Presentazion dal libri su la Ocitanie

Doman, domenie il Prin di Març 2009 aes 5 sot sere inte Sale multimediâl dal Centri di Coordenament Culturâl de Cjargne li dal Museu Cjargnel des arts e tradizions popolârs di Tumieç (v. Vittoria, 4) al vegnarà presentât il libri “Viaç in Europe. Ocitanie” di Marco Stolfo. L’apontament al è inmaneât de “Associazione della Carnia Amici dei Musei e dell’Arte”, che e à editât la publicazion.
L’incuintri al previôt i intervents di Paolo Moro (President de “Associazione della Carnia Amici dei Musei e dell’Arte”), Pauli Cantarut (Gjornalist e operatôr culturâl – “Radio Onde Furlane”), Dario Anghilante (Operatôr culturâl des Vals Ocitanis dal Piemont – associazion “Chambra d’Óc”) e dal autôr dal libri. Cun di plui si podarà viodi il video documentari “L’Occitania a pé” (2008, FR 3 Sud, 26’).
La presentazion si sierarà cuntun ghiringhel furlan-ocitan.

Zornade furlane dai dirits - edizion 2009

Come che us disevi îr, vuê e je la Zornade furlane dai dirits, che e cole tal aniversari dal riviel de joibe grasse dal 1511. Come ogni an, ancje jo us publichi il comunicât dal Comitât482.

Us visi ancje che usgnot su Telefriuli a lis 19.45 al va in onde "Contile juste" program di aprofondiment gjornalistic de Provincie di Udin: o sarai ancje jo e o ringrazii Anna Casasola par vêmi clamât.

27 di Fevrâr: Zornade Furlane dai Dirits

Al è zaromai di cualchi an che ai 27 di Fevrâr il Comitât 482, intune cun altris realtâts furlanis, al celebre la Zornade Furlane dai Dirits. Cheste date e ricuarde la Joibe Grasse dal 1511 cuant che si impià il riviel plui grant inte storie dal Friûl: un episodi storic che, fûr des leturis stereotipadis che cualchidun al va dilunc a proponi, al mostre a clâr ce che lis comunitâts furlanis a jerin prontis a fâ par difindi i lôr dirits. Il Comitât 482 al è nassût cun chê di difindi i dirits linguistics e nazionâi des diviersis comunitâts minorizadis dal Friûl e, duncje, al è propit su chest teren che si indrece prin di dut la nestre riflession. Magari cussì no, di fat, al è simpri il pericul di pierdi ce che si à rivât a otignî cun agns e agns di bataiis democratichis. Il risi al è, o almancul al varès di jessi, sot dai voi di ducj. Pensìn, par esempli, ae leç statâl 482/99, chê che il nestri Comitât al cjape il so non e che chest an e finìs dîs agns. Tai ultins agns i fonts par metile in vore si son sbassâts in maniere continuative: tal belanç statâl pal 2008 a son stâts metûts sù par jù 4 milions e 800 mil euros, ta chel pal 2009 i fonts a son deventâts 2 milions e 274 mil e la prospetive pal 2010 e je inmò plui basse. Cualchidun pensial pardabon che cuntun belanç di cheste fate si puedi garantî la presince des lenghis des dodis comunitâts minorizadis ricognossudis dal stât talian inte scuele, inte aministrazion publiche, intai mieçs di comunicazion? Cul gjavâi i fonts, tal cidin colpevul ancje de classe politiche nostrane, si va a sassinâ la 482, ven a dî la leç che e varès di meti in vore i articui 3 e 6 de Costituzion de Republiche taliane! In Regjon intant ce sucedial? La gnove leç sul furlan, la 29/07, e je ferme. No dal sigûr par vie de impugnazion di pôcs articui denant de Cort costituzionâl, ma parcè che la aministrazion regjonâl no à mot un dêt par fâ i regolaments che a coventaressin par metile in vore. Cun di plui, l’assessôr di riferiment al à za dit a clâr che, ancje se la Cort e ves di dî che i articui impugnâts dal guvier talian a van ben cussì come che a son, si larà a modificâ la leç, pidimentantle su doi dai siei aspiets di fonde: l’ûs de lenghe furlane inte scuele e inte aministrazion publiche. Nancje che si volès cirî di limitâ, impen di slargjâ, ce che al ven garantît cu la 482. La prospetive e somee propit cheste: gjavâi ai furlans ancje chei risultâts otignûts inta chescj agns cu lis ongulis e cui dincj. E la situazion no je cui sa ce miôr nancje pai slovens e pai todescs dal Friûl. No stin a fevelâ po di rom e sinti che, ancje chenti, no dome no si ju calcole di minorance linguistiche, ma a voltis si ju piture di forescj ancje se pe plui part a son citadins talians... Magari cussì no, chescj atacs ai dirits linguistics e nazionâi des comunitâts dal Friûl no podevin rivâ tun moment piês. Cun di fat, nol è mai stât cussì sempliç platâ dut daûr des emergjencis che si cjatìn a frontâ, veris o inventadis che a sedin. Cu la crisi economiche al è facil justificâ i tais pai fonts pes comunitâts minorizadis e pes lôr lenghis, cundut che si vedi tacât a taiâ za di prime de crisi e che i fonts metûts dal stât a sedin mancul di un fruçon dal so belanç. E nol impuarte nancje che cussì si tocjin dirits umans di fonde garantîts de Costituzion taliane, di acuardis internazionâi e riclamâts che al è pôc di une gnove risoluzion dal Parlament european. Il stât talian, di fat, invezit di ispirâsi ai principis democratics de sô Cjarte costituzionâl al pâr che al cimii ae muse piês dal so passât: chê nazionaliste e autoritarie. Cussì di une bande si taie cu la manarie risorsis e dirits, di chê altre bande si sabore pôre e asse cuintri di cui che al è diviers: vuê i imigrâts e doman cui sa? Cundut achel, nô o vin sperance parcè che, ancje tai moments plui scûrs de sô storie, il Friûl al à simpri savût resisti e resurî. La nestre e je une storie di resistence. Par chest o refudìn di sbassâ il cjâf e di adatâsi a cheste clime. Par chest o lin dilunc a rivendicâ il nestri jessi furlans: ni miôr, ni piês di chei altris popui, ma diviers. Cul impegn, duncje, a lotâ pai nestris dirits linguistics e nazionâi, intune cul dirit di decidi in plene autonomie dal nestri avignî. Tal stes timp no acetìn di colâ tal zûc dal meti identitât cuintri di identitât: furlans sì, ma solidaris cun cui che al patìs. Alore, come i nestris vons, o alcìn la bandiere dai dirits e dal autoguvier, par fâ sù un Friûl che al sedi patrie di dirits par dutis e par ducj.

Udin, Fevrâr dal 2009

Il puartevôs dal Comitât 482

Carli Pup

Doman programazion speciâl su Radio Onde Furlane

Ai 27 di Fevrâr il Comitât 482 al celebre la Zornade Furlane dai Dirits, une zornade pai furlans e pai lôr dirits. Us invidi a visitâ il sît dal Comitât (http://www.com482.org/) par scuvierzi cheste impuartante iniziative che e ven ricuardade ancje cuntune zornade di programazion speciâl su Radio Onde Furlane. O sarìn ancje jo e pre Roman.

ZORNADE FURLANE DAI DIRITS
Programazion dai 27 di Fevrâr dal 2009

fin a 08.30 - musiche furlane e des minorancis

08.30 -09.00 jentrade ai programs de buinore cun Mauro Missana e Carli Pup
09.00-10.00 aprofondiment storic su la Joibe Grasse dal 1511 cun Furio Bianco
10.00-11.00 dirits in musiche par cure di Pauli Cantarut
11.00-11.30 dirits linguistics: la situazion dai slovens dal Friûl cun Jole Namor
11.30-12.00 dirits linguistics: la situazion dai todescs dal Friûl cun Lucia Protto
12.00-12.30 dirits violâts: la situazion di rom e sinti cun Eva Rizzin
12.30-14.30 musiche furlane e des minorancis
14.30-15.00 jentrade ai programs dal daspomisdì cun Mauro Missana e Carli Pup
15.00-15.30 une leture storiche sul 1511 (par cure di Stefania Nonino)
15.30-16.00 dirit ae cjase in Friûl cun Luciano Aita e Maurizio Ingegneri
16.00-16.30 dirits des feminis in Friûl cun Lauretta Serafini e Eleonora Baldacci
16.30-17.00 proprietâts coletivis e ûs civics in Friûl cun Nadia Carestiato

17.00-17.30 glesie e dirits linguistics cun pre Romano Michelot e Christian Romanini

17.30-18.30 dirits in musiche par cure di Pauli Cantarut (R)
18.30-19.30 aprofondiment storic su la Joibe Grasse dal 1511 cun Furio Bianco (R)
des 19.30 indenant - musiche furlane e des minorancis

Il cine sul Tiliment

Us propon il trailer di "Rumore bianco" dal regjist Fasulo che al fevele dal Tiliment. Us segnali a chest proposit l'articul jessût su La Patrie dal Friûl tal mês di Dicembar.
Il film al à vût tant sucès al Festival dai Popui di Florence e al sarà ancje presentât a Rome dai 6 ai 19 dal mês che al ven (presentazion a la stampe ai 3 di Març) li dal Nuovo Cinema Aquila.

Il libri dal prof. D'Aronco

Vuê a Palaç Belgrât, sede de Provincie di Udin, a lis 17.30 si presente il libri dal prof. Gianfranco D'Aronco, "Il Friuli a mezzadria".
E je une racuelte edite da La Nuova Base, dal inz. Vittorio Zanon, che o ai vude la furtune di cognossi dentri dal Cda de Arlef.
Si trate di scrits e articui dal prof. D'Aronco dilunc la sô lungje esperience tal autonomisim furlan.
Dal sigûr un moment interessant par cognossi miôr la nestre storie resinte. Tal prin coment un met l'invît.

A mi no mi displâs

L'unic corispondent che o ai tignût di voli al è stât trentespagnolets: no ai viodût il Festival, ma o scuen ameti che no mi à displasût... come che no mi à displasût cuant che o ai sintude cheste cjançon...

Zornade de Marilenghe

Come che nus vise ancje Luche,vuê e je la Zornade de Marilenghe, istituide de Unesco.
Jo o aprofiti par ricuardâ a cui che al pense che a sedin robis par "cuatri furlaniscj", che la Costituzion, cul art 6, e stabilìs che: "La Republiche e tutele cun normis di pueste lis minorancis linguistichis".

Alc&Cè di Carnavâl

Sabide ai 21 di Fevrâr, cu la Vite Catoliche, in regâl il gnûf numar di Alc&cè, il gjornalut par fruts dut in marilenghe, realizât cul contribût de Agjenzie regjonâl pe lenghe furlane. In cuviertine un biel Arlechin colorât al anuncie il teme centrâl dal numar: il carnevâl. Un viaç tra passât e presint ae scuvierte de origjine di cheste mascare cognossude in dut il mont grazie ae “comedie de art”, ma che e je nassude ben prime dal Cinccent. E jere, di fat, une mascare dai carnevâi des monts talianis. Vuê e je un pôc dismenteade, ma a son paîs li che si pues viodi ancjemò. Un al è Ruede, tes vals dal Nadison, li che si clame “Pust”. Di carnevâl si fevele ancje tal “cjantonut dal fâ”, dulà che si insegne a fâ dai dolçuts cun curiandui… di zucar.
I protagoniscj di “Perlis di nature” a son i re dal aiar: variûl, gipeto e acuile reâl, che a svolin ancje tai cîi dal Friûl. Po a tornin i Gnognosaurs, Pantiagneur e Barburice cu lis lôr aventuris a fumets; i zûcs, par divertîsi imparant la lenghe; l’util vocabolari par imagjinis. Te rubriche sportive, si podarà lei la interviste ae zovine campionesse cjargnele di rally, Vanessa Polonia.
Par sugjeriments e curiositâts sul gjornalut, si pues scrivi une e-mail a Erika Adami, responsabile e coordenadore editoriâl de riviste, ae direzion: adami@lavitacattolica.it
Alc&cè al ven doprât ancje in tantis scuelis de regjon dulà che si insegne la lenghe furlane. I docents che a vuelin ricevilu pai lôr arlêfs, sore nuie, a puedin domandâlu telefonant al numar 0432/242611, mandant un fax al 0432/242600, o une e-mail ae direzion: amministrazione@lavitacattolica.it

Us spieti ugnot a Voleson

Come che us ai za dit, us spieti usgnot a Voleson. Ve chi in bande la locandine realizade pe ocasion: fracait su la foto par leile miôr.
O aprofiti par saludâ il Circul Culturâl Erasmo di Voleson che o speri che a saran presints in fuarcis.

Ps: chi o podês scoltâ la mê interviste a Radio Spazio, te trasmission "Ciak cultura", par cure di Valentina Pagani che o ringrazii pe ospitalitât: fracait chi par scoltâ.

Ve ca la interviste su RadioRai1

Come che us vevi dit chê altre setemane, îr e je lade in onde la pontade di "Vuê o fevelìn di..." li che o soi stât ospit par fevelâ dal anuari di Glesie Furlane "Patrie dal Friûl". O torni a ringraziâ Antonella Lanfrit e la regjiste Claudia Brugnetta pe ospitalitât.

Si rît par no vaî

Us ripropon une vignete che o ai viodût vuê sul Gazzettino. O ai scugnût ridi, ancje se pensant ben, dopo, mi è passade dute le ligrie e mi soi dit "Nol è propit nuie ce ridi..."

La Patrie a Voleson

Miercus ai 18 di Fevrâr a lis 20.30 a Voleson (PN), li de Sale Roma in place Mercato, la riviste in lenghe furlane “La Patrie dal Friûl” e presentarà il gnûf numar Zenâr-Fevrâr dal 2009, ospit de aministrazion comunâl. Dopo de solite pause dopo des fiestis di Nadâl, il mensîl diret di Dree Venier al torne ufrint ai siei letôrs un speciâl dedicât al ort, une vere passion dai Furlans, e ancje la solite analisi de atualitât leade ai temis dal autonomisim e de cuistion linguistiche. Cun noaltris al sarà ancje Stefano Montello, autôr dal libri "Manuâl critic pal Ort - L'art da la jeche".
O segnali inmò une volte che “La Patrie dal Friûl” e puarte ben: dopo dal aur olimpic concuistât di Chiara Cainero, intervistade di noaltris prime de partence par Pechin (v. La Patrie di Avost dal 2008, speciâl Sport), Teho Teardo autôr des musichis dal film “Il Divo”, intervistât sul numar di Dicembar dal 2008, al à ricevût des mans di Ennio Morricone il premi che al puarte il non dal innomenât composidôr, in pratiche “l'Oscar talian” pes colonis sonoris cinematografichis.
La riviste e je disponibil tes miôr ediculis e librariis. Par savê cemût abonâsi o lei i numars passâts si pues visitâ il sît www.lapatriedalfriul.org.

Assemblee de Pro Majano

Vinars ai 20 di Fevrâr a lis 20.30 e sarà la assemblee de Associazion Pro Majano.
Par savê di plui, fracait chi o lait a lei il prin coment.

Par...

Te

L'Ort, une passion dai Furlans

Vuê a lis 10.00 (ore furlane) e va in onde a Radio Onde Furlane la presentazion dal gnûf numar dal mensîl "La Patrie dal Friûl" cul speciâl dedicât al Ort (te foto, la cuviertine).
Un grazie al diretôr Mauro Missana simpri disponibil che come ogni mês nus ospite dentri de sô trasmission Ator ator.
Par scoltâ la presentazion, fracait achì!

PS: E us torni a visâ che lunis o sarai a RadioRaiUNO.

Interviste su RadioRaiUNO

Lunis ai 16 di Fevrâr a lis 3 e un cuart dopomisdì (15.15) o sarai a Radio Rai Uno te trasmission regjonâl "Vuê o fevelìn di..." par presentâ la gnove publicazion di Glesie Furlane, ven a stâi l'anuari "Patrie dal Friûl" che al fâs il struc de ativitât 2008.

Par cui che al desideràs domandâ une copie, al pues contatâ pre Roman Michelot (Vilegnove di Sant Denêl – tel 0432-956010) o pre Tonin Cjapielâr (Ruvigne – tel 0432-957268) e i sarà mandade a cjase par pueste in forme gratuite fint a esauriment des scortis.

Un grazie a Antonella Lanfrit che mi à clamât in studi e a la regjiste Claudia Brugnetta.

Restait in scolte...

Furlan e Europe

Cualchidun al sosten che cui che si interesse di furlan "al è sierât".
A mi, invezit mi plâs ricuardâ une citazion di pre Checo Placerean che al diseve che "il furlan al à di vierzi i puartons", dant cussì une vision pardabon atuâl di ce che al significhe valorizâ la identitât locâl in sens di confront cu lis altris realtâts: di cuant che o ai tacât a viodi di chestis robis, o ai vût une vore di contats cun altris popui europeans che no prime.
O pensi che la cunvigne di doman, inmaneade de Provincie di Udin, e cori su cheste strade stant che la ocasion e sarà un confront su la tutele de lenghe furlane e la Europe. Fracait chi par viodi l'invît.
Al intervignarà ancje Aureli Argemì, che o ai cognossût tal mês di Lui dal 2008.

Mandi Eluana

Fint cumò no ai mai dit nuie a rivuart, parcè che mi somee che e je stade fate tante, masse confusion. Plui a passavin lis zornadis, plui al cresseve il numar di chei che a vevin la rispueste sigure, pronte par jessi berghelade in place. E chest no mi à plasût gran.
"E je lade vie" i è stât dit îr al pari. E denant di chel pari e di chê mari, la uniche robe che mi sint di fâ al è tasê par rispiet di un dolôr che no rivi nancje a imagjinâ.
A lôr il gno corot par chê fie che no je plui.
A jê, mandi Eluana.

(la imagjin le ai cjatade chi)

L'archivi di Tiziano Tessitori

Vuê a Sedean al è stât presentât l'archivi dal Senatôr Tiziano Tessitori. Su La Vita Cattolica e je une pagjine une vore interessante che e fevele di chest progjet e de vite dal Senatôr Tessitori. Fracait su la foto par lei miôr.
Un biel intervent ancje di William Cisilino sul Gazzettino (tai coments) e su lengheNET.

Presentazion dal belanç

Tal prossin consei comunâl si fevelarà di belanç di prevision 2009. La zonte e à aprovât la delibare che îr e je stade presentade in comission e ancje in frazion di Sant Salvadôr. Ta chescj dîs il belanç al sarà presentât ta chês altris frazions e vinars 13 aes 6 e mieze al sarà puartât in consei comunâl: ve chi il calendari pes frazion e la convocazion dal consei.

Di Dartigne a Buenos Aires

Aromai a son tancj mês che o dopri il blog, ma a sucedin simpri robis che inmò mi dan di maravee.
La ultime e je stade une mail che mi è rivade su la pueste dal blog. Cui che mi scrîf si clame Ruben Romanini (te foto cu la sô famee) e al è di Pilar in Argjentine o di Dartigne in Friûl... o di ducj i doi i puescj! La sô e je la storie di tancj furlans e ancje dai Romanini, che come gno nono (al jere di Borc di Clame) a son partîts par lavorâ vie di cjase. A difarence di gno nono che al è tornât dongje fasintsi une vite chi in Patrie, altris come il pari di Ruben a son restâts vie e la lôr famee e je cressude lontan di chi. No sai se o sin parincj, ma o soi stât une vore content di cheste biele sorprese par diviersis motivazions: viodi che i Furlans (che ta chest câs si clame ancje come me!) ancje di lontan a continuin a cirî un leam cul Friûl e che il gno blog al pues judâju tal tignî chest puint.
Un mandi grant grant a Ruben, a la sô famee e ducj chei Furlans ator pal mont che, ancje se a àn sul passepuart une citadinance difarente, tal cûr a restin simpri int dal Friûl.

Chei di Intesa si cjatin

Si tache a fevelâ di belanç e dopo di une riunion de comission, domenie matine chei di IntesaperMajano a àn programât une assemblee publiche: ve chi l'avîs sul lôr blog.

Debut su Contecurte

Cualchi zornade indaûr us ai segnalât la nassite di une Ostarie leterarie. Dopo cualchi dì mi soi ingolosît e o ai volût provâ ancje jo e mi soi butât, mandant une mê Contecurte. Par cui che no le ves inmò lete, ve chi il link a "Lis cialis".
Buine leture e o spieti un vuestri parê.

Prins impegns in Arlef

Cheste setemane o vin vude la prime riunion dal Cda de Arlef. E je stade la prime ocasion par viodisi ducj e cognossisi. Invezit vinars o vin vût za il prin incuintri istituzionâl: o sin stâts ricevûts dal assessôr regjonâl a la culture Roberto Molinaro (te foto). Nus spiete tant lavôr e l'assessôr si è dimostrât avonde disponibil ancje se al è stât dome un prin contat: sperìn che nus stedi dongje e che nus judi. Ve chi il comunicât e un articul su Lenghe_net.