33, i agns di Christ...ian

Po ben, a son rivâts ancje chescj... E stant che plui di cualchidun al à tacât ancje a fâmal presint, o cjapi spont de batude par fâ une riflession in teme... No je mê, ma o pensi che e sedi buine par ducj: "Ognidun al à la sô crôs, cui che le puarte e cui che le strissine".

Ah... mi dismenteavi di une robe: grazie pai auguris!

Zornade de Memorie 2010

L'articul 1 de leç 211 dal 2000 al dîs "La Republiche taliane e ricognòs la zornade dai 27 di Zenâr, date che a son stâts butâts jù i cancei di Auschwitz, "Zornade de Memorie", cun chê di ricuardâ la Shoah (stermini dal popul ebraic) lis leçs raziâls, la persecuzion taliane dai citadins ebreus, i talians che a àn patide la deportazion, la prisonie, la muart, e ancje chei che, ancje in cjamps e posizions diferents, si son oponûts al progjet di stermini, e metint in pericul la lôr vite a àn salvât altris vitis e protezût i perseguitâts".

(L'an passât us vevi conseât di lâ a viodi La Risiere di San Sabba... invît che o torni a fâ ancje chest an)

O aprofiti ancje par proponius chest messaç che mi è rivât par mail cu la autorizazion dal autôr a publicâlu:

"chel che mi à simpri intosseât de zornade de memorie e je la scjarse memorie dai talians e il mandâ la responsabilitât nome ai naziscj e ai todescs. a part i museus sul olocaust presints in gjermanie (dramaticamentri biel e coinvolgent chel di lueberkund a berlin) dispès a capite di cjatâ là mostris dediadis a cheste memorie: les ài viodudis al deutche museum di monaco tant che a moritzburg che altrò. lì, diretamentri o indiretamentri, al è ricurinte cheste vergogne dal passât e no dome tal di de memorie.chi di no, invecit, nuje. si dismenteisi che nome in friûl andi è stâts trê cjamps di stermini e si continue a tigni bon chel criminâl di mussolini (600.000 muarts nome italians, distruzion economiche, socjâl e maçalidis in italie, etiopie, grecie, slovenie... cui responsabii ben taponâts tai archivis) onoranlu a predappio, lassant che la mussolini si incazzi co si fevele mâl di lui... fin - scuviarte di vuê - vignî a savê che la vôs e i scrits di mussolini son i seconts plui scjariâts tai ipod... in italie al samee che la memorie e sedi dome chê di chei altris.

di suald"

Lidrîs

Il lidrisament al è forsit la dibisugne plui impuartante e plui mâl cognossude de anime umane. E je tra lis plui dificilis di definî. Midiant de sô partecipazion reâl, ative e naturâl ae esistence di une coletivitât che e conservi vîfs cierts tesaurs dal passât e cierts presentiments dal avignî, l'om al à une lidrîs. Partecipazion naturâl, ven a stâi, imponude in maniere automatiche dal lûc, de nassite, de profession, dal ambient. A ogni om i coventin lidrîs multiplis. Al à dibisugne di ricevi cuasi dute la sô vite morâl, inteletuâl, spirituâl midiant dai ambients che ur parten naturalmentri.I sgambis di influencis tra i ambients une vore difarents tra lôr a son indispensabii tant che il lidrisament tal cjamp naturâl. Un determinât ambient al à di jessi influençât dal esterni, no par jessi insiorât, ma par jessi stimolât e rindi plui profonde la proprie vite. Al à di nudrîsi dai stimui che a vegnin di difûr, dome dopo di vêju assorbîts e i individuis che lu componin ju àn di ricevi dome di chest stes. Cuant che un pitôr di autentic valôr al va intun museu, la sô origjinalitât si sint rinfuarcide. Chel distès al à di sucedi a lis diviersis popolazions de tiere e ai diviers ambients sociâi.Si à dislidrisament ogni volte che si à une concuiste militâr e, ta chest câs, la concuiste e je cuasi simpri un mâl. Il dislidrisament al è minim cuant che i concuistadôrs a son un popul migradôr che si stabilìs intune tiere concuistade, si misclice cu la popolazion e al met lidrîs alì. Chest al fo il câs dai Elens te Grecie, dai Celts in Galie, dai Arabics in Spagne. Ma cuant che il concuistadôr al reste forest sul teritori che al à ocupât, il dislidrisament al è une malatie cuasi mortâl pes popolazions concuistadis. Si rive al massim nivel cuant che a son deportazions di masse, come te Europe ocupade de Gjermanie o te anse dal Niger, o cuant che e je une sopression brutâl di dutis lis tradizions locâls, come tai teritoris francês de Oceanie (se o vin voie di crodi a Gauguin e a Alain Gerbault).Fintremai cence concuiste militâr, il podê dai "bêçs" e la dominazion economiche a puedin imponi une influence foreste al pont di provocâ la malatie dal dislidrisament.Infin lis relazions sociâls dentri di un stes paîs a puedin jessi fatôrs une vore pericolôs di dislidrisament. Tai nestris paîs, in dì di vuê, oltri che a la concuiste a son doi velens che a difondin cheste malatie. Un a son i "bêçs". I bêçs a secjin lis lidrîs dapardut li che a jentrin sostituint a ogni altri movent il desideri di vuadagn. Al vinç facilmentri ducj chei altris movents parcè che al domande un sfuarç di atenzion une vore mancul grant. Nissune altre robe e je clare e semplice come une cifre.

Simone Weil, Il lidrisament (L'enracinement, 1949)

Salvâsi de stupiditât

O ai vude ocasion di rifleti cuntune persone a proposit di stupiditât.
Mi è tornade sot man cheste che us torni a proponi: il stupit ti splace parcè che ti fâs dam o ti fâs stâ mâl cence vê nissun vantaç par se. Il trist ti fâs mâl, ma par vê un vantaç! Duncje il stupit nol è prevedibil. Forsit par chest i nestris nonos a disevin: "Al è miôr vê da fâ cun cent triscj inteligjents che no cuntun stupit!".

Estroverso2010

A Tavagnà/Felet a son leâts i ricuarts di une biele esperience lavorative che mi à dât tante sodisfazion no dome come dipendent ma ancje dal pont di viste uman.

Us segnali la cerimonie di premiazion dal concors di traduzion Estroverso dal comun di Tavagnà.Sabide des 3 dopomisdì e sarà la cerimonie e si podarà viodile ancje in streaming. Par savênt di plui, fracait chi.

Interviste a pre Roman Michelot

Vuê o ai viert il gjornâl e mi soi cjatât une biele sorprese: il Messaggero al è daûr a fâ une schirie di interviste par une inchieste su la lenghe furlane e vuê al è ospit pre Roman Michelot, plevan di Vilegnove: lait a lei tai coments ce che al à dit.
Te foto il grup storic di Glesie furlane: ospits dal president Fontanini cualchi mês indaûr, di çampe il dean Zuan Pieri Biasat, bonsignôr Roberto Bertossi di Vençon, pre Roman Michelot e ultin a drete pre Tonin Cjapielâr, di Muris/Ruvigne, dongje di lui o soi ancje jo.

Novitâts su Frank Spada

Ogni tant al passe par di ca o te Ostarie leterarie, ma al è un pôc che no lu viôt... Cumò o ai capît parcè: Frank Spada si viôt che al jere impegnât cul so ultin libri "Marlowe ti amo" che al sarà tes librariis tor fin di Zenâr o Fevrâr (si cjatarà forsit za prime li de librarie Tarantola di Udin).
Cjalant la cuviertine, mi pâr di capî che al sarà un libri par talian... cjâr Frank, a cuant une publicazion ancje par furlan? ;-)

Il mestri Dreetôr

Plui di cualchidun, ta chestis setemanis, mi veve domandât cui che al sarès stât il gnûf diretôr e se o sarès stât jo a cjapâ il puest dal Dree.
Invezit o soi propit content che dopo di un Dree a 'nt rivi un altri: di fat Dree Valcic al è il gnûf diretôr da La Patrie dal Friûl, la storiche riviste mensîl in lenghe furlane, cjapant il puest di Dree Venier.
Inmò grazie al Venier par chel che al à fat e al Valcic par vê acetât di deventâ il gnûf diretôr.
Tal coment us zonti il comunicât stampe.

... jo e te su la lune...

Sintude in curve

Po ben: 1 a 1 e bale tal mieç (gôl di Di Natale). L'Udin al à gambiât alenadôr ma nol rive a cjapâ chê corse che i coventarès par faltâ fûr dai paltans di une classifiche no biele.
Però vuê cu la Lazio no à pierdût ancje se lis robis no jerin tacadis mâl: sot di un gôl ancje in curve nol tirave un bon aiar. Pe prime volte chest an o ai sintût coros avonde stiçâts. Si sa che il tifôs furlan nol è dai plui cjalts però no vevi mai sintût a menaçâ: "Non vincete, non uscite!"... cuntune zonte di bande di un tifôs che mi à pardabon fat ridi: a un ciert pont, dopo l'enesin corut che us disevi, si jeve sù chest ca e dut incavolât al vose: "Se no vinceis, o fâs un capanelo fûr dal porton dal stadi e us spieti fin doman buinore... che o ai di lâ a vore!"
Dome un furlan al podeve dî une robe dal gjenar! eheh

Contis curtis tal vagon

Il Sportel pe Lenghe Furlane dal Comun di Remanzâs, in colaborazion cu la Ostarie Leterarie “Contecurte” e inte suaze dal program invernâl inmaneât dal Assessorât pe Culture, a presentin joibe ai 14 di Zenâr dal 2010
aes 20.45 il secont apontament de rassegne CONTIS CURTIS TAL VAGON.
Si trate di un cicli di cuatri apontaments – la seconde joibe di ogni mês, fin al mês di Març – dedicâts ae leture par furlan intune curnîs pardabon sugjestive: il vagon di tren dal Laboratorio di Sant Urbano, in vie della Stazione, 42 a Remanzâs.
Un vagon dal 1920, di fature ceche e restaurât di pôc, al da ospitalitât ae Ostarie leterarie di Contecurte che, di virtuâl e devente finalmentri reâl in compagnie di ostîrs e camarîrs, stuzighets e lis contis curtis dai aventôrs.
Contecurte al è un blog (http://contecurte.splinder.com), une Ostarie Leterarie virtuâl li che, propit come intune ostarie reâl, si dan dongje i clients plui varis, ognidun cuntune sêt diferente e ognidun pront a contâ la sô storie e a condividi i siei pinsîrs cun chei altris aventôrs.
Lis seradis a àn un teme diviers daûr dal gjenar des contis. Dopo lis Contis par spaventâsi dal mês di Dicembar, chestis lis datis a vignî:
Joibe ai 14 di Zenâr aes 20.45 _ Contis par maraveâsi
Joibe ai 11 di Fevrâr aes 20.45 _ Contis par divertîsi
Joibe ai 11 di Març aes 20.45 _ Contis par rifleti
Dal moment che il spazi tal vagon al è pôc, si consee di prenotâ il puest li de Biblioteche “G. Missio”
tel. 0432 668750.

Cul nâs par aiar a viodi di ce bande che al tire

Epifanie, no fieste de befane, ancje in Friûl. E come ogni an, cui che lu clame Pignarûl, cui Avent, cui Pan e Vin, cui Fogaron... insumis, il Fûc, simbul de lûs... e dut il Friûl a viodi di ce bande che al tire il fum, cu la sperance che il gnûf anal sedi miôr dal an passât.

Bentornade!

E je stade une polse di 6 mês, ma a la fin no à resistût: e je tornade la archeofurlane, che la plui part dai blogarins a cognossin cul non di Ninine (te foto)!
Po ben, cumò vonde scherçs e sot cun pale e pic par fânus scuvierzi alc di plui dal nestri patrimoni archeologjic! Cuâl saraial il prin archeopost dal 2010?

Neule scure di Elsa Martin a Sanremo

Lis sorpresis a son inmò plui bielis cuant che no tu tes spietis... cussì mi ven di definî l'incuintri telefonic cun Elsa Martin (te foto), che juste vuê mi à clamât par telefon dopo che e veve stât li di Valentina Pagani a Radio Spazio 103.
No cognòs personalmentri Elsa ma mi à contât che e partecipe a la selezion par "Sanremo Nuova generazione 2010" e e je in concors cun la cjançon Neule Scure (musiche sô e peraulis di Stefano Montello).
Par scoltâ la sô cjançon, fracait chest link.
Jo i auguri di fâ tante strade, parcè che intun mont li che spes al è plui di mode jessi omologâts, nol è facil cirî di mantignî la proprie identitât e puartâ indevant lis tôs lidrîs, tô lenghe.
Elsa, tu âs sielte une strade forsit mancul facil tra chês che al propon il "market", ma forsit propit par chest la sodisfazion e sarà dople.
E no stâ vê pôre se cualchi "tentatôr" al vignarà a dîti "lasse pierdi che no vâl la pene, no stâ sierâti, il mont no ti capìs se tu fevelis par furlan...". A saran in tancj ma se a vessin reson chestis personis, probalmentri il mont al sarès plui puar. Ti consei a ti e ai letôrs di chest blog, di lâ a lei une pagjinute scrite su chest pdf: fracait chi e lait a pagjine 8.
Brave Elsa e continue cussì!