L'editoriâl di Pre Toni

Us met achì l'editoriâl di Pre Toni Beline (11.02.1941-23.04.2007), publicât sul numar di Avrîl da "La Patrie dal Friûl", jessude cualchi zornade indaûr.

Autonomie e marcjât
Comprâ e vendi par furlan

Semplificant il pinsîr di Marx, “la economie e spieghe la storie”. Ancje se lis sôs teoriis no àn puartade cui sa ce furtune a di chei che lis àn metudis in vore o imponudis cu lis buinis o cu lis tristis e la storie e dimostre ogni dì di plui lis tragjediis e i dams di une dutrine o teorie fate passâ par veretât assolude, no podìn no concuardâ che “cence economie no si spieghe la storie”. E nancje no si le fâs. Parcè che l’om, fra lis sôs tantis cualitâts e potenzialitâts e catalogazions, al è ancje un animal oeconomicum.
Che i bêçs a coventin lu provin soredut chei che no 'nd àn e a scuegni fâ salts disperâts par tirâ fûr par se e pai lôr fîs il pan di ogni dì. Lu prove la nestre storie di int che la miserie, la puaretât, la fan le à tant provade che le à somatizade. Di fat o vin simpri pôre di murî di fan e o spindìn e o spandìn par cjoli ancje ce che no nus covente, par ingrumâ fin che 'nt sta, par meti vie come se e ves di inviâsi la tierce vuere mondiâl o e fos par rivâ la fin dal mont. Un popul che al à simpri stentât a fâ cuadrâ i conts, che al à fat vitis martaris par cumbinâ il gustâ cu la cene, che al à lassât il sanc su dutis lis armadutis dal mont par podê puartâsi fûr la bocjade e sigurâ a la famee une cuarte di sotet.
Chest mont furlan, sotan in politiche e in economie, al à tant fat di massarie e di manoâl che al à la convinzion, o cualchidun al cîr di convincilu, che nol è fat par comandâ ma dome par ubidî, che nol à il don de managerialitât, ma dome la cualifiche de pale e dal picon. Di li un sens di frustrazion, di suturnitât, di pocje sgrimie, di rassegnazion.
Però alc al è capitât ancje chi di nô. In ritart, jessint une regjon confinade, o in maniere parziâl e inadeguade, jessint une tiere bandonade dai politics e sfurnide di une classe dirigjent degne di chest non. Cence santui, tignint dûr, lavorant fieste e disdevore, doprant il propi inzegn e chês cualitâts individuâls cussì marcadis, ma che a stentin a deventâ un fat e un ben sociâl e coletîf, zontant ancje lis palanchis meretadis di une disgracie no meretade come il taramot, sta di fat che il Friûl al à savût riscatâsi, cjatâ une sô strade particolâr, une sô muse, un stîl di lavorâ e di produsi che al à cjatât udience, rispiet, atestazion positive no dome in Italie, ma in Europe e tal mont. In chel mont che i nestris vons a levin disperâts, i lôr nevôts a van a cjâf alt, cun professionalitât e dignitât. No van dome a cirî, ma ancje e soredut a puartâ, parcè che, pe prime volte inte storie, il furlan si è cjatât tal grant marcjât dal mont a puartâ e tratâ e no dome a puartâ ator casselis o adiriture a jessi metût sul banc, in vendite.
Une des condizions essenziâls pal marcjât mondiâl di vuê, dongje de cualitât dal prodot, e je la promozion dal prodot stes, la sô presentazion, parcè che o vivìn in timps che il mût di presentâ un prodot al vâl, in tiermins di marcjât e di investiment, di bot come il prodot stes. Cu la agravant che tantis voltis si riscje di privilegjâ la scjatule e i flocuts sul pôc o nuie che al è dentri. Però bisugne tignî cont di cheste impuartance fondamentâl dal marketing. E chi al ven fûr, dret, logjic, inderogabil, il discors de promozion di un prodot furlan, cualunche prodot, dal plui piçul al plui grant, par furlan. Se o sin rivâts a jessi protagoniscj, se o vin tante biele robe di mostrâ, parcè no vino di vê il coragjo e il sintiment di mostrâsi cu la nestre muse, di fâ de promozion te nestre lenghe un alc in plui? Il câs dal tocai furlan, che si ostinisi a clamâlu “italiano” impen di “furlan”, al è un dai plui scandalôs e imperdonabii. Tra l’altri, cu la globalizazion di vuê che e riscje di vualivâ ducj, si cîr di meti un sigjil di protezion a garanzie di produzion locâl. Lu fasin ducj, par cualunche marcanzie, ancje pal argjel, e al rint. Parcè no vino di fâlu nô? E je une biele ocasion pal mont imprenditoriâl di integrâ e consolidâ, cu la finance, il teme vitâl de autonomie. Un popul al pues vê un avignî dome se la economie e la culture si dan une man une cun chê altre. Comprâ e vendi par furlan e pues deventâ la grande ocasion di riscat e di promozion di un popul che, te storie, al à scugnût rassegnâsi a fâ une part ingloriose: lassâsi comprâ e vendisi al prin che al capitave. Al è rivât il moment di gambiâ solfe e o vin dutis lis brisculis par vinci la partide. Parcè che o sin cressûts, o vin cuistade stime di nô, o vin mostrât e o continuìn a dimostrâ che o sin un popul valit, di int che no à pôre de modernitât e nancje de concurince, parcè che e à lis cualitâts inteletuâls e professionâls par imponisi. Fintore la lote autonomiste no à cjapât pît parcè che e vignive puartade indenant soredut tal cjamp culturâl e di int inteletualmentri preparade, ma che no veve nissune esperience e sensibilitât pal mont dal lavôr e de produzion. E tancj a àn confondude la culture furlane cu la puisie o la vilote par furlan. Nuie di plui sbalât e periculôs. La culture furlane, come ogni vere culture, e je omnicomprensive. E la economie e je une des colonis puartantis di un Friûl riscatât e protagonist. Se un prodot al è fat chi, cul materiâl di chi e cu la int di chi e cul mistîr di chi, parcè no vino di vê la furbetât di clamâlu ancje cu la nestre lenghe? Jo no scomet mai, ma o sarès disponût a scometi che une promozion par furlan e je un bon investiment. Parcè che la peraule “Friûl” e vâl ancjemò.

Antoni Beline