtôr (Domenico "Meni" Francescon) al à inventât plui cualitâts.
Che il so produtôr ur à dât il non des borgadis di Cjavàs.
Che il so produtôr al è masse fuart: al faseve il muradôr e cumò al fâs bire: "da la malte al malto"!
Ma soredut... che e je buine!
Prosit!!!

Campagne abonaments

Vuelistu jessi simpri inzornât su ce che al sucêt ta chest blog? Ti someial util (tal ben o tal mâl) di viodi ce che o cumbini? Po ben, se la rispueste e je "sì", alore aboniti! Cemût? Baste che tu ti iscrivis fracant chi!
Grazie a chei che lu àn za fat e a chei che lu fasaran!

La Arlef che mi plasarès...

Checo un pôc mi dâ cuintri, un pôc mi fâs i compliments... no sai ce dî... però mi à dât la ocasion di proponi une robe che mi balinave za tal cjâf e o vierç cussì la discussion domandant a voaltris cualchi propueste pe Arlef. Une racomandazion: chest al è un zûc e la Arlef e à za un organisim che al varà di proponi lis liniis de politiche linguistiche, ven a dî il Comitât Tecnic Sientific, che al varà di proponi a Cda i progjets miôr pe valorizazion de lenghe furlane. Però a mi mi interesse di capî ce che i letôrs dal blog a volaressin viodi fat di bande de Arlef. A mi mi bastarès viodi metude in vore dute la normative in cont di tutele linguistiche: al sarès za un bon risultât cence scugnî lâ a cirî novitâts... Ma cumò vonde fevelât jo: us tocje a voaltris... ca che a vegnin lis ideis!

Aldo in onde

Come che nus vise ancje lui, Aldo Rossi al sarà martars ai 11 di Novembar ator pes radio par presentâ il so prossim CD "Curtis, ghitaris e curtìs".

aes 10.30 in direte a Radio Onde Furlane cun Pauli Kantarut
aes 14.00 in direte a RAI Radio1 Regjon cun Tullio Durigon
aes 16.00 regjistrazion a RadioSpazio103 cun Marco Tempo

In spiete di sintî ce che al con(cjan)tarà, us torni a segnalâ chê che secont me e je une des cjançons plui bielis che Aldo al à fat, ma ancje che jo o vedi sintût. E o ai vût l'onôr di scoltâ in anteprime, une sere Lui: A là sù.

Auguris

Stant che cualchidun al fâs i agns casualmentri, tancj auguris! :)

Il diari di Tosoni

Un grazie a Stefano Gasti che sul ultin numar dal Diari al fâs un servizi sul gno blog, fevelant dal prin post su lis nominis dal Cda de Arlef.
Par lei dut il numar, o che o lais a cjoli une copie di cjarte o che o discjamais il pdf: fracait chi.