Cuasi cuasi... freulis

O jerin restâts cul dubi che forsit al sarès stât miôr plantâ trutis... e invezit ve ca che la produzion de aziende agricule di... terace e va indevant.
Chi us presenti la prime freule, o miôr la prime FUTURE freule, a mieze strade tra pome e rose.
Us dîs ancje che o jeri preocupât parcè che tun vâs o 'nd ai plantatis 3 e forsit a son masse dongje parcè che, a part chê tal mieç (chê de foto) chês altris dôs plantutis a àn un tic stentât...
E us zonti ancje che lis freulis a àn tante vitamine C.

Conciert benefic par Mattia

Us segnali chest event benefic par un frut di non Mattia.
L'apontament al è par Sabide ai 15 di Jugn li dal auditorium di Maian aes 9 di sere.
Par plui informazions o podês fracâ chest link: http://www.festivalkras.com/
Partecipait!

Ort bagnât...

Al è cualchi dì che no us inzorni sul gno ort. Al è pôc ce dî: se o savevi che e vignive dute cheste ploie, chest an o plantavi trutis...

ps: ve ca lis previsions.

Profum di basili

Cuant che o jeri piçul mi visi che mi contavin che "Basili" al jere il non de cjavre che e veve puare mê none.

Ma a part ciertis divagazion, ancje tal gno ort di terace nol podeve mancjâ il basili.
Cheste plantute verde e profumade si pues traplantâle, spostantle di un vâs plui piçul a chel plui grant. Al è miôr metilu in zone di mieze ombrene e se si pues, dongje dai pomodoros cussì ju jude a tignî fresc il teren e ju pare dai pedoi. Cun di plui al varès di tignî lontanis ancje lis moscjis.
Lu vevi pastanât ancje l'an passât ma nol à rivât a passâ l'unvier parcè che al patìs il fret.
Jo lu dopri par fâ il "pestât furlan", version nostrane dal origjinâl gjenovês: al puest dai pignûi o met nolis e al puest dal formadi di piore o parmesan, o dopri formadi Montâs vecjo nostran. E par conservâlu, invezit di tignîlu tun vasut sot vueli, lu met vie tes vascutis de glace cussì cuant che mi covente un tic par une porzion di pastesute o tiri fûr dal glaçarot dome un cubut. Provait.

Ps: al è impuartant tirâ vie lis rosutis par ordin che a vegnin fûr in maniere che la plante e continue a menâ e a fâ fueis invezit che lâ in semence.

Cjalde chê sere

Lis plantis di pomodoro

E po ben: almancul vuê no si à scugnût bagnâ. Tignìn cont de aghe pai mês cjalts (se mai a vessin di decidi di rivâ…). Ma cualchi lavorut lu ai fat distès te mê “aziende agricule” urbane. Prin di dut une raclade ai pomodoros, e za che o jeri i varès dade une raclade ancje a chel lofio di cjan che al vuache par ogni monade… Sì, cun cheste bestie o soi “unpolitically correct” parcè che se e je vere che il “cjan al è il miôr amì dal om”, nol à però di lamentâsi se al 745m “bau bau” (di bant!) ancje S.Francesc al sarès deventât il piês nemì dal cjan!
Tornant ai pomodoros: un tocut di spali par leâju a la bachetute e il zûc al è fat. Cjalant lis fotos o varês viodût za la disposizion, ma mi somee just specificâ cualchi robute propit a la cemût meti jù li splantis di pomodoros.
Par traplantâlis tal vâs grant si podarès fâlu fin a Jugn e cuntun tic di spazi in plui si podarès meti plui plantutis (une ogni 30 cm) e magari ancje plui filis (a distance di 60 cm une di chê altre).
A pene pastanade la plante, o ai bagnât par ben in maniere di judâle a cjapâ. O vevi pensât di meti ‘ndi dôs par vâs, ma o ai preferît abinâ une di pomodoros e une di basili parcè che al jude a tignî umide la tiere e al ten lontan i pedoi dal pomodoro.
Dopo raclade, e viodût che mi someave avonde in salût, o ai sraridis lis menadis da pît de plante in maniere di dâur plui fuarce a chês altris. In 2 dîs za si viodin lis primis rosutis e un pâr di pomodoruts verts e piçui. Ah, no us ai dit ce cualitât che o ai cjolte: si clame "piccadilly" ("une vore produtîf, rustic e resistent" al è scrit su la etichete): mi àn dit che une plante e fâs sui 8 kg par stagjon... starìn a viodi.

Di une campagne a chê altre

Un politic navigât une volte mi à dit che la campagne e scomence la dì dopo des elezions (par preparâ chês de riconferme...). Ancje se cheste volte mi è lade strucje, o ai volût tignî bon distès il consei chi parsore e se propit no fevelìn de stesse campagne, mi soi butât sul agricul di terace. Ve ca ce che o ai cumbinât cun pomodoros, basili, freulis e une plante di frambue... tal mieç al è ancje un Ibiscus, che al fâs dome rosis.: ve ca cualchi fotografie.

Us segnali la tignude dal "contadin": maiute made by Friulpoint e scarpet cjargnel handmade in Paulâr!
Bon, cumò o voi a bagnâ: us tignarai inzornâts.

351 grazie

O ringrazii di cûr ducj chei che in cheste aventure eletorâl mi son stâts dongje, mi àn sopuartât e supuartât, chei che mi àn judât, chei che a àn lavorât cence comparî e "last, but not least" chei che mi àn votât e fat votâ.

Personalmentri o soi content dai 351 eletoris e eletôrs che mi àn dade fiducie puartantmi al 5,01% rispiet a la medie provinciâl de liste fermade al 2,07%. Duncje o ai fat plui dal dopli, rivant a jessi il secont par numar di vôts te mê liste.
Nol jere facil, ma in mancul di un mês di campagne eletorâl chest risultât al va parsore di ce che mi spietavi: ve ca i risultâts tal colegjo 20 di S.Denêl.
Al displâs che il 2,07% complessîf dal Maf nol à puartât la elezion di nancje un conseîr, ma mi consoli cu la vitorie al prin colp dal President Fontanini (ve ca la composizion dal gnûf consei provinciâl).
Tornant al aspiet principâl, grazie pardabon a ducj voaltris!

Apel finâl

Al mancje pôc a la fin di cheste campagne eletorâl e mi somee doverôs sierâle cul apel finâl, domandant la vuestre fiducie.
Parcè votâmi me?
Parcè che o pues meti dongje l'entusiasim di un zovin e une esperience concrete fate in prime linie: o ai 36 agns, 11 ju ai passâts in aministrazion comunâl e par 4 e mieç o ai lavorât pal President de Regjon. Cheste esperience mi à permetût di cognossi di dentri la nestre struture istituzionâl a plui nivei: comunâl, provinciâl e regjonâl.
Parcè che o ai voie e ideis par continuâ a dâ servizi al gno teritori, siôr di culture, ambient, storie... intune peraule: "un patrimoni" come pôcs altris in dute la Provincie.
Parcè che o pensi di vê imparât une maniere di lavorâ che e sta de bande de int e che o ai cirût di dimostrâ ancje ta chescj dîs: informazion direte, coinvolziment e confront diret, rapuart cu lis istituzions e cognossince personâl des situazions dal teritori.
Parcè che tai ultins agns o ai vude la pussibilitât di aprofondî tematichis che mi àn fat cjapâ cussience dal sens di identitât dal Friûl, che o metarai a disposizion de comunitât provinciâl par dâ fuarce ai nestris comuns che no puedin jessi bandonâts denant dal centralisim di Triest.
Cun chest spirt o intint frontâ la esperience di conseîr provinciâl se o pensais che o podedi jessi la persone juste. Lu fasarai par puartâ la vuestre vôs in Consei Provinciâl e par chest us domandi di meti dome une X sul simbul dal Moviment Autonomist Furlan, il gno non al è za scrit su la schede zale pes elezions provinciâls dulà che o soi candidât pal Maf tal colegjo eletorâl n.20 di S.Denêl (comuns di Forgjarie, Maian, Ruvigne e S.Denêl) (fracait su la foto e cjalait ben la imagjin chi dongje).
Grazie.

Apontament cu la storie

La nestre zone e je siore di testemoneancis storichis che a confermin la impuartance dai nestris paîs. Us segnali par chest l'event che si tignarà sabide ai 20 di Avrîl aes 5 dopomisdì tal Hospitale di S. Zuan a S. Tomâs, une struture storiche di nivel internazionâl che e je testemoneade za intun document dal 1199. Par cui che nol cognossès la funzion dal Hospitale e jere une struture gjestide di un ordin religjôs che te Ete di Mieç e deve bon acet ai viandants che a percorevin la Vie dal Tiliment in direzion Gjermaniis - Rome - Jerusalem. Za di cualchi an la struture e je interessade di une azion di recupar e valorizazion. In particolâr, la gjestion des iniziativis e je de Associazion Amici dell'Hospitale che mi disevin che ta chescj mês a son rivâts a viodi chest sît passe 1000 personis, ancje dal forest, tra turiscj, oms des istituzions e rapresentants religjôs ancje de Austrie. Par plui informazions us consei di lâ a lei il lôr blog e se o vês ocasion lait a viodi chest puest, cjamât di storie e inserît intun contest ambientâl invidiabil come lis culinis che a fasin di corone a la zone.
Se o rivarai a jentrâ in consei provinciâl mi impegnarai par dâ vôs al patrimoni storic ambientâl de nestre zone par podê meti in vore politichis di promozion turistiche comprensoriâl che a puedin dal sigûr rapresentâ une forme di economie gnove e moderne.

O ai cirût di esponi in part il program pes Elezions provinciâls 2013 dulà che o soi candidât pal Maf tal colegjo eletorâl n.20 di S.Denêl (comuns di Forgjarie, Maian, Ruvigne e S.Denêl).

Sanitât e servizis sociâi

Ce che te sanitât si faseve te zone di riferiment dal Ospedâl di S.Denêl za 20 agns indaûr, vuê come vuê in altris bandis de Regjon e dal rest di Italie inmò sal insumiin. Nol è un slogan, ma la veretât, risultât no dome di un sisteme istituzionâl virtuôs, ma ancje di
une sensibilitât particolâr de nestre int.
E je vere che la gjestion dal Ospedâl e dal sisteme sanitari al è di competence de Regjon, ma la Provincie di Udin e à une funzion di sigure impuartance tal operâ tal sociâl, come che par agns al à fat l'assessôr Adriano Piuzzi.
Une conferme di cheste particolâr vocazion dal nestri teritori e ven di 3 realtâts come il Samaritan a Ruvigne, la fondazion Pontello a Pêrs di Maian e Casa Elena a S.Denêl: trê struturis di primarie impuartance tal sostegnî i disabii e lis lôr fameis. Se o sarai elet in consei provinciâl la mê azion e sarà ancje tal dâ vôs a chestis e a dutis chês realtâts che a lavorin par garantî a lis personis mancul fortunadis servizis e assistence, par dâur la pussibilitât di frontâ la vite cun dignitât e cence pôre .

Di chei altris ponts che o volarès realizâ, us scrivarai tai prossims dîs, cirint di esponi cussì il program pes Elezions provinciâls 2013 dulà che o soi candidât pal Maf tal colegjo eletorâl n.20 di S.Denêl (comuns di Forgjarie, Maian, Ruvigne e S.Denêl). 

A proposit di traspuart public

Une des miôr manieris di cognossi lis robis al è chel di vivilis in prime persone. Cussì di cuant che o ai tornât a doprâ la coriere par lâ a vore, mi soi inmò plui convint che il traspuart locâl al merte di jessi tignût di voli e favorît. La Provincie e à une funzion di control sul servizi furnît dal gjestôr privât ancje se la azion e je une vore condizionade dal finanziament che al rive de Regjon: i km di corsis programadis par cuvierzi il teritori a dipendin di tropis risorsis che a rivin di Triest. Ma pal utent dal servizi al è indispensabil vê un contat plui dongje cu lis istituzions: si imagjinaiso di scugnî rapuartâsi cun Triest par une segnalazion o par un sugjeriment suntun linie di autobus Maian-Udin?
Se o sarai elet in consei provinciâl mi impegnarai par rindi inmò plui fuart il leam cul teritori, par podê mantignî un contat strent tra cui che al da e cui che al ricêf il servizi di traspuart public. Tal stes timp al sarà impuartant cirî di dialogâ in maniere atente cu la Regjon par garantî lis risorsis necessariis par sodisfâ al miôr la domande.

Di chei altris ponts che o volarès realizâ, us scrivarai tai prossims dîs, cirint di esponi cussì il program pes Elezions provinciâls 2013 dulà che o soi candidât pal Maf tal colegjo eletorâl n.20 di S.Denêl (comuns di Forgjarie, Maian, Ruvigne e S.Denêl). 

Pe nestre dignitât

Abram Lincoln al diseve che "la democrazie e je il guvier dal popul, pal popul" e mi somee une buine rispueste a cui che al volarès fâ des provinciis un ent di secont nivel, ven a stâi "no elet dal popul". Gjavâ al popul il dirit e la pussibilitât di sielzi i siei rapresentants ancje a nivel provinciâl nol fâs l'interès dal popul.
E te stesse maniere il popul al à dirit di vê ducj i mieçs par podê sintîsi al stes nivel di chei altris popui, cence sintîsi di mancul, cu la stesse dignitât. Ve alore che ancje la traduzion di chestis frasutis, dopradis su la pagjine di Facebook dal Moviment Autonomist Furlan, a àn cheste funzion: fin cumò la plui part des informazions che nus rivin dal forest, se no son te version origjinâl, a son intune lenghe difarente de nestre. Ma si pues doprâ il concet globâl, cence dismenteâsi de realtât locâl.
E se o sarai elet in Consei provinciâl mi impegnarai par dâ al nestri popul e ae nestre lenghe la dignitât che a mertin, no cun chê di sierâsi, ma di cjalâ e dialogâ cui altris ae stesse altece.

Di chei altris ponts che o volarès realizâ, us scrivarai tai prossims dîs, cirint di esponi cussì il program pes Elezions provinciâls 2013 dulà che o soi candidât pal Maf tal colegjo eletorâl n.20 di S.Denêl (comuns di Forgjarie, Maian, Ruvigne e S.Denêl).

Novitât

Ve ca la novitât di chescj dîs. Sui tabelons eletorâi a son rivâts ancje i nestris manifescj e, permetêtmi di dîlu, a son i plui biei di ducj. Ma la vere novitât des elezions provinciâls al è propit il Moviment Autonomist Furlan, une gnove fuarce politiche in difese dal Friûl e de Provincie di Udin parcè che no podìn lassâ i nestris comuns bessôi cuintri dal centralisim di Triest.
Se o sarai elet in Consei provinciâl o fasarai di dut par jessi plui dongje par difindi il gno teritori.

Di chei altris ponts che o volarès realizâ, us scrivarai tai prossims dîs, cirint di esponi cussì il program pes Elezions provinciâls 2013 dulà che o soi candidât pal Maf tal colegjo eletorâl n.20 di S.Denêl (comuns di Forgjarie, Maian, Ruvigne e S.Denêl).

Politichis pai zovins

Spes si sint a fevelâ che i zovins no àn interès, che a son ognidun par lôr cont. Cheste e je une vision sbaliade che forsit e covente plui a platâ lis mancjancis di cui che le dîs che no invezit a cjatâ soluzions. La Provincie di Udin, midiant dal Assessorât a lis politichis sociâls, e sosten i progjets des "borsis di lavôr pai zovins", esperiencis di lavôr che pal solit a vegnin fatis vie pal Istât. A son progjets che o ai vût maniere di cognossi ben ancje a Maian, dulà che o soi stât assessôr pes politichis pai zovins. Progjets che a coventin no dome come esperience lavorative, ma soredut come moment di agregazion e cressite. E vuê Maian al à ancje un Informezovins, un pont informatîf ancje chest dentri di un coordenament provinciâl. Se o sarai elet in Consei provinciâl o puartarai la mê esperience direte ta chest setôr par svicinâ inmò di plui i zovins a la vite dal paîs, ma inmò di plui par ufrî a lôr ocasions par rindisi protagoniscj dal lôr paîs.

Di chei altris ponts che o volarès realizâ, us scrivarai tai prossims dîs, cirint di esponi cussì il program pes Elezions provinciâls 2013 dulà che o soi candidât pal Maf tal colegjo eletorâl n.20 di S.Denêl (comuns di Forgjarie, Maian, Ruvigne e S.Denêl).

Dialogâ a cuatri voi

Ta chescj agns o ai vude la pussibilitât di colaborâ a diviers nivei cu lis istituzions. O ai scomençade la mê ativitât aministrative tal 2000 cun Adriano Piuzzi, vuê candidât pe Regjon, che mi à clamât te sô zonte comunâl (te foto, un moment de serade organizade di Piuzzi a Cjasesole, lunis passât).
Cul timp o ai vude la ocasion di cognossi Renzo Tondo che mi à clamât a vore come so segretari e tai agns che o ai lavorât in Regjon o ai imparât cemût che e funzione cheste istituzion. E simpri ta chescj agns o ai imparât a cognossi un pôc di plui ancje il mont de agricolture grazie al assessôr Violino, ancje lui in corse pal consei regjonâl, che mi à ufiert il compit di direzi Tiere Furlane. Tal stes timp, continuant a interessâmi di temis come la identitât e la lenghe furlane, o ai prime colaborât cul President Strassoldo, che tant al à fat su chescj temis, e dal 2008 al 2012 o soi stât clamât dal President Fontanini come component dal CdA de Arlef.
E se o sarai elet in Consei provinciâl o fasarai in maniere di meti a servizi dal gno teritori chescj rapuarts par garantî un dialic atent e diret tra lis istituzions.

Di chei altris ponts che o volarès realizâ, us scrivarai tai prossims dîs, cirint di esponi cussì il program pes Elezions provinciâls 2013 dulà che o soi candidât pal Maf tal colegjo eletorâl n.20 di S.Denêl (comuns di Forgjarie, Maian, Ruvigne e S.Denêl).

Lavôr e formazion

O soi blocât in cjase cu la fiere e une brute gastoenterite. Robis che a sucedin... Dut câs o aprofiti dal fat di vê Internet come unic colegament cul mont par fevelâ di lavôr. Di fat la Rêt e je un imprest che nol covente dome pe comunicazion, sedi personâl che istituzionâl, ma ancje come imprest util pal lavôr. La Provincie di Udin e gjestìs i Centris pal Implei o Uficis dal Lavôr. Se o lais sul sît o cjatais la sezion dedicade a la domande/ufierte di puescj di vore, ma ancje chê dedicade a la formazion. Viodûts i timps che corin, o soi convint che si à di pontâ a miorâ chest servizi e rindilu inmò plui acessibil al citadin. Se o sarai elet in Consei provinciâl mi impegnarai par svilupâ il servizi dai Uficis dal Lavôr par podê dâ gnovis oportunitâts a cui che al sta cirint, ma ancje a cui che il lavôr lu à za ma al à voie di mantignîsi inzornât cuntune formazion costante: mi plasarès provâ a inviâ, ancje in fase sperimentâl, un progjet di teleformazion a distance.

Di chei altris ponts che o volarès realizâ, us scrivarai tai prossims dîs, cirint di esponi cussì il program pes Elezions provinciâls 2013 dulà che o soi candidât pal Maf tal colegjo eletorâl n.20 di S.Denêl (comuns di Forgjarie, Maian, Ruvigne e S.Denêl).

Par une gnove economie

Il nestri teritori al è siôr come pôcs in dute la Provincie di Udin. Ambient, storie, culture, lenghe e prodots di cualitât si incrosin fasint di chescj paîs un sisteme dulà che la nestre identitât specifiche e pues fâ economie. O vin di fâ sinergjie metint in relazion i paîs e dutis lis lôr potenzialitâts, pontant a valorizâ chest patrimoni che traviers il turisim di cualitât al pues dâ gnove economie. Vivi intun ambient siôr di culture al conven 2 voltis: prin parcè che al jude i abitants di cheste zone a vivi miôr e secont parcè che la crisi globâl di chescj timps e pues jessi sconfite cun cheste soluzion. E par fâus un esempli, us ricuardi che domenie ai 14 a Ruvigne, la associazion Scriptorium foroiuliense e organize la Zornade dal Patriarcje, une rievocazion storiche tal Cjistiel. Ta cheste zornade a fasaran ancje la premiazion dal prin cors di biele scriture, dulà che students di dut il mont a àn partecipât par imparâ a scrivi cu la plume come che a fasevin i amanuens. Dute cheste int e je rivade a Ruvigne di tantis bandis dal mont e cun entusiasim e tornarà tal sô paîs puartant no dome il ricuart ma ancje un tocut di Friûl, stant che mi àn contât che plui di cualchidun al à imparade ancje cualchi peraulute di furlan. Ma dongje di Ruvigne al è S.Denêl, e je Forgjarie e al è Maian e in ognidun di chescj paîs al è un altri esempli di puartâ: dome fasint sisteme tra lis risorsis di ducj i paîs, si rive a otimizâ lis risorsis e fâ cressi dut il teritori. Se o rivarai a jessi elet mi impegni par un confront costant e sistematic cu lis comunitâts, par potenziâ il sisteme locâl e presentâlu ancje a nivel internazionâl.

Di chei altris ponts che o volarès realizâ, us scrivarai tai prossims dîs, cirint di esponi cussì il program pes Elezions provinciâls 2013 dulà che o soi candidât pal Maf tal colegjo eletorâl n.20 di S.Denêl (comuns di Forgjarie, Maian, Ruvigne e S.Denêl).

Fats e no "parole"

Vuê si son vudis lis celebrazions uficiâls dai 3 di Avrîl, aniversari de nassite dal Stât Patriarcjâl di Aquilee (1077), ma tra tantis cjacaris, pôcs fats: no ai viodût altris che si presentin ai eletôrs dome par furlan. Jo ai decidût di fâ par furlan ancje il gno materiâl promozionâl di cjarte, in coerence cun chest blog, faceboook, twitter e i intervents publics come la presentazion de coalizion fate martars passât. No ai pôre di fâlu parcè che o vin di jessi braurôs di ce che o sin: une plante e cres sane e fuarte dome se e à lidrîs profondis. Us ricuardi lis peraulis di pre Checo Placerean “Nol è lecit plui, par chei che a vuelin ministrâ la nestre tiere, di no vê coragjo, parcè che chel che nol à coragjo pe nestre int al è un che nol servìs la nestre int, ma al servìs un altri paron”.
E se o sarai elet in Provincie di Udin mi impegnarai par dâ al nestri popul e ae nestre lenghe la dignitât che a mertin, no cun chê di sierâsi, ma di cjalâ e dialogâ cui altris ae stesse altece.

Di chei altris ponts che o volarès realizâ, us scrivarai tai prossims dîs, cirint di esponi cussì il program pes Elezions provinciâls 2013 dulà che o soi candidât pal Maf tal colegjo eletorâl n.20 di S.Denêl (comuns di Forgjarie, Maian, Ruvigne e S.Denêl).

Fadie e sodisfazion

O soi om di popul. Par chest, cun bon sens, mi soi dât un tet di spese par cheste campagne eletorâl, dal dut autofinanziade. O ai simpri intindude la politiche come servizi, cu la convinzion che il vôt dal eletôr al vadi vuadagnât sul teritori. Par chest o ringrazii la mê famee e chei amîs che a pene che a àn savût de mê candidature si son ufierts di dâmi une man in maniere dal dut spontanie e entusiaste. E chest par me al è un carburant inestimabil che ancje vuê mi à permetût di zirâ pai paîs di un scûr a chel altri, fevelant cu la int, domandant il vôt e distribuint il gno materiâl eletorâl (chi in bande il gno biliet, denant e daûr). O soi rivât a cjase strac, ma cu la sodisfazion di vê incuintradis diviersis personis e di vê vude la pussibilitât di resonâ insiemit e confrontâmi su lis ideis, i ponts di viste e lis necessitâts de int. E se o rivarai a jessi elet o continuarai a mostrâ la muse par rispuindi des mês azions.

Di chei altris ponts che o volarès realizâ, us scrivarai tai prossims dîs, cirint di esponi cussì il program pes Elezions provinciâls 2013 dulà che o soi candidâtpal Maf tal colegjo eletorâl n.20 di S.Denêl (comuns di Forgjarie,Maian, Ruvigne e S.Denêl).  

Par furlan si dîs creance

Al è di bant platâsi: la politiche e sta cjapant une derive un tic volgarote. Al somee che par presentâ une idee si scuegni atacâ chei altris, magari insultant e berghelant. Chest nol è il gno stîl: e covente creance! Pûr savint di jessi spes intune situazion minoritarie, ancje cuant che mi sarès convignût alineâmi al “main stream”, o ai cirût di sostignî lis mês convinzions cence fâmi cjapâ la man, ancje se cualchi erôr lu ai fat ancje jo. Ma cul timp o ai imparât che dispès “al à tuart chel che al vôse fuart” e duncje mi soi convint che la miôr maniere di presentâsi al è cirî di jessi clâr e coerent, ancje se al sarès convenient lâ di chê bande che al tire l’aiar. E se o sarai elet in Provincie di Udin, o tignarai cheste linie in rispiet dai citadins parcè che la classe politiche e à di jessi a servizi de int e no il contrari.

Di chei altris ponts che o volarès realizâ, us scrivarai tai prossims dîs, cirint di esponi cussì il program pes Elezions provinciâls 2013 dulà che o soi candidât pal Maf tal colegjo eletorâl n.20 di S.Denêl (comuns di Forgjarie, Maian, Ruvigne e S.Denêl).

Presentazion ancje sul Gazzettino

Ancje il Gazzettino di îr, dopo dal articul dal Messaggero che us ai postât chê altre dì, mi presente spiegant cemût che o intint puartâ indevant la comunicazion politiche: no un pontificâ a sens unic come che al fâs Beppe Grillo, ma metisi a disposizion des personis par rispuindi a lis domandis. E ta chescj dîs achì o ai ancje vude la pussibilitât di incuintrâ divierse int che o ai podût fevelâ di persone, spiegant ce che o intint pe centralitât de persone e duncje il dialic cul citadin che nol pues escludi ancje l'ûs di tecnologjiis come il blog, twitter e facebook. E se o rivarai a jentrâ in Provincie di Udin, chest dialic al continuarà dal sigûr par une trasparence concrete.

Di chei altris ponts che o volarès realizâ, us scrivarai tai prossims dîs, cirint di esponi cussì il program pes Elezions provinciâls 2013 dulà che o soi candidât pal Maf tal colegjo eletorâl n.20 di S.Denêl (comuns di Forgjarie, Maian, Ruvigne e S.Denêl).

Buine fieste nazionâl dal Friûl

Vuê e je la zornade de Fieste nazionâl dal Friûl e no pues celebrâ ancje jo l'inovâl dai 3 di Avrîl, cuant che tal 1077 al nasseve il Stât Patriarcjâl di Aquilee. Za domenie, sul blog che o scrîf pal Messaggero Veneto, o vevi acenât alc.
Us segnali duncje ancje chi sedi l'intervent che William Cisilino al à scrit pal gjornâl, sedi il sît dal Istitût Ladin Furlan "Pre Checo Placerean" che al dediche une sezion specifiche a cheste date.
Tal nestri program eletorâl e je une sezion che e fevele de valorizazion de identitât furlane. Ma parcè isal cussì impuartant fâ cognossi la nestre storie e vê cussience des nestris lidrîs identitariis?
Cjalait fûr dal barcon: une plante cence la lidrîs e cence la tiere par supâ ce che i covente par vivi, si secje e e mûr. Une plante cuntune lidrîs debile, al prin soflâ di burlaç e cole, si secje e e mûr. Dome chê plante che e à lidrîs profondis, e rive no dome a butâ e a tignî bot ai burlaçs, ma ancje e slargje simpri di plui i siei ramaçs, dant fueis e pomis.
Se o sarai elet in consei provinciâl mi impegni a valorizâ chest patrimoni culturâl che nus fâs unics.
E par usgnot us consei l'apontament in Biblioteche Vuarneriane Antiche cul "Cjant des Pergamenis". Buine Fieste nazionâl dal Friûl a ducj!

Di chei altris ponts che o volarès realizâ, us scrivarai tai prossims dîs, cirint di esponi cussì il program pes Elezions provinciâls 2013 dulà che o soi candidât pal Maf tal colegjo eletorâl n.20 di S.Denêl (comuns di Forgjarie, Maian,Ruvigne e S.Denêl).

Conference stampe di presentazion dal President Fontanini

Vuê o vin fat la presentazion di coalizion pal candidât President Fontanini pe provincie di Udin. A jerin i rapresentants di dutis lis 5 listis e pal Moviment Autonomist Furlan o ai fevelât jo (la foto le ai fate in direte di li che o jeri).
O ai fat ancje un passaç su la impuartance de nestre identitât (come che o vevi scrit chi) e sul ûs des gnovis tecnologjiis come imprest di dialic cui citadins (fracait chi).
Cun di plui, o ai ribadide la impuartance de Provincie come ent di mieç tra i comuns e la regjon che e varès di vê une funzion legjislative, lassant al ent provinciâl la funzion aministrative di aree vaste (che o vevi spiegât chi e chi).
A chest proposit al è util tornâ a dî che ancje in altris bandis dal mont a esistin lis "provinciis": in Gjermanie si clamin circondaris, in Francie si clamin dipartiments, in Ingletiere e tai Usa si clamin conteis.
Cheste solfe de eliminazion des provinciis e je mode di cumò dai talians, populiste e demagogjiche, ma se o lin a viodi ben, permetêtmi la tirade, a son propit ciertis provinciis talianis che a mertin di jessi taiadis, no chês furlanis, che a àn dimostrade eficience e funzionalitât. Se tai ultins agns in Italie a son nassudis come foncs provinciis gnovis e piçulis, chi di nô invezit cuant che si fevelave de provincie di Tumieç, la int e à dimostrât sens di responsabilitât evitant un frazionament no necessari dal teritori.
Che a vadin a taiâ dulà che al covente, no chi di noaltris!

LINK:
la anteprime sul sît dal MV
l'articul sul sît da Il Friuli
il servizi dal TG3

Di chei altris ponts che o volarès realizâ, us scrivarai tai prossims dîs, cirint di esponi cussì il program pes Elezions provinciâls 2013 dulà che o soi candidât pal Maf tal colegjo eletorâl n.20 di S.Denêl (comuns di Forgjarie, Maian, Ruvigne e S.Denêl).

Vuê o soi sul Messaggero Veneto

Il Messaggero Veneto di vuê al à publicât une presentazion su di me che us ripuarti chi dongje (par lei l'articul, fracait su la foto). Par cuistions di spazi, i concets a son stâts sintetizâts e par chest o dopri chest blog par spiegâmi miôr.
Vuê si sint a fevelâ tant di Beppe Grillo e dal so blog, in realtât il gno e il so a àn dome pôcs mês di diference. Ce che a àn di une vore difarent e je la maniere che ju doprìn: Grillo al pontifiche cence rispuindi al lis domandis, jo o invezit o pensi che chest imprest al sedi di meti a disposizion dai citadins come moment di confront e dialic.
O ai acetade la candidature cul Moviment Autonomist Furlan par sostignî il President Fontanini parcè che tal prin puest dal nestri program e je la centralitât de persone e duncje il dialic cul citadin nol pues escludi ancje l'ûs di tecnologjiis come il blog, twitter e facebook.

Di chei altris ponts che o volarès realizâ, us scrivarai tai prossims dîs, cirint di esponi cussì il program pes Elezions provinciâls 2013 dulà che o soi candidât pal Maf tal colegjo eletorâl n.20 di S.Denêl (comuns di Forgjarie, Maian, Ruvigne e S.Denêl).

Par te, cun te, par jessi plui dongje

O torni sul argoment "provincie sì o provincie no" parcè che plui di cualchidun al sta zuiant sul cjâf dai citadins. Cui che al aferme che scancelant lis provinciis si risolvin ducj i mâi de aministrazion publiche al fâs dome demagogjie di bas nivel. In Sicilie, il president Crocetta al à ubidît a cheste mode "tipicamente italiana" e al à tiradis vie lis provinciis. Ma nissun nol dîs che la alternative proponude a son i consorzis di comuns che in realtât a son altris "provinciis" cun cda e framentazion dal teritori. Secont me i sindics a àn za masse ce fâ a viodi di fâ ben pal lôr comun e al è just che e sedi la int a dâ la responsabilitât di guvier al president de Provincie, elezintlu e domandant a lui di rispuindi des sôs azions.
Alore no si pues menâ il mus pe glace. La Provincie, o ent di mieç, e je une istituzion ricognossude tai ordinaments internazionâi, dulà che tra il comun che al viôt de aministrazion dal paîs e la regjon che si ocupe di legjiferâ a alt nivel, e je la Provincie che e à une funzion aministrative di aree vaste (in Ingletiere e tai Stâts Unîts lis clamin "conteis", in Francie lis clamin "dipartiments", in Gjermanie lis clamin "circondaris"). No si pues pensâ che i nestris sindics a vadin a Triest par ogni piçule robe: la Provincie e covente par jessi plui dongje e al servizi dal citadin, dai nestris paîs. A la Provincie i van trasferidis plui funzions e risorsis, slizerint la Regjon che e varà di fâ leçs e tignî rapuarts interistituzionâi ancje cui stâts dongje. Si varès duncje di scomençâ a pensâ a "mancul regjon e plui provincie", plui dongje ai citadins e duncje plui controlabile. E se o sarai elet in consei provinciâl o sarai a disposizion dai sindics e des aministrazions comunâls par fâ di puartevôs a lis necessitâts dai nestris comuns, fin di subit, in spiete che la riforme dai ents locâi e vadi indevant su la strade che o ai spiegât chi parsore.

Di chei altris ponts che o volarès realizâ, us scrivarai tai prossims dîs, cirint di esponi cussì il program pes Elezions provinciâls 2013 dulà che o soi candidât pal Maf tal colegjo eletorâl n.20 di S.Denêl (comuns di Forgjarie, Maian, Ruvigne e S.Denêl).

Buine Pasche

Vuê e je Pasche, une fieste impuartante. Us fâs i auguris di Buine Pasche a ducj voaltris letôrs di chest blog e a dute la vuestre int.
Tancj auguris!

Zoventût e esperience

Si sint spes a fevelâ de "etât de politiche": coventino zovins? Coventie esperience? No sai se o ai di metimi te categorie dai zovins: o ai 36 agns. Ma o pues puartâ un pocje di esperience che o pensi e sedi utile cuant che si à di presentâsi par une incarghe publiche. O soi jentrât in aministrazion comunâl a Maian tal 2000 e o soi restât in municipi fin al 2011. O ai vude la pussibilitât di lavorâ sedi come conseîr sedi come assessôr cun deleghis al ambient, a la scuele, a la culture, ai rapuarts cu lis associazions, cui comuns zimui e i zovins. Cun di plui, prime di fâ il concors che mi à puartât a vore te Agjenzie Regjonâl pe Lenghe Furlane, dal 2008 fin al 2012 o ai lavorât te segretarie particolâr dal President de Regjon Renzo Tondo: cheste esperience mi à permetût di cognossi di dongje cemût che e funzione la nestre aministrazion regjonâl e tignî rapuarts cun chei altris ents, come ancje la Provincie di Udin. O met duncje a disposizion dai citadins cheste esperience che mi à fat cressi sedi professionalmentri sedi personalmentri. Par votâmi, al baste meti une X parsore dal simbul dal MAF che o cjatais te SCHEDE ZALE pe Provincie di Udin - FONTANINI PRESIDENT.

Di chei altris ponts che o volarès realizâ, us scrivarai tai prossims dîs, cirint di esponi cussì il program pes Elezions provinciâls 2013 dulà che o soi candidât pal Maf tal colegjo eletorâl n.20 di S.Denêl (comuns di Forgjarie, Maian,Ruvigne e S.Denêl).

Sul streaming e la aghe cjalde

Ta chescj dîs e je vignude la mode di doprâ la peraule "streaming". Che al sedi clâr: l'imprest al è util e no lu discut.
Mi fâs però un tic ridi che plui di cualchidun al spiete di cori daûr des modis talianis come che al è il M5S, cuant che invezit al podarès cjalâ in cjase.

Di fat za tal 2011 - par esempli - o ai vût il plasê di condusi une presentazion di un libri in direte via streaming cun spetadôrs ancje di Londre, di Buenos Aires e no dome: lait a lei chi.
Cun di plui, savêso ce che mi à costât? NUIE parcè che o vevi za une conession internet, il gno pc e la mê webcam.

Duncje Furlans, cirìn di crodi plui intes nestris capacitâts che no vin di vê pôre di nissun: vonde cori daûr de mode dal ultin moment.

E se o rivarai a jentrâ in consei provinciâl o metarai a disposizion la mê esperience che o ai fat in ducj chescj agns che o soi presint su Internet, doprantlu pardabon e no fevelant "par sintût a dî".

Di chei altris ponts che o volarès realizâ, us scrivarai tai prossims dîs, cirint di esponi cussì il program pes Elezions provinciâls 2013 dulà che o soi candidât pal Maf tal colegjo eletorâl n.20 di S.Denêl (comuns di Forgjarie, Maian,Ruvigne e S.Denêl).

Pensâ locâl, agjî globâl

Inte ete de globalizazion si pues cjapâ stradis difarentis. Une e pues jessi chê di simiotâ chei altris e pierdisi te omologazion cence savôr. Une altre soluzion e je, doprant lis peraulis di Robert Jhonson, za consulent di Bill Clinton e Bill Gates, "distinguisi par no estinguisi". Ve alore che al è clâr il parcè de valorizazion de nestre identitât, parcè che dome se o sarìn bogns di promovi ce che o vin di particolâr, di speciâl, di "dome nestri", alore o podarìn proponisi al mont come un ricjece, un valôr che al fâs plui siôrs. Cheste filosofie e pues riferîsi a la culture, a la lenghe, a lis tradizions, ma no dome: se o pensìn ai nestris prodots, no ise vere che simpri di plui si cîr chel determinât prodot tipic, chê specificitât? E a vegnin ancje di di fûr par cognossiju e preseâju.
Ve alore che jessi pe valorizazion de dimension locâl nol à di significâ sierâsi: al diseve Pre Checo Placerean za tal 1975 "Pensâ al Friûl, fâ i interès dal Friûl, vê cussience di jessi un popul, di vê une muse difarente di chei altris, nol vûl dî sierâsi dentri un curtilut di cjase, ma al vûl dî spalancâ i puartons di ogni bande a la int di dutis lis bandis, par che a jentrin e par che a passin, par che a nus contin ce che nô no savìn; ma tal nestri curtil, a cjase nstre, libare e vierte a ducj; no in man a altris che le doprin par lôr".
E se o rivarai a jentrâ in consei provinciâl, o puartarai indevant chest pinsîr come clâf par vierzi colaborazions ancje fûr dai nestris confins, confrontantmi prin di dut cui popui dongje che a àn za tal Patriarcjât di Aquilee une part di storie in comun cun nô.

Di chei altris ponts che o volarès realizâ, us scrivarai tai prossims dîs, cirint di esponi cussì il program pes Elezions provinciâls 2013 dulà che o soi candidât pal Maf tal colegjo eletorâl n.20 di S.Denêl (comuns di Forgjarie, Maian,Ruvigne e S.Denêl).

Alè Udin a S.Denêl

Usgnot o ai passade une biele serade in compagnie dal Udinese Club di S.Denêl li dal Bar Zebretta dal amì Angelico Vatri.
Al incuintri a jerin l'assessôr provinciâl Adriano Piuzzi organizadôr dal incuintri, il president Pietro Fontanini, il comissari di S.Denêl Daniele Damele, il vicepresident dal AUC Giancarlo Damiani e i "parons di cjase": il diretîf dal Club cul president Dimitri Quaglia.
Une biel event par rindi mert a une realtât associative come chê dal Udinese Club, che al ten dongje i tancj socis sedi pe passion sportive pe nestre scuadre dal cûr, ma ancje pal gust di stâ insiemit.
E duncje "Alè Udin" e se o rivarai a jentrâ in consei provinciâl, mi impegnarai par continuâ a dâ une man al mont dal associazionisim, element di fonde dai nestris paîs, parcè che tal nestri program eletorâl o vin metût tal prin pont la centralitât de persone par scoltâ e dâ rispuestis imediadis a lis domandis dal citadin e, duncje, ancje des formis associativis dulà che al è coinvolt.

Di chei altris ponts che o volarès realizâ, us scrivarai tai prossims dîs, cirint di esponi cussì il program pes Elezions provinciâls 2013 dulà che o soi candidât pal Maf tal colegjo eletorâl n.20 di S.Denêl (comuns di Forgjarie, Maian,Ruvigne e S.Denêl).

Il Tiliment, patrimoni e risorse dal nestri teritori

Par chei che za mi lein di cualchi timp, a san che mi ocupi di identitât. La identitât di un popul e je fate di tancj elements: la lenghe, il patrimoni culturâl, artistic, storic… ma dispès no si visisi che ancje il teritori e l’ambient a son elements integrants e fondamentâi de nestre identitât. No pues imagjinâ il Friûl cence il Tiliment, inmò di plui no pues imagjinâ i comuns di Forgjarie, Maian, Ruvigne e S.Denêl cence il re dai flums. Cuant che al jere vignût fûr il progjet des cassis di espansion, mi soi impegnât CUINTRI DES CASSIS in DIFESE DAL TILIMENT.
Parcè che chest flum, la “Aghe” par antonomasie, riferiment par il “di ca” e il “di là” dal Friûl, e je un ecosisteme cuntun ecuilibri menaçât dì par dì des ativitâts di cui che, in non dal profit, nol à nissun rispiet pal ambient naturâl che i sienziâts di dute Europe a vegnin a studiâ, a difindi, a valorizâ. O soi convint che valorizantlu, chest patrimoni ecologjic al podarès deventâ une risorse economiche par meti in vore ancje il turisim di cualitât.  Se o rivarai a jentrâ in consei provinciâl, mi impegnarai par continuâ su cheste strade.

Di chei altris ponts che o volarès realizâ, us scrivarai tai prossims dîs, cirint di esponi cussì il program pes Elezions provinciâls 2013 dulà che o soi candidât pal Maf tal colegjo eletorâl n.20 di S.Denêl (comuns di Forgjarie, Maian,Ruvigne e S.Denêl).

Cemût che o viôt la Provincie

Si à fat e si continue a fâ un grant dibatiment su la domande "provincie sì o provincie no?".

Jo o pensi che l'ent provinciâl al à di continuâ a esisti, ma al è evident che si à di pensâ a une gnove organizazion a nivel regjonâl.

O lassi un moment in bande lis cuistions tecnichis parcè che no ai voie di fâle masse lungje, ancje se inmò no mi àn convint su cemût che si pues gjavâ lis provinciis che a son previodudis tal titul V de Costituzion taliane: une riforme costituzionâl no je cussì imediade.

Ma tornant al pratic, o pensi che une miôr organizazion dai ents locâi e sedi pussibile. E su chest teme o soi dacuardi cu la idee che e viodarès di une bande la citât metropolitane di Triest e di chê altre il Friûl. Vêso presint il model di Trent e Bolzan? Chel!

Cheste struture no dome e cjatarès une fonde storiche dant une juste impostazion a la "convivence" fuarçade che e dure di passe 50 agns di dôs realtâts tant difarentis (chê furlane e chê triestine), ma e rispuindarès ancje a cuistions pratichis. Fin cumò o ai fevelât di "contignidôr", cumò provi a fevelâ dal "contignût": o soi convint che un ent di mieç tra comun e regjon al coventi par vê un interlocutôr istituzionâl a puartade di man: miôr decentrâ che acentrâ, parcè che Triest no je propit cussì dongje. Al è clâr che a la provincie i van delegâts une serie di podês e di risorsis par meti in vore la totalitât de ativitât aministrative di aree vaste: a la regjon, slizeride des funzions aministrativis, i varessin di restâ compits legjislatîfs e di rapuarts internazionâi, par esempli.

Jo le pensi cussì e o soi in sintonie ancje cul President Fontanini che le à plui voltisdeclarade.

Di ce che o volarès fâus scrivarai tai prossims dîs, cirint di esponi cussì il program pes Elezions provinciâls 2013 dulà che o soi pal Maf tal colegjo eletorâl n.20 di S.Denêl (comuns di Forgjarie, Maian,Ruvigne e S.Denêl).