Mozion trasversâl a pro des leçs di tutele linguistiche.

Il consei comunâl di Maian, su mê propueste al à aprovât une mozion a pro des leçs di tutele des minorancis linguistichis.
Achì us met il test de relazion introdutive e tal prin coment definitîf aprovât ae unanimitât di dut il Consei comunâl di Maian.

Relazion introdutive: relatôr Christian Romanini (Forza Italia)

Par introdusi cheste mozion, o volarès domandâ dome cualchi minût par ricuardâ une figure fondamentâl par dut il Friûl e i furlans: pre Toni Beline, mancjât ai 23 di Avrîl dal 2007.
Pre Toni cualchi volte al vignive ancje a Maian a cjatâ une sô sûr che e je nestre concitadine.
La muart di chest predi, inteletuâl, furlanist e lasse un grant vueit no dome par chei che lu àn cognossût, ma soredut par dut il popul furlan che, ancje se no ducj si rindin cont, al è restât plui puar.
La maniere piês par ricuardâlu al sarès limitâsi a sempliç discors di circostance, dismenteantsi di ce che al à dit, scrit e puartât indevant.
Ta chest moment storic li che ancje in Regjon e je daûr a puartâ in aule la gnove propueste di leç pe tutele de lenghe, al sarès stât impuartant vêlu inmò cun nô cu lis sôs riflessions e invîts a no vergognâsi de nestre identitât furlane, invidantnus a jessi braurôs di ce che di plui fuart e biel o vin te nestre culture: la nestre lenghe furlane.
Ta cheste setemane, cjârs coleghis, Us ai cun plasê fat vê une copie dal so libri “Une scuele pai furlans” li che e ven fûr dute la fuarce profetiche e la grandece inteletuâl di un om che nol è stât dome un grant esponent dal mont culturâl e predi, ma ancje un mestri che za 30 agns indaûr al veve anticipât temis e esperiencis che vuê o sintìn tant a fevelâ.
O speri che la leture us vedi dât sponts di riflession e stiçade la curiositât.
O ai vude la furtune di cognossilu di persone tai ultins mês de sô vite e mi auguri che il so testament inteletuâl al podedi jessi pardabon chê semence che e cressarà simpri di plui ancje cumò ce lui al à lassât cheste esistence terene. In cheste ete globalizade e cu la tindince a omologâsi, ducj, ancje i singui comuns e i singui conseîrs comunâi a àn il dovê di difindi la identitât de nestre int, tacant dai plui piçui za tes scuelis, parcè che al è di bant cjalâsi ator pal mont se no si cognòs di dulà che si ven. Dal sigûr, cjapant cussience de nestre realtât nus sarà ancje plui facil frontâ lis grandis sfidis ator pal mont.
Dut chest duncje par sierâsi tal nestri “curtîl”, ma te convizion che dome valorizant il “particolâr” si pues pandi une culture de integrazion tra lis identitâts difarentis presintis in Europe e no dome, ancje tal nestri comun e te nestre regjon: par chest la mozion in argoment e fâs riferiment ancje aes comunitâts slovenis e gjermanofonis de nestre regjon, propit intune vision di Friûl tant che esempli e laboratori par une convivence tra i popui, duncje intune solidarietât tra comunitâts linguistichis.
Juste ai 26 di Setembar il Consei di Europe, e no un gruput di “cuatri furlaniscj”, al à fissât la zornade europeane des lenghis disint a clâr trê principis di fonde:

• La Europe e je plurilengâl e lu sarà simpri;
• L'aprendiment des lenghis al ufrìs une oportunitât ai citadins;
• Ognidun al è in stât di fâlu.

I rapuarts internazionâi a àn dibisugne sì di une lenghe francje internazionâl, ma al sarès secont me contraditori fevelâ di Europe cence visâsi des lenghis locâls: chest lu disin lis normis europeanis.

Come che al à dit ancje cualchi timp indaûr il president de Sardegne Soru “No capìs parcè che noaltris o vin la responsabilitât di protezi un nuraghe, di protezi e salvâ cualchi piere di une citât puniche e magari o vin di lâ a pierdi une robe vive tant che la lenghe, che e fevele di nô centant di plui di un muret punic: e fevele di un popul e di une storie cent mil voltis di plui di cuatri pieris metudis in rie”. E o soi convint che ancje pre Toni le varès pensade te stesse maniere ancje se noaltris no vin i nuraghis, parcè che no je une cuestion ni di colôr politic ni di origjins, ma di valôrs di fonde di un popul, che al sedi sart o furlan, ma tal stes câs popui che a àn voie di frontâ la sfide de globalizazion cu la lôr muse e cuntun element identitari ben definît, ma in pericul.
E cumò vignint al detai de mozion presentade, o scuen dî che la propueste di leç in esam in consei regjonâl e je stade argoment di un lunc dibatiment chest Istât: tancj pas indevant a son stâts fat, ma si pues miorâle inmò e no si à di sbassâ il nivel di atenzion. Ve chi la mozion che us lei...