Par cui che nol à let la Patrie di Avost 2007

Ve ca la regjistrazion a Radio Onde Furlane, che mi à ospitât par fevelâ dal numar di Avost 2007 de Patrie dal Friûl.

Abonament par un an: 25,00 euros (pal forest 30,00 euros) sul cont corint postâl n.12052338 intestât a "LA PATRIE DAL FRIUL" Glemone

Diari di Viaç - Canadà, Multicultural lession #1

Al continue il Diari dal Diari di Viaç di Luca Peresson, che o ringrazii come simpri pe biele oportunitât che nus da di cognossi in anteprime alc di ce che al viôt e al vîf a Toronto.

Vision talebane dal mont:
intune zone cun presince cinese prevalente, la insegne di une bancje e je fate in version bilengâl.
Al è clâr che al è un fotomontaç. Cui mai saressial cussì taleban di fâ une robe compagne?... O no?...
In cualchi bande la normalitât e je banalitât; di altris bandis la banalitât e je normalitât.
Luca Peresson, Toronto - Canadà

Furlan: lenghe di int cence creance!!!

Us met achì, tai coments, la rispueste de assessore Garzitto (te foto) ae mê interogazion su l'ûs de lenghe furlane.
Mi à pardabon fat zirâ i "cjarsons" pe vision provinciâl e sotane che e à palesât vie pal ultin consei comunâl. Lait a lei i coments e la mê considerazion finâl. E pensâ che cheste siore e je la referent politiche pe politiche linguistiche dal comun di Maian: al sarès di metisi a ridi, se nol fos ce vaî. Ma si visie che il comun di Maian al cjape i contribûts de Leç 482/99 pal ûs de lenghe furlane dentri de aministrazion publiche e no par une gjestion spontanie de lenghe?

Cheste e je propit biele

O ai viert il gjornâl e mi soi cjatât un articul che al fevelave dal ultin consei comunâl. Par di dî la veretât nol fevele dome dal consei, ma ancje di alc che al è sucedût vie par chest Istât. Lait a lei il prin coment...

Par cui che nol à let la Patrie di Lui 2007

Ve ca la regjistrazion a Radio Onde Furlane, che mi à ospitât par fevelâ dal numar di Lui 2007 de Patrie dal Friûl.

Abonament par un an: 25,00 euros (pal forest 30,00 euros) sul cont corint postâl n.12052338 intestât a "LA PATRIE DAL FRIUL" Glemone

50.000 grazie!

Cuntun tic di ritart, come ogni 10.000 contats ve chi che o soi a ringraziâ ducj voaltris letôrs di chest blog: sedi chei de Patrie (Friûl), sedi chei dal Friûl sparniçât pal Mont che mi disin che ju fâs sintî un tic plui dongje de Patrie, sedi chei dal Stât talian, sedi chei che par câs a capitin achì.
Ancje se al è nassût par scherç e cualchidun al crodeve che e fos une bufule, o soi content che ben o mâl un pocje di compagnie, un pocje di informazion e un pôc di divertiment ju fâs e tant int e ven achì par lei ce che o scrîf.
Grazie inmò a ducj!

International Blog Interactive Show

Forsit o vês viodût che in bande a çampe al è un banner: IBIS Award 2007.
Chest progjet mi veve incuriosît e o ai provât a mandâ la domande par jessi ametût: le àn acetade (se no no mi mandavin il banner di meti, mi pâr di vê capît) e cumò stin a viodi ce che al sucêt.

Il Retôr Honsell al fevele di lenghis in Rai

Honsell su Fahrenheit
Caricato da christianromanini

Biel intervent dal Retôr Magnific Furio Honsell ai 2 di Avost vie pe trasmission Fahrenheit su Radio3.

Mi è rivât il tessarin

Come che us vevi za dit, o soi deventât publicist.
Vuê us mostri il tessarin che finalmentri mi è rivât: n. 122877 (terno sec su Rome 12 28 77).
O torni a ringraziâ ducj chei che o ai za ringraziât tal post precedent: mi soi gjavât une biele sodisfazion!
E stant che chest post al è un tic plui ironic di chel altri, o dedichi cheste foto al atuâl diretôr responsabil dal boletin comunâl che mi à parât vie parcè che no vevi operât cun professionalitât.

Ps1: un grazie ai Fantats furlans pe maiute!

Ps2: sì, lu sai, o soi un sticeboris e mal vês za dit!

Molinaro

E ancje Roberto Molinaro al è intervignût sul furlan cuntun intervent che nol jere mâl, ma masse condizionât de sindrome dal "IO C'ENTRO"!
Cun di plui al à doprât une brute peraule "Talebans" che e tache pardabon a stâmi sul cûl!
Lait a lei il prin coment...

Diari di Viaç - Canadà

Luca, Carlo e Giusy a son partîts par Toronto (te foto) in Canadà pe cuarte pontade di Farcadice. Luca mi mande cheste mail, tant che une sorte di diari di "Diari di viaç": une anticipazion golose e preziose di un grant biel lavôr su la emigrazion furlane. Grazie Luca.

ai 26 di Avost dal 2007
E je la cuarte dì di intervistis e ripresis a Toronto. E pe cuarte volte, dopo de Argjentine, Belgjiche e Sudafriche, o scuvierzìn une emigrazion sorprendentementri divierse. A son tantis lis robis che ti smaravein a Toronto: la prime, in ordin di timp, e je la sensazion di no vê mai capît ad in plen il concet di multiculturalisim. Lant pes stradis de citât al è impussibil no restâ sorprindûts di cemût che etniis diviersis, lenghis diviersis, grafiis diviersis su pes tabelis e insegnis des buteghis (caratars latins, grêcs, asiatics) a convivin “in maniere naturâl” delineant o afermant une teorie de diference. Îr, intune interviste nus àn dit: «La diference tra i Stâts Unîts e il Canadà e je semplice: cuant che tu ti traferissis tai Stâts Unîts tu deventis “american”, cuant che tu ti trasferissis in Canadà tu deventis un "canadês che al ven di...”». Nissun in Canadà ti domandarà di dismenteâ il to passât. Par un canadês e je propit cheste la ricjece. Cui che al associe a cheste imagjin la imagjin de Italie tant che stât regjonâl si fâs cualchi domande... o no?
Luca

Comunicazion dal sindic

E je stade comunicade une robe interessante vie pal ultin consei. Lait a viodi tal prin coment...

Benvenuto on the web

Stant che mi disês che o feveli dome par furlan, o ai doprât un titul anglo-talian par presentâ il sît gnûf dal albierc di Renzo: ve ca il link.
Jo e Thermo i vin za dât un sugjeriment, ma o scuen ancje ameti che il sît mi plâs une vore!

Fieste ladine a Sant Denêl

Doman e tache Fieste Ladine a Sant Denêl: ve chi il program.
Fieste ladine e je dal sigûr une grande e biele ocasion.
Vê un moment di incuintri, riflession e confront tra i nestris popui al significhe fâ il pont de situazion par cjalâ indenant.
Purtrop però nol baste cjatâsi dome 3 dîs par an: intune realtât come la nestre li che la tutele des nestris lenghis (furlan, ladin e grisonês) a son l'element di fonde de nestre identitât, o calcoli avonde stonât l'ûs dome de lenghe taliane come unic veicul pe comunicazion e promozion de fieste stesse.
Se o vin di garantî l'avignî de nestre lenghe, no si pues limitâsi a pocjis situazions, ma o vin di pontâ sul so ûs simpri plui larc dentri di ogni situazion de nestre vite cuotidiane e istituzionâl.
Mi plasarès che pai prossins agns e cressès la presince no dome dai contignûts (dal sigûr za di alt nivel), ma ancje dal ûs normâl de lenghe furlane in maniere di no cjatâsi a fevelâ "di furlan", "di grisonês", "di ladin", ma "par furlan", "par grisonês", "par ladin".

Maran

Ma se a drete o ai za dit cui che no mi plâs cuant che al fevele di minorancis (Menia, Asquini, Ciani), ancje a çampe a son biei personaçs che a mertaressin un bon ripàs des normis dal stât talian: dopo vê fevelât di Malattia (nomen omen?) e i siei, ve ca il bon Alessandro Maran dal Ulivo. Tal prin coment, us met un so deliri publicât sul Piccolo.

Menia

Cualchi zornade indaûr o fevelâvi di un politic sul blog di Renzo Tondo.
No lu vessio mai fat: o soi stât acusât di vê dât dal fassist a Roberto Menia (te foto).
Jo o ai dome contestât lis declarazions che Roberto Menia al à fat in cont di minorancis linguistichis e come che o podês lei tai coments dal blog di Renzo Tondo, o ai cirût di sclarî la mê opinion.

Po dopo Menia al è libar di pensâle cemût che al à voie e di fâsi fotografâ cemût che i plâs di plui.
I doi però un consei: pai eritemis sot dai braçs, a son cremis cussì buinis che a fasin passâ lis iritazions intun lamp... cussì nol covente che al vadi ator cul braç alt...

Interogazion sul interreg

Us met achì il test de interogazion che o ai presentât pal consei comunâl di doman, joibe ai 23 di Avost.

Il sotscrit Christian Romanini
- stant la interogazion presentade vie pal ultin consei comunâl (29/06/2007) li che si domandave sclariments pal ûs de lenghe furlane dentri dal progjet Interreg
- stant che la lenghe furlane e jere stade dal dut ignorade, ancje se la Europe cu la Cjarte europeane pes lenghis minoritariis e garantìs l'ûs de lenghe furlane pes minorancis linguistichis dai stâts de Union europeane
- stant che l'ass. Garzitto e garantive che il comun nol ignore la lenghe furlane
- ricevût de Segretarie l'ultin invît pe presentazion dal opuscul par talian e par todesc, dentri sal progjet Interreg

AL DOMANDE

1. parcè che l'invît al è dome par talian e par todesc
2. cui che al fâs lis traduzions par todesc
3. parcè che la referente dal sportel pe lenghe furlane e à firmât la mail dome par talian come Segretarie
4. se il comun al riten impuartant il servizi dal sportel pe lenghe furlane
5. se al pues dimostrâlu
6. se o varìn prime de fin de legjislature une comunicazion trilengâl furlan, talian, todesc
7. copie scrite in formât digjitâl de rispuete ae interogazion de volte passade (ndr, cheste mi è rivade ai 8 di avost e le cjatais tai coments)
   
8. di savê cui che al à fat la traduzion de rispueste ae interogazion passade
9. copie scrite in formât digjitâl de rispueste a cheste interogazion

Tai coments invezit us met la pontade precedente: ce che o vevi domandât tal ultin consei (29/06/2007) e ce che mi jere stât rispuindût simpri in mert a cheste cuestion.

Thermoscandai: ce pensaiso des mês dimissions di cjâf grup?

Come anunciât, ve ca il secont scandai:

Ce pensaiso des mês dimissions di cjâf grup?
a) un altri at de vuere mai finide
b) un plasê fat ae zonte interie
c) un erôr politic
d) une sielte juste
e) no i free un caz (a nissun)
f) nissune opinion

O podês votâ fin ai 31 di Avost. Votait, votait, votait!

Consei comunâl

Joibe ai 23 di Avost aes 18.30 al è Consei comunâl e achì al è l'ordin dal dì.

Grazie Claudio

O ringrazii Claudio Bardini (chel cu la canotiere blancje, te foto), president dal CSI (centro sportivo italiano) par Stadium, une biele manifestazion sportive che si fâs a Lignan ogni Istât.
Di trê agns in ca nus invide noatris damiscj par podê ufrî ai partecipants, no dome torneu di beach volley, canois polinesianis cun Daniele Scarpa (olimpionic cun Antonio Rossi, te foto piçule), i zûcs e lis magjiis di Toni Zavatta.
A son stâts trê biei dîs di sport in compagnie di personis pardabon speciâls.
Grazie a Claudio Bardini e a dute la organizazion dal CSI.

Ligabue

Il Giorno Di Dolore Che Uno Ha

Mandi Flavio

Biei i fûcs?

E ancje chest an il Festival al è lât intun lamp. Tant lavôr par mês e cuant che tu screis lis mostris ae fin di Lui, tu ti rindis cont che in realtât al è za finît e 3 setemanis a passin cence nancje visâsi.
Grazie a Daniele e a ducj chei che a judin la Pro Majano no dome a cjacaris.
Plasûts i fûcs?

Cun Chiara a Aquilee

Chest post lu dediche a Chiara, la mê amie sanzurzine che e vîf a Il Cairo (inmò par pôc). Chiara e je pardabon une persone di cognossi e dopo cualchi mês che o vevi dome fevelât cun jê e scrit cualchi mail, si sin cjatâts di persone intant che e je achì in vacancis. Jê e je la nestre corispondente internazionâl te redazion de Patrie dal Friûl e come tancj furlans che a vivin ator pal mont e à un fuart leam cu la sô identitât furlane.
E par tornâ sul discors che cualchi politic al fâs su inglês vs furlan, Chiara e je un esempli pratic che al dimostre che chei che a àn voie di difindi e tutelâ la lenghe furlane no fevelin dome par furlan: par lavorâ tal forest jê e scuen doprâ l'inglês, ma il fat che e continuedi a fevelâ par furlan, a scrivilu su la Patrie no i à comprometût propit nuie la cariere... Cun buine pâs dai Asquini, Ciani, Leonarduzzi, Rimati, Farcotti... e compagnie briscule che a continuin a stiçâ polemichis e posizions strumentâls.
A part la polemiche che achì o ai fat jo e che mi scusi, dulà sino lâts? Piçule gjite motare jù pe basse, tra Sant Zorç, Palme e clarementri a Aquilee (te foto) te basiliche mari de Glesie furlane.
Mandi Chiara, a la prossime!

Ogni respîr...

The Police - Every Breath You Take

Ogni respîr che tu cjapis,
ogni moviment che tu fasis,
ogni leam che tu rompis
ogni pas che tu fasis
jo o starai a cjalâti...

Cjistiel in rose a Ruvigne

La redazion di vivereragogna mi segnale une biele iniziative dal cjistiel di Ruvigne che si davuelzarà ai 18 e ai 19 di Avost. Za dome l'edifici al merte la visite, figurìnsi se al è ancje in rose. Un mandi a ducj chei di Ruvigne e in particolâr a Dino che mi à passât cheste biele foto dal cjistiel sot de nêf.

Il paîs dai orlois

Come che us vevi za dit, vuê o ai stât ta la val dal timp a Pesaria.
Us met achì une cerce di ce che o ai viodût ta chest paîs, maraveôs come dute la Cjargne.
O ringrazii di cûr i Colonos e il Tomât di Buie pe biele gjite e la organizazion ecezionâl. Compliments!

Al fevele Federico Rossi...

Viaç te val dal timp - Federico Rossi

... Al fevele Guglielmo Pitzalis...

Viaç te val dal timp - Guglielmo Pitzalis

... A fevelin la vuide e la aghe...

Viaç te val dal timp - Orloi a bascule

... Al fevele il carillon...

Viaç te val dal timp - Orloi cul carillon


... e ducj noaltris a scoltâ il timp che al cor.

No coventin peraulis...

Ce fiestone li di Renzo

Grande fieste îr di sere a Tumieç li di Renzo.
Tancj amîs, biele atmosfere e buine cusine!
Se cualchi papavar al vignìs fûr dai palaçons e al stes un tic di plui cu la int, nol varès dubis su cui che al varès di vuidâ la Regjon cul prossin an. Sperìn che chest Avost al puart un tic di sintiment te coce di plui di cualchidun.
Îr tante int a Tumieç e à mostrât che se al dipendès dal popul, lis sieltis a saressin za fatis.
Grazie Renzo e une bussade a Sonia!

Pascat Gjambar a Cjaurià

Un salût e tancj compliments ai fantats de associazion Pascat Day che cu la tratorie di Vico a inmanein la fieste dai Gjambars (si tache martars ai 14 di Avost). Chest an a son ancje biei grups di musiche furlane che a sunin. Mi sa che si viodìn là jù.
O met in evidence chestis 2 datis:
vinars ai 17
Lino Straulino/Loris Vescovo (duo acustic)
Barbariga Funky Band (funky-soul)
sabide ai 18
Jo no kognos (folk-rock furlan)
General musashi (southern rock/blues de Slovenie)

e nol mancjarà il sangrie party!

Altris informazions sul sît de associazion Pascat Day

Sant Lurinç di Sedean

La gnot di Sant Lurinç e je la gnot des stelis e dai desideris.
A Sedean e je une frazion che si clame Sant Lurinç li che propit ai 11 di Avost e je previodude une rogazion une vore sugjestive: lait a lei su Lenghe.net...

Blasoni e il dibatit su la lenghe furlane

O ai let cun plasê l'articul di Massimo Blasoni (te foto) a proposit de lenghe furlane sul Messaggero di vuê. Par furtune, in Forza Italia a son ancje personis che no le pensin come Asquini.
Compliments a Blasoni e grazie: biel intervent che us met come prin coment.

Viaç te val dal timp

Us segnali cheste biele iniziative dal Tomât di Buie par domenie 12 di Avost:
Viaç ta la val dal timp in colaborazion cui COLONOS dentri di AVOSTANIS 2007

“…il gjeni secolâr dai orloiars da la Val Pesarine e il museu dal orloi
intun mâr di vert, Pradumbli,Truia, i stâi di Orias,
lis cjasis carateristichis cui cuvierts a plovê fats cu lis scjandulis ...”

aes 9.15 – partence in coriere de place di Madone di Buje
(aes 9.45 – la coriere e passe denant de stazion di Cjargne par chei che rivin di Udin cul tren des 9.09).

Rivâts a Pesariis si tache la visite a lis variis sezions dal museu dai orlois cu la vuide dai esperts e le visite dai orlois monumentai ator pal paîs.
Pal gustâ ducj insieme o larìn a Osteai.

Tal dopodimisdì ducj libars di lâ ator pai paîs par cjasis, lavadôrs, trois, stâi e vie indenant.

Si monte in coriere aes 16,30
(par rivâ a stazion di Ciargne in timp par cjapâ il treno des 17.30 par chei che àn di tornâ a Udin).

Si rive a Buie tor sîs di sere.

TEN DI VOLI
Puescj a disposizion pal viaç e gustâ coletîf: 20 iscrizions, fin che son puescj, rime di domenie 5 di Avost a e iscrizion si pae le cuote di 35 €uros pai grancj, 25 €uros pai fruts fin a dîs agns dentri de cuote al è il viaç in coriere e il gustâ;

Vint a disposizion dome 20 puescj, si scuen fâ di corse !

info NADIA 0432963537, LAURA 0432961241

Il president Santuz

Te zornade dal aniversari di Marcinelle, o scuen tornâ a scrivi di emigrants. E lu fâs cun tancj compliments a Giorgio Santuz (te foto cun me a Pontebe), president di Ent Friûl pal Mont, pe biele manifestazion di sabide e domenie. Santuz cul so grup di vore no dome al è daûr riorganizâ l'ent Friûl pal mont, ma si è declarât completamentri favorevul al insegnament dal furlan a scuele. Ve chi une altre persone autorevule che e dimostre la inteligjence di une cierte classe politiche furlane, no sierade tal so palaç (o ort), ma che e cjale lontan cence dismenteâsi di dulà che e ven e dal so patrimoni identitari.
Grazie president Santuz!

Ce blogarins chescj furlans! Melchior

Aromai o sin inviâts e cui nus ferme plui?! Ve ca ancje il blog dai Furlans sù pes Gjermaniis scrit di Luca Melchior (te foto) che al vîf a Munich, dulà che al lavore pe Universitât di li.
Nuie ce dî: a chei, che a disin che il furlan al è sierât e nol è atuâl cui timps, o fâs une biele sbeleade!
Parcè che il Friûl no je une "piçule" Patrie, ma une grande Patrie cence confins!
Mandi ai furlans di Baviere e a ducj i furlans ator pal mont!!!

Ce blogarins chescj furlans! Carrozzo

E dopo vê anunciât la nassite di Internazionalitari ve ca un altri blog dut par furlan: chel di Sandri Carrozzo (tal spielut de foto) che cumò al vîf tra Friûl e Catalogne.
Une sorte di diari di viaç, ma no dome: "O ai metût sù chest blog par condividi cu la famee e cun ducj i amîs lis fotos dai puescj li che o voi" al dîs Sandri, che al continue "In bande o podês cjatâ ancje altris informazions e leams su ce che o fâs, che o scrîf, che o publichi..."
O soi propit content che al sedi dut chest sflurî di blog in Marilenghe!

Repetita juvant: Farcadice a Felet miercus

Come za anticipât:

Te zornade che e ricuarde lis vitimis de tragjedie te mine di Marcinelle, (ai 8 di Avost dal 1956) dopli apontament cul cine documentaristic dedicât ae emigrazion furlane.

Miercus ai 8 di Avost dal 2007 aes 21.00 li dal Parc di Vile dai Tinins (o in auditorium, se al plûf) a saran proietâts 2 documentaris su la emigrazion furlane realizâts di Carlo Della Vedova e Luca Peresson (te foto), vincidôrs dal premi Appi 2006:

Farcadice: Diari di viaç – Charleroi (Belgjiche) e Umkomaas (Sudafriche)

Charleroi e je une citadine belgjiche, Umkomaas e je une citadine sudafricane: tant lontanis tra di lôr ma che dutis dôs a forin mete di une vore di furlans, costrets a emigrâ par cjatâ lavôr. E tancj emigrants a son restâts là vie creantsi une lôr vite lontan dal Friûl, ma mantignint un leam cu la tiere dai paris.
A saran presints i regjiscj par comentâ i documentaris insiemit al public.

Ent Friûl pal Mont a Pontebe

Îr o ai stât a Pontebe ae cunvigne anuâl dal furlans pal mont: biele zornade!
Vuê o tornarai sù par finî di viodi la fieste cuntun altri "furlan ator pal mont": il Dree.
E intant mi soi fat la foto cul mitic Bruno Pizzul!

In rispueste a doi antifurlans

Vuê il Messaggero al à publicât une mê letare, ve chi il test:

O domandi ospitalitât te rubriche des letaris par rispuindi a doi conseîrs regjonâi dal centridrete, part li che ancje jo mi identifichi, jessint un iscrit e un elet di Forza Italia.
Intune “Cjase des libertâts” il principi di fonde al varès di jessi propit la difese de libertât di ducj, ma al semee, secont Paolo Ciani (An) (foto a çampe)e Roberto Asquini (Fi) (foto a drete), che pai furlans no sedi la libertât di gjoldi di un dirit tutelât no dome de leç 482/99 dal stât talian, ma adiriture de Costituzion de Republiche, cence contâ dute la normative europeane che e tutele i dirits linguistics des minorancis.
I doi conseîrs dal centridrete (ma ancje di chê altre bande al è ce sgrisulâsi par mert di plui di cualchidun) si declarin contraris al insegnament de lenghe locâl a scuele, platantsi daûr scusis pardabon debulis: al bastarès che a lessin a leisi «Il cuadri european di riferiment des lenghis» par rindisi cont ce che si dîs in Europe in mert a chest argoment. Invezit si continuisi a jemplâ la bocje di peraulis come “internazionalizazion”, “rapuarts cu la Europe e il mont”, ma no si piert ocasion par palesâ une otusitât provinciâl e nazionalistiche pardabon sleade dal cuadri european di vuê, li che la stesse Europe e dîs a clâr che par rivâ a un plurilinguisim concret si à di partî des lenghis locâls, passant a chê dal stât par rivâ ae fin a chês internazionâls che ti permetin di zirâ il mont: fâ une cuintriposizion tra furlan e lenghis internazionâls (par esempli, l’inglês) al è ridicul.
Afermâ che la lenghe furlane e puarte vie timp e fuarcis ai fruts, cuant che invezit al sarès par lôr une oportunitât in plui par disvilupâ plui capacitâts cognitivis, al significhe no vê nissune competence in materie di didatiche des lenghis e resonâ in maniere pardabon limitade: il cjâf dai fruts nol è come un seglot che une volte rivât a nivel, nol ten dentri plui nuie. Anzit, cun plui stimui, si rive a vê une formazion che ti permet di rispuindi miôr a dute chê schirie di situazions che si puedin presentâ intune societât complesse come chê di vuê.
E acusâ che la lenghe standard e la grafie uficiâl a copin lis varietâts locâls, come che al dîs Ciani, al significhe no vê studiât i elements di fonde: une politiche linguistiche serie e previôt sedi la tutele des varietâts locâls sedi la necessitât di une variante standard di riferiment che e fasi di “cuviert” a dut il sisteme linguistic, intun cuadri fondât su la coesistence e no su la esclusion. Ameti il contrari par un che al à la responsabilitât di fâ lis leçs, e je une mancjance pardabon injustificabil: berghelait di mancul e studiait un tic di plui se o vês di fevelâ dal pulpit. Se invezit no us va di documentâsi, parcè che l'argoment no us plâs, us ricuardi che o vês la responsabilitât di viodi dai interès di cheste regjon e no us à obleâts il miedi a fâ politiche. Se o sês contraris al furlan, fevelait clâr, cence platâsi o fâ lezions di furlanetât.
Al semearà strani, ma la posizion di Ciani e Asquini no mi maravee plui di tant, considerât che cuant che a son stadis lis ocasions par fevelâ e confrontâsi su chescj argoments lôr no jerin. Mi riferìs, par esempli, a un incuintri organizât te sede de Regjon a Udin li che su 60 conseîrs invidâts, cuasi il 90 par cent al jere assent e i doi a pene nomenâts a jerin tra i latitants. Cun di plui il stes Asquini al jere stât invidât a une altre taule di vore par frontâ la cuestion e jo stes, presint ta chê ocasion, mi soi permetût di mandâ plui voltis diviers materiâl al grup consiliâr regjonâl di Forza Italia, ma, ancje se su tancj ponts o restìn lontans, dome il conseîr Massimo Blasoni al à vude la creance di rispuindi. Invezit Ciani nol à rivât a concedimi un incuintri, ancje se jal vevi domandât. Ce che e mancje e je la voie di confrontâsi in maniere serene sui problemis: mi àn insegnât che in politiche, cui che al è assent al à simpri tuart e stâ sierâts tun “palaç di avoli” nol jude dal sigûr il dialic. Soredut par cui che al à il prejudizi di vê reson e nol vûl scoltâ opinions diviersis des sôs. O ai come la impression duncje che ciertis declarazions a sedin di singui che a fevelin a non di ducj, considerât che o ai bogns elements par sostignî che divierse int che si identifiche ancje tal centridrete no je cussì contrarie: intune serade a Pagnà assessôrs, conseîrs comunâi, components di sezion e sempliçs iscrits di Forza Italia de zone a àn manifestât un parê positîf al insegnament de lenghe furlane a scuele. Dal sigûr al è dome un campion, ma lis statistichis si fasin a campion.
O sieri cuntune considerazion su chei che a disin che i bêçs pal furlan a son “imorâi”, “butâts vie” e che si varès di fâ un referendum cuintri. Chest al è populisim pardabon puar e provinciâl, che mi fâs nassi cualchi domande: i bêçs che cierts politics a cjapin ancje se a dimostrin di no cognossi lis leçs, o piês, che no àn voie di rispietâlis; che a fevelin dome in maniere strumentâl fasint viodi trop “piçule” che e je cierte politiche, sono bêçs spindûts ben? Sono bêçs che a mertin? Jo no sai rispuindi e mi fâs voie di fâ une provocazion: parcè cun dute cheste ondade “moralistiche” nissun di chescj sioruts nol propon un referendum sui stipendis dai politics? Come che si viôt, cul populisim no si risolvin i problemis, ma si fâs dome deventâ triste la discussion. Par tant lassìn pierdi chestis sflocjis e cirìn di viodi dal destin di cheste regjon e de sô specialitât fondade, voie o no, ancje sul patrimoni linguistic che no si pues ignorâ.
Christian Romanini
conseîr comunâl
di Forza Italia a Maian

Amâr di Maian

Ve lu! Dopo che al è stât anunciât in "pompa magna" la dì de inaugurazion dal Festival (?!?), o ai rivât adore a recuperâ une butiliute dal Amâr di Maian, che clarementri al è un non dome par talian: "L'Elisir del Priore - Majano".
La Nonino e fâs la sgnape "Ue" e le vent in dut il mont, e invezit achì o vin dome l'Elisir... po ben, lassìn pierdi se no cualchidun si stice...
Fevelant dal Amâr, chescj i ingredients: alcul, aghe, zucar, salvie, estrat di mente, melisse (o jerbe di âf) e articjoc.
Plui che amâr al è dolçut e la butiliute no dure trop ;-)

Il riç internazionalitari

E cres la famee dai blogarins furlans cun Internazionalitari.
Internazionalitari e je une trasmission di Radio Onde Furlane che e fevele, cuntun tai nazionalitari, des nazions cence stât e des minorancis nazionâls de Europe. Rispiet al formât radiofonic, achì si puedin cjatâ dome lis gnovis e la trascrizion di cualchi pontade speciâl. Dut câs, la idee, e je chê di zontâ ancje cualchi gnove in plui rispiet ae version audio, massime cuant che la trasmission e je in polse, e la segnalazion di libris o altris materiâi in teme cui argoments frontâts.
Compliments a triku, il riç che al aministre Internazionalitari.

Cine a Felet: Farcadice (Charleroi e Umkomaas)

Te zornade che e ricuarde lis vitimis de tragjedie te mine di Marcinelle, (ai 8 di Avost dal 1956) dopli apontament cul cine documentaristic dedicât ae emigrazion furlane.

Miercus ai 8 di Avost dal 2007 aes 21.00 li dal Parc di Vile dai Tinins (o in auditorium, se al plûf) a saran proietâts 2 documentaris su la emigrazion furlane realizâts di Carlo Della Vedova e Luca Peresson (te foto), vincidôrs dal premi Appi 2006:

Farcadice: Diari di viaç – Charleroi (Belgjiche) e Umkomaas (Sudafriche)

Charleroi e je une citadine belgjiche, Umkomaas e je une citadine sudafricane: tant lontanis tra di lôr ma che dutis dôs a forin mete di une vore di furlans, costrets a emigrâ par cjatâ lavôr. E tancj emigrants a son restâts là vie creantsi une lôr vite lontan dal Friûl, ma mantignint un leam cu la tiere dai paris.
A saran presints i regjiscj par comentâ i documentaris insiemit al public.

Zucchiatti al è il miôr

Almancul cussì al è ce che a pensi i votants dal scandai di chest blog. Di fat il 32% dai 213 che a àn votât, a àn indicât Aldo Zucchiatti, l'assessôr ai LLPP (te foto) come il miôr component de zonte comunâl di Maian. Compliments pal vincidôr e un incoragjament a chei che a son rivâts indaûr. Cumò tocje pensâ ae cerimonie di premiazion e al premi che si varà di consegnâ: vêso cualchi sugjeriment?

Ve chi ducj i risultâts:

1. Aldo Zucchiatti (69 su 213=32%)
2. Romano Ciani (46 su 213=21%)
3. Mariella Unfer (35 su 213=16%)
4. Claudio Zonta (20 su 213=9%)
5. Maria Teresa Garzitto (18 su 213=8%)
6. Marco Minisini (16 su 213=7%)
7. Giuseppe Cozzi (9 su 213=4%)

Il fat che lis percentuâls a son in cifre tonde, al fâs pierdi cualchi decimâl.