Colonia Caroya e ricuarde il 3 di Avrîl dal 1077

O ai ricevût cun tant tant plasê chest invît pe ricorence dai 3 di Avrîl.

Ta chescj ultins agns cheste date e ven valorizade e ricuardade di tantis aministrazions, ents e associazions, ma viodi che l'aniversari de nassite dal Stât Patriarcjâl di Aquilee che al nassè tal 1077 al sedi celebrât te comunitât furlane di Colonia Caroya in Argjentine a 13.000 km dal Friûl... beh... a mi mi fâs un grant biel efiet!
Compliments ai amîs di Colonia Caroya.

Fracait su la foto par lei miôr.

Presentazion de Patrie a Lestans

Usgnot o sin a presentâ la Patrie dal Friûl di Març a Lestans a 20.30 li de Somsi in vicul de Latarie: in cuviertine Mauro Corona che al vierç la riviste cuntune lungje interviste.
Un grazie a la Somsi e a Daniele Martina che a àn organizade la serade. Us spietìn ducj.

ps: fracait chi par lei ancje l'avîs su Facebook

Di Colonia Caroya, auguris papà!

Vuê al è Sant Josef, fieste dal papà. Ancje se o soi di chê altre bande dal mont, jo i fâs i auguris a Giancarlo, il gno.

Que linda que es, esta Colonia que tanto querés

No rivi inmò a capî ben dal dut ce che o stoi vivint ta chestis zornadis...
o ai fat une dì di viaç par avion, par lâ di chê altre bande dal mont e mi somee di jessi in Friûl...
o doi la man a la int per presentâmi e mi sint a rispuindi: o soi Copetti... Bergagna... Roya... Toso... Londero... Cargnelutti... Visintin... Cemût vadie?
o se a son plui zovins, tor de mê etât o jù di li, "Hola, que tal? Yo soi Copetti... Bergagna... Roya... Toso... Londero... Cargnelutti... Visintin..." e ti san a memorie ducj i nons ancje dai nonos e dai nonos bis origjinaris di Glemone, Udin, Osôf, Prât di Cjargne... che a son partîts in nâf di Gjenue tal 1878... zoventût che ti domande di fevelâur par furlan parcè che no lu fevelin, ma a volaressin recuperâ la lenghe che a sintivin a fevelâ dai nonos...
cjatâsi tal mieç de campagne sconfinade, tun vignâl che no tu rivis scuasit a viodi dulà che al finìs e cjatâ un siorut di non Marcetti (il cognon al è scrit Marchetti, ma pronunciât a la castiliane) che al rive cul tratôr, ti salude par castilian "Hola, que tal?" e cuant che i domandi "Mandi, ma lui fevelial par furlan?" e lui ti rispuint "Sigûr, cun plasê, cemût staiso?" e al tache a contâ "O soi partît dal puart di Gjenue a 12 agns cun mê mari tal 1949 e no soi plui tornât...", fevelanti par passe une ore dai cjamps, dal lavôr, de ue che chest an e à cjapade la ploie e al à pierdût passe la metât de produzion, ma il guvier no i darà un franc... e vignî a savê di sô fie, dopo che si sin saludâts e lu vin lassât che al continuàs a lavorâ, che ancje par jê che no fevele une peraule, e jere la prime volte in dute la sô vite che e sintive a fevelâ so pari par furlan...
cognossi il sindic di un comun dongje, Jorge Roberto Visintin, che ti dîs: "Puedio fâus viodi il gno paîs, lu clamìn San Durì, come la frazion di Flaiban"...
Dut chest ti fâs sintî tal cûr emozions che no tu rivis a descrivi fint insom... e ti ven un grop...
Forsit al è il câs di tornâ a scrivi une des primis riis di chest post:
o ai fat une dì di viaç par avion, par lâ di chê altre bande dal mont e O SOI in Friûl...
Lait a viodi alc di plui, fracant chi: www.entract.it/farcadice.html
Grazie Colonia Caroya!

Di Jerusalem a Sant Tomâs

Ve ca la locandine dal incuintri di miercus ai 10 di Març che si fasarà a Sant Tomâs. Une biele ocasion par viodi puescj lontans. Par lei miôr, fracait su la foto.
Ducj invidâts!

Auguris

A son passâts 4 agns che o ai screât il blog e come in chê volte, e tal 2007 e tal 2008, e tal 2009, o fâs i auguris prin di dut a lis feminis, ma ancje a chest gno blog: parcè che nol è nuie di miôr che fâ fieste in compagnie.
Fasint un belançut di chescj agns o scuen ameti di vê vude tante sodisfazion parcè che tantis a son stadis lis manifestazions di preseament, ma ce che mi à fat plui plasê al è stât che divierse int e à cjapade la stesse strade. Un grazie o scuen dîlu al Dree, il prin blogarin furlan.
In pôc timp al è gambiât tant: il Furlanist al à sierât, i blogarins (ancje chei par furlan) a àn tacât a doprâ altris socialnetworks, ma l'impuartant al è vê slargjade la presince de lenghe furlane intun mieç di comunicazion come Internet, ma no dome istituzionâl. Bon, cumò vonde fâ i seriôs e vie a fâ fieste, spietant il prossin compleblog!

Elio a la Bit

Vuê o ai tornât a viodi Elio, un coleghe de Filologjiche che mi à dit di vê stât a la Bit. Mi à proponût di contâ chi ce che al veve viodût a Milan e vulintîr us propon ce che mi à mandât: lait a viodi tai coments...

Un gnûf blog: Comitât pe Autonomie

Us segnali une notivitât te blogosfere furlan: si trate dal blog dal Comitât pe Autonomie e pal Rilanç dal Friûl, che al à come president Gianfranco D'Aronco.
Pal moment al è par talian, ma mi àn garantît che ca di pôc e sarà doprade di plui ancje la lenghe furlane.
Intant benvignûts te Rêt e bon lavôr.

Sipari furlan: Mari Aghe

E continue la edizion 2010 di Sipari Furlan (achì dut il program), cuntun spetacul dedicât ai plui piçui, ma no dome.

Mari Aghe al è il non dal event in sene domenie ai 7 di Març aes 5 dopomisdì tal teatron.

Par savênt di plui, fracait chi.

Fevelant a Colonia Caroya

A tachin cheste setemane i incuintris par fevelâ la lenghe furlane...
Fin chi al podarès someâ un normâl invît come che mi 'nt rivin tancj, ma se o fracais su la foto, o viodarês alc di plui: ce che par me al è straordenari al è che cheste iniziative e nas e e ven puartade indenant a Colonia Caroya, une comunitât furlane di chê altre bande dal mont!
Une biele rispueste a ducj chei che a disin che cul furlan no si va di nissune bande...
Compliments ai amîs furlans caroyenses!

Lu vevi dit jo... BAU!

Il mês di Jugn dal an passât o vevi fat presint la notizie sul cjanîl di Triest e la sdrume di bêçs che al varès costât (fracait il link).
A lei i gjornâi e lis declarazions però, o varessin vût di stâ trancuii parcè che daûr al jere un project financing, cu la partecipazion dai privâts, in maniere che nol varès costât dome su lis cassis publichis...
Jo o vevi ancje fat cualchi considerazion che us torni a scrivi:
"Cun di plui i partners privâts che a varessin di cofinanziâ la opare, no son inmò individûats... ma intant il contribût public al ven assegnât.Cumò mi fâs e us fâs cualchi domande: ma se no vessin di vignî fûr finanziadôrs privâts par cuvierzi la difarence, ce sucedial?" (19.06.2009)

Cumò, a distance di mês, a son scjadûts i tiermins par presentâsi e volêso savê trops privâts che si son ufierts stant che il progjet al jere "tant" interessant?
Lait a lei il prin coment...