Alc nus veve za dit Luca a proposit dal Tg realizât de Provincie di Pordenon. Jo mi soi permetût di lâ a viodi plui a fonts ce iniziative che e jere e o ai scrit un articul publicât su Il Friuli di vinars ai 14 di Novembar dal 2008.Te foto: Elena Zanussi, la sporteliste de Provincie di Pordenon che une vore ben e à conduzût par furlan il notiziari in cuistion.
Furlan in TV par mût di dì
RispondiEliminaSu Il Friuli 14/11/2008
L'autun 2008 al someave che al ves puartât cualchi biele novitât in cont di iniziativis a pro de valorizazion de lenghe furlane. Ancje se il notiziari radiofonic par furlan in onde tal palinsest regjonâl de aziende che e gjestìs il servizi radiotelevisîf public e jere daûr a concludisi dopo i prins 6 mês di sperimentazion, la Provincie di Pordenon e chê di Udin a àn screât ognidune par so cont un spazi informatîf televisîf par furlan. Ma nol è dut aur ce che al slûs.
Su la rive dal Noncel lis robis a prometevin di plui di ce che po dopo al è stât mantignût. Di cuasit un an al è in vore il gnûf sportel pe lenghe furlane, afidât cuntun concors a Elena Zanussi, laureade in Lenghis e Leteraturis Forestis te Universitât dal Friûl tal 2003 (110/110 e lode) cuntune tesi su Maria Forte e la nassite dal romanç par furlan, cun relatore la professore Piera Rizzolatti e cun doi esams di Lenghe e Leterature furlane tal plan di studis. La Zanussi no je gnove tal panorame di tutele e valorizazion de lenghe furlane: dal 2003 al 2008 e je stade sporteliste di lenghe furlane tal Comun di Sedean li che e vîf; dal Lui dal 2005 al Novembar dal 2006 sporteliste di lenghe furlane tal CIRF de Universitât dal Friûl li che e je stade daûr a progjets di promozion linguistiche e cun Priscilla De Agostini e à curât la campagne Furlan mieç di comunicazion al cuadrât, la realizazion di dôs Zornadis Europeanis des Lenghis, e à moderât cunvignis ancje di comunicazion, e à partecipât ae realizazion di doi dizionaris di lessic specialistic e tant altri. Dopo une curte parentesi tant che docente di lenghe inglese te scuele medie di Lignan la Zanussi e je tornade al so prin amôr e e je deventade, tramite concors public, sporteliste di lenghe furlane de Provincie di Pordenon ai 11 di Dicembar dal 2007 e li e lavore ore presint. Tal cjamp de comunicazion e colabore cu la redazion di Lenghe.net e de Patrie dal Friûl (cun cheste di pôc timp) e dal mês di Jugn al mês di Setembar dal 2008 e je stade daûr cun altris trê sportelistis dal Friûl di Mieç a la redazion e conduzion di cualchi puntade de trasmission radiofoniche “In stant Pic”, in onde su Radio Onde Furlane, che e je stade metude adun dal Progjet Integrât Culture dal Friûl di Mieç par promovi par furlan lis sôs ativitâts tal cjamp culturâl e sociâl.
Tornant a lis iniziativis de Provincie di Pordenon, tra chês finanziadis cui fonts de Leç 482/99 (esercizi finanziari dal 2005) al jere sedi il progjet dal sportel linguistic, dai cors di formazion pai dipendents publics (tignûts sedi a Pordenon sedi a Manià) e la comunicazion istituzionâl. Par chest ultin cjapitul i fonts a disposizion a son stâts 8.000 euros: di chescj, 3.000 euros a son stâts spindûts par traduzions di regolaments e di parts dal sît Internet de Provincie di Pordenon (www.provincia.pordenone.it); chei altris 5.000 euros a son stâts metûts pal progjet dal notiziari “La provincie par furlan”. La domande e jere stade fate tal 2004 sot de Presidence di Elio De Anna che dopo però si è dimetût par candidâsi a lis elezions regjonâls 2008, lassant la gjestion dal progjet finanziât tes mans de Presidence di Alessandro Ciriani, so vicepresident e cumò in carghe fint a la fint dal mandât che si sierarà tal 2009.
Il progjet al previodeve la realizazion di 4 pontadis di meti in onde su Telepordenone subit dopo dal notiziari de sere, duncje tor lis 20.30 di joibe, ogni 15 dîs. Cu “La provincie par furlan” la zonte provinciâl e varès vût di ilustrâ la sô ativitât: duncje no un vêr telegjornâl cu la presentazion dai fats dal teritori, ma plui che altri un moment di servizi di comunicazion par permeti al citadin di cognossi la azion aministrative dal esecutîf de Provincie di Pordenon, in lenghe furlane.
Stant che al è stât cualchi probleme cu la regolaritât de metude in onde “Une colp Telepordenone si è adiriture dismenteade di mandâ in onde la pontade” e lamente la Zanussi “E tâ chê sere, che al è sucedût, o ai ricevût telefonadis di bande de int che e spietave di viodi il program”. Par furtune almancul 3 dai 4 filmâts a son in Rêt sul sît de Provincie di Pordenon e cui che nol à vude la pussibilitât al pues tornâ a viodiju li.
A part la conduzion de sporteliste che e je stade simpri in lenghe furlane, sedi i 4 intervents di Ciriani (onipresint in dutis lis trasmission) sedi chei di chei altris assessôr provinciâi a son stâts dome par talian cence nissun sot titul o traduzion (cu la uniche ecezion di Markus Maurmair, il plui zovin de zonte, cu lis deleghis a la planificazion teritoriâl, a lis politichis europeanis, a la agricolture, a lis pro loco e al turisim e che al è stât l'unic a fevelâ par furlan). Altris ecezions a son stadis Massimo Milanese, assessôr di Manià che al è stât sintût pe dai cors di lenghe furlane che la Provincie e à fat ta chel comun, e Pietro Fontanini, president de Provincie di Udin, intervistât in ocasion dal passaç di testemoni a la vuide de assemblee des Provinciis furlanis, cuant che Udin al à tornât a vê la presidence. Dome chestis intervistis a son stadis par furlan, cun pôcs minûts a disposizion sul totâl di 12 par ogni pontade: adiriture te cuarte e ultime pontade nancje un ospit nol à doprât la lenghe furlane.
A la fin si à vût cuasit la impression che al sedi stât no un program par furlan, ma une biele e grande vetrine “a cost zero” pe aministrazion provinciâl di Pordenon, li che in realtât la lenghe furlane e je passade in secont plan, ancje se, stant lis finalitâts dal progjet e de leç che lu à finanziât, e varès vût di jessi la protagoniste di dute la trasmission (o tornìn a marcâ i minûts di trasmission li che si à sintût a fevelâ dome par talian: la plui part rispiet a chei par furlan). E no vin voie nancje di pensâ che al podedi sedi cualchi colegament cu lis elezions aministrativis dal 2009 e che a viodaran ancje la Provincie di Pordenon clamade a votâ il so gnûf President. Cemût jerie chê? “A pensâ mâl si fâs pecjât, ma”...