01 novembre 2007

Fieste de Lega Nord a Pêrs

Mi è rivât chest invît. O ringrazii e o visi ancje voaltris. A Pêrs la Lega Nord e à decidût di fâ la sô
fieste sabide ai 3 e domenie ai 4 di Novembar.
Leint il manifest (fracait la imagjin par viodi plui grant) però no mi son plasudis un pâr di robutis.
La Lega Nord e à int valide come Stefano Tuti (che cumò al deventarà assessôr a Maian) e Claudio Violino, l'unic conseîr regjonâl leghist che o cognòs e che mi permet di saludâ e ricuardâ (o speri che altris no si sustin, se no ju ai nomenâts).
E propit ricuardant il grant impegn de Lega Nord pe tutele de lenghe furlane in consei regjonâl, de poie che mi à dât la Lega Nord in consei comunâl pe mozion a pro de tutele linguistiche di cualchi setemane indaûr, cumò o lei un manifest dome par talian... mi spietavi almancul in 2 lenghis...
Bon, a part chest, une altre robe no mi plâs: Sabide ai 3 "Faro Blu: canzoni e storie della tradizione lombarda"...
Ogni tant mi pâr che al sedi alc di masse lombart ancje te Lega Nord furlane... No ai nuie cuintri de Lombardie, ni nuie cuintri de Italie in se, ni cuintri nissun altri, ma mi plasarès che si cjalàs un tic di plui a ce che o vin noaltris che al à plui dibisugne di jessi valorizât. Chest al è un difiet che a àn un pôc ducj i partîts (fale il Moviment Friûl, clâr), ma de Lega Nord un si spietarès simpri une atenzion ae identitât locâl: chê lombarde cul Friûl no centre tant...
Però mi complimenti pe sielte de fantate: almancul ZULEIKA, la miss cjameseverde, e je furlane di Aquilee!
aes

9 commenti:

  1. thermonuke1/11/07 23:11

    Beh un tic reson tu le as, dome che o cjat strani che no tu vedis dite nuje sul Inno padano. Boh...

    RispondiElimina
  2. Christian Romanini2/11/07 07:45

    Thermo
    chel al rientre tal discors che o fasevi, jo o ai fat un resonamen in gjenerâl cuntun pâr di esemplis. Ma la sostance o crodevi che e fos clare: come che mi pâr che il Friûl nol centre cu la Lombardie, mi pâr avonde fuarçade ancje la sielte di cjantâ un Imni Padan. Ma lassìn pierdi ancje il "stringiamci a coorte..." che no sai trop che al centre cul Friûl...

    RispondiElimina
  3. thermonuke2/11/07 19:00

    Disin che no tu lu capissis non che no tu lu sas...

    RispondiElimina
  4. thermonuke2/11/07 19:13

    O ai let cumo: li servizi d'ordin al sara garantit di un doberman...

    RispondiElimina
  5. Gibi4/11/07 01:30

    Mandi Sig. Christian Romanini, mi presenti, jo, Marcuzzi Gilberto, o soi l’ideatôr e naturalmentri un component dal “Faro blu”, cundut un music e presentadôr dal grop folcloristic “Balarìns de Riviere”( Magnan in Riviere ).
    Lu ringraci par il preseament fat par un spetacul che a nol sâ nancje ce cal è, mi displâs viodi che des disparitâts a si čhiapin dome per “PARTÎT” čhiapât, la politiche sie cun chel ch’al ven fat par passion e, o disâres ancje in tà Furlanitât sincere, no vûl di esisti !!! o no vares…..
    Par la cròniche, o sin stâs rimplačâs dučh tal ultin moment, il risultât al è, che i pipinots di “cheste LEGA NORD” àn čhiapât par il cŭl 25 cristians tanche nuje.
    Un biel graciis a dučh, Marcuzzi Gilberto.

    P.S.: O speri di vê scrit vonde pulît in Furlan, sinò…………in lumbard sbagli minga.
    Se cualchidun al à di bruntulami 3888271240.

    RispondiElimina
  6. Christian Romanini4/11/07 08:29

    Mandi siôr Marcuzzi
    e je vere, jo no ai viodût il spetacul, ma di fat la mê no jere une critiche sul spetacul in se, che cun dute probabilitât al è stât ancje un biel spetacul.
    La mê e jere une riflession sul partît de Lega Nord che ancje chi in Friûl al reste cualchi volte un tic masse leât a chê Lega Lombarda de prime ore e che mi semee che no vedi tant a ce fâ cu la nestre realtât.
    Se lu ai ofindût, no jere mê intezion ancje parcè che no mi semee di vê dit che no sês brâfs o che il vuestri spetacul al è brut.
    E no je nancje mê intenzion ofindi la Lega Nord e i organizadôrs di cheste iniziative.
    O ai dome dit che, condividint ciertis bataiis che e à fat la Lega Nord, prime su dutis, la grande azion pe gnove leç di tutele de lenghe furlane fate di Claudio Violino in regjon cun dut il rest dal grup dai conseîrs regjonâi di chest partît, mi semee che la Lombardie no centre tant cul Friûl.
    Dut chi.
    Dopo, se Lui , siôr Marcuzzi, al à vût cualchi probleme cui organizadôrs, e je une cuestion vuestre e che no ai ni voie ni titul par comentâ.

    RispondiElimina
  7. Gibi4/11/07 18:50

    Mandi, lu ringraci par la rispueste, mi brami che o varîn occasion di podê cognošisi
    e sganbiâsi cuatri opinions a muse, daûr al veri ch’al no tabaje no ai trop plasè
    sancierementri.
    Salûs Gilberto Marcuzzi

    RispondiElimina
  8. Christian Romanini4/11/07 19:50

    Mandi siôr Marcuzzi,
    o soi content se o ai rivât a jessi plui clâr e al jere un dovê rispuindi.
    Par cjatâsi, o pues invidâlu a Felet vinars di sere pal conciert dal FLK in auditorium come che al pues viodi lant a lei achì.
    Mandi, a prest.

    RispondiElimina
  9. Gibi5/11/07 14:28

    Buine zornade Romanini,
    o soi impegnât vinars, se a si finis a timp o ven vulintîr, o cognos il grop e o vares plasè.
    Mandi Marcuzzi.

    RispondiElimina