Usgnot passade mi soi let un librut di pre Toni "A San Jacum, là che al finìs il mont" (ed. La Grame, 2004).A son passaçs pardabon biei di chest pelegrinaç fat cui amîs di Glesie Furlane tal Fevrâr dal 1996 a Sant Jacum di Galizie dilunc dal cjamin dai pelegrins che almancul une volte ("o di vîfs o di muarts"...) a àn di lâ "là che al finìs il mont".
Al è un librut svelt e gustôs che al da un esempli fuart dal scrivi di pre Toni: argoments storics, teologjics, pagjinis di diari intimis e sinceris scritis come che al saveve lui, in maniere semplice e direte che ti rivin dretis tal cjâf e tal cûr.
O ripuarti une riflession fate intant che al passave la Catalogne, in visite al Santuari di Montserrat.
Al scrîf pre Toni (pagjine 43):
"No si pues vinci nissune bataie, ni di ordin militâr, ni di ordin culturâl, cence lis mans alçadis. (Il riferiment al è al cjapitul 17 dal libri dal Esodi: la bataie di Refidim, cuant che Mosè al ten i braçs alçâts judât di Aron e Cur, intant che Gjosuè al scombat cuintri di Amalec te plane pe liberazion dal popul ebraic, ndr.).
Tant a dî che no baste la fuarce militâr o economiche o tecnologjiche par che un popul al puedi vê avignî. E covente la fuarce de fede, de religjon, de culture, dal spirt. Un popul grant e fuart cence idealitât al devente debul; un popul piçul, cuntune grande cjarie spirtuâl e ideâl al devente fuart.
Il popul catalan, a diference dal nestri, al à vude la fortune di une grande disponibilitât di mieç economics. Un grant puart, une grande industrie, un grant teritori, un grant numar di int. E in plui al à vude de sô bande la glesie, che e à savût cumbinâ religjositât e culture, libris pe anime e libris pe ment. Jentrant tal curtîl de badie, si viôt une grande lapide là che la nazion catalane e ringrazie la comunitât benedetine di Monserrat par vê difindude cun fuarce e coerence la identitât culturâl catalane. Tant a dî: nô o vin fate la nestre part là jù, ma o fasevin pôc o nuie se voaltris, ca sù, no tignivis lis mans alçadis".
Par informazions e par vê i libris di pre Toni, clamait pre Tonin Cjapielâr (Ruvigne - UD) 0432.957268 o pre Roman Michelot (Vilegnove di Sant Denêl - UD) 0432 956010
Usgnot o ai stât a Vençon a cene cul grup di Glesie Furlane. O vin fevelât di cheste esperience e mi àn dât ancje un altri libri che al fevele di pelegrinaç: il viaç in Palestine che a vevin fat la volte prime, simpri cun pre Toni. Ma di chest us fevelarai dopo che lu varai let.
RispondiEliminano tu tacaras ancje tu a da binidizions urbi e turbul come ... no?
RispondiEliminano, no, trancuil: jo o soi dal parê che lis benedizions a àn di jessi lassadis ai predis. Ai laics ur fâs ben lâ a dutrine, ma simpri restant ca di ca dal altâr.
RispondiElimina