Fieste de Patrie dal Friûl

Cheste e je la setemane de Fieste dal Friûl che e cole ai 3 di Avrîl cuant che a colaran i 932 agns de costituzion dal Stât Patriarcjâl di Aquilee (1077).
Chest aniversari al ricuarde cuant che l’Imperadôr Indrì IV, tornant di Canossa, li che i jere stade gjavade la scomuniche di Pape Gregori VII, al ven salvât dal so amì Siart di Beilstein, Patriarcje di Aquilee, che lu jude a scjampâ de vuaite dai nobii che lu menaçavin. Par ringraziâlu de fedeltât e dal jutori prestât, ai 3 di Avrîl dal 1077 l’Imperadôr Indrì IV al firme la bole imperiâl che e conferìs al Patriarcje Siart il podê temporâl: pe prime volte la aree, che e cjape dentri i teritoris dal Friûl, Cjargne, Cjadovri, e ancje zonis che vuê a son in Austrie, Slovenie e Istrie, e je governade di une autoritât locâl e autonome che e à sede a Aquilee.
Chest an la fieste dai 3 di Avrîl e je inmaneade de Provincie di Udin, dal Comun di Buie e dal Istitût Ladin Furlan “pre Checo Placerean” cu la partecipazion de Provincie di Pordenon, de Regjon Autonome Friûl-Vignesie Julie, de Agjenzie Regjonâl pe Lenghe Furlane, des Diocesis di Gurize, Concuardie-Pordenon e Udin, de Universitât dal Friûl, dal Ufici Scolastic Regjonâl, de Parochie e de Pro Loco di Buie.
Ve chi il program complet.

E jù ploie

Biel intervent di Boris Pahor

Us segnali un articul jessût su LengheNET che al fevele di un incuintri cun Boris Pahor, scritôr sloven di Triest (ancje la Patrie e veve za fevelât di lui) che al è intervignût a Cormons par presentâ il so ultin libri. Te interviste al dîs che buine part dai furlans al è aromai talianizât. Jo no dome us consei di lei chest articul, ma us met tal prin coment ancje un so altri intervent jessût cheste setemane sul Piccolo di Triest, li che al fevele di foibis, riconciliazion e veretât storiche masse voltis tradide in non di une ideologjie nazionaliste.
O scuen ameti che fint a cualchi an indaûr no savevi di precîs ce che e significave la peraule foibe, ma tai ultins mês, vint ancje plui contat cun Triest, o ai vude maniere di sperimentâ plui di dongje ce che al è il strissinâsi di un nazionalisim talianon che o crodevi che al fos finît passe 60 agns indaûr e che invezit al continue (nancje tant "sot vie") a strumentalizâ cierts events... Lu sai, o soi stât un tic criptic, ma propit par chest us consei di lei l'intervent di Boris Pahor, che a mi mi à viert i voi.

Adriano Di Giusto

Vuê i fâs i compliments a Adriano Di Giusto che al è finît su lis pagjinis de Vita Cattolica di sabide ai 21 di Març .
Ve chi l'articul che al fevele di lui:

Alè Friûl
UNE FARIE DI ATLETIS
Adriano Di Giusto, 41 agns, di Maian, di pôc nomenât president de Federazion di atletiche lizere di Udin, al è stât l’ospit de seconde pontade di «Alè Friûl», la trasmission in lenghe sul sport di chenti, che e va in onde dutis lis sabidis aes 10 e mieze di matine e aes 5 e un cuart daspomisdì su Radio Spazio 103.
La ocasion e je stade dade dai resints risultâts ai campionâts europeans indoor tignûts a Torin. In chê ocasion i atletis de regjon si son fats valê in particolâr cu la astiste Anna Giordano Bruno e il cuatricentist Iacopo Marin, che al à vinçût la medaie d’aur inte stafete. «I risultâts tal cuviert dai nestris atletis a vegnin dal alenament al Palaindoor Bernes di Udin dulà che a vegnin a alenâsi Bruno, Marin e ducj i atletis de regjon», al spieghe Di Giusto, gjoldint de tradizion di grancj esponents di chest sport che e continue. Ma cui sono i zovins di tignî di voli? «A son tancj, jo o nomenarès Riccardo Cecolin, zovin dal 1988, che al è une promesse dal salt in alt (chest an al è rivât a 2,20), al continue la tradizion dai Dal Forno, Di Giorgio, Toso e Talotti, e dopo Massimiliano Snaidero che tai ultins campionâts talians al cuviert al è rivât setim», al dîs Di Giusto. Jenfri lis feminis o zontìn ancje Alessia Trost, 16 agns, che e je rivade a 1,80 tal salt in alt. Par tignî in Friûl i atletis plui prometents di un pâr di agns al esist un progjet «talent»: la Regjon e da un jutori finanziari a lis societâts par permeti di tignî in cjase i zovins: la ultime rivade e je la coridore Micaela Bonessi che cumò e cor par la societât Maratonina di Udin e e ponte a fâ ben sui 3000 metris dulà che chest an e je rivade a 9.22. «La atletiche e je un sport puar, ma e je la fonde di ducj i sports, par zuiâ a balon, ducj i fruts a àn di imparâ a cori, saltâ e tirâ. Ducj a puedin fâ atletiche», al comente Di Giusto. Sabide ai 21 di Març «Alè Friûl» al propon une interviste a Stefano Franz, fondadôr dal ugnul Chelsea fan club di Italie.
articul di MARCO TEMPO

Donadôrs in assemblee a Maian

Mi è rivade la convocazion de sezion di Maian dai Donadôrs di sanc: sabide ai 28 e je la zornade de donazion e domenie a buinore la assemblee.
Come simpri o invidi ducj, se a puedin, a deventâ donadôrs no dome di sanc, ma ancje di tiessûts e orghins.

Tal ort

E intant e je rivade la Primereve e cui prins cjalduts (aiar permetint) dal sigûr cualchidun al à cjapât sù i imprescj e al à tacât a lavorâ l'ort. A chescj, ma ancje chei pucefadiis che come me no àn chê di metisi a svangjâ o semplicementri no àn l'ort, us segnali la recension dal libri di Stefano Montello, jussude su IL FRIULI di vinars ai 13 di Març dal 2009 te pagjine Marilenghe.

ORT, PASSION FURLANE

Fi di un impleât comunâl che si jere “sfrancjât” lassant la tiere e rivant a lâ a vore in Municipi, Stefano Montello al ven fûr in librarie cu la sô ultime fadie leterarie dedicade a la grande passion dai furlans “Manuâl critic pal ort-l'art da la jeche”.
“Ancje se gno pari al diseve che o tornavi indaûr” al dîs Montello, za cognossût al public pe sô vôs e pe sô musiche cui Flk “jo o ai cjatade la mê dimension tal lavôr di coltivadôr, dopo che diplomât mestri o vevi tacât a fâ il saldadôr: ma une dì, chê semençute di lidric mi à fat gambiâ vite”.
Montello al conte de sô esperience di agricoltôr, ma no dome. Il libri, editât de cjase editore universitarie Forum, te golaine di narative gnove “Fûrlanie […] vôs di un Friûl daviert al mont […]”, al è il pretest par fevelâ dai Furlans e de lôr identitât.
Inte prime part si riflet suntun interessant paralesim tra l'ambient e il popul, tra cemût che chest rapuart al pues condizionâ e ancje rifleti il caratar de int che lu vîf. O vin cussì il porton de cjase, separade dal esterni “e par cui che al ven rive de strade un mont blindât” si lei tes primis pagjinis. Un pôc come che al somee il furlan: “difensîf, prudent, suspietôs sul imprin; socievul e cence malizie dopo; solitari te fonde de anime; carogne cuant che si trate dal ort”. Sì, parcè che insom de proprietât domestiche al è chel blecut di tiere plui o mancul grant, li che si jentre (spes dome se si à la clâf dal clostri) in aparence par rilassâsi, ma che in realtât al è un “piçul cjamp di bataie”: un lote continue cun dutis lis besteutis che ti mangjin la verdure, cul delicât ecuilibri des sostancis che lis plantis a assorbissin, cul vicin che nol à mai di vê lis jechis miôr des tôs.... “In Friûl lis plui grandis barufis si àn vudis par cuistions di ort…” al conferme Montello.
E dopo une prime sezion introdutive li che l'autôr al conte carateristichis no dome dal ort, ma ancje dal ortolan passant tra citazions storichis e leterariis, si jentre tal ort, leteralmentri: la seconde part e je dedicade a lis plantis che si cjatis tes jechis. In ordin alfabetic a vegnin presentadis, tacant cul “militaresc” ai, passant pe freule “sensuâl”, il “poetic” pevaron fintremai a la “narcisistiche” vît, la ultime schede che si siere cuntune conte a jê dedicade.
L'ultin cjapitul dal libri al fevele dal Ort come “Teatri de Memorie”, come che al marche ancje Pierluigi Cappello che al firme la introduzion dal test. Un volumut che si siere masse adore par trop che al rive a coinvolzi il letôr cuntun furlan sclet e diret “la uniche lenghe che mi sintivi di doprâ par chest libri: se lu ves scrit par talian, mi sarès pierdût in milante pagjinis di plui”, nus conferme l'autôr. Il “Manuâl critic pal ort-l'art dal la jeche” si lei intun flât e al conferme la grande ecleticitât dal autôr che, in spiete di tornâ a cjapâ in man la ghitare, al pense za ai prossims progjets “Mi plasarès realizâ ancje un spetacul teatrâl su chest libri” nus confide.

Cun D'Aronco, Vidal e Burelli: Cadorna nol merte l'onôr di une place

Preseât Sindic di Udin,
vuê sul Messaggero al è un biel intervent che al fâs une propueste secont me di condividi: Gianfranco D'Aronco, Bruno Vidal e Ottorino Burelli a proponin di gjavâ il non di place Cadorna e intitulâle ai miârs di soldâts muarts (o miôr: mandâts a murî propit par cause di chest gjenerâl).
Us met chi la traduzion di un passaç dal articul, ripuartant tal prin coment dut il test.

Presât Sindic, su Cadorna a son stâts scrits libris su libris. Il so cult al è stât confermât di Mussolini tal 1924, cuant che il gjenerâl al fo promovût maressial di Italie. Al è di in chê volte che si è consolidade la venerazion dal piemontês. I ordins pai assalts mats, lis fusilazions te schene, i procès imediâts e lis decimazions a son prin di dut une sô responsabilitât.
Nissun al pense di celebrâ procès dopo muart: tant plui che la stesse comission di inchieste, istituide subit dopo Cjaurêt, finidis lis voris, lis sierà tun armaron. "Parce sepultis" sigûr: ancje Cadorna. Ma vuê si trate dome di meti finalmentri la peraule fin a un malintindiment: il continuâ di un ricognossiment a un personaç, che in pratiche tal imagjinari coletîf al ven metût sul stes plan dai inocents, che lu stes al à sacrificât.
Une des placis dal centri di Udin e je dedicade a Cadorna. O domandìn che chel non al vegni gjavât de citât, batiade une volte cul penôs titul di capitâl de vuere. Pluitost che si dedichi la place a lis vitimis, che 100.000 mil a son intassadis sot dai nestris voi a Redipulie e 25.000 a Udin.

Jo o disarès di copiâ chest post e di mandâlu al Sindic di Udin: e-mail: sindaco@comune.udine.it

Presentade La Comugne

Îr di sere o ai stât a la presentazion de riviste leterarie La Comugne.
O ai vût il plasê di puartâ i salûts dal gnûf Cda de Arlef, stant che il President nol à podût intervignî par un imprevist e mi à delegât. E o ringrazii la editore Alessandra Kersevan (za componente dal Cda de Arlef) e il curadôr dal progjet Pauli Cantarut (za component dal Cts de Arlef) che mi àn lassât fâ, dongje dai salûts, ancje cualchi riflession in gjenerâl che us torni a proponi, zontant magari ancje alc altri (no ai podût jentrâ tal particolâr, parcè che si tratave di un progjet decidût di finanziâ de Arlef di prin).
No met in dubi che la leterature in lenghe furlane e vedi propuestis interessantis, ma chest nol baste.
Prin di jentrâ te sale de presentazion o ai zirât tra lis scansiis de librarie che e ospitave l'event (une gruesse librarie di Udin). No ai cjatât un titul (un) par furlan: alore mi soi dit "al è vinars, o soi stracut, magari no mi soi inacuart che a son... o voi in casse e o domandi dal catalic". Risultât: "mandi, scusait une informazion: vêso libris in lenghe furlane"... al passe cualchi secont... rispueste de comesse (simpatiche e cun creance) "mmm.... aspetti... abbiamo questo (e mi mostre "il cjasâl dai animâi" che no ai capît parcè che lu veve sul bancon), ma altro... no... mi pare di no... ah sì: c'è anche questa rivista"... po si vise che forsit: "ma forse è venuto apposta"... e jo: "eh sì..."
Chest mi sburte a pensâ che nol è suficient stampâ materiâl (o feveli simpri in gjenerâl) se dopo no si lu cjate sul marcjât.
Parcè che al è just che un editôr al furnissi une ocasion pai scritôrs, ma no si pues trascurâ che dopo cheste "ocasion" no vedi di jessi fate cognossi e duncje secont me al è necessari rindile "popolâr", in maniere che la int le cjati: e chi al jentre in zûc il mont de distribuzion dai prodots che e viôt il librari come interlocutôr principâl dal letôr: dulà si vadial a cirî un libri? In librarie (a son ancje altris canâi, ma secont me la librarie e je inmò un canâl fuart).
E come che al diseve ancje Fulvio Romanin "Nol baste che un test al sedi publicât parcè che al è scrit par furlan: e covente robe ben scrite": secont me dome cussì tu puedis competi, dome se tu pontis a la cualitât.
Al è just, e lu condivît, ce che o ai let intune interviste, joibe sul Messaggero, li che si presentave La Comungne e la serade di vinars "l’obiettivo è quello di arrivare all’autonomia economica necessaria che ci permetta di non dipendere sempre dai finanziamenti pubblici".
Al è un discors une vore plui lunc e forsit un post nol è il puest plui adat, ma mi plaseve condividi chescj pinsîr cui letôrs di chest blog, ancje parcè che di chest argoment o vin za fevelât intune altre ocasion e o vevi cjatât intervents interessants. Us ringrazii za se o 'nt cjatarai ancje ta cheste ocasion.

ps: Tornant a La Comugne (e mi à fat plasê finalmentri viodi ancje lis musis dai scritôrs che a jerin in sale), mi à plasût sintî i intervents dai protagoniscj che a son stâts clamâts a lei cualchi cerce e o amet che diviers contribûts mi àn plasût.

Omenuts

Torzeonant su Internet o ai cjatât chest video che al propon su Youtube un episodi dai Omenuts, la version furlan di Little people fate di Massimo-Garlatti Costa, che o ringrazii par vêmi dade la pussibilitât di colaborâ cun lui. Cui che al à voie di vê i 4 Dvd al pues contatâ la Societât filologjiche furlane.

Auguris Papà e Fuarce Udin

Vuê al è Sant Josef, fieste dal papà. Jo i fâs i auguris a Giancarlo, il gno, che usgnot al sarà come tancj furlans pront a tifâ pal Udin!

O profiti par segnalâ la iniziative dal sît www.udineseclub.net che al da la pussibilitât di viodi e comentâ la partide cuntri dal Zenit: sul sît si podarà viodi la partide su la WebTV e midiant di Skype, contatant l’utent “udineseclub”, dal studi virtuâl de Auc a saran fatis audioconferencis pai tifôs che si conetaran.

La Patrie e je util

Cumò che al è passât il 15 dal mês, o vin metût online La Patrie dal Friûl - Speciâl ort. Chi in bande us propon un calendariut une vore util che al vise cualis che a son lis pomis e lis verduris di stagjon. Par viodi miôr la tabelute, fracait chi.

Cun di plui us torni a visâ che usgnot a lis 8 e mieze a Tavagnà o presentarìn La Patrie dal Friûl - Speciâl internet: cun noaltris al sarà ospit Aldo Rossi.

La Pimpa a Coder

Sabide ai 21 di Març, a lis 3 e mieze dopomisdì li de Cjase Turoldo di Coder di Sedean, al sarà presentât il progjet “Golaine Imparelibris” da la Pimpa, la simpatiche cjiçute a balins ros, nassude dal lapis e de fantasie di Francesco Tullio Altan. La traduzion di 4 aventuris (Pimpa e lis robis, Pimpa e i colôrs, Pimpa e i numars e Pimpa e je in vore) e je pensade par une prime alfabetizazion dai plui piçui. Il progjet al è stât realizât dal Istitût ladin furlan “pre Checo Placerean” e dal portâl lengheNet cul jutori de Regjon Friûl – Vignesie Julie e cu la colaborazion de cjase editore Franco Cosimo Panini e de Quipos. A la presentazion a saran presints l’autôr dal fumut, Francesco Tullio Altan; il president dal Istitût, William Cisilino; il president de Agjenzie Regjonâl pe Lenghe Furlane (ARLeF), Lorenzo Zanon e la regjiste de Rai regjonâl, Claudia Brugnetta, che à curât la version televisive par furlan Pimpa. A cheste iniziative editoriâl e al è leât ancje il progjet “A scuele cu la Pimpa” pensât dal Istitût ladin furlan “pre Checo Placerean” cun chê di coinvolzi dutis lis direzions didatichis de Provincie di Udin e puartâ i libruts tes scuelis tant che materiâl didatic.

Alè Udin

Joibe e jere stade une brute zornade, ma par furtune in serade si è dreçade cu la vitorie dal Udin! No dome un sucès sportîf, ma ancje une biele partecipazion dal public che sul sierâ de partide al à tacât a berghelâ la cjançon storiche "Alè Udin"!
Ancje se l'Udin al à une cjançon uficiâl par talian (scrite tal periodi de Champions leage, secont me però avonde lamie), il public al cjantave par furlan "Alè Udin"... mi somee un segnâl interessant, ven a stâi, la int si ricognòs te cjançon furlane di Dario Zampa.

ps: ancje "Chi non salta, triestino è!" al à fat saltâ dute la int, robis di fâ vignî jù il Friuli: masse biel! =)



E dopo la cronache di vuê, un tic di storie di îr, par no dismenteâ:

Trilogjie tormentade

A Sanremo un dai argoments di chest an e je stade la omosessualitât (cjançon di Povia, Benigni che al recite une letare di Oscar Wilde). Jo us segnali che li dal link http://www.friul.net/e_libris.php si pues scjamâ «Trilogjie tormentade» (te foto, la cuviertine), il libri di pre Antoni Beline li che al met a confront lis figuris di Oscar Wilde, Pieri Pauli Pasolini e pre Lorenzo Milani. Une des oparis plui origjinâls, e bielis, di pre Toni.
Chest libri, che o consei, al à vinçût il premi Sant Simon tal 1999 (pre Antoni al veve vinçût za une edizion tal 1981 cul libri "Pre Pitin").

Cinc, cuatri, trê, doi, un... Zero/quater

La Patrie a Tavagnà

Il gnûf numar da «La Patrie dal Friûl» al è rivât a cjase dai abonâts e tes miôr ediculis e librariis (viôt la liste li dal sît www.lapatriedalfriul.org).
Tal numar passât tant che argoment dal speciâl La Patrie dal Friûl e veve tratât «l’ort», un teme une vore leât ae tiere e ancje tradizionâl pai furlans. Sul numar di Març il mensîl in lenghe furlane al fevele di internet. A somein dôs robis cetant distantis, ma a la redazion i somee une cubie che e pues lâ benon a braç. “Pal disvilup san di un popul i vûl chel e chel, la tradizion e la modernitât, il passât e il futûr che a contribuissin a formâ il presint” al marche il diretôr Dree Venier. E i furlans no si tirin indaûr nancje su internet: une testemoneance al è il «social network» Facebook – la espression plui popolâr di cheste categorie di aplicazions web – che al è simpri plui fis di robe e temis furlans. Po dopo e ven fate une indagjin dulà che si fevele in lenghe par dute la «rêt des rêts»: blog, YouTube, MySpace, e-lerning… No stait a spaventâsi par dutis chestis peraulis strambis: dentri de Patrie o cjatarês spiegât dut.
Il rest dal numar al va indevant cuntune vore di argoments, simpri viodûts cuntun voli furlanist: atualitât, rubrichis, storiis des personis, fats e… cualchi sgrifade!
Sul sît www.lapatriedalfriul.org, di vuê o podês cjatâ la cuviertine e la liste dai articui di chest mês e ducj i articui al mês passât (cul speciâl «ort») in formât digjitâl.
La Patrie dal Friûl – Speciâl internet e sarà presentade miercus ai 18 di Març a Tavagnà (Ud) a lis 20.30 tal centri civic di place Di Prampero: a saran presints Mario Pezzetta, sindic di Tavagnà; jo e Aldo Rossi, musicist e blogarin furlan-cjargnel. A dut il public e vignarà regalade une copie de riviste (fracait la imagjin par viodi miôr la locandine).

Ancje chest an, cu la declarazion dai redits tu puedis dâi une man a «La Patrie dal Friûl»: baste meti il numar 01299830305 te casele juste e firmâ la destinazion dal 5 par mîl.

Zornade di EMME...nthal...

La setemane e je tacade di rive sù e par cualchi zornade no ai rivât a jessi tant presint. Ma come che nol bastàs, vuê mi soi jevât tart, parcè che no ai sintude la svee... o miôr: le ai sintude, le ai distudade ("dai dai, inmò un momentut e dopo o partìs...")... e vie jo: tornât a indurmidîmi!

Po dopo jù di corse fint a Triest cuntun trafic che mieç al bastave... e rivât intal forest, mi capite une altre "biele sorprese" che no us stoi chi a contâ, ma che mi conferme che "se la furtune e je vuarbe, la sfighe e viôt benon!"... Ancje chi trafic micidiâl par vie di une cunvigne su la droghe cun pulizais a sbreghebalon: e cussì dopo 1 ore e 40 minûts di strade finalmentri o soi rivât a vore (almancul li dut trancuil)... O disarès che par cheste setemane al podarès jessi avonde, ma doman al è vinars ai 13: jo no i crôt tant, no soi superstiziôs, ma un tic cumò o tachi a gratâmi...
Ce dî di plui? Sperìn almancul tal Udin usgnot!

Fieste dople

A son passâts 3 agns che o ai screât il blog e come in chê volte, e tal 2007 e tal 2008, o soi a fâ fieste cun ducj voaltris, ma soredut cun dutis voaltris: parcè che nol è nuie di miôr che fâ fieste in compagnie, massime se al è no dome il compleblog, ma soredut la fieste de femine (te foto, daûr des mimosis e des orchideis, la rose plui biele).

Assemblee de Filologjiche

E je convocade par domenie ai 8 di Març dal 2009 aes nûf e mieze di buinore li de Sale “Paulin di Aquilee” in vie Trep, 5/B a Udin, la Assemblee gjenerâl ordenarie dai Socis de Societât Filologjiche Furlane, che chest an e fâ i 90 agns de fondazion.
La Assemblee, che si da dongje une volte ad an dentri dai prins trê mês daûr dal articul 8 dal Statût sociâl, e rapresente il moment par fâ il belanç finanziari e ancje il pont su la vite e lis ativitâts dal Sodalizi che si son tignudis tal 2008 e che a son program pal 2009. Un an particolâr, il 2009, stant che a colin i novante agns de nassite dal Sodalizi, ai 23 di Novembar dal 1919.
L’incuintri si vierzarà cul discors dal president Lorenzo Pelizzo e cu la relazion di mission dal 2008 si ricuardaran lis azions puartadis indenant, des manifestazions aes ativitâts, de produzion editoriâl e multimediâl ai progjets di didatiche e di formazion e aes iniziativis di comunicazion e promozion.

La nâf spaziâl di Tavan

Sul blog dai Fantats furlans o ai cjatade cheste biele segnalazion, cuntun video di Paolini che al recite "La nâf spaziâl", poesie di Federico Tavan di Andreis. Par cognossi di plui chest autôr che al à ricevût di pôc il vitalizi previodût de Leç Bacchelli, us segnali cheste pagjine di Wikipedia: fracait chi.

Il gnûf Cts de Arlef

Us doi une anticipazion: vuê dopomisdì si sin cjatâts come Consei di Aministrazion de Agjenzie regjonâl pe lenghe furlane.
Il pont al ordin dal dì plui impuartant e jere la nomine dal gnûf Comitât tecnic sientific che al è stât votât a la unanimitât e che us presenti:

Donato Toffoli e Piera Rizzolati (planificazion linguistiche);
Alessandra Burelli e Pierino Donada (didatiche);
William Cisilino e Luca Peresson (mieçs di comunicazion);
Maria Carminati (produzion artistiche, musicâl, multimediâl).

La funzion dal Cts e je chê che si cjate ancje ben scrit tal sît de Arlef. I siei compits plui impuartants a son che di meti dongje il program anuâl de ativitât de Agjenzie, i plans regjonâi di politiche linguistiche, esprimi parêrs e diretivis su lis azions di competence des Aministrazions publichis sul ûs de lenghe furlane te ativitât istituzionâl e tai rapuarts cui citadins, sui programs scolastics pal insegnament de lenghe furlane, organizâ cunvignis, seminaris, incuintris di studi e cjapâ sù ogni altre iniziative par promovi il scambi di cognossincis e l’aprofondiment sientific e culturâl des materiis ogjet dai fins statutaris de Agjenzie.

Vivi Remanzâs. Vuide ai uficis, ai servizis e aes oportunitâts dal teritori

Miercus ai 4 di Març dal 2009, aes 18.00, te Sale dal Consei dal Palaç municipâl di Remanzâs e vignarà presentade la vuide bilengâl: “Vivi Remanzâs. Vuide ai uficis, ai servizis e aes oportunitâts dal teritori”.
Si trate di un librut bilengâl di 65 pagjinis par contâ il paîs e il teritori di Remanzâs furnint al citadin informazions utilis par vivi ad implen i servizis e lis oportunitâts ufiertis de Aministrazion comunâl e des realtâts associativis dal teritori. Une vuide par rindi plui sclet l’acès ae informazion e par favorî la partecipazion ative di ducj i citadins che, in chest mût, a podaran zovâsi des oportunitâts ufiertis ma ancje contribuî di persone a miorâ il lôr teritori. Un strument informatîf svelt e eficaç par fâ cognossi a ducj, sedi ai citadins gnûfs che a chei dal lûc, il lôr paîs e par valorizâ cun di plui la lenghe furlane tant che element distintîf, vîf e cuotidian de vite dal puest.
La publicazion, realizade de Aministrazion comunâl in gracie de Leç 482/99 pe tutele des minorancis linguistichis storichis, e vignarà dade fûr a dutis lis fameis di Remanzâs e distribuide in Municipi, tal Sportel pe Lenghe Furlane e tal Centri Informezovins a ducj i interessâts . Intervignaran:
Dario Angeli, Sindic di Remanzâs
Daniela Briz, Vicesindic e Assessore ae culture di Remanzâs
Marco Stolfo, Diretôr dal S.I.L.C.E., Servizi Identitâts linguistichis, culturâls e Coregjonâi tal Forest, Regjon Autonome F.V.J.
Massimo Duca, Diretôr de ARLeF, Agjenzie regjonâl pe lenghe furlane
Alessandro Carrozzo, Serling, Sportel pe Lenghe furlane di Remanzâs
Priscilla De Agostini, curadore de publicazion

Int di Maian tai lager

Come ogni an, ancje jo ai 27 di Zenâr o ai fevelât de Zornade de Memorie. Al pues someâ un argoment lontan, sedi tal timp, sedi tal spazi. Ma cussì nol è. Nol covente che us torni a dî che a pôc plui di une ore di strade di cjase mê, a Triest, e je la Risiere di San Sabba, unic cjamp di stermini nazist in Italie. Cun di plui cheste setemane sul Gazzettino e jere une pagjine interie (par leile, fracait achì) une testemoneance direte di 2 oms di Maian, inmò in vite che a àn vivude cheste tragjedie su la lôr piel: a son Guido Riva (di Maian, te foto a çampe) e Emilio Martinuzzi (di Sant Tomâs, te foto a drete). Leint cheste pagjine dai 24 di Fevrâr, o ai sintût une emozion profonde e ju ringrazii par chês peraulis.