UNE VÔS ZOVINE, UNE VÔS LIBAREIl blog di Christian Romanini

Ringraziament

2011-06-12T06:55:00.006+02:00

Us ringraziìn di cûr par vênus stât dongje tal moment de pierdite dal nestri GIAN CARLO
Denise, Sonia e Christian Romanini

Mandi Papà

2011-06-08T06:00:00.006+02:00

O vevin di clamâti par fâti i auguris, ma o vin scugnût vignî a cjoliti e dîti "Mandi, si tornarìn a viodi di une altre bande".
Salude nono Rino, none Fenisie e barbe Gjino.
Recuie.

30

2011-05-11T00:01:00.000+02:00

Robert Gerard “Bobby” Sands – Roibeard Gearóid Ó Seachnasaigh

2011-05-05T00:51:00.002+02:00

09.03.1954 – 05.05.1981

Par Bobby Sands la lodule e jere un dai simbui de libertât. Si pues sierâle intune scjaipule, torturâle e fâi dut il mâl pussibil, ma no cjantarà mai par cui che le à impresonade. Se si vûl sintîle a cjantâ, bisugne lassâle libare.
Bobby Sands al è muart 30 agns indaûr. Cun lui a àn pierdût la vite altris nûf volontaris republicans. E je une feride che e bruse ancjemò. Dut câs, la lodule e va dilunc a cjantâ e, se si le scolte ben, si visisi che e cjante propit la sô cjançon di libertât:

Tiocfaidh ár lá – La nestre dì e vignarà

Se o vês gust di lei inmò alc, fracait su http://www.bobbysandstrust.com/ e ancje chi.

6 di Mai spietant il Messâl par furlan

2011-05-01T08:46:00.000+02:00

Vuê us segnali cheste mail che mi è rivade chê altre dì.

Buine a ducj.
Us fâs savê che Vinars che al ven, ai 6 di Mai, che a colin juste 35 agns dal orcolat, o vin pensât (chei cuatri di nô di buine volontât che no àn masse voie di rindisi) che, un pôc par chest inovâl e un pôc pe visite "pro forme" dal Pape a Aquilee, al sarès stât biel e just di cjatâsi denant dal Palaç dal Vescul (Palaç Patriarcjâl) a Udin par ricuardâur ai vescui talians de C.E.I. che e sarès ancje ore che a lassassin libar il Messâl par Furlan e ancje, parcè di no, par tirâsi dongje fra di nô e cirî di stiçâ a meti fûr il nâs chei che a son dome bogns di trugnâ inte ostarie o sot de nape.
Duncje, l'invît al è par cjatâsi aes 4 daspòmisdì là che o ài dit, puartantsi daûr plui int che si rive e almancul (!!!) une bandiere de Patrie par om e, se o volês, ancje cartei cun scritis e sprocs di cheste fate: "vescui talians, lassait libar il Messâl Furlan!"; "6 di Mai: o vin fat sù i paîs, metìn adun la int!" o ancje "6 di Mai: lis cjasis a son fatis, fasìn sù il Popul!".
Al è clâr che se a son par furlan al è miôr ma a laran ben ancje par todesc (lenghe dal Pape e simpri mâl glotude dai "italianissimi") e par sloven (ca ai "....issimi" ur ven sbulium pe vite!). Chei par talian... ancje chei, se propi un nol sa a scriviju in altris lenghis!
L'apel al è di sparniçâ plui pussibil la vôs a ducj chei che o cognossês.
Almancul par un colp, no stin a pensâ: "o ài di lâ a...; " o varès di fâ..."; "mi ven par cjase..."; "il plevan mi à dit...".
NO! Pensait dome: "A Udin o ài di jessi ancje jo!", a cost di sintîlis de femine... o dal om,... o de madone... o...
A part i scherçs (che nol è tant ce scherçâ), tignît ben presint che se no si judìn prime nô di bessoi, al sarà ben dificil che nus judi cualchidun altri.
Pai particolârs, in câs, Us fasarai savê miôr setemane che e ven. Tal fratimp, fasêtmi savê voaltris ce che o pensais de pensade.

Ariviodisi in tancj!
Mandi
Sandri Pian

P.S. - Us prei di fâ zirâ cheste mail a ducj chei che o pensais che a sedin sensibii a lis cuistions furlanis, segnalant lis direzions di pueste eletroniche di vuestris amîs che a sedin disponibii a meti fûr la bandiere storiche dal Friûl pes cjasis dai paîs de zone di Aquilee te zornade de visite dal Pape (se voaltris o cumbinais i nons e i riferiments, noaltris o cumbinarìn lis bandieris).

25 agns

2011-04-26T01:23:00.000+02:00

Friûl dal 1511 a Cjampfuarmit

2011-04-18T22:09:00.002+02:00

Joibe ai 21 di Avrîl a 8 e mieze di sere (20.30) alì de Ostarie “A la Patrie dal Friûl”, in place a Cjampfuarmit, Luigino Peressini e Carli Pup a presentaran il libri - mape “1511 il Friûl de Joibe Grasse”, une edizion de cooperative Serling (www.serling.org).
Il cressi des tensions sociâls, la faide jenfri Strumîrs e Çambarlans, la vuere jenfri Vignesie e l’Imperi, il Carnevâl, la funzion des Cernidis, i confronts cul rest de Europe, il sclop e il davuelziment dal plui grant riviel popolâr de storie dal Friûl a vegnin contâts de mape ilustrade di Luigino Peressini e dai tescj curâts di Carli Pup.
La opare e je formade di une mape che e mostre dut il Friûl storic, là che a vegnin presentâts in maniere dinamiche lûcs, fats e personaçs leâts al riviel de Joibe Grasse, e di un librut bilengâl (furlan – inglês) là che a son spiegâts in maniere sintetiche i elements clâf che a son daûr dal riviel dal 1511.

Ancje jo a la leture de Bibie

2011-04-07T16:50:00.003+02:00

O sin a plui di metât di cheste setemane memorabil (fracait su la imagjin par lei dut il calendari).
Doman e sarà par me une zornade speciâl.
Prin di dut parcè che tes primis oris dal vinars al tocjarà ai miei amîs che a son a stâ di là de "grande aghe" oceaniche.
Prime dal cricâ dal dì dal 8 di Avrîl (doman), tal cûr de gnot, tor lis 3, si scomençarà la leture dal libri di Zacarie. Graziis al coordenament di Luca Peresson dal CTS de ARLeF e ae rispueste pronte di Claudio Roya, si à podût dâ la leture di 8 tocs di chest test Sacri a ancjetancj furlans di 5° e 4° gjenerazion, partignints al Circul ALEF di Colonia Caroya, citât fondade di furlans 133 agns indaûr (1878) in provincie di Cordoba (Argjentine). Chescj a àn ambientât la lôr leture par furlan in 5 glesiis storichis de zone di partignince. Chi daûr a son i nons, etâts e lûcs di leture:

1- Diego Bovo (32 agns): cjap. 1-2 - Glesie "Nuestra Señora de Lourdes" - San Durí - Col Vicente Agüero - Argjentine
2- Marcos Goy (17 agns): cjap. 3-4 - Capele "Nuestra Señora del Rosario" - Colonia Caroya - Argjentine
3- Daniel Cargnelutti (37 agns): cjap. 5-6 - Glesie "Nuestra Señora de Monserrat" - Colonia Caroya - Argjentine
4- Lito Carrizo (52 agns): cjap. 7-8 - Glesie "Nuestra Señora de Monserrat" - Colonia Caroya - Argjentine
5- Edgar Toso (49 agns): cjap. 9 - Capele di "Estancia Jesuítica de Caroya" - Colonia Caroya - Argjentine
6- Mickaela Toso (16 agns): cjap. 10-11 - Capele di "Estancia Jesuítica de Caroya" - Colonia Caroya - Argjentine
7- Fernando Visintin (29 agns): cjap. 11-12 - Glesie "Nuestra Señora de Lourdes" - San Durí - Col Vicente Agüero - Argjentine
8- Ariel Cragnolini (25 agns): cjap. 13-14 - Glesie "Nuestra Señora de Lourdes" - San Durí - Col Vicente Agüero – Argjentine.

La sielte di dâur la leture di chest libri no je a câs, cun di fat in Zacarie si fevele di lontanance de Patrie lontane. Lôr, cetancj atîfs tal mantigniment dal leam cul Friûl e cul desideri di fevelâ e di praticâ di plui la marilenghe, a rapresentin in cualchi maniere cu la lôr presince “in diferide” i miârs di furlans che a son tal forest e che in chescj dîs a son daûr a seguî l’event in streaming.

Tal dopomisdì, tor 5 e alc invezit jo e Venusia o vierzarìn la leture dal libri dai Ats dai Apuestui.
Il prin cjapitul jê e il secont, chel des Pentecostis, jo: il cjapitul dulà che il Spirtu Sant al fâs fevelâ i oms ognidun te sô marilenghe e, ancje se dutis difarentis, ducj si capissin tra di lôr.
Continuait a cjalâ la leture de Bibie on line, fracait achì.

Friûl di Magance a Cjampfuarmit

2011-04-06T11:43:00.002+02:00

Te setemane che al cole l'aniversari dai 3 di Avrîl, Fieste Nazionâl dal Friûl pe nassite dal Stât Patriarcjâl di Aquilee istituît tal
1077, joibe ai 7 di Avrîl aes 6 e mieze di sere li de Ostarie “A la Patrie dal Friûl” in place a Cjampfuarmit, Sandri Carrozzo e l'autôr
Luigino Peressini a presentaran la mape ilustrade “Friûl di Magance”, une edizion Serling (www.serling.org).
La opare e mostre dut il Friûl storic, de Livence al Timâf, traviers la presentazion des figuris mitologjichis de tradizion furlane. Si
podaran cussì cognossi maçarots, spirts folets, aganis, benandants, striis, salvans... Sul daûr de mape e je ancje une schede par ogni
personaç in maniere di vê une piçule vuide pe leture.
Dutis chestis figuris e tantis altris a compagnaran il letôr a la scuvierte dal Friûl pardadon magjic.

Bon 3 di Avrîl

2011-04-03T16:41:00.003+02:00

Buine fieste nazionâl dal Friûl. Us visi che usgnot al tache ancje il grant event de leture continuade de Bibie.
Par cui chel nol rive a lâ a Udin, us segnali il link par viodi la direte: fracait chi.

La Patrie dal Friûl di Març

2011-03-17T15:43:00.003+01:00

E je jessude La Patrie dal Friûl (http://www.lapatriedalfriul.org/) di Març, dulà che si podarà cjatâ par intîr il comunicât di Glesie Furlane, che, pûr tal rispiet dal stât, si declare une vore critiche cuintri de retoriche nazionalistiche su la date dai 17 di Març.
«Par nô cheste fieste no pues jessi complete e serene, par vie che chê che e veve di jessi la nestre “cjase comugnâl” no je, dut a vuê,vierte a lis nestris sacrisantis spietativis di int e di popul, come che la stesse Cjarte Costituzionâl dal Stât Talian e intindarès professâ» a scrivin chei di Glesie Furlane tal document intitulât “Friûl: 145 - 93 agns de Italie”.
La Patrie e presente in cuviertine la “Cuintristorie dal Nûfcent” di Agnul Floramo che al dediche la sô riflession al deceni 1910-1920 e sivierç cuntune interviste a Remo Cacitti che al presente l’ultin libri editât di Glesie Furlane “Il Pastore ad Aquileia” di Gabriele Pelizzari.
La Patrie dal Friûl e je presinte a la Fieste dal Vin di Bertiûl tal dopomisdì di domenie 20 e domenie 27 di Març cuntun spazi espositîf li de enoteche de Pro Loco.

Apontament cui Gnognosaurs

2011-03-07T00:35:00.001+01:00

Miercus ai 9 di Març, a partî des cinc sotsere (17.00), Dree Venier al presente il segont libri dai siei «Gnognosaurs» dentri dal spazi «L’Ora delle Storie», organizât de Sezion Fruts de Biblioteche Civiche “V. Joppi” pai fruts dai 4 ai 8 anni.

Jentrade provisorie bande place Marconi 8.

Tiere Furlane, biele serade a Sant Denêl

2011-03-03T23:58:00.000+01:00

Usgnot o vin presentât Tiere Furlane n.7 a Sant Denêl, grazie a la colaborazion e a la ospitalitât dal Consorzi dal Persut che nus à dât pardabon un bon acet e che o ringrazii.

E je vignude tante int e o ai vude ancje cualchi sorprese. Mi à fat plasê di cognossi Sandro di Bassan e o ai savût che al jere in sale ancje Giustino, ma no lu savevi.

Tornant a la presentazion, o vin jemplât la sale dal cine e la serade mi à propit sodisfat.

Mert dai relatôrs come Francesco Ciani di Ineq e Domenico Pecile dal Messaggero, che o ringrazii ducj pe analisi e pes riflessions che a àn regalât al public. La serade si jere vierte cun Dino Persello, che al à ricuardât un divertent scrit dal mitic Riedo Pup.

Un grazie particolâr ancje par Enos Costantini, par dute la redazion, pal grant lavoron tal meti adun la riviste e al ass. Claudio Violino pe fiducie.

Al somearà retoric, ma no si à di vê pôre di dî grazie e chest ultin ringraziament al è pe tante int che ogni volte e ven a scoltânus e che simpri di plui e domande di ricevi la riviste.

Al fâs plasê viodi che ce che si fâs al plâs e al à riscuintri: fin dal prin numar, ogni presentazion e je stade un event culturâl preseât. Un entusiasim che al dure inmò a distance di mês.

E duncje se cualchidun altri al volès ricevi Tiere Furlane al pues clamâ il numar vert 800-149605 (se o cjatais ocupât, us domandi scuse, ma al è dome pal fat che tante int e clame).

Par savê alc di plui su cemût che e je lade la serade, fracait achì.

Us spieti a la prossime!

27 di Fevrâr: Zornade Furlane dai Dirits

2011-02-26T00:23:00.004+01:00

Come ogni an, ancje jo o ricuardi il riviel de Joibe Grasse dal 1511 che chest an al cole il so 500m aniversari.
Par cognossi miôr chest event, us consei l'articul di Donato Toffoli su La Patrie dal Friûl di chest mês (fracait chi).
Us segnali lis iniziativis di Radio Onde Furlane, la radio libare dai furlans che a cause dai tais dai finanziaments e je obleade a meti in casse integrazion i siei dipendents e cun doman e varà une riduzion dal palinsest (fracait chi); sedi il blog dal Comitât 482 (fracait chi); sedi il blog de Associazion 1511 che e fâs il pont su lis iniziativis previodudis ta chestis zornadis par ricuardâ chest aniversari (fracait chi).
Dute la mê solidarietât ai amîs di Radio Onde Furlane!

Su La Patrie la "cuintristorie dal Nûfcent"

2011-02-19T00:11:00.002+01:00

Dopo de solite polse dal mês passât, a Fevrâr e je tornade "La Patrie dal Friûl" (www.lapatriedalfriul.org), cun tantis confermis e novitâts.
Tacant de cuviertine, i letôrs a podaran cognossi la "Cuintristorie dal Nûfcent" curade di Angelo Floramo.
«Tal an li che a diviers nivei si volarès insegnâ la “storie” dai 150 agns de unitât di Italie – che e à invadût il Friûl dome tal 1866 (e des bandis di Gurize i talians a son rivâts dome dopo de prime vuere mondiâl)» a declarin chei da “La Patrie dal Friûl” «o proponìn une leture furlane autentiche de Storie dal “Secul curt”. Ogni mês la cuviertine e fevelarà di un event significatîf dal 1900 a vuê. Une corse dilunc dai decenis par capî miôr ce che al è sucedût in Friûl, cence contentâsi di ce che nus conte e che nus volarès imponi la Italie».
La prime pontade e je dedicade al deceni 1900-1910 cun Udin capitâl “de modernitât” cu la fiere campionarie dal 1903 e “de lûs” cun Artûr Malignani.
Il numar si vierç cuntune analisi storiche di Donato Toffoli sui 500 agns dal riviel contadin de Joibe Grasse dai 27 di Fevrâr dal 1511.
Tra lis novitâts ancje la rubriche dedicade a la Rêt e a lis gnovis tecnologjis “Furlans, digjitait furlan” cun Dree Venier, Michele Calligaris, Giorgio Jannis e Matieu Baldan.
Restant su la atualitât, un intervent di Marco De Agostini, segretari politic dal Moviment Friûl e la interviste esclusive a Sonia Cossettini, la “vigjilesse” furlane dal spot Rai tant criticât che e declare «La Patrie dal Friûl je stade la uniche a domandâmi cemût che le pensavi jo di dutis chestis polemichis sul spot RAI».
La Patrie si le cjate intes miôr librariis e ediculis, in dutis lis filiâls de Casse di Sparagn F-VJ o par abonament: tancj regâi e promozions par cui che al decît di abonâsi.
E sul sît www.lapatriedalfriul.org al è disponibil dut l’archivi dai numars passâts e za cualchi anticipazion di chest mês.

Auguris

2011-02-14T00:11:00.000+01:00

2 agns

2011-02-09T19:35:00.000+01:00

Lait a lei chi: www.pereluana.it

Ven a lei ancje tu la Bibie par furlan, 0432/555979: metiti in note

2011-02-03T07:39:00.004+01:00

0432/555979 al è il numar par metisi in note.
Jentre te storie: ti segnali che ducj a puedin partecipâ in maniere ative ae leture integrâl de Bibie par furlan, in program dai 3 ai 9 di Avrîl dal 2011.
I puescj disponibii par deventâ protagonist dal plui grant event culturâl in marilenghe dal 2011 a son 1300, ma al è miôr notâsi subit.
Si pues partecipâ, tant che letôr singul o tant che grup di letôrs, sedi par telefon, tacant di miercus ai 2 di Fevrâr, clamant il numar 0432/555979 dal lunis al vinars des 10.00 aes 13.00 e des 17.00 aes 20.00, o pûr scrivint ae direzion bibie@regione.fvg.it.
Il numar al è valit ancje par domandâ informazions e sclariments.
No stâ pierdi cheste ocasion!

Cunvigne sul Testament Biologjic

2011-02-02T23:41:00.001+01:00

O publichi vulintîr l'invît a la cunvigne sul testament biologjic inmaneade de associazion "Per Eluana".
Apontament par lunis ai 7 di Fevrâr alì dal Palamostre a Udin aes 8 di sere.
O pensi che ducj a vedin prin di dut di scoltâ, informâsi e dopo decidi in dute libertât, ma simpri cence fâsi cjapâ la man tes reazions. Lu dîs parcè che o vin sintût masse int a berghelâ in place, invezit di metisi a resonâ.

O aprofiti par tornâ a proponi la interviste al dot. Amato De Monte, fate su La Patrie dal Friûl di Dicembar 2010: fracait chi.

Par savênt di plui su la Associazion e su la cunvigne, fracait chi.

Ospit di Rosalba Tello a Meridiana su FREETV

2011-01-31T20:15:00.007+01:00

Vuê o ai vût il plasê di jessi ospit di Rosalba Tello a Meridiana, trasmission di FREE-TV. O jerin in rapresentance de Redazion da La Patrie dal Friûl.
Cul President de Provincie di Udin, Pietro Fontanini, cul segretari di Glesie Furlane, pre Tonin Cjapielâr e cul President di Ente Friuli nel Mondo, Pieri Pittaro o vin fevelât di culture, lenghe e identitât furlane. La trasmission e jere in direte aes 13.00, ma e varès di jessi in prevision ancje une repliche.
O ringrazii Rosalba pe ospitalitât e pe ocasion che nus à dât di fâ cognossi ce che o fasìn.

ps: e usgnot seconde ospitade a Sportissimo cun Marina Presello grazie a Oscar Puntel.

Watch live streaming video from freefvg at livestream.com

Grazie

2011-01-28T00:11:00.003+01:00

Ca i Carnavâi a corin... come che mi à za fat presint plui di cualchidun!
Ma ce si puedial dî?

Grazie a ducj!

Zornade de Memorie

2011-01-27T00:39:00.001+01:00

Cirint il prossin sindic (o sindiche)

2011-01-26T23:54:00.000+01:00

Vuê sul gjornâl al jere un articul cun protagonist Lionello Floreani che al dîs la sô a proposit dal prossim sindic.
E come che o vevi za domandât ancje jo, ancje Nello al bute la idee di une femine a la vuide dal Comun (lait a lei il post Totosindic di Otubar dal 2010)
Par lei l'articul cu lis declarazions di Nello Floreani, fracait chi o lait a leilu tal prin coment.
Ce disêso se o provìn a dâ un cognon a chestis: "Barbara, Anna, Gaia, Maria Teresa ed Elisa, i cui cognomi sono ben noti ai cittadini"?
Ancje se secont me al podeve zontâ ancje un pâr di nons di sioris za candidadis: dismenteance o omission volude?

Tiere Furlane e à il Numar Vert

2011-01-25T20:33:00.003+01:00

Par facilitâ cui che al à voie di ricevi par abonament la riviste trimestrâl di culture dal teritori “Tiere Furlane”, la Regjon e à ativât un Numar vert.
Di fat, telefonant al numar gratuit 800149605 di lunis al vinars des 9 aes 13 e des 14,30 aes 17,30 al è pussibil comunicâ i propris dâts par ricevi la publicazion editade de Aministrazion-Direzion Agricolture.
Cun di plui, la riviste si pues discjamâle in pdf dal sît www.regione.fvg.it/tierefurlane e si cjatile ancje sul innomenât social network Facebook.
“Tiere Furlane”, nassude tal 2009, e je rivade a la setime jessude.
Tal ultin numar l'assessôr regjonâl aes Risorsis Rurâl, Agroalimentârs e Forestâls, Claudio Violino, midiant dal editoriâl al fevele ai letôrs e a la comunitât regjonâl riclamantju a la tutele e a la valorizazion des lidrîs de nestre int e de nestre realtât, e a lis tradizions plui antighis, vere espression dal teritori e di chei che a àn disvilupade la economie, ancje, in principi, cuasit dome midiant de civiltât contadine.
Tra i articui sul numar 7 si segnalin i tancj intervents dedicâts al purcit, ma ancje la pagjine di storie dal Friûl tant impuartante ma ancje tant pôc cognossude: il riviel contadin de “joibe grasse” dal 1511. Si trate dal event dai 27 di Fevrâr dal 1511, cuant che Udin al fo teatri dal prin riviel contadin, che chest an a colin i siei cinccent agns.

Bocâl e Cresime a Remanzâs

2011-01-19T00:29:00.002+01:00

Al è timp fint ai 12 di Fevrâr par partecipâ al concors "Tarlecs e comareçs jenfri Bocâl e Cresime" di Remanzâs che za di cualchi an si davuelç in ocasion de Mascarade di Carnavâl.
Lait a lei ben sul sît dal Comun di Remanzâs (ma ancje il blog di Contecurte nus fâs capî alc di plui...) e provait a partecipâ!

Une cerce di Euskal Herria a Maian

2011-01-15T15:22:00.003+01:00

In Catalogne o ai stât e intant che o spieti la volte buine par lâ in Galizie e tal Paîs Basc, mi contenti di "cerçâ" l'aiar di Euskal Herria lant a Maian...
Sì, sì: no stoi çavariant!
O feveli dal bar "Al Got" di Maian, dal gno coscrit Juri Savio che di cualchi an si è trasferît tal Paîs Basc e cussì o voi a cjatâlu par fâmi contâ alc di plui di chel popul. Juri mi à testemoneât che jentrâ in contat cul popul basc, cussì braurôs de proprie identitât, i à permetût di tornâ a scuvierzi ancje la sô identitât furlane.
Cumò al è tornât par cualchi mês tal so bar di Maian, puartant però tal cûr chê tiere... e ancje cualchi fotografie come cheste chi in bande!
E a proposit de foto, su facebook cumò o varès di fracâ un boton, ma su chest blog mi ven di scrivi "Mi plâs"!

Tiere Furlane 7

2011-01-06T00:49:00.003+01:00

Sot Nadâl al è jessût Tiere Furlane 7.
Par savênt di plui su chest numar, fracait chi.
O ringrazii dute la Redazion che e fâs un lavoron ogni volte par meti adun cheste riviste, in particolâr Enos Costantini che al è pardabon une risorse inesauribil.
Tra i tancj articui che us invidi a scuvierzi, mi permet di segnalâ l'intervent di Carli Pup, sul riviel de joibe grasse dal 1511: ai 27 di Fevrâ di chest an a colaran i 500 agns di cheste pagjine di storie tant impuartante, ma ancje tant pôc cognossude de storie dal Friûl, fracait chi.

Mittelfest e Lenghe furlane

2011-01-02T12:11:00.006+01:00

O vierç il gnûf an leint i gjornâi e us propon cheste notizie che e rive dal consei regjonâl.
Il conseîr Roberto Novelli (te foto) al propon al Mittelfest di puartâ plui atenzion pe valorizazion de lenghe furlane (fracait chi par lei la Ansa). Mi somee une buine notizie, ancje parcè che cheste tiere e je simpri stade crosere di culturis e il Mittelfest al podarès jessi propit une buine ocasion.
Tai prossims dîs al varès di jessi metût in calendari un incuintri tra il Mittelfest e la Arlef.

Tancj auguris di bon 2011

2010-12-31T17:54:00.005+01:00

Bon An!
Srečno novo leto!
Ein gutes neues Jahr!
Buon anno!
Prosperu annu nou!
Feliç Any Nou!
¡Feliz año nuevo!
Bonne année!
Happy New Year!

Tra une mangjade e chê altre...

2010-12-27T00:05:00.000+01:00

A fiestis no si pues dî che si reste a digjun... ma tra une mangjade e chê altre, se no si rive a lâ a fâ une cjaminade, ce isal di miôr di une buine leture? E se e je par furlan, e je inmò miôr!
L'impuartant al è tacâ fin di piçul.

Bon Nadâl a ducj

2010-12-25T00:01:00.001+01:00

Preiere di Nadâl
Ven jù Signôr
dal to cîl di glorie,
ven a comedâ la nestre storie.

Ven jù Signôr
in cheste puare tiere,
là che a regnin
svindic, fam e vuere.

Ven jù Signôr
a sfantâ la pôre e il scûr,
a morestâ e a sclipî il nestri cûr.

Ven jù ancje vuê
come chê dì a Betlem,
ven a viodi dal puar
e di chel che al zem.

Ven jù in chest mont
simpri plui forest:
dome cu la tô gracie
si podarà meti in sest.

Ven jù Signôr
dal to biel cîl stelât,
ven a viodi dal mont
che al è malât.

Ven jù Signôr
a fânus il grant regâl
dal perdon e de pâs
come tal prin Nadâl.

pre Antoni Beline

Spot Rai n.2

2010-12-23T13:22:00.001+01:00

Dopo de proteste inviade passe 10 dîs indaûr, a distance di cualchi zornade us segnali cheste novitât: fracait chi.
Ve chi il secont spot: fracait chi, ce us someial?

Vergognôs spot Rai

2010-12-11T22:34:00.023+01:00

No sai voaltris, ma o ai di pôc viodût la ultime campagne Rai par fâ paiâ l'abonament. Chi il link par viodi i 5 (no 1, ma ben 5!!!) spots.
La reazion che o ai vude jo e je stade di sens di stomi, come di un cjapât pal cûl.
Juste cualchi setemane indaûr la Rai e à dit che pe atuazion de leç 482/99 no àn avonde bêçs e che duncje i furlans a varan di spietâ par vê programs in lenghe furlane, ancje se a pain il canone Rai.
Invezit bêçs ju àn cjatâts par une campagne publicitarie vergognose che e celebre i 150 agns (chi in Friûl no saran 150 agns, ma 145, stant che i tegnin a precisâ), doprant i dialets e la lenghe furlane come se a fossin une robe negative: di fat il messaç finâl al rive disint che grazie a la Rai si è fate tante strade par bandonâ lis lenghis e lis feveladis locâls. Come se la omologazion e fos un sucès...
Mi plasarès savê ce che e je costade cheste robe ridicule, che no coventave stant che o savìn benon che la Rai e ignore la leç dal stât (482/99). Cun di plui, no contente nus mene ancje pal boro...
Za fin cumò o jeri simpri stât in dubi, ma cheste volte propit a mi no mi ven voie di paiâ l'abonament Rai. E voaltris?

INZORNAMENT: RASSEGNE STAMPE
La proteste e je rivade ancje su:
IL CORRIERE DELLA SERA 14.12.2010: fracait chi (e je la prime volte che o lei il gno non su chest cuotidian!).
IL FRIULI 14.12.2010: fracait chi (une mê interviste firmade di Marta Rizzi).
LA PATRIE DAL FRIÛL 14.12.2010: fracait chi (il comunicât uficiâl de nestre riviste)
IL BLOG DI SANDRI 14.12.2010: fracait chi (une iniziative che o condivît)
IL BLOG DI IVO MURGIA 13.12.2010: fracait chi (citazion in Sardegne)
DIEGU CORRAINE 13.12.2010: fracait chi (furlan e sart, stes tratament)
GIANFRANCO PINTORE 13.12.2010: fracait chi (furlan e sart, stes tratament)
MICHELA MURGIA 13.12.2010: fracait chi (150 agns de Uniformitât di Italie)
IL BLOG DAL COMITÂT482 15.12.2010: fracait chi (citazion)
IL BLOG DAL COMITÂT PE AUTONOMIE DAL FRIÛL 15.12.2010: fracait chi (citazion e comunicât de Patrie)
IL GAZZETTINO 15.12.2010: fracait chi (citazion e comunicât de Patrie)
IL MESSAGGERO VENETO 15.12.2010: fracait chi (comunicât de Patrie ma ancje cualchi sflocje dal regjist dal spot)
IL BLOG DI DONE BETE 15.12.2010: fracait chi (citazion de riflession di Franco Brevini e citazion dal articul di Lorenzo Salvia sul Corriere)
IL MESSAGGERO VENETO 16.12.2010: fracait chi (il conseîr regjonâl Roberto Novelli - PdL - al condivît il comunicât de Patrie)
LA REGJON SARDEGNE 16.12.2010: fracait chi (Diegu Corraine sul sît istituzionâl)
IL BLOG DI ALDO ROSSI 16.12.2010: fracait chi (comunicât de Patrie)
IL BLOG DI LORELE 17.12.2010: fracait chi (comunicât de Patrie)
UDINE OGGI 17.12.2010: fracait chi (comunicât de Patrie)
IL MESSAGGERO VENETO 18.12.2010: fracait chi (il senatôr Mario Pittoni - Lega Nord - al domande il ritîr dal spot par furlan)
FURLAN 18.12.2010: fracait chi (al fevele de vigjilesse)
IL SPOT N.2 22.12.2010: fracait chi

Amato De Monte su La Patrie dal Friûl

2010-12-10T18:22:00.003+01:00

O ai vût l'onôr di podê intervistâ Amato De Monte pe Patrie dal Friûl (chi in bande la cuviertine). E je stade une esperience che mi à lassât tant, parcè che mi à permetût di cognossi un grant professionist che al à ancje une umanitât enorme. No zonti nuie altri, dome il link se o volês lâ a leisi la interviste, fracait chi.
Us visi ancje che o presentarìn La Patrie sabide ai 18 di Dicembar aes 6 di sere a Vile di Buie, grazie a Guglielmo Pitzalis che al sarà presint, a la associazion "El Tomât" di Buie e al Consei pastorâl e il plevan di Vile.

Ospit di Dario Zampa

2010-12-08T20:16:00.002+01:00

Dario Zampa mi à invidât te gnove serie dal Scrigno su Telefriuli.
Chi sot la interviste che mi à fat.

Premi Friûl

2010-12-04T00:05:00.000+01:00

Usgnot o ai stât al Palamostre pe prime serade di Musiche/Muziche. E jere la serade dedicade a la musiche slovene, in colaborazion cu la comunitât slovene de provincie di Udin.
Ma chei che o spietavi a jerin i R.Esistence in Dub, chi sot o cjatais il video de lôr esibizion al Liet International Festival che a àn vinçût in Bretagne sabide passade: BULOS E VONDE!

E usgnot la serade dal Premi Friûl: 20.30 li dal Palamostre a Udin.

Tancj auguris a Dario Zampa

2010-12-03T07:16:00.000+01:00

No si pues dî che Dario Zampa nol vedi dât un contribût fondamentâl pe furlanetât: dal sigûr une des musis plui popolârs e ricognossudis ator no dome pal Friûl, ma ancje fûr dai confins fisics de Patrie. Par chest, vuê, dì dal so complean (al è dal 1946) i fâs tancj auguris!
Par te Friûl... Par te, Dario! Augurons!

R.Esistence in Dub, prins in Europe

2010-11-29T23:18:00.000+01:00

O soi propit in "Fieste"! I R.Esistence in Dub a àn vinçût il Premi dal Public al Liet International, il festival european de musiche pes minorancis in Europe, davuelt sabide di sere in Bretagne.

La cjançon "Fieste" e à ricevût une slavinade di vôts e o soi propit content par chest grup che al fâs une biel miscliç glocâl in musiche, coniguant sonoritâts gjamaicanis e eletronichis cun sponts de tradizion furlane, doprant la lenghe furlane pai lôr tescj!

O aprofiti par segnalâus une vecje interviste che i ai fat a DJTubet su La Patrie di Jugn dal 2009.

Bulos e vonde!

Biele serade a Manià cun Tiere Furlane 6 e La Associazion dai Miluçs Antîcs

2010-11-25T22:03:00.005+01:00

Vuê a Manià o ai vude la enesime conferme che la nestre int e à gole di Friûl e di furlanetât, voie di confrontâsi e cjatâsi. Al è sucedût cussì ancje in ocasion de presentazion di Tiere Furlane 6, la riviste di culture e teritori che o firmi tant che diretôr responsabil. O aprofiti par ringraziâ dute la redazion e in particolâr il prof. Enos Costantini pal grant lavôr che a fasin.
A Manià o sin lâts parcè che li e à sede la Associazion dai Amadôrs dai Miluçs Antîcs, une biele realtât che ogni an e inmanee une mostre itinerante sui miluçs tipics furlans.
Par lei i numars passâts o podês fracâ chi.
Par savê alc di plui sul numar 6 fracait chi o par lei un piçul struc de serade di usgnot, fracait chi.

Recension sul blog de trasmission canadese Mandi Mandi

2010-11-24T23:55:00.001+01:00

Dulà si vadial cul furlan? Jo o soi lât in Canadà, Australie, Catalogne e soredut in Argjentine: tal sens che di cuant che mi interessi di cuistion leadis a la lenghe furlane e a la identitât o ai vude la pussibilitât di cognossi une vore di int che e je ator pal mont, magari dome midiant de Rêt, contats che cualchi volte a son deventâts ancje reâi. La ultime tape e je propit canadese, cuntune recension sul blog de trasmission radiofoniche Mandi Mandi di Paolo Canciani.
Il blogarin al è un zovin di Codroip, Mattia Bello che cumò al è daûr a fâ une esperience lavorative propit in Canadà: ve chi la recension che al à fat dal gno blog.

Gnogno apontaments

2010-11-21T15:20:00.000+01:00

Ve chi un avîs che mi rive dal comun di Sedean

I Gnognosaurs in mostre: lis taulis origjinâls, i libris, i Gnognoboi, “fasiti la foto cui Gnognosaurs”, disegne i Gnognos e tant altri...
A San Lurinç di Sedean Cjase Uarnèl (vie Çorut, 1)

Inaugurazion: domenie ai 28 di Novembar aes 17.00

A saran presints l'autôr Andrea “Dree” Venier e la senegjadore Elisabetta PittanaVierzidure: vinars e sabide des 9.30 aes 12.30 fin ai 31 di Dicembar

In plui o ricuardìn ancje lis dôs presentazions dal libri "I Gnognosaurs 2"

Il gnûf libri dai dinosauruts plui simpatics dal mont

Vinars ai 26 di Novembar aes 18

li de Osterie Al Buso, Vie Simoni 8 a Spilimberc

A saran presints l'autôr Andrea “Dree” Venier e la senegjadore Elisabetta Pittana presentâts dal editôr Orazio Cantiello

Sabide ai 27 di Novembar aes 18

li de librerie Friuli, vie Rizzani 1/3 a Udin

A saran presints l'autôr Andrea “Dree” Venier, la senegjadore Elisabetta Pittana e William Cisilino responsabil P.O. Lenghis minoritariis de Regjon F-VJ

I Gnognosaurs a son tornâts

2010-11-17T23:29:00.000+01:00

Dopo dal sucesson dal an passât al è aromai pront il volum 2 dai Gnognosaurs. Ma no dome: dongje dal blog uficiâl us consei di lâ a viodi ancje chest gnûf sît cun tancj gnognozûcs: gnognogame.blogspot.com

Minorancis linguistichis e imprenditorie

2010-11-11T00:51:00.002+01:00

Pai siei 30 agns Radio Onde Furlane e à inmaneât une cunvigne su Minorancis linguistichis e imprenditorie.
Se o rivais, us consei di passâ sabide ai 13 di Novembar in Cjamare di Cumierç a Udin.
Par viodi dut il program, fracait chi.

PPP 02.11.1975_2010

2010-11-02T20:04:00.003+01:00

Fint che al jere vîf, al deve fastidi a plui di cualchidun.
35 agns indaûr lu àn copât.
Cumò che nol è plui vîf, al continue a dâ fastidi a plui di cualchidun.
Vuê no puedin plui copâlu.

"A vignarà ben il dì che il Friul al si inecuarzarà di vei na storia, un passat, na tradizion!..."
[furlan di Pier Paolo Pasolini]

Taiant la coce su Contecurte

2010-11-01T15:34:00.002+01:00

Pe seconde volte o ai vût l'onôr e il plasê di jessi ospit de Ostarie leterarie di Contecurte che di pôc e à ristruturât l'ambient...
Fracait chi par lei la mê "Taiant la coce"...

Une biele notizie par un amì

2010-10-29T06:30:00.004+02:00

Vuê o soi jevât adore e mi soi subit rindût cont che e jere une biele zornade. Un gno amì al è stât une vore mâl par vie di un episodi sucedût a Telefriuli dulà che al jere stât tirât in bal intune discussion. Par fortune il timp al è galantom e vuê, a distance di cualchi mês, l’autôr di declarazions i à domandât scuse sul Messaggero (che o podês lei chi in bande, MV dai 29.10.2010, pagjine 6 regjonâl).

Cun Pierluigi Cappello a Tresesin

2010-10-26T22:12:00.003+02:00

E je rivade pes cjasis la ultime Patrie dal Friûl cun in cuviertine Pierluigi Cappello.
O aprofiti par invidâus ducj a Tresesin, in sale dal consei comunâl, joibe ai 28 di Otubar aes 20.30 par une serade in compagnie dal poete vincidôr dal Viareggio 2010 e la presentazion di chest numar.
Sul sît de Patrie o cjatais ancje cualchi anticipazion...
E se no lu vês za fat, ABONAITSI!

Totosindic

2010-10-14T00:33:00.005+02:00

O sin tal ultin Autun prin dal 2011 e duncje l'ultin Autun prin de prossimis elezions aministrativis che te prossime Primevere a puartaran un gnûf sindic a Maian.
L'atuâl, simpri che no gambiedin (ipotesi avonde improbabil) la leç che e proibìs ai sindics dai comuns parsore di un ciert numar di abitants di presentâsi plui di 2 voltis di file, nol podarà tornâ a candidâsi.
Duncje e je ore di vierzi il "Totosindic", stant che inmò no si sint nuie di uficiâl.
No cjali di chê altre bande, no savarès cui pescjâ: Lieto Molinaro al à za corût plui di une volte cence risultât... isal il câs di tornâ a provâ? Boh, nol è un gno probleme.
Ma cjalant ca di ca, cui podaressial jessi?
Romano Ciani, vicesindic in cjarie, al à un bon curriculum aministratîf e no dome: esperience, ultins 5 agns in prime linie, personalitât, stimât e nol è nancje vecjo. Duncje un bon non par tacâ a resonâ, simpri che, prin di dut, al sedi lui a vê voie.
Dal sigûr il cuadri politic di cheste volte nol sarà come chel de volte passade: i ecuilibris internis a la maiorance a son un tic difarents rispiet a 5 agns indaûr.
E no stin a dismenteâ che la Leghe Nord, che za te ultime tornade e veve concuistât un ciert pês cun 3 conseîrs, ta chescj mês e sta passant un bon moment di consens a tancj nivei (ancje se e je stade cualchi sbrissade, e no feveli di Maian...).
Altris, vuê come vuê, cui podaressino jessi "papabii"?
Forsit saressial miôr cirî cualchi outsider?
Cemût viodaressiso une femine cu la fasse di sindic?
O cualchi candidât che al vedi mancul di 35 agns?
E dut câs, cuissà se si cjatarìn come la ultime volte cuntune corse a 4?...
Diviersis domandis... ma... cui vuelial provâ a rispuindi?

Un altri colp di Spade

2010-10-13T20:04:00.000+02:00

No sai cui che al è...

O sai che al è di Udin... almancul a disin...

E se ancje no ai tantis altris informazions su di lui, dome une foto sô di cuant che al jere zovin, aromai mi sta simpatic, ancje parcè che mi vise ogni volte di dut ce che al fâs.

Alore jo us visi ancje voaltris che al è di pôc jessût il so ultin libri simpri su Marlowe... chi in bande la cuviertine: Dimmi chi sei Marlowe.

Jo mi contentarès di savê cui che al è Frank Spada... se no altri par dîi di no molâ... ops, ma jal ai za dit!

A Cjasielis par Onde Furlane

2010-10-07T18:50:00.002+02:00

Sabide 9 di Otubar tacant des 5 dopomisdì, ducj a Cjasielis di Mortean par no lassâ distudâ Radio Onde Furlane!

Balonut ros

2010-10-05T21:15:00.002+02:00

Ogni cuatri seconts, tal mont al mûr un frut. No stin a lassâlu lâ.

Ai 6 di Otubar e je la zornade dal "Balonut ros" (www.palloncinorosso.it) di Save the Children...

Ocjo, chest video al podarès urtâ la vuestre sensibilitât!

La Patrie di Setembar

2010-09-26T00:08:00.000+02:00

E je rivade pes cjasis La Patrie dal Friûl di Setembar. Chi o cjatais cualchi cerce, come l'editoriâl di Dree Valcic, la interviste a Toni Capuozzo, chê a Marco Macorigh e chê a Pieri Villotta.

La Patrie ti fevele sul videofonin

2010-09-07T23:41:00.003+02:00

Al è il gjornâl storic in lenghe furlane e dal 1946 al continue a dâ vôs a la cause furlaniste, "par un Friûl plui furlan" al dîs il sproc che si lei sot de testade.
La fuarce da La Patrie dal Friûl (www.lapatriedalfriul.org) e je simpri stade chê di tignî ben di voli lis lidrîs dal Friûl, ma cence dismenteâsi de atualitât.
Cun chest principi e nas la colaborazion tra "La Patrie dal Friûl" e TradeinvestTV (www.tradinvest.tv), webtv nassude a Londre tal 2006.
Il progjet al previôt une campagne promozionâl indreçade ai utents cun smartphone, plui cognossût cul non di videofonin.
Si trate di spots curts (massim 30 seconts) che “La Patrie dal Friûl” e divulgarà par fâ cognossi la riviste midiant videomessaçs in lenghe furlane che si puedin viodi sul cualsisedi model di smartphone, simpri plui doprâts dai zovins.
"O ai vude ocasion di confrontâmi cu la Redazion de Patrie dal Friûl e si sin cjatâts subit in sintonie" al declare Marco Macorigh (te foto), furlan traplantât di passe 20 agns a Londre e aministradôr di TradeinvestTV "Intun mont globalizât, dulà che Internet al è il spiele plui imediât di chest procès, nus somee strategjic pontâ ancje su la lenghe furlane, parcè che come che al dîs Robert Jhonson, life training ancje di Bill Gates, al è necessari "distinguisi par no estinguisi": te comunicazion al devente fondamentâl dâ une fuarte identificazion al messaç e par chest o ai vin decidût di mostrâ cheste campagne ancje in Scozie, in Gales e in Irlande".
La Patrie dal Friûl e je duncje il prin media in lenghe furlane che al sperimente chescj gnûfs mieçs di comunicazion, ma ancje esempli di avanguardie a nivel european.
Cui al volès ricevi i sms e mantignîsi cussì informât al pues mandâ il so numar di telefonin a info@lapatriedalfriul.org: PAR VIODI IL SPOT, FRACAIT CHI.

La culture e je simpri nobile

2010-09-05T16:57:00.006+02:00

O sin a Blessan cun Glesie Furlane, La Patrie dal Friûl e la Serling par partecipâ a la Fafieste, un event che si sta dimostrant la juste maniere di fâ fieste cence dismenteâ che "no dome di frico al vîf il furlan"... e se us al dîs jo, fricodipendent, o podês crodimi.
Come che o disevi o sin presints par promovi lis nestris publicazions e tai moments di polse, o cjapi la ocasion di tornâ a sfueâ i libris di pre Antoni, za lets ma che a san smaraveâti ogni volte che tu ju cjapis in man. Cun Mauro mi è capitât di fermâmi suntun passaç di "Trilogjie tormentade" il libri che pre Toni al à scrit tai agns 90 e che i à fat vinci il premi Sant Simon dal 1999.
Si trate di riflessions su trê oms che a somein une vore lontan: don Milani, Oscar Wilde e Pieri Pauli Pasolini. Propit su chest ultin inteletuâl, mi soi fermât a lei chestis riis che us torni a proponi chi sot. Nol è mai biel lei i libris a tocs e un consei che us doi di cûr al è di gjoldi de prime a la ultime ducj i libris che us capitin sot man. Comprindût chel chi.

Ve chi ce che al scriveve pre Antoni...

La culture e je simpri nobile (pagjine 205)
O sai che l'om inteligjent e curiôs al rive a passâ cun libertât e facilitât de leterature plui blasonade a chê plui sclete, cunvint che no esist une culture nobile e une ignobile, parcè che la culture e je simpri nobile come che la ignorance e je simpri ignobile. Ma chescj resonaments, che a somein scontâts, no jentrin par nuie intai compuartaments normâi de intelighentsia taliane e ancje furlane, simpri pronte a bandonâ il mancul pal plui. Là che il mancul al è chel che al da mancul pussibilitâts di public e di cariere. E i inteletuâi di riunde furlane dificilmentri a àn savût resisti a lis sirenis che a cjantanvin tal mâr plui larc e a àn stralozât cun armis e bagais dai gravârs dal Tiliment ai paltans dal Arno o, miei, dal Tevere, che al sfilie il Palaç di plui dongje.

Ancje il restâ furlans e je une sielte (pagjine 206)
Mi permet un ricuart personâl. Seben che no soi un inteletuâl di prime cualitât, no pues dineâ di vê rivât a fâmi un ciert non tra i scritôrs nostrans, judât salacor de pocje fole dai contendents. Poben plui di une volte mi è stât dât il consei, ni cirût ni condividût, di bandonâ la lenghe furlane parcè che no da pussibilitât di sboc. Come se la culture e ves di jessi in funzion de cariere.
Mi visi ancje de impression orende che al à fate pari Turoldo a Aquilee te grande celebrazion dai 11 di Lui dal 1976 pes vitimis dal taramot, cuant che si è scusât di no podê fevelâ par furlan parcè che al veve di dî robis "masse impuartantis".
Cemût aial vivût Pasolini il so amôr pe culture-mari peade a la realtât contadine e i aprofondiments filologjics de culture umanistiche che i cjapavin simpri plui e il timp e il cûr? Aial rivât a mantignî un ecuilibri no facil o la seconde i aie cjapade la volte a la prime, come che la periferie di Rome i veve cjapade la volte a la periferie culturâl furlane? Cemût mai che, dopo de primevere curte de Academiuta, i scrits par furlan a son sparîts e intes letaris si respire un contest culturâl che nol à plui nuie di "locâl"? No soi in grât di dâ une rispueste. Mi sint in dirit però di fâmi e di fâ la domande.
[...]
pre Antoni Beline (Trilogjie tormentade, ed. Glesie Furlane - Premi Sant Simon 1999)

FAntat in Fieste

2010-09-01T23:48:00.000+02:00

Chest fin di setemane i Fantats furlans a fasin fieste a Blessan di Basilian.
O speri di viodius in tancj!
Ve chi il program (fracait il link) e la locandine dal Maiute Award 2010, il concors pe miôr maiute par furlan.

Grazie Totò

2010-08-27T00:04:00.000+02:00

No stoi fevelant dal Princip de Curtis, ma dal nestri Totò, il nestri cjapitani.

Chê altre sere la fieste e jere stade ruvinade di une notizie che e veve tacât a zirâ tal dopomisdì: Antonio Di Natale al someave in partence pe Juve.

E jù dute une rie di legjitimis protestis e cualchi acuse al zuiadôr.

Ma fin di subit jo, ancje se o jeri restât mâl e displasût par une eventuâl pierdite di un zuiadôr simbul, no me soi sintude di condanâlu. Di Natale nol è plui un frut e tal efimar mont dal balon, a 33 agns un al tache a sintîsi dâ ancje dal "vecjut". Lu varès capît: une scuadre blasonade, che i varès ufiert plui bêçs che no a Udin, in sumis une biele ocasion economiche pe sô cariere.

Ma vuê la notizie plui biele: il Cjapitani al reste, dant une biele lezion di stîl e mantignit fede a la promesse fate diviersis voltis "O resti a Udin par sierâ la cariere". I becins no son la robe plui impuartante... nancje sot dai rifletôrs dal balon.

Grazie Totò! Par jessi restât e par vênus dât un pocje di sperance che a podedin esisti ancjemò valôrs che no son contâts dome in euros.

ps: W la classe!

Friûl, Europe: dute une altre musiche, anzit SUNS

2010-08-19T18:26:00.000+02:00

SUNS al è un festival de cjançon par dutis lis lenghis minoritaris de Italie, Austrie, Svuizare, Slovenie e Corsiche.
I 9 finaliscj a sunaran dal vîf ai 28 di avost a Udin.
I doi vincidôrs dai premis di public e jurie saran invidâts jenfri i 10 finaliscj dal LIET INTERATIONAL (Bretagne – France) ai 27 di novembar dal 2010.
Par savê al di plui sul event, scoltâ in anteprime lis cjançons votâ i grups in gare, fracait chi, e su la locandine chi in bande.
Si viodìn ai 28 di Avost a Udin in place Sant Jacum aes 9 di sere!

Par te

2010-08-14T00:28:00.000+02:00

Precisazion sul Messaggero Veneto

2010-08-12T07:43:00.006+02:00

Vuê il Messaggero Veneto al publiche une mê precisazion a proposit di une cuistion cinese.
Ve ca la letare:

PRECISAZIONE
A proposito dei Fogôlar

Preseât Diretôr, mi displâs disturbâLu par une cuistion che o vevi za sclarît, ma stant che domenie ai 08 di Avost o soi stât tirât in cause, o scuen fâ une precisazion. O volarès trancuilizâ il president onorari Marco Casula parcè che no mi soi mai permetût di fevelâ a non dal Fogolâr furlan di Shanghai ni o ai mai declarât di jessi lôr soci. Jo o soi intervignût a Maian a la VII Convention di “Ente Friuli nel Mondo”, che mi veve invidât, a non dal mensîl in lenghe furlane “La Patrie dal Friûl”, come che al à scrit just il coleghe Domenico Pecile il Prin di Avost simpri te stesse pagjine 04 (insert di Udin) sul vuestri gjornâl. Sul fat che, cence nissune responsabilitât di bande mê, mi sedin stadis atribuidis declarazions a non dal FF di Shanghai, o vevi za segnalât il probleme propit parcè che o imagjinavi che cualchidun al varès podût risintîsi. Chês peraulis lis à ditis un lôr rapresentant che al jere presint cun altris 2 personis, simpri dal Fogolâr Furlan di Shanghai, almancul cussì si è presentade la persone che e à cjapât la peraule a lôr non. O ringrazii inmò pal spazi che mi vês dât par cheste precisazion.
Christian Romanini

Furlan is better! Peraule de Ministre Sandra Pizzolitto

2010-08-10T18:12:00.004+02:00

Il numar da "La Patrie dal Friûl" di Avost, mês che pal solit al viodeve i nestris emigrants a tornâ a cjase, si vierç cun Sandra Pizzolitto Pupatello in cuviertine, origjinarie di Morsan des Ocjis, ministre furlane dal cumierç e dal disvilup economic de provincie canadese dal Ontario, che cun onôr e grant plasê o ai intervistât. La ministre Pizzolitto, che e fevele furlan e inglês, e à declarât «Il furlan al pues deventâ la “lenghe francje” parcè che o pensi che cuant che i Furlans si cjatin pal mont, chest al è za un pas in plui: il fat di vê lis stessis origjins al permet subit di jessi in sintonie. E al jude ancje i rapuarts economics parcè che tu ti sintis za de stesse famee». E à ancje zontât «Il Friûl al podarès jessi la puarte de Europe pal Canadà», dimostrant cussì che tignî cont di identitât e lenghe furlane al pues vê efiets positîfs impuartants ancje dal pont di viste economic.

FRACAIT CHI PAR LEI DUTE LA INTERVISTE

Chel Diablo di Pelù

2010-08-08T21:45:00.007+02:00

Eh sì, al continue il cjalt Istât furlan dal rock: chei che îr a passavin des bandis di Maian a àn stacât il biliet par une altre serade di ricuardâ. Destinazion: stât libar di Litfiba.
Finalmentri i riff di Ghigo Renzulli e la vosone di Piero Pelù si son tornâts a cjatâ sul stes palc e il risultât al è stât "rock & roll" come pôcs a san fâlu vuê come vuê par talian.
Une reunion che lis lenghis velenosis a àn definît di oportunitât, ma che chei 6mil che ju àn sintûts a puedin testemoneâ che la alchimie musicâl e je simpri chê: potente come la vôs dal diabolic Pelù, un vêr "animâl" su la sene, cjaveli lunc, forsit un tic di grîs ma presince e grinte che a strissinin. Une batude par furlan "Popul dal Friûl!" par saludâ vierzint il conciert (come che mi à ricuardât ancje Ninine), e po dopo vie par passe 2 oris.
E no dome musiche: o soi restât impressionât ancje dai messaçs che tra une cjançon e chê altre a son stâts mandâts. Politiche, impegn sociâl (a proposit us segnali la Onde Verde Iraniane, moviment che al conteste Ahmadinejad president dal Iran), contestazion de jerarchie laiche e religjose, ma soredut "voie di no sbassâ il cjâf" denant dai sorestants e cuintri i mieçs di distrazion di masse. Si pues jessi plui o mancul dacuardi, ma si scuen dâi at che il spirt libar fiorentin al à carisme e cjâf.
E par furtune, il spetacul al à inmò di scomençâ...

Zovins e Furlanetât

2010-07-31T23:12:00.005+02:00

Vuê o soi intervignût a la Cunvigne di Ente Friuli nel Mondo su "Zovins e furlanetât".
O soi restât scaturît pai coments che al à fat il prof. Tellia che al à fat intindi che la identitât furlane no covente...
Us propon chi l'intervent che o ai fat.

Zovins e furlanetât tal 2010

Cuant che a non da La Patrie dal Friûl o soi stât invidât a intervignî a cheste setime cunvigne dai Furlans tal mont, e o ai savût dal titul de zornade, mi soi fat une domande: aial sens fevelâ di furlanetât a zovins che forsit il Friûl no lu àn mai viodût o lu viodin vuê pe prime volte?
La domande no je banâl come che banâl no je la domande che si lee secont di me in maniere strente a une seconde domande: aial sens mantignî la nestre lenghe furlane intun mont che al devente simpri plui piçul ta cheste ete de globalizazion?
Lin par ordin.
Se vuê o sin chi, evidentementri no je dome par condividi une zornade di fieste. Piês al sarès limitâsi a un cjalâsi indaûr, lassantsi puartâ vie de nostalgjie par un Friûl che nol è plui.
Cuant che i nestris nonos a àn lassade cheste tiere, o met ancje la mê famee stant che i miei a son stâts “libars di scugnî lâ” in Argjentine (a Buenos Aires); in Gjermanie (a Colonie); in Svuizare (a Zurîc e Aarau); in Francie (a Parîs), al jere dal sigûr no par turisim ma parcè che chi e jere miserie o parcè che a vevin la ilusion di cjatâ dulà che a levin alc di miôr.

La lidrîs e je restade vive, ma chest nol baste plui.
Continuâ suntune strade dal ricuardâ ce che al è stât lassât, nol puartarà di nissune bande. Cemût podìno pensâ che i dissendents di emigrâts pal mont, int che e à savût costruîsi une posizion (par ducj o pensi a Sandra Pizzolitto, ministre dal cumierç e dal disvilup economic dal Ontario, ma tancj a saressin i esemplis) si podedin contentâ di une sunade di liron, une vilote, di un album di vecjis fotos in blanc e neri? Dut chest patrimoni al va ben e si à di tignîlu di cont, ma vuê il Friûl di chenti al à la responsabilitât morâl di fâ cognossi ce che cheste tiere e je orepresint.

Pierdi une culture al è un dam orent pal mont intîr
Duncje o vin di jessi pronts a frontâ cheste sfide cul mont di vuê, tignint presint che il pericul di pierdisi tal vilaç globalizât al è grant. E par dîle cun Robert Jhonson, gure espert di "life training e za consulent di Bill Clinton, Bill Gates e Micheal Jordan, o vin di "distinguisi par no estinguisi".
Spes tes discussions che cualchidun al imbastìs in cont dal Friûl, al capite di sintîsi a dî: “a ce coventie la lenghe furlane se o sin 600.000 mil chei che la fevelin achì e il mont al è invezit di 6 miliarts di personis”. Daûr di chest resonament aritmetic alore la stesse obiezion e podarès jessi fate ancje par dutis lis feveladis, cjapant dentri il stes inglês, il stes castilian, il stes cinês: ce plui, ce mancul o sin ducj piçui e ducj grancj a seconde dal element di confront.
Pre Antoni Beline, par agns diretôr da “La Patrie dal Friûl”, za tal 1989 al scriveve sul libri “Struture e/o culture” che o cjatais su la jentrade «A chest pont la cuistion e sarès sierade cu la prospietive, no tant lontane, che lis culturis mancul fuartis, come lis nestris, a vegnin glotudis e assimiladis di chês plui fuartis, come il talian. Cu la stesse logjiche, ancje il talian al vignarà glotût de culture anglo-americane e cussì chei che nus varan copâts nô a saran copâts ancje lôr. Ma chest nol è che mi jempli il cûr di sodisfazion. Parcè che la pierdite di une sole culture, ancje de plui rimite, e je un dam culturâl orent. Une pierdite che nissune teorie sul vilaç-globâl no pues justificâle. Un mont là che si è compagns tal sens di jessi ducj cence savôr e cence odôr e je une disgracie che ti fâs vigni frêt dome a pensâle. Imagjinâsi a vivile.
A rivuart dai piçui che si difindin, acusâts simpri di jessi antisociâi e nemîs dal progrès, che al sarès chest planete vualivât, mi permet di osservâ che la robe e je vere juste par ledrôs. Chel che al à une sô invidualitât al podarà confrontâsi, dâ e cjapâ. Il vêr indivualist al è chel che si sint citadin dal mont e vonde, par ce che nol à nuie ce dâ e nuie ce cjapâ. Dome pensâ pal so glotidôr».

Si à di montâ a cjaval, no colâ di chê altre bande
A ce covential continuâ a fâ vivi une lenghe? Montâ sù sul cjaval de modernitât nol à di significâ, taiâ la lidrîs cu la essence dal nestri jessi furlans. E il spieli di un popul al è la lenghe che chest popul al fevele: il so prin biliet di visite, la sô prime cjarte di identitât di mostrâ a chei altris popui. Par fâ une batude o disarès che il todesc al è precîs, come precise e je la sô lenghe, il talian al è cavilôs come che e je cavilose la sô lenghe, e vie indevant. La lenghe furlane e je sclete e sute come che a son i furlans. Ben si intint che ognidun di chescj aspiets al à il dret e il ledrôs de medaie, e ogni popul al è biel.
Come che al diseve Dree Venier intun editoriâl su La Patrie, duncje «La cuestion no je “dulà si vadial cul furlan” ma “dulà vadial il Friûl cence lenghe furlane”: al sparìs!»
Ve alore che al devente fondamentâl peâsi a chest fuart element di identificazion par podê continuâ a trasmeti no dome un vocabolari, ma ancje dut un sisteme di valôrs che cheste lenghe e puarte cun se.

No je dome une cuistion di lenghe.
La lenghe furlane no je dome un mieç di espression. Vere: se al fos dome chest al bastarès dome un codiç linguistic, ma o savìn ducj ce fin che al à fat l’esperanto e che l’inglês che si fevele tal cuotidian pai rapuarts internazionâi nol è la lenghe di William Shakespeare, ma une forme puare che e covente par puartâ juste il minim de informazion e che cualchidun al clame “globish”. Dal sigûr no puarte cun se chê complessitât di patrimoni che al identifiche un popul ben definît. Ce che mi preocupe di plui al è che dispès chi in Friûl al somee che al ziri chel virus strani, fi de globalizazion e che si clame “esterofilie”: o vin scuviert chei altris, dimenteantsi di noaltris. E vuê plui di cualchidun si è dismenteât di savê fevelâ furlan. Ma se i Furlans tal mont, e voaltris o sês l’esempli concret, a àn vuadagnade stime al è parcè che si presentavin cuntun patrimoni di culture, lenghe, esperience, mistîr, cognossincis, valôrs e identitât ben definîts. La storie de emigrazion furlane e je divierse de storie de emigrazion taliane, ancje se dispès e ven cjapade dentri di chê. O puarti dome l’esempli di une realtât che o ai vude la furtune di cognossi diretementri. Cuant che tal 1876 il prin ministri de Argjentine Nicolas Avellaneda al pensave a une leç di imigrazion al à cirût cuâi che a podevin jessi i destinataris di chestis assegnazions di terens e i è stât rispuindût e conseât un popul che al steve tal nord Italie, ai confins cul mont austriac, e che si clamave (e si clame) “furlans”. Nol è un câs che i sedi stât fat il nestri non: cussì tal 1878 a son rivâts il prins 295 fondadôrs che cul lôr patrimoni di cognossince e di culture a àn fat nassi cheste comunitât che inmò in dì di vuê e rapresente une realtât virtuose e esemplâr di furlanetât tal mont. E nol è l’unic câs che al testemonee la stime che il nestri popul si è vuadagnât ator pal mont.

Une clâf universâl
Covential zontâ inmò alc? Po ben, o cjali simpri tal pratic daûr di une esperience che no je masse grande, ma dal sigûr direte.
E il spont mal à dât propit il President Pieri Pittaro te conference stampe che al à fat in borc dal sâl juste martars passâts cuant che al à dit che i furlans dissendents di emigrants ator pal mont a son sui 4 milions di lôr. No saran ducj tai vertiçs dal sisteme economic tai rispetîfs paîs, ma se o provìn a pensâ che in dut il mont, chescj a puedin jessi lis “puartis par jentrâ” tai marcjâts dai 5 continents, la prospetive e gambie. E no pôc. Provait a imagjinâsi che chel fîl che al pues leâ un furlan canadês, cuntun furlan argjentin, passant par un furlan european, fint a un furlan australian si clamedi lenghe furlane, permetint cussì di cori di une bande a di chê altre dal mont, cence mai gambiâ no dome codiç, ma nancje identitât: ce sensazion provaiso cuant che o sintîs a fevelâ par furlan? No ise za di se une clâf che ti vierç cun plui facilitât e in mancul timp chê puarte clamade “difidence”? E ta chest mont che al va simpri plui di corse, i vêrs siôrs a son chei che a rivaran a spindi miôr il lôr timp. No ise une oportunitât che forsit o vin pierdude masse voltis ta chescj agns? Trope economie no puedie zirâ se in ogni continent i furlans a decidin di metisi in rêt e fâsi di tramit par relatîfs marcjâts economics, deventant cussì pont di riferiment par chei altris furlans? Ce isal miôr di dut, se no podê contâ suntune pussibilitât di comunicazion za nestre? Nissun dinee la impuartance di imparâ ancje chês altris lenghis, ancje parcè che chi buine part e cognòs za plui di une lenghe e duncje o pensi che nissun al puedi acusânus di jessi sierâts. Anzit, i studis a confermin che il frut che al nas intun ambient plurilengâl (tal nestri câs, furlan-talian; furlan-castilian; furlan-inglês e vie indevant) al disvilupe abilitâts superiôrs che i dan un vantaç ancje tal imparâ gnovis lenghis (us consei la leture dal libri: “Il cjâf dai furlans” di Franc Fari, neurolinguist furlan di nomee mondiâl). Duncje se o vin za une briscule di plui, parcè no zuiâsile?

La esperience di “La Patrie dal Friûl”
Vignint a la nestre ativitât plui specifiche, lu vin za sperimentât tal concret. Di cuant jo e Dree Venier tal 2006 o sin stâts clamâts di pre Antoni Beline e o vin decidût di metisi al servizi di chest gjornâl storic, nassût tal 1946 e che fin dai prins numars al vignive fûr dut par furlan (ancje in agns che no jerin contribûts pe lenghe furlane), o vin cirût di slargjâ lis colaborazions sedi dal pont di viste anagrafic, tirant dentri zovins e poiantsi su lis tecnologjiis di vuê, sedi dal pont di viste gjeografic. L'impuartant al jere, e al è ancjemò cul diretôr di vuê Dree Valcic, continuâ a fâ un gjornâl par furlan. E la lenghe furlane e je stade il fîl che nus à permetût di tirâ dongje colaborazions di dut il mont: il stes Dree Venier nol vîf in Friûl, ma a Milan; o vin Chiara Segrado che al Cairo, in Egjit, e lavorave te Bancje mondiâl e nus à vût scrit di finance; za di mês o vin a Colonia Caroya Marta Copetti e Claudio Roya che nus tegnin informâts di ce che al sucêt di là dal Ocean; o vin une rubriche su la Austrie, scrite di Janez Erat, un sloven straferît là e inamorât dal furlan; e sul prossim numar di Avost, la federazion dai Fogolârs dal Canadà (cul President Ivano Cargnello e Sonya David) e je stade determinante par podê vê l'onôr di intervistâ Sandra Pizzolitto Pupatello, ministre dal cumierç e dal disvilup economic dal Ontario. Us fâs dome une anticipazion di ce che nus à dit jê (che tra l'altri, e fevele par inglês e benon par furlan e no dome la nestre lenghe) «Il furlan al pues deventâ la “lenghe francje” parcè che o pensi che cuant che i Furlans si cjatin pal mont, chest al è za un pas in plui: il fat di vê lis stessis origjins al permet subit di jessi in sintonie. E al jude ancje i rapuarts economics parcè che tu ti sintis za de stesse famee». E se o zontìn a cheste frase ce che mi à dit subit dopo, che stant la crisi dai USA a stan cirint gnûfs marcjâts e che «Il Friûl al podarès jessi la puarte de Europe pal Canadà», si capìs subit l'aspiet propit PRATIC e ECONOMIC che la afermazion di apartignince di Sandra Pizzolitto Pupatello si tire daûr, e di ce sorte di ocasions che o podìn vê devant. Isal il câs di pierdi un caric di briscule di cheste sorte?
E ducj chescj rapuarts, che a son dome une cerce di dute la ativitât e i contats che o vin vût in chescj passe 3 agns di lavôr, a son nassûts in gracie dal fat che o fevelìn e o scrivìn par furlan. Us dîs chest no cun chê di fâ viodi “ce brâfs che o sin”, ma par dâ un esempli concret di ce potenzialitâts che il nestri popul al à. Noaltris o vin fat zirâ informazion, parcè no podaressial chest il principi chel che al fâs zirâ ancje chei altris rapuarts economics tra i furlans ator pal mont?

La nature nus insegne
Baste cjalâsi ator par vê i insegnaments che ti coventin te vite.
Une plante cence la lidrîs e cence la tiere par supâ ce che i covente par vivi, si secje e e mûr.
Une plante cuntune lidrîs debile, al prin soflâ di burlaç e cole, si secje e e mûr.
Dome chê plante che e à lidrîs profondis, e rive no dome a butâ e a tignî bot ai burlaçs, ma ancje e slargje simpri di plui i siei ramaçs, dant fueis e pomis.
Chei ramaçs, chês fueis e chês pomis che a àn lidrîs in Friûl e che a supin chê linfe che o podìn clamâ lenghe furlane, o sês ducj voaltris, o sin ducj noaltris, Furlans tal mont.

Tancj auguris, pro Majano

2010-07-24T01:05:00.000+02:00

Al tache vuê il Festival di Maian, numar 50.
Fracait chi par lei il program.

Furlans sul Espresso

2010-07-19T00:28:00.008+02:00

Tra lis tantis acusis gratuidis e atacs fats par di bant che nus à usâts a lei l'Espresso (grup di Repubblica, ma ancje di Piccolo e Messaggero Veneto), chest mi somee un articul simpatic e ben scrit: "Felici? No, Friulani" (fracait il link) di Natascia Gargano.
Par nuie banâl ni scontât.
Ancje jo o ai viodût il promo de serie TV "Felici, ma furlans" su Internet (al è ancje ca sot), e al pues plasê o no plasê, ma i autôrs (te foto, un dai protagoniscj) a declarin: "Un viaggio tra figure di pasoliniana memoria, "il film gioca costruendo stereotipi - racconta l'autore - quelli tipici del teatro comico della tradizione, per poi smontarli, accompagnando lo spettatore nel percorso che i personaggi compiono puntata dopo puntata".
Mi plasarès viodi chês altris pontadis par capî se l'intent al è mantignût. E se a rivin, mi somee une biele robe lavorâ par "smontâ i stereotips dal furlan". E e sarès une biele novitât.
La satire e je une materie dificil di fâ (e di capî) e se a son bogns di fâle, secont me a saressin une biele novitât intun panorame furlan che al riscje simpri di cjapâsi masse sul seri.
O preferìs un progjet inovatîf e che al ponte a une maniere gnove di fâ television che no dutis chês declarazions che si son letis in ocasion de visite ancje dal President de Republiche: i furlans che ducj si ricuardin come "saltsonescjlavoradôrs" che a fasevin la code par paiâ lis tassis ancje in timp dal taramot, o che a àn servide la "patrie" italie jemplants cimitieris e ossaris cun zovins mandâts a murî par une vuere (e ancje dôs) che lôr no crôt che a vessin volude, o lis laudis pe Universitât dal Friûl che ducj a disin che e je tra lis miôr (ancje plui di Triest par ciertis robis, massime su la gjestion de spese e no dome pe didatiche) ma che a la fin e à di sierâ i cors parcè che Rome no i mande avonde risorsis o, infin, parcè che o sin i donadôrs di sanc e di orghis plui brâfs di italie. Sincerementri mi da plui fastidi sintî a dî "Ce brâfs che a son i Furlans", tant par dânus un contentin e dopo continuâ "come niente fosse" a metinuse ta chel puest. O sai bessôl che o sin miôr di tantis bandis di cheste spes ridicule Italie. E par chest o pretint che nus vegni dât il nestri: almancul ce che nus spietarès di dirit. Invezit prin une "pacca sulla spalla" e dopo une pidade dulà che "nol trai soreli" (cuasi simpri). Ma chest al è un discors un tic lunc par frontâlu dome intun post.

Stin a viodi ce che a rivaran a cumbinâ.

Felici Ma Furlans from UOLLI on Vimeo.

Usgnot a Aquilee

2010-07-18T10:47:00.002+02:00

Dree Valcic, vuê sul Gazzettino al scrîf cussì.

A son tradizions e apontaments che a segnin la vite dai popui e la manifestazion di usgnot a Aquilee e rapresente un pont fer pal popul furlan.
Di fat, in basiliche aes 6 di sere si cjataran chei che puntuâi a cjapin sù l'invît di Glesie Furlane par ricuardâ i protetôrs di chestis tieris: Ermacure e Furtunât. La celebrazion uficiâl cu la presince dai vescui de regjon e des autoritâts e je za stade, ma chê volude dai predis furlans, erêts dal spirt e de volontât di pre Marchet, Placerean e Beline e à un altri significât.
Definîle alternative al sarès sbaliât e ridutîf. Conotâle cul tiermin “vere”, mi somee plui adat, parcè che al definìs un rapuart di amôr e sperance pal avignî dal Friûl.
Une messe che e ribadìs il sens cristian de solidarietât pai ultins, ma ancje la ferme determinazion a difindi i dirits des minorancis.
In non di chei valôrs universâi che a nasserin te glesie mari di Aquilee, che si faresin sostance tal timp dal Patriarcjât e che vuê, cun fadie, e assediâts di tancj gnûfs “Atile”, a rivivin tra chei che no sbassin lis bandieris dal autonomisim.

Tiere furlane si presente ai Agnui

2010-07-17T14:39:00.004+02:00

Al sarà presentât in maniere uficiâl ai 23 di Lui aes 6 di sere, li dal teatri tende di Dieç (frache il link) (fraz. di Tumieç, UD) il cuint numar di Tiere Furlane, periodic di culture e teritori de regjon autonome Friûl – Vignesie Julie (frache il link) e rivade aromai al secont an di ativitât.
A presentaran Tiere Furlane (frache il link) n. 5 pre Alessio Geretti dal Comitât di Sant Florian (frache il link) ; Gilberto Ganzer, diretôr dai Museus Civics di Pordenon; Enos Costantini, curadôr editoriâl de riviste, Claudio Violino, assessôr regjonâl aes risorsis agriculis, naturâls e forestâts (frache il link) e il President de Regjon (frache il link) Renzo Tondo (frache il link)
Il progjet, che o ai il plasê di direzi e volût cun fuarce dall’assessorât a la agricolture, al à come obietîf «Valorizâ e fâ cognossi il patrimoni culturâl de regjon interie midiant de riscuvierte dal teritori» come che al sclarìs l’assessôr Violino (frache il link).
E propit par mantignî il leam cul teritori, a continuin lis presentazions itinerantis e chest ultin numar al sarà presentât a Dieç (frache il link), sugjestive suaze e sede dal impuartant event espositîf chest an dedicât ai Agnui (frache il link)«La sielte e je colade su chest paîs de Cjargne, piçul tes dimensions, ma grant par dut ce che il Comitât di Sant Florian (frache il link) al fâs ta chescj agns» al declare l’assessôr Violino (frache il link)«E po, “la Cjargne e je la mari dal Friûl”: Tiere Furlane (frache il link) no podeve no jessi presentade ancje chi e la ocasion nus ven dai contignûts di chest numar che al fevele propit de tradizion de latarie e dai mulins di Dieç (frache il link)».
Sul numar 5 di Tiere Furlane (frache il link) si fevele di fat di chescj elements, ma ancje di vuardi e de tradizion de bire in Friûl. I “personaçs” presints su cheste edizion a son Eugenio Caneva fondadôr de prime latarie sociâl cjargnele di Culino (1880) e Giovanni Bolle un grant sienziât a servizi de agricolture gurizane. Cun di plui une puntuâl ricercje storiche e mostre lis claris origjins de “Jote”, nassude propit in Cjargne par po jessi espuartade diventant embleme gastronomic di une grande citât. Il numar si siere cuntune sugjestive panoramiche fotografiche dedicade a Grau storiche: no dome “tiere” duncje, ma ancje “lagune furlane”.
Atenzion a lis lidrîs, ma il voli ben pontât sul avignî: al continue l’impegn ancje pai furlans tal mont che a puedin lei midiant de Rêt i contignûts di Tiere Furlane (frache il link). A son costants i inzornaments su internet: i aretrâts (i prins numars a son finîts) a son e a saran consultabii on line dal sît de regjon www.regione.fvg.it/tierefurlane (frache il link) e il profîl dal popolâr social network “Facebook” (frache il link) al è aromai rivât a passe 500 adesions.
“Tiere Furlane” (frache il link) e je ancje une trasmission cuindisinâl in onde ogni vinars des 11.00 e in repliche sabide aes 5 dopomisdì e domenie aes 9 e mieze su lis frecuencis di Radio Onde Furlane (frache il link) (Udin, Gurize, Basse Furlane e Friûl di Mieç: 90.00 mhz FM; Cjargne: 90.20 mhz FM; Colonia Caroya Argjentine 96.60 Mhz FM) o su www.ondefurlane.eu (frache il link) in streaming.

Glesie Furlane e La Patrie dal Friûl insiemit a Aquilee

2010-07-16T06:45:00.000+02:00

Come ogni an, tal non dai Sants Ermacure e Furtunât, Glesie Furlane e La Patrie dal Friûl si cjatin a Aquilee par celebrâ i patrons dal Friûl.
La messe par furlan e sarà celebrade te Basiliche Mari a lis 6 di sere di domenie ai 18 di Lui. Dopo ducj i partecipants si trasferiran alì dal ristorant “ai Patriarchi” par continuâ la serade in compagnie cu la presentazion dal ultin numar de riviste in lenghe furlane “La Patrie dal Friûl”.
In cuviertine Tania Morandini, diretore di orchestre internazionâl, furlane di Vergnà che e conte la sô esperience. Di une Morandini a un altri, Giuseppe: il gnûf president de bancje ex-Crup, che cumò si clame CassarisparioFVG, a proposit de lenghe furlane al declare «Fevelâ par furlan cu la nestre int o pensi che e sedi la miôr maniere par fâsi sintî dongje».
Dilunc dal gjornâl si fevele ancje de situazion no masse buine pal furlan “di là da la aghe” e de visite in regjon de delegazion dal Comitât consultîf de Convenzion-cuadri pe protezion des minorancis nazionâls dal Consei di Europe. Tes pagjinis “internazionâls” invezit si torne a fevelâ di musiche dilà dai confins, in Slovenie e in Austrie. Di no pierdi i conseis pai libris par furlan di puartâ in vacance.
Tal archivi dal sît http://www.blogger.com/www.lapatriedalfriul.org si puedin lei ducj i contignûts de riviste fint al mês passât. Si ricuarde che “La Patrie dal Friûl” si le cjate tes miôr librariis e ediculis o si ricêf a cjase par abonament.

Cemût puedio pensâ?

2010-07-15T19:51:00.004+02:00

Jo o soi nassût dal 1949. Pocjis oris dopo che o jeri vignût ta chest mont, mê mari, 21 agns, par cause di complicazions e je mancjade.
Prin di murî i à dit a gno pari "Sêstu content che ti ai fat un fi mascjo?" e po dopo e à sierât i voi par simpri.
Cemût puedio pensâ che la mê lenghe e je cence valôr se lis ultimis peraulis che e à dit mê mari prin di murî a son stadis par furlan?

[sintude par Radio, www.ondefurlane.eu, vuê dopomisdì]

nb: te foto la cuviertine da La Patrie dal Friûl, Mai 2008, speciâl "La Mame"

Sants Ermacure e Furtunâts, patrons dal Friûl

2010-07-12T00:01:00.000+02:00

Sù, fâsti dongje, int di Sant Ermacure,
al to pastor e a Fortunât rivolziti,
ai testemonis, che tu sâs in glorie,
parcè che pe lôr fede a àn dât la vite.

Achì passarin, come vint in furie,
popui ruviei di brame e di tristerie,
ma tu âs viodût te dì de gran miserie,
il segno che il Signôr no ti bandone.

Gjolt, Aquilee, Diu ti da la glorie,
che, fruçonâts i mûrs de tô supierbie,
cence des armis cjantistu vitorie
pai tiei nemîs clamâts a jessi fradis!

Chi l'om furlan e chel da la Slovenie
e il todesc a cirin amicizie
e, tant diviers, a cjatin une patrie,
che e à tai martars dute la sô fuarce.

Chi la semence de Furlane Glesie,
di Redenzion e puartave lis primiziis
e tal martiri si viestì di glorie,
sfidant a muart la prepotence umane.

Laudât Idiu, Trinitât santissime,
Pari, cul Fi, a pâr cul unic Spiritu,
che al sielç i debui, cun dissen di gracie,
par palesâ tal mont la sô potence. Amen.

Presentazion de Patrie a Marian

2010-06-30T00:04:00.001+02:00

Us spietìn vuê a Marian pe presentazion de Patrie di Jugn: (cuviertine dedicade a Dino Zoff): o sarìn il Dreetôr Valcic e jo, ospits de sindic Cristina Visintin. Apontament te sale dal consei comunâl in place dal municipi aes 8 e mieze di sere.

Dut in waka waka

2010-06-27T14:18:00.002+02:00

Va ben, lu amet, o ai fat une mancjance: no ai inmò fevelât des partidis dai mondiâi e alore o recuperi cuntun video che mi à fat ribaltâ dal ridi! E intant, in onôr dai miei amîs di Colonia Caroya jo o tifi Argjentine (ancje se Maradona no mi è propit simpatic).

Documentari a Maian

2010-06-24T18:41:00.000+02:00

Sabide ai 26 di Jugn, li dal Auditorium Comunâl di Maian aes 20.45 cun jentrade libare, al vignarà presentât il film documentari Cjampanes realizât dai "Pignots de Companie Instabil di Artigne".
Nassude cuasi par câs tal 1991, la companie teatrâl e ricêf in dì di vuê larcs e entusiastics consens in tantis localitâts de regjon cui siei spetacui che a tindin a fâ rivivi la autenticitât dal vivi furlan, libar dai condizionaments imponûts de culture moderne.
Il film al nas dal desideri di Anna Maria De Monte, autore dai tescj teatrâi e ancje atore de companie, di realizâ un cd audio che al contignìs une sô conte e il sun des cjampanis di mandâ a un parint in sud Americhe. Al scomençà cussì la stesure de senegjature e tal stes timp a partirin lis richiestis di contribût a istituzions publichis e privadis che in gracie dal lôr interessament a àn permetût la realizazion dal progjet.
Cjampanes al è un film documentari che al conte, traviers une letare, i ricuarts di Anna Maria De Monte. Il fîl dal discors a son lis cjampanis che a vuidin il spetatôr te storie che e marcje i ultins cincuante agns de vite di paîs in Friûl. Une volte, il sun des cjampanis al segnave la vite di une comunitât, il nassi e il murî de zornade, la ore dal gustâ e de preiere, l'ultin viaç dal om in chest mont. Si che duncje il film documentari si môf sul fîl dai ricuarts fasint rivivi moments significatîfs di vite di un passât no ancjemò lontan cuant che i ritmis di ogni dì a lassavin spazi al incuintri, al dialic, ae condivision. Lis imagjinis a mostrin la zone culinâr, ma a puedin dal sigûr rapresentâ buine part de regjon. Tantis fameis a podaran cussì ricognossisi par vie che a àn vivût e a vivin situazions compagnis a chês descritis tal film. Cun di plui, la sielte di limitâ i dialics e je stade fate par lassâ al spetatôr la pussibilitât di identificâsi cu la storie contade.
Cun chest lavôr, basât sul test di Anna Maria De Monte, "I Pignots" no intindin peâsi ae nostalgjie pal passât, ma trasmeti un insegnament e un messaç di sperance indreçât soredut ai zovins ricuardantjur che i valôrs no van daûr lis modis e no si pierdin tal timp.
Tal avignî, Cjampanes al vignarà distribuît ancje tal forest midiant lis associazions dai emigrants. Infratant si sta valutant la partecipazion a concors nazionâi dedeâts al setôr e ancje a une dopleadure in lenghe inglese che e permetarès une plui grande difusion tal forest e ancje la pussibilitât di partecipâ a concors internazionâi.
Eventuâls ufiertis libaris cjapadis sù vie pe serade a saran dopradis par comprâ lis cjampanis pal gnûf cjampanili di Maian.

Un vêr campion

2010-06-23T22:37:00.002+02:00

No us dîs ce emozion che o ai vude a intervistâ Dino Zoff: su la Patrie dal Friûl di chest mês o fevelìn di balon e a mi mi à tocjât l'onôr di fevelâ cul mitic portieron di Marian.
Par lei la interviste: fracait chi.

Mandi Emilio Crozzolo

2010-06-21T22:03:00.002+02:00

Mi àn visât che al è mancjât Emilio Crozzolo, president de Societât Furlane di Buenos Aires. Jo no lu cognossevi di persone, ma cuant che tal 2007 (che in chel an la Societât e à fat 80 agns) o vin proponude la FriûlTV nus veve mandât un messaç video che us torni a proponi. Jo lu ricuardarai cussì.
Un mandi di cûr a ducj i furlans di Buenos Aires e a la famee di Emilio Crozzolo in chest moment dificil.

A Parîs

2010-06-14T06:57:00.000+02:00

La Cjacarade di Valcic sul Gazzettino di vuê

2010-06-13T10:48:00.003+02:00

Dree Valcic (te foto) al dediche vuê la sô rubriche "La Cjacarade" a la azion (o miôr: la no-azion) dal Arcivescul Mazzocato su la cuistion furlane. Il titul mi somee che al dîs za tant...

Chel «mandi» che l'arcivescul nol rinove
di Dree Valcic
Di cuant che al è rivât a Udin, bonsignôr Andrea Bruno Mazzocato, arcivescul, come segnâl di comprension pe gnove realtât che al cjapave la vuide spirtuâl, si è limitât fint cumò a un debil e cuasi obleât “mandi” al la fin dal so discors di investidure. Di chê dì, ai 18 di Otubar dal 2009, al è passât avonde timp par capî lis dinamichis di chel Friûl «che no cognòs» come che al veve dit ta chê volte.
Par tacâ chel percors al à sielt lis sedis dal disasi e de soference: la preson e il Piccolo Cottolengo, che a mostravin lis carateristichis che al intindeve dâ al so mandât. Pocje politiche, plui magjisteri. La incarghe dade a Genero in sostituzion di Gherbezza tal puest di vicjari gjenerâl, mi somee che e confermi la sensazion.
No che chest ca al fos un politic di nature, ma al è stât lui il cleric che al à partecipât a ogni iniziative, cunvigne, assemblee che e domandàs la presince de Glesie dal Friûl dongje dai problemis leâts al disvilup di cheste tiere. Comprindûts chei de autonomie. Un argoment che Mazzocatp al evite pulît, come che no si è mai venturât sui ritarts romans pe aprovazion dal “Messâl par furlan”. Forsit al à decidût che un “mandi” al baste e al vanze.

Rispiet

2010-06-10T00:02:00.008+02:00

Al è un pôc che al mancje un post gnûf… ma disìn che mi soi cjapât un moment par lei alc di plui e scrivi alc di mancul. Parcè?
Parcè che cuant che tu ti cjatis pes mans pagjinis come chês scritis di Amato De Monte e la sô femine Cinzia Gori, tu ti rindis cont di trop che a pesin lis lôr peraulis e trop invezit che a son cuasi di bant dutis chês altris, comprindudis lis tôs.
“Gli ultimi giorni di Eluana” al è un libri che o ai let dut di un flât, cun intensitât e atenzion. Parcè che o volevi capî. O ai simpri cirût di no lassâmi tirâ te confusion di chei dîs, di no cedi a la tentazion de gare a cui che al berghelave di plui par vê reson. E o soi content di no jessi sbrissât, ancje grazie al grant esempli che mi à dât une altre persone impuartante.
Cui miôr di lui che al à cjapade une responsabilitât cussì grande podevial descrivi chei fats? Sigûr che Beppino Englaro al à scrit ancje lui un libri, articui, si è batût par puartâ indevant cheste bataie. Ma cuant che al è jessût chest libri o ai sintude une fuarce strane che mi à dit a colp che o vevi di cjolilu.
E lei lis pagjinis scritis dal miedi De Monte, un riferiment a nivel di anestesie, une specializazion fondamentâl de medisine, mi à fat vignî i sgrisui. Cui che lis à scritis nol veve dome une opinion, ma ancje la competence necessarie par tratâ un câs come chel di Eluana Englaro. E propit leint chestis pagjinis o ai vude la sensazion clare che Amato De Monte al à zontât a la sô preparazion sientifiche ancje chê part di umanitât che e covente in situazions cussì. O ai capît che par lui no si tratave di un “câs Englaro”, ma dal dolôr di une famee che e veve dibisugne di delicatece e rispiet. Robe che invezit tancj no àn fat. Ta chês zornadis ai sintude tante confusion, ma o ai vude la impression che la plui part no à vude chê di metisi in discussion, cirint magari di capî ce che chê famee e à passât.
In tancj a jerin cussì preocupâts di fâ savê ce che al jere miôr fâ, cence magari nancje vê viodude la situazion cui lôr voi, che forsit no àn cirût (o no àn vude voie) di imagjinâ ce che un pari e une mari a puedin sintî denant di une disgracie cussì grande come viodi une fie ferme intun jet par cussì tant timp dopo di un incident, savint cemût che le pensave cheste fie. E claris a vegnin fûr lis contradizions di un sisteme che si è dimostrât une vore impreparât a frontâ tematichis cussì grandis.
Par furtune che invezit a son personis che impreparadis no son. Amato De Monte mi à fat rifleti e lu ringrazii. Lu ringrazii pe sô professionalitât di miedi al servizi di cui che al à bisugne, ma ancje pe umanitât di om che e ven fûr di chest libri. Rispiet de persone, rispiet dal dolôr dai cjârs, rispiet de justizie… sì parcè che forsit, tal grant davoi, plui di cualchidun si è dismenteât ancje dal fat che ce che al è stât fat al jere l’adempiment di un at in non de leç uficiâl in rispiet di une volontât difindude cun trasparence in ducj chescj agns.
Jo no sai cemût che mi sarès compuartât intune situazion cussì... o ai za dit che si varès di jessi li par podê fevelâ, ma dal sigûr o varès domandât di vê la gracie di podê confrontâmi cuntune persone come lui, che mi à dimostrât di cognossi pardabon il significât de peraule “rispiet”.

PS: us consei di lei il so libri, ma ancje di lâ a viodi il sît http://www.pereluana.it/, di lei chest intervent di pre Tonin Cjapielâr che us vevi za segnalât e di scoltâ cheste cjançon di Aldo Rossi "Pari".

Mandi Easy Rider

2010-05-30T11:27:00.003+02:00

Par me che o ai une moto "Easy Rider" al è un film cult e Dennis Hopper che lu à diret tal 1969 al è deventât une sorte di icone cu lis sôs corsis dongje Capitan America.
Cumò al continuarà il so viaç su lis highway dal cîl.
Mandi "Billy"!

Sunsator 2 a Tavagnà

2010-05-26T23:55:00.000+02:00

Cun grant plasê us segnali cheste iniziative dal Comun di Tavagnà che mi rive dal Sportel pe lenghe furlane: vinars ai 28 di Mai aes 8 e mieze, al sarà presentât il DVD di Sunsator 2, video documentari on the road su la culture furlane realizât di Massimo Garlatti-Costa.

Par savênt di plui, fracait chi.

Une biele robe di viodi e di fâ cognossi!

La nassite de peraule Motâr

2010-05-22T11:01:00.004+02:00

Il gno amì Moreno (te foto cun me), deus ex machina (o saressial miôr dî: deus ex moto?...) pari de Bikerfest, mi à contât cemût che e je nassude la peraule "Motâr".
Sul sît de Bikerfest e je dute la spiegazion:

"Cualchi volte si domandisi cui e cemût che al à dât vite a alc che prime nol jere. Al vâl ancje pes peraulis gnovis, che no simpri a àn di jessi inglesisims, anzit. Us conti cemût che e je nassude la peraule “Motârs”, intune ostarie dal Friûl culinâr, une sere di un cuart di secul indaûr.
Al jere Avrîl dal 1986, cuant che un trop di zovins amîs motocicliscj furlans “a american vie” (si jere definîts cussì ta chê volte) a volevin fondâ un gnûf club e creâ un gnûf steme di meti sui lôr gjilè di moto. Il club che a jerin daûr a molâ si clamave Free Eagles, la sede dai incuintris e jere la ostarie di Sant Liseu a Maian. Ta chest gjenar di club si voleve ri-formâ, simbui e nons plui di mode tal nord Europe e in Americhe a jerin menaçôs e agressîfs e no vevin il consens di ducj i presints ta chê enesime riunion dal vinars di sere te gnove sede: il bar “Le Vecchie Carceri” di Sant Denêl. I presints, di oris e di dîs, a cirivin di gnûf un non e un simbul che ju rapresentàs, par jessi identificâts miôr in viaç, massime tal forest, in Gjermanie.
Cun me, a jerin Francesco e Flavio di Cjistierne, Mauro di Sant Tomâs e Michele di Cjistierne (che magari cussì no, nus àn lassâts), Claudio e Franco di Susans, Massimo di Codroip, Innocente di Sant Salvadôr, Paolo di Pordenon e infin Jerry di Rivis Darcjan, che, a un biel moment, strac e sustât al salte fûr: “clamìnsi Motârs e che e sedi finide”! Si sin cjalâts in muse e o vin capît che, se cheste peraule par inglês si voltave come “Bikers”, par spagnûl e jere però “Moteros” e par francês “Motards”; il leam al jere e ancje il simbul al jere facil di cjatâ: la aquile, il steme araldic dal nestri Friûl. Nissune ostentazion, severitât o tristerie dentri, ma dome serietât, autonomie e voie di fâ cognossi un moviment Biker seri ancje in Nord Italie: e nascevi i Motârs ma ancje une peraule gnove. Al jere ideâl par cui che al cirive un simbul no banâl ma di caratar, che ju caraterizàs tai viaçs luncs tal forest e tal nord Europe dulà che a vevin une vore di amîs. Al jere gjeniâl te sô semplicitât, al plaseve a ducj e la votazion e fo un piçul plebissît."...

Par savê il rest, lait a lei fracant chi

AC/DC a Udin

2010-05-20T00:16:00.003+02:00

Adrenaline pure, potence fûr di misure! Al è dificil no doprâ chestis peraulis par comentâ ce che a àn viodût chei passe 47.000 di lôr che a àn jemplât il stadi Friûl (cence contâ i miârs che a jerin difûr).
Di cuant che il “rock ‘n roll train” al è rivât te stazion di Udin, Angus & Co a àn discjamât sul Friûl une slavinade di notis e energjie che e à leteralmentri ipnotizât par dôs oris buinis il public, cjapât dentri intun incredibil rituâl rock! Un tripudi che al à fat omaç a chest leiendarie rock band australiane cun lidrîs scozesis, jentrade dopo mai te storie de musiche mondiâl.
Un scuelarut ripetent, se inmò al ves bisugne di dimostrâ alc, al à fat viodi e sintî ce che 2 mans a puedin gjenerâ cun 6 cuardis e un amplificadôr… a pat che tu ti clamedis Angus Young. Une corse, a pas de ocje e cu la benedizion dal mestri Chuck Berry, dilunc dai passe 35 agns de band che e continue a inflamâ lis plateis di dut il mont cu la semplicitât e la fuarce che dome il vêr rock al pues regalâ. E dongje dai virtuosisims pirotecnics di Angus, compagnât de seconde ghitare di Young fradi, dute la fuarce de poderose session ritmiche tignude dal bas di Cliff Williams e de batarie di Phill Rudd (che al à fat i agns sul palc), adun cu la ruspiositât de vôs di Brian "cjartediveri" Johnson, intant che sul wallvideo a corin lis imagjinis dal conciert e dai cartoon-video-game de band par un spetacul tal spetacul!
Une vere "war machine" cheste band che e sa discjamâ un "high voltage" che al fâs lâ fûr di cjâf lis 3 gjenerazions di fans a sun des scampanotadis des "hells bells" o dai assolos di Angus, esplosîfs come il "TNT".
I Ac/Dc a àn saludât ducj rignuvint l’invît a la prossime tape dal lôr Black Ice Tour che e clamarà inmò une volte un public oceanic cence limits di anagrafe... e parchegjade sul palc la locomotive, a continuaran il lôr viaç te leiende dal rock, cjapant, e nol podarès no jessi cussì, la uniche autostrade disponibile: la mitiche "Highway to hell"!
Nol reste che dî: "let there be rock"!

Par viodi cualchi foto dal conciert: fracait chi ma ancje chi.

La scjalute dal conciert
ROCK ‘N ROLL TRAIN
HELL AIN’T A BAD PLACE TO BE
BACK IN BLACK
BIG JACK
DIRTY DEEDS
SHOT DOWN IN FLAMES
THUNDERSTRUCK
BLACK ICE
THE JACK
HELLS BELLS
SHOOT TO THRILL
WAR MACHINE
HIGH VOLTAGE
YOU SHOOK ME ALL NIGHT LONG
TNT
WHOLE LOTTA ROSIE
LET THERE BE ROCK
HIGHWAY TO HELL
FOR THOSE ABOUT TO ROCK

Veju veju

2010-05-14T19:09:00.000+02:00

Il libri su Eluana Englaro

2010-05-09T23:15:00.002+02:00

O soi lât a comprâ il libri di Amato De Monte che o viodês te foto l'invît pe presentazion di sabide passade: Gli ultimi giorni di Eluana.

O pensi che in tancj, masse, si son permetûts di fevelâ, cuasi simpri cence nancje cognossi in prime persone il câs, la famee, cui che al è stât dongje di Eluana Englaro. In câs come chescj o pensi che par dâ une opinion (sedi a pro sedi contrarie) si varès di fevelâ dome se si è cjapâts dentri te stessis condizions che al à vivût Beppino Englaro cu la sô famee. E si varès di fâlu cun massim rispiet e discrezion.

O ai vude maniere di sdongjâ il dot. Amato De Monte cualchi mês dopo di chel Fevrâr 2009 e mi soi permetût di fevelâi cualchi secont par dâi la mê solidarietât pe maniere che al è stât (mal)tratât.

Par chest mi leiarai tal cidin chest libri e us segnali chest link cuntune riflession di pre Tonin su la Patrie dal an passât: fracait chi.

Par chei che ta chê sere a àn sierât i voi par simpri

2010-05-06T00:01:00.001+02:00

Recuie eterne, Signôr, pai nestris muarts.
Impie par lôr il sflandôr de tô lûs
par in eterno. Amen

Tiere Furlane 4

2010-05-05T21:49:00.004+02:00

Di cualchi mês o ai il grant plasê di jessi il diretôr di Tiere Furlane, une riviste publicade de regjon: o scuen ringraziâ sedi il President sedi l'Assessôr Violino par cheste oportunitât. Cheste esperience mi sta dant tante sodisfazion parcè che o ai la furtune di vê colaboradôrs une vore preparâts, in particolâr Enos Costantini che al à une culture infinide e une grande competence suntune vore di argoments.
Doman, ai 6 di Mai aes 6 di sere o presentarìn il numar 4 a Villa Russiz, a Caprive in provincie di Gurize, ven a stâi, te bande orientâl dal Friûl.
Par savênt di plui, us segnali il link www.regione.fvg.it/tierefurlane, ma ancje il grup di Facebook che o vin screât di pôc e il link al comunicât stampe.

Auguris al gno nevodut e a mê sûr

2010-04-30T00:27:00.000+02:00

Juste un an indaûr o deventavi barbe di Gioele, nassût te stesse dì di sô mari, ven a dî mê sûr. Augurons!!

La braure dal Barça

2010-04-28T17:56:00.002+02:00

Vuê e je la zornade de semifinâl di cope tra Barça e Inter. No fâs pronostics, ma o segnali la iniziative dal Barcelone che al à fat une biele maiute pe partide e... cuale lenghe aial doprât pal messaç? La sô lenghe: il catalan!
Par savênt di plui, fracait chi.

3 agns che nus à lassâts

2010-04-23T00:01:00.001+02:00

Trê agns indaûr, come vuê, pre Antoni al lassave cheste esistence par lâ te lûs eterne. Usgnot a Visepente e domenie a Vençon al sarà ricuardât. Ma jo lu sint simpri presint, come se no nus ves mai lassâts, parcè che la semence e à di murî par dâ gnove vite, e i siei insegnaments a restin e a restaran, come che al à scrit tal so cumiât (fracait chi par savênt di plui).

"Vivêt a lunc, vivêt cun dignitât, vivêt di furlans. Vivêt pal vuestri ben, vivêt pal ben de glesie, vivêt pal ben dal nestri Friûl. Cence fâ i prepotents e cence vendisi, lavorant e pratindint, galantoms cun Diu e cul mont. Intun timp cussì birbant e galiot, us racomandi di no pierdi ni la memorie ni la tramontane ni la voe di fâ. Se no rivais a gambiâ il mont, cirît che il mont no us gambii vualtris. Se no rivais a salvâlu, metêtle dute par che no us sassini. Che al puedi benedîus Diu e la storie, come che cumò us benedis pe ultime volte e cun dut il cûr il vuestri puar predi e fradi".

Odissee, biel event

2010-04-21T01:30:00.005+02:00

O ai stât a la prime de Odissee, opare teatrâl cjapade de traduzion dal classic omeric di Sandri Carrozzo e Pierluigi Visintin. Nissun dai doi al à podût jessi, ma ju ai sintûts ducj i doi presints.
No soi un espert e duncje no ai pretesis… mi limiti a regjistrâ lis mês impressions a cjalt.
Il spetacul mi à plasût e mi à convint ancje la sielte di fâ recitâ i personaçs ancje tes varietâts de lenghe furlane a seconde des zonis di provenience. E cui si freial se o vin scugnût ancje becâsi cualchi batude in triestin (i triscj Proci che a smicjin Penelope e il ream di Ulìs; lis Sirenis tentadoris che dopo vê cirût di striâ Odisseu cjantant in maniere maraveose par furlan, dopo si lamentin par triestin)… jo o varès fat vulintîr di mancul di cheste sielte, ma amen...
O ai viodût moments une vore profonts (l’episodi di Polifem, la stesse sene des Sirenis tal prin an) cuntune fuarce emotive inmò plui coinvolzent tal secont at, che mi à plasût tant di plui (une piçule critiche tal prin at che ogni tant al sbrissave in maniere pericolose un tic masse tal ridicul…).
Mi à fat vignî i sgrisui pe emozion cuant che o ai viodude la Novella Cantarutti lei un pas de traduzion: biele cheste sielte di inserî tocs di leture, pardabon emozionant chest omaç a la grande scritore mancjade che nol è tant.
O soi lât a cjase content di vê viodût un biel spetacul ma ancje di jessi stât testimoni di un moment impuartant pal Friûl: il teatron di Udin al à dât acet a une opare in lenghe furlane che e à viodût impegnadis une vore di personis.
E cui che nol jere si è pierdût un event.
Mi auguri che pal avignî si continui, magari evitant di sierâ lis oparis par furlan intun calendari specific, ma miscliçant lis lenghis, insiemit, tu calendari unic di dute la stagjon.
Compliments a cui che al à volût cheste iniziative e al à fat in maniere che e deventi realtât.

Odissee

2010-04-19T20:50:00.003+02:00

O sin rivâts a la zornade de prime tant spietade: martars ai 20 di Avrîl aes 9 mancul un cuart di sere e larà in sene al teatri Zuan di Udin la "Odissee", traduzion par furlan dal innomenât test omeric voltât par furlan di Carrozzo e Visintin.
Ducj i detais dal spetacul ju cjatais chi (fracait il link).

Donait il 5 par 1000 a La Patrie dal Friûl

2010-04-15T01:01:00.002+02:00

Ancje chest an, cu la declarazion dai redits tu puedis dâi une man
a «La Patrie dal Friûl» il mensîl dut in marilenghe dal 1946.
Nol coste nuie: baste meti il numar 01299830305
te casele juste e firmâ la destinazion dal 5 par 1000.
LOTANT PAR UN FRIÛL PLUI FURLAN, TU STÂS MIÔR ANCJE TU
Grazie!

Crocodile

2010-04-14T00:07:00.001+02:00

Un cuc indaûr

2010-04-07T23:53:00.000+02:00

Ve ca une biele serade a Sedean sul teme de storie de nestre tiere: apontament joibe ai 8 di Avrîl aes 20.45 par un viaç storic pardabon interessant cun Venusia Dominici, Massimo Garlatti-Costa e Carli Pup.

Baudelaire

2010-04-06T00:52:00.000+02:00

Content al è cui che, lassâts daûr i ingôs e i dolôrs che a pesin cu la lôr cjame su la esistence fumatose, al pues cun ale vigorose slançâsi viers i cjamps luminôs e serens; cui che i siei pinsîrs, come lodulis, a saetin in libertât viers il cîl de buinore; cui che al svole su la vite e al capìs cun facilitât il lengaç des rosis e des robis mutis.

Charles Baudelaire

Buine Pasche a ducj... o cuasi!

2010-04-04T00:01:00.001+02:00

Fasìnsi i auguris e ancje une ridade!
Buine Pasche!

Friûl viaç te storie

2010-04-03T23:01:00.000+02:00

Chest an par ricuardâ l'aniversari dai 3 di Avrîl, nassite dal Stât Patriarcjâl di Aquilee, fieste nazionâl dal popul furlan, us met chi il video che o ai cjatât su youtube:

Friûl viaç te storie di Massimo Garlatti-Costa

chi sot ancje chês altris parts:

Friûl viaç te storie (part 2)

Friûl viaç te storie (part 3)

Friûl viaç te storie (part 4)

Precisazions

2010-04-02T15:23:00.004+02:00

Une des notiziis che vuê a àn plui spazi sui gjornâi di chi e no dome (al è un articul ancje su Repubblica) e je chê de proteste leghiste in consei regjonâl cuintri lis celebrazions dai 150 agns de Unitât di Italie che a saressin in program tal 2011. No jentri tal mert dal dibatiment, ma o cjali la storie e o provi a resonâ cul gno cjâf. Come furlan o riten plui concret e responsabil cjalâ i numars e lis datis: il jessi "pressapochist" nol è dal nestri popul.
Buine part dal Friûl storic al è colât sot dal Ream di Italie tal 1866 (fracait il link) e duncje chest an che al ven nol è nissun “150m talian” pal nestri teritori, che se mai al è stât concuistât ben 5 agns dopo dal 1861.
Cun di plui, la zone dal confin, e mi riferìs tant par semplificâ a buine part de contee di Gurize, ma no dome, e je deventade taliane dome dopo de fin de prime vuere mondiâl dal 1915-18 (che tancj a celebrin come “Grande Guerra”, ma che in sostance e je stade dome une grande tragjedie che e à fat murî miârs e miârs di zovins).
O sieri lassant fâ fieste il prossin an a cui che al vûl, ma se propit propit nol pues fâ di mancul, i ten a visâlu che chi di noaltris dut câs al fasarà fieste pai 145 agns de colade dal Friûl sot dai Savoia (sì, la famee di chel siôr, cualchidun lu clame princip dismenteantsi che i titui nobiliârs mi somee che a son stâts abolîts, che e à domandât a la Republiche taliane un mega risarciment pai 54 agns di esilii… ma a saressin ancje altris episodis di podê ricuardâ...).
Forsit forsit prime di fâ fieste, al bastarès almancul lei ben i fats de storie e no i proclamis de propagande nazionaliste taliane.
Invezit o torni a ricuardâ che secont me une vere fieste nazionâl furlane e je chê dai 3 di Avrîl, che e ricuarde la nassite dal Stât Patriarcjâl di Aquilee, une forme di guvier nestri nassût tal 1077 e che al cjapave dentri i teritoris fint in Cjadovri e chei che cumò a son Austrie, Slovenie e Istrie.
Buine fieste nazionâl furlane a ducj.

ps: se mai tal 2011 a colin i 500 agns dal riviel contadin de Joibe Grasse dal 1511... chê sì che e je une date impuartante e un aniversari di ricuardâ pal popul furlan che si è ribelât cuintri dai nobii che lu tibiavin.

Fevelant a Colonia Caroya/2

2010-04-01T00:01:00.002+02:00

Vie pe mê permanence a Colonia Caroya o soi stât ospit ancje di une biele iniziative culturâl: il grup "Fevelant".
O vin fat une lungje fevelade sul Friûl, su la storie, su ce che a fasin lôr ta chestis ocasions li che si cjatin e a fasin chest laboratori che al cjape dentri zovins e mancul zovins, cu la bandiere cu la Acuile di Betrant picjade tal mûr e il mate cjalt su la taule (in prin plan)... masse biel il Friûl declinât in forme Argjentine.
Sabide cheste al sarà il tierç incuintri e come che us disevi, a ricuardaran la Fieste dai 3 di Avrîl.

Colonia Caroya e ricuarde il 3 di Avrîl dal 1077

2010-03-30T23:57:00.000+02:00

O ai ricevût cun tant tant plasê chest invît pe ricorence dai 3 di Avrîl.

Ta chescj ultins agns cheste date e ven valorizade e ricuardade di tantis aministrazions, ents e associazions, ma viodi che l'aniversari de nassite dal Stât Patriarcjâl di Aquilee che al nassè tal 1077 al sedi celebrât te comunitât furlane di Colonia Caroya in Argjentine a 13.000 km dal Friûl... beh... a mi mi fâs un grant biel efiet!
Compliments ai amîs di Colonia Caroya.

Fracait su la foto par lei miôr.

Presentazion de Patrie a Lestans

2010-03-26T14:35:00.000+01:00

Usgnot o sin a presentâ la Patrie dal Friûl di Març a Lestans a 20.30 li de Somsi in vicul de Latarie: in cuviertine Mauro Corona che al vierç la riviste cuntune lungje interviste.
Un grazie a la Somsi e a Daniele Martina che a àn organizade la serade. Us spietìn ducj.

ps: fracait chi par lei ancje l'avîs su Facebook