Sience furlane

Cinc trasmissions di divulgazion sientifiche in lenghe furlane
E tache domenie ai 27 di Avrîl, a lis 10.15, su RAI 3 (sede regjonâl dal F-VJ) la serie televisive “Sience Furlane”. Una novitât inte ufierte comunicative in lenghe furlane, di fat il program al è il prin esperiment televisîf di divulgazion sientifiche in marilenghe. Une sfide impuartante pe continuitât de nestre lenghe e culture, che e pues dâsi dome se i aspiets plui impuartants de modernitât, come lis siencis, a vegnin coltivâts e divulgâts par furlan, doprant i mieçs di comunicazion plui adats. A garantî la cualitât de operazion e je la SSTeF (Societât Sientifiche e Tecnologjiche Furlane), che e ten adun ricercjadôrs, docents e professioniscj interessâts a lis tematichis de sience e de tecnologjie modernis, e al lôr disvilup e difusion in lenghe furlane. Tes cinc puntadis di “Sience Furlane”, che a durin sù par jù 12 minûts, Giorgio Cantoni al intervistarà cualchidun di chescj esperts par frontâ argoments come lis neurosiencis, la realtât virtuâl, la meteorologjie, lis siencis biologjichis e altri. A vierzi lis trasmissions, ambientadis intune librarie di Udin, Giusy Gubiani che e introdûs i temis e i autôrs. In sierade une bibliografie e une sitografie, utilis par cui che al volès profondî i argoments tratâts intes intervistis. Lis novitâts de trasmission però no integnin dome i contignûts ma ancje il lengaç, si à cirût di fat di ufrî une ocasion di divulgazion de lenghe furlane contemporanie intal grant public, cualificade di une terminologjie specifiche e insiorade di neologjisims necessaris a lis gnovis esigjencis espressivis. I tescj di “Sience Furlane” a son di Paolo Cantarutti, la realizazion tecniche di Alphavideo.

Sience Furlane, calendari des puntadis:
- domenie 27/04/08: “Viaç in 3D te Basiliche di Aquilee”, interviste al inz. Domenico Visintini;
- domenie 04/05/08: “Fenomens meteorologjics violents e cambiaments climatics”, interviste ai dot. Fulvio Stel e Dario Giaiotti;
- domenie 11/05/08: “Il cancar dal cjastinâr e lis curis biologjichis”, interviste al prof. Romano Locci;
- domenie 18/05/08: “Storie de vît in Friûl”, interviste al prof. Enrico Peterlunger;
- domenie 25/05/08: “Sintiments religjôs intal çurviel”, interviste al prof. Franco Fabbro.