La vignude dai Magjos

Dopo che Gjesù al jere nassût a Betlem in Gjudee, sot dal re Erode, ve che a rivarin a Gjerusalem dal orient magjos e a domandarin:² «Dulà isal il re dai Gjudeos apene nassût? Parcè che o vin viodude la sô stele in orient e o sin vignûts par adorâlu».³ Sintint une tâl, il re Erode al restà scaturît e cun lui dute Gjerusalem.⁴ Alore al clamà dongje ducj i sorestants dai predis e i scrituriscj dal popul e ur domandà: «Dulà varessial di nassi il Messie?».⁵ I rispuinderin. «A Betlem di Gjudee. Cussì di fat al è stât scrit midiant dal profete:⁶ E tu, Betlem, tiere di Gjude
no tu sês propit il plui piçul di ducj i paîs di Gjude.
Di te al saltarà fûr un sorestant
che al passarà il gno popul, Israêl».
⁷ Alore Erode, al clamà di scuindon i magjos e si informà sul timp precîs che ur jere comparide la stele;⁸ po ju mandà a Betlem disint: «Lait, cirît cun precision il frut; a pene che lu cjatais, fasêtmal savê ancje a mi, che o puedi lâ a adorâlu».
⁹ Lôr, sintudis lis racomandazions dal re, si meterin in viaç. E ve: la stele, che a vevin viodude in orient, e leve denant di lôr fin che no si fermà sul lûc là che al jere il frut.¹⁰ Viodint la stele, si jemplarin di une gjonde straordenarie.¹¹ Jentrâts in cjase, a vioderin il frut cun Marie sô mari e si butarin denant di lui adorantlu. Alore a vierzerin lis lôr arcjis e i ufririn in regâl aur, incens e mire.¹² Po dopo, visâts in sium di no tornâ a passâ par li di Erode, a tornarin par une altre strade tal lôr paîs.

dal Vanzeli di Matieu - Il vanzeli de Infanzie (cjapitul 2, 1-12): par lei dut il cjapitul, fracait chi.