07 maggio 2006

Un simbul de ricostruzion: Il Domo di Vençon

Intun filmât fat de Universitât di Udin e che si pues viodi in internet, al è stât riprodusût ce che al è sucedût al Domo di Vençon in chê sere dai 6 di Mai dal 1976 aes 21.06: 50 e rots seconts che no finivin mai: discjame il video. Us consei di scoltâ l'audio cuntun pâr di auricolârs.
Inmò grazie a dute la int di cûr che e à regalât ae mê gjenerazion un Friûl che al è nomenât par dut il mont come un model e mi fâs sintî braurôs di jessi furlan. Un pinsîr lu dedichi par ducj i Sindics di chê ricostruzion che e àn dimostrât che cu la volontât si rive a fâ dut: ancje a fâ tornâ a nassi une Regjon.
Un "Mandi" ancje ae siore Luciana Bonatti Mora, che in chês gnots e à lavorât cence polse intun dai plui dificii compits: vê cure par ducj i 131 muarts di Maian e ricognossiju par podê informâ lis fameis che a vevin pierdût i lôr parincj.

3 commenti:

Christian Romanini ha detto...

Vuê o ai sintût a fevelâ int che e à vivût chei agns de ricostruzion. Tai discors di Adriano Piuzzi e Roberto Dominici si à sintût la fuarce di une gjenerazion di politichis che e à segnât la storie de Ricostruzion e dal gnûf Friûl. No sai se la classe dirigjente di vuê e rivarès a fâ ce che e àn fat in chê volte. Jo o sarès spaventât.

Christian Romanini ha detto...

O aprofiti par ringraziâ dute la int che si è dade di fâ in chescj doi dîs achì par ospitâ cun grande dignitât lis tantis personis vignudis a Maian. Cence lis associazions e i volontaris (no fâs nissun non par no dismenteâ nissun) che a àn fat PLUI DAL DOVÛT, chest fin setemane nol sarès stât pussibil. Grazie e compliments

Christian Romanini ha detto...

Disìn che achì di nô e je stade une misture che e à cjapât dentri une classe dirigjente-politiche (il stât, la regjon, i sindics: no stin a dismenteâ ancje lis peraulis di Sandri Schiratti!) che e jere pardabon fuarte e e saveve ce fâ; la int che no à molât e, invezit che cjapâ sù la valîs, si è tirade sù lis maniis e e à decidût di restâ; il volontariât che nus à fat cognossi trope brave int e je ator pe Italie e pal Mont. Ma cence i politics e la credibilitât de nestre int, salacor, no sai se si varessin vûts i stes risultâts. La mê riflession no meteve in dubi ni il lavôr de int, ni dai volontaris: mi pâr però di viodi une diference tra la classe politiche di îr e di vuê.