Rap par Cjargnel: Dek Ill Ceesa live@MUSICHE*2006

Dek Ill Ceesa live@MUSICHE*2006
Caricato da luxaud

Prime il furlan e dopo l'inglês

Chê altre dì o leievi il NuovoFVG, diret di Mauro Tosoni, che nol è propit un che le pense politichementri come me. Ma chest no mi interesse: o preferìs jessi informât il plui pussibil e po decidi cul gno cjâf. Duncje, par tornâ sul discors di partence, cence pierdisi vie par altris trois, us met chest link al gjornâl, ancje par rispuindi a chei che a pensi che la tutele linguistiche di une comunitât e sedi une robe secondarie, cuant che invezit za te Costituzion taliane (art. 6, migo l'ultin) e al è scrit clâr il principi che al à dât vite ae Leç 482/99.
Se nol ves di funzionâ il link, tal prin coment, o cjatais il test de interviste a Silvana Schiavi Fachin.

Il Furlan al va cu la coriere!

Su ILfurlanist e je la notizie dal ultin at de campagne promozionâl dal Cirf de Universitât dal Friûl.
Ocjo al furlan su lis stradis de regjon. La campagne di promozion de lenghe, pensade dal Centri Interdipartimentâl di Ricercje su la culture e la lenghe dal Friûl (Cirf) de Universitât dal Friûl, si sierarà cuntun viaç in coriere, di Zenâr fintremai ae metât di Lui, tra lis provinciis di Udin, Gurize e Pordenon. Cuatri autobus extra urbans, doi che a partissin de stazion di Udin, un di chê di Gurize e un di chê di Pordenon, a ziraran di fat pal teritori regjonâl metint fûr cartei cu la formule “F=MC2 Furlan mieç di comunicazion al cuadrât”.

La scree de campagne di promozion de lenghe e je dal prin di Novembar dal 2006: di chê volte, la campagne si è disvilupade midiant di spots publicitariis trasmetûts tes salis cinematografichis plui grandis de regjon, ma ancje in gracie di messaçs pe radio, di publicazions su gjornâi specifics e su la cjarte stampade, o cu la distribuzion di cartulinis e di segnelibris, adesîfs e manifescj. Par ducj i interessâts, i materiâi si distribuissin al Cirf, li de Universitât, in vie Petracco 6, a Udin. Inte stesse sede si pues usufruî dai servizis dal Sportel di lenghe furlane, che si pues contatâ ancje la numar 0432 5564580, o pûr scrivint une mail. La campagne promozionâl «e je stade – e comente Piera Rizzolatti, diretore dal Cirf – une biele prove pal Cirf e pal Ateneu di Udin. Pe prime volte o vin vût a ce fâ cuntune campagne in grande scjale pe promozion de lenghe furlane, leade al mont de tecnologjie, de sience e de inovazion».

«La formule F=MC2 – e spieghe Priscilla De Agostini dal Cirf, coordenadore dal progjet -, che e ven di chê di Einstein E=MC2, sinonim universâl di discuvierte sientifiche, e rimarche l’aspiet une vore inovatîf dal doprâ il furlan tant che lengaç sientific, tecnologjic e filosofic». Tai ultins agns, il studi, la ricercje continue, lis publicazions dal setôr, come cualchi riviste sientifiche in lenghe furlane, e il fat di vê prontât imprescj linguistics specifics, «a àn contribuît – e rimarche Rizzolatti - al procès di insiorament continui e di evoluzion dal furlan». «La lenghe furlane – e siere De Agostini – e à vuê la pussibilitât di rapresentâ ad implen la realtât e di afrontâ nivei alts e diversificâts di comunicazion, e la discuvierte di cheste gnove formule F=MC2, dute par furlan, e je sore il dut un ricognossiment des potenzialitâts concretis di cheste lenghe».

Giusy in Sud Afriche

Ce figade skype! O ai a pene fevelât cun Giusy, une mê amie di Glemone che cumò e je in Sud Afriche.
O soi stât propit content parcè che al jere un pôc che no le sintivi.
Mandi Giusy e mandi a ducj i Furlans ator pal mont. Almancul cun internet o rivìn a sintîsi plui dongje!

Letaris sul gjornâl

Al è di cualchi zornade che si lei diviersis letaris... come che al domandave cualchidun, velis achì... ma no dome...

La gnove version dal blog

Come che cualchidun mi à segnalât, o varês viodût che alc al è gambiât tal blog. O ai decidût di fâmi un regâl pai miei 30 agns (c***o! a son 30 propit vuê) e o soi passât ae gnove version che e à cualchi funzionalitât in plui, par podê dâ un servizi un tic plui curât ai letôrs.
A part l'aspiet che mi rivuarde, ven a stâi la part gjestionâl dal blog, pal utent a son comparidis lis "Etichetis". Chestis etichetis che pal solit o cjatais in ogni post in bas a çampe (o te colonute chi in bande), us permetin di cjatâ ducj i post dividût par argoment. Al è clâr che pal moment chest al vâl pai gnûfs post, ma o soi che o viôt di fâlu ancje par cualchi post passât... par esempli provait a fracâ te liste a çampe par cjatâ l'argoment che un interesse.

Alessandra Dittaro sporteliste pe lenghe furlane a Maian

Le ai a pene savude: Alessandra Dittaro di Cjasesole e à vinçût la selezion pal sportel pe lenghe furlane a Maian. O soi propit contenton!

Il plan dai implants telefonics

Come che al à za anticipât cualchidun, e zire une letare di IntesaperMajano che e convoche i comitâts di frazion par martars ai 30 di Zenâr aes 18.30 in Municipi par fevelâ dal plan de telefonie.
Come comission Teritori e Ambient o vevin dât des indicazions pe stesure dal plan e ancje in Consei o vevin fat une delibare une vore restritive, par evitâ che lis antenis a fossin proviodudis sedi tal centri dai paîs e lontan di areis sensibilis (areis par fruts, anzians...).

Zornade de memorie: Auschwitz Birkenau

Auschwitz Birkenau
Caricato da kahaniste13

La principesse coragjose

A Forgjarie, îr di sere, la scuele elementâr di li e à presentât l'ultin libri realizât pai fruts de classe prime.
O ringrazii il preside Silvano Bernardis che mi à invidât ae presentazion e che mi à dât la pussibilitât di partecipâ a cheste biele esperience fasintmi voltâ par furlan la flabe.
O puartarai doman une copie dal librut in biblioteche cussì, chei a volaran leilu a puedin domandâlu alì.

Proprietâts coletivis in Cjargne

Us segnali chest articul che o ai scrit pal Friuli su lis proprietâts coletivis e i ûs civics. O ignoravi la difussion di cheste realtât che o crodevi avonde limitade. Invezit, di une prime analisi, mi soi rindût cont che cheste usance di gjestion dal teritori no rivuarde dome la nestre regjon, ma si cjate in dute Italie e no dome.

Fin setemane tra solidarietât e art

Come che si lei sul Gazzettino di vuê chest fin setemane al sarà dividût tra solidarietât: si tache vinars di sere cul Cineforum de Soms e si continue sabide dopomisdì cu inaugurazion de mostre di piture dai arlêfs di Monica Zumino.

Musiche di autôr...

Cineforum de Somsi: All invisible children

Vinars che al ven ai 26 di Zenâr aes 20.00 in auditorium a Maian, la Societât Operarie e à inmaneât une serade di Cineforum par fevelâ des problematichis de infanzie. All invisible children al è un film fat di 7 impuartants regjiscj che a lei chest teme daûr des lôr esperiencis e sensibilitâts. Ospits de serade, par un dibatiment ae fin de proiezion, a saran Renzo Tondo, Paolo Menis, Daniele Damele e ancje i rapresentants di une cjase famee e une mission in Brasîl. Compliments ae Somsi!

Colonia Caroya: un toc di Friûl in Argjentine

Luca Peresson e Carlo Della Vedova nus fasin un altri grant biel regâl: il prin Farcadice (1999).
Grazie e compliments!!!

Diari di Viaç: Colonia Caroya
Caricato da farcadice

Publicitât progrès: cuintri la ignorance informatiche

Mi soi rindût cont che in teme di internet, gnûf media e gnovis tecnologjiis e je une vore di IGNORANCE.
Jo stes (te foto), in plui ocasions, o ai scuviert grazie ancje ai intervents dai letôrs di chest blog (in particolâr o scuen ringraziâ thermonuke, ma ancje altris) che a son tantis robis di savê.
Alore propit parcè che o pensi che tal 2000 no si puedin restâ cence une alfabetiziazion informatiche minime, mi permet di segnalâ un pâr di robutis, in maniere che chei che a son cussì arogants di crodi di savê dut e invezit no san propit nuie, a puedin cjatâ cualchi rispueste e soluzion a la lôr ignorance: cjalait achì e achì.
O speri che di cheste discussion a vegnin fûr inmò cualchi segnalazion interessante e cualchi sugjeriment costrutîf.

Cjante che ti passe

Madrac
Caricato da luxaud

E par cui che al volès ancje scoltâsi la radio, us segnali Radio Onde Furlane (si pues scoltâle in streaming diretementri tal vuestri computer)e il gnûf program condusût di Daniel Samba, zovin camerunês che rivât in Friûl al à pensât ben di imparâ la nestre lenghe.

I 40 agns dal Cipaf

Sabide a Osôf, li di Fanton (te foto il centri ricercjis), si celebraran i 40 agns dal Cipaf.

Rondis padanis e tarondis nostranis

E je notizie di vuê che ancje la direzion provinciâl de Lega Nord e à dât il so parê positîf pes "Rondis padanis". Intant a Maian, su la Statâl 463, dopo che e je saltade la idee di meti une rotatorie li di Snaidero, al ven fûr che un ticut plui in sù, viers Osôf, dopo de feramente di Taboghe e di becjarie di Pugnet, di front dal Broi e vignarà fate une altre zone comerciâl e induvinait un pôc: par jentrâ e je previodude une rotatorie... pe serie "Cualchi volte a tornin!"

Edilizie privade

La rispueste dall'assessôr ae LLPP su la interogazion in mert aes concessions ediliziis.

Rassegne Stampe: la rispueste dal Sindic

Dopo dal consei di lunis li che si à fevelât de domande di revoche des deleghis al assessôr al ambient, famee, paritâts om femine, politiche pai zovins, turisim (no come persone, ma come incjarie), vuê sul gjornâl a son l'intervent di Lieto Molinaro e la rispueste che il Sindic i da.

O vin finît a miezegnot

Ancje se le vin tirade a dilunc fin miezegnot, nol è bastât par finî fûr ducj i ponts al ordin dal dì.
O soi restât che e jere la sale plene di int: e po a àn il fiât di dî che la int no je interessade ae vite publiche.

Thermorubriche pal an gnûf:Glemone su Scai

Come che nus à segnalât Thermo, si ricuarde che su Sky History Channel vinars ai 19 di Zenâr al larà in onde un documentari su Glemone (te foto, il puarti di via Bini dopo dal Taramot): intant lait a viodi achì.
Grazie pe segnalazion.

Europe e lenghis locâls

Sul Mv di vuê al è jessût ancje un articul che al ricuarde un pâr di iniziativis fatis timp indaûr: la cunvigne di Sant Denêl e la mozion mandade in Parlament.
Te foto il panorame european des lenghis locâls.

Pal prossim consei

Come che za o vês let sul gjornâl,Intesa per Majano e à domandât al sindic la revoche des deleghis a Mariella Unfer (te foto), assessôr cun deleghe al ambient, turisim, femee, paritâts om femine e politichis pai zovins. Voaltris ce pensaiso?

Ospedâl di Sant Zuan a Sant Tomâs

Par cui che al à voie di savê cualchi novitât e magari ancje viodi a ce pont che a son lis indagjins archeologjichis, vuê dopomisdì tor 3 o sarai a Sant Tomâs. Cussì o cjalìn il stât dai lavôrs insiemit. Us spieti.

Oris: 17.40
O soi a pene tornât di Sant Tomâs e us fâs viodi un particolâr dai scandais archeologjics. No son une vere campagne di sgjâfs, ma dome un prin intervent par verificâ la cualitât dal sît. E i prins risultâts a son pardabon positîf. Cheste che e je te foto e je une pavimentazion in clap (un pedrât) che al è saltât fûr tal zardinut tra l'ospedâl e la gleseute di Sant Zuan. Sot di uns 30 cm di teren e je dute cheste pavimentazion une vore ben conservade e regolâr. Cun di plui a son vignûts fûr reperts di vaselam dal 1400. Par no fevelâ di ducj chei altris reperts che a son dentri e ator de cente dai mûr. In sumis, chel che al veve di jessi dome un côl di claps si presente come une dai sîts archeologjics plui impuartants de Ete di Mieç e adiriture la Sorintendince (in pratiche: il Ministeri dai Bens Culturâi) e à confermât la impuartance dal edifici. Pal moment mi fermi achì, ma us invidi pardabon a lâ a dâ un cuc. Ca di cualchi mês, cuant che al torne un tic di plui cjaldut i lavôrs a podaressin pardabon cjapâ une biele corse.

Convocât il prossim consei comunâl

Lunis che al ven (ai 15 di Zenâr) aes 6 e mieze di sere al è il consei comunâl. Par cjatâ l'ordin dal dì, us segnali la home page dal comun.

Comission teritori e ambient

Joibe o ai convocade la comission teritori ambient par viodi di planificâ lis oparis pal 2007 e lis relativis domandis di contribût di mandâ indevant. Prioritari: il Cuel dal Fum.

No incinisadôrs

Vonde platâsi daûr di peraulis che no si capissin! Al è impuartant fevelâ clâr e clamâ lis robis cul lôr non. I termovalorizadôrs NO ESISTIN! Brusâ scovacis nol valorize un tubo.

Pifanie: pît di strie

Lis zornadis ben plancut a tachin a slungjâsi. Vuê e je la gnot dai pignarûi. A Tarcint, sul cuel di Cuie a piin il plui famôs, ma a ancje a Maian e frazions a fasin i pignarûi: Deveà, Cjasesole, Susans a son chei che di solit o voi a viodi jo. Voaltris savêso ancje di altris borcs?

Une domande...

Mi àn dit che al è rivât il notiziari di "Intesa per Majano", vêso viodude une copie?

Concors in Comun

Ancje a Maian al è stât metût fûr un avîs di concors par un puest di Operadôr di sportl linguistic daûr de leç 482/99.
Fracait achì par vê plui informazions.

Consei comunâl

Spietant di tornâ in consei, us met inmò alc di lei (rime no volude)...

Rassegne stampe

Tornin a tacâ cu la part informative dal blog, segnalant un pâr di notiziutis relativis al nestri paîs: un premi dât ae Bube e l'articul relatîf ae mancjade sentade dal consei comunâl dai 23 di Dicembar.

Ps: chel te casope de edicule chi in bande nol è nissun de zonte (precisazion dovude al fat che cualchidun timp indaûr al veve notade une cierte semeance cuntun assessôr).

Inmò bon an!

Katie Melua - Blowin In The Wind
Caricato da nono_the_bean