26 settembre 2009

Zornade europeane des lenghis

Come ogni an, ancje jo o ricuardi la zornade europeane des lenghis, comprindudis chês mancul pandudis, par esempli chês che feveladis dai popui cence stât.
Chest apontament al è celebrât dal 2001 cuant che la Europe e à formalizâ "an european pal multilinguisim.

Par savênt di plui, lait a lei chi.

25 settembre 2009

Transumancis politichis

Il consei comunâl di usgnot si è viert cu la leture de letare di dimissions di Giovanna Iesse (te foto).

"Al Sig. Sindaco
e al Consiglio Comunale
del Comune di Majano

Con la presente rassegno le mie dimissioni quale Consigliere Comunale di minoranza eletta nella Lista Civica "La Nuova Majano" poichè il mio attuale impegno politico all'interno del Popolo della Libertà non è più compatibile con il mandato affidatomi al momento delle passate elezioni amministrative dagli elettori, che ringrazio per la fiducia.
Estendo i miei più sentiti ringraziamenti al Segretario Comunale e al personale dell'Ufficio di Segreteria per la cortese collaborazione.
Auguro a Lei e ai colleghi Consiglieri i migliori auguri di buon lavoro".

E cussì Giovanna Iesse e siere la sô presince al consei comunâl. Jo no comenti la decision parcè che ognidun al è libar di gambiâ idee politiche, decidi di passâ di une altre bande e fâ ce che plui si sint. O ricuardi dome che par passe un an la siore Giovanna Iesse e à tignût il pît in dôs scarpis: a Maian e jere conseîr di centriçampe cuant che invezit chi in comuns dongje si dave di fâ par fâ nassi i Circui de libertât, e coreve pal Senât come candidade pal Pdl e vie indevant.
Jo al so puest, prime mi sarès dimetût di conseîr e dopo o varès formalizât altris sieltis. Ma si sa che no si è ducj compagns, par furtune.

23 settembre 2009

150mil voltis grazie

Al pues someâ ripetitîf e autocelebratîf, ma meti un post in ocasion di travuarts simpri plui grancj lu riten il minim.
Un grazie a ducj che che mi lei e in particolâr a chei che si son iscrits al grup su Feisbûc!
O aprofiti ancje par domandâ alc di fâ in concret: ce pensaiso se o organizi alc par cjatâsi di persone?
Un piçul event par stâ insiemit, cence formalitâts... isal fatibil?

Dimissions di Giovanna Iesse

Al jere za di timp che la notizie e zirave, e a la fin a son rivadis.
Tal prossin consei comunâl (fracait chi par lei dut il document) il prin pont interessant tal ordin dal dì al è chest: "Surogazion dal conseîr comunâl siore Giovanna Iesse e verifiche condizions di eleibilitât e compatibilitât dal gnûf conseîr."
Su cheste situazion che e viodeve la stesse persone di une bande conseîr di centriçampe in comun a Maian e candidade dal Pdl pal Senât de Republiche, o ai za scrit, ma se o vês pierdût cualchi pontade, lait a lei chi.

22 settembre 2009

Contile juste

Us segnali chest link: la pagjine internet dal notiziari "Contile juste", un imprest informatîf che finalmentri si cjate ancje on line e no dome par television.
Lait a dâ un cuc...

21 settembre 2009

Ricuarts di Friulidoc

Un grazie al President Fontanini, al Assessôr Mattiussi, a Cristian e Roberto de associazion de "Strade dal Vin".
Ma soredut a Venusia, Federica, Bruno, Daniele e Mauro par dut ce che a àn fat pe associazion Glesie Furlane.

Contile Juste, 18 di Setembar dal 2009 from Provincia di Udine on Vimeo.

17 settembre 2009

La Patrie dal Friûl ospit di Ersa a Friuli Doc

La Patrie dal Friûl (www.lapatriedalfriul.org) i dediche il speciâl dal numar di Setembar a «bire, vin e resentin»: da la tiere dal bon vin ae tiere dal bevi ben. Un viaç in cheste ecelence dal Friûl, cence dismenteâ il probleme dal alcolisim, cuntune interviste al prof. Francesco Piani, diretôr dal Dipartiment des Dipendencis de ASS nr. 4 «Friûl di Mieç». 
Tal rest dal numar si sierin dôs inchiestis, chê su la publicitât par furlan e chê sul libri vert de sanitât, e si ‘nd invie une su la scuele in marilenghe. Dentri des pagjinis de riviste, ancje un toc sui paîs de Alte Valmarecchia passâts des Marchis ae Emilie Romagne, un decision che si spere e puedi rivâ adore ancje par Sapade/Plozen e ancje a altri spaîs dal Friûl storic che a an domandât di tornâ te scune de Patrie. 
Il partî dal campionât di balon al è il rimpin par intervistâ il president de Associazion dai Udinese Club, Michele De Sabata, cun dongje un servizi su la tifoserie in marilenghe tal stadi e tai club stes.Il numar fresc di stampe al sarà presentât vie par Friuli doc a Udin, li dal stand di Ersa - agjenzie regjonâl pal disvilup rurâl (in place "dai grans" - XX di Setembar) vinars ai 18 di Setembar a lis 17.00. Al event  e sarà presinte Cristina Coari, autore dal libri «Bye bye Tocai» che al fronte la vicende de pierdite dal storic non dal tipic vin blanc furlan. Cun di plui si vise che dai 20 di Setembar, sul sît www.lapatriedalfriul.org a saran disponibii i contignûts dal numar di Avost dedicât al «Mâl dal modon». La Patrie dal Friûl si ricêf par abonament o comprante tes miôr ediculis e librariis. 

16 settembre 2009

Contecurte: leturis in marilenghe par une ostarie leterarie itinerante

Une gnove impuartante in salse furlane e inricjìs cheste edizion di “Friuli Doc”: la colaborazion cul blog “Contecurte”, singolâr e divertent contignidôr par mininarative in marilenghe, e crearà la ocasion par trê apontaments pardabon golôs in diviers locâi storics de citât.
La particolaritât di “Contecurte” e je che si trate di une “ostarie leterarie virtuâl” une vore origjinâl, dulà che ognidun al pues lassâ contis curtis letis daspò de comunitât leterarie. La idee che l’Ufici par valorizâ la lenghe furlane dal Comun di Udin al à proponût al staff di “Contecurte” e je chê di calâ te realtât cheste ostarie virtuâl, puartant lis contis letis “dal vîf” tes ostariis storichis de citât. Grazie ae misture di leterature e enogastronomie al nassarà un clime dal sigûr interessant e di no pierdi: ancje parcè che la cualitât des contis sielzudis e je pardabon di rivuart. I apontaments a son fissâts par vinars ai 18 di Setembar aes 18.30 inte ostarie “Sbarco dei Pirati” in vie Bartolini; sabide ai 19 di Setembar aes 20.00 al “Vecchio Stallo” di vie Viola; e domenie ai 20 di Setembar aes 18.30 tal bar “Da Artico” in borc di Poscuel. In dut a saran letis 12contis (e us anticipi che une di chestis seris o sarai ancje jo...), cualchidune scrite di pueste par “Friuli Doc”, ducj a son stât metûts dongje intun librut dât fûr sore nuie in ocasion dai trê apontaments. Il miôr de narative curte in marilenghe us spiete: e tra une degustazion e chê altre nol sarà dificil cjatâ mieze ore par gjoldi dal incjant di une conte par furlan in puescj pardabon speciâi come lis ostariis storichis di Udin. 

Par info. contecurte@gmail.com

15 settembre 2009

Glesie Furlane a Friuli Doc

Obietîf di Glesie furlane (www.glesiefurlane.org) al è chel di cognossi, studiâ, promovi, valorizâ cun ricercjis, publicazions, incuintris dut ce che al rivuarde la dimension religjose te culture furlane cirint tant traviers lis fonts storichis che la realtât contemporanie. Propit par cheste azion che e à chê di puartâ a une dimension plui umane e incjarnade la opare di evanzelizazion, la associazion e à cjapât cun plasê la pussibilitât di partecipâ a la prossime edizion di Friuli Doc (dai 17 ai 20 di Setembar 2009). Une ocasion nassude grazie al intervent de Provincie di Udin, in particolâr par mert dal President Pietro Fontanini e dal Assessôr al Turisim Franco Mattiussi, e cu la colaborazion de associazion “Strada del Vino” di Aquilee.
Tal spazi dedicât si podaran cjatâ i libris editâts di chest grup di cristians e furlans che a cirin di lâ a font des lôr lidrîs culturâls e religjosis, par podê conciliâ in maniere armoniche la proprie fede cu la proprie identitât culturâl. Vuê si fevelarès di "inculturazion de fede" o di "vanzelizazion de culture". Il grup, nassût viers i agns '70, sul sburt dal Concili Vatican II (1962-1965), dai prins pas de Teologjie de liberazion e tal contest politic-culturâl de cussience autonomistiche furlane, al à come figure carismatiche iniziâl il professôr pre Checo Placerean (1920-1986).
L’apontament al è duncje di joibe ai 17 fin domenie ai 20 di Setembar sot dal tendon di place Venerio, daûr de glesie di Sant Francesc, dulà che i visitadôrs a podaran cjatâ ancje i libris di pre Antoni Beline (1941-2007), ma no dome, domandant informazions e podint cognossi miôr cheste associazion che e cjale al avignî dal Friûl di vuê cence dismenteâ il patrimoni inestimabil che al ven da la tradizion dal Patriarcjât di Aquilee.

13 settembre 2009

Alè Udin!

Vuê o ai screât l'abonament!
Ma ce sudadis! Massime pe prime part de partide...
O miôr plui che sudadis, a jerin lagrimis...
Eh sì, cjatâsi in svantaç cun 2 pirucis cjapadis tai prins 45 minûts nol jere biel.
E po o ai ancje scuviert che chês dal prin timp no jerin lis unichis lagrimis: di fat cuant che o ai compradis 2 butiliutis di 0,5 lt di aghe e lis ai paiadis 4 euros in dut, mi è vignût il suspiet che a vessin propit imbutialidis lis lagrimis de Madonute di Madone di Mont.
Po ben, a part monadis, a la fin l'Udin al à recuperât e grazie al cjapitani Di Natale (te foto la mê tifose preferide, contente pe triplete di Totò) o vin fat 4 gôi: 1 par ogni euro di aghe che o ai comprât...
Alè Udin!

12 settembre 2009

Gjoêl sul Friuli

Come che us ai dit, sabide passade o ai stât a Udin a viodi la simultanie di dame. Di chel apontament al fevele ancje il Friuli e adiriture sul sît e je une biele galarie di fotos che a contin l'event (fracait chi).
Tra chestis o ai cjatât ancje il gno nevodut Gjoêl! Velu chi cun me!

11 settembre 2009

SUNS cui FLK

Doman o voi a viodimi e scoltâmi un pocje di buine musiche al Palamostre di Udin. Aes 21 al tache SUNS, concors di musiche in lenghe minoritarie, une semifinâl dal Liet festival.
Par savênt di plui lait a viodi sul sît de Arlef o di Radio Onde Furlane (fracait chi par viodi ducj i partecipants).
O voi content ancje parcè che nol sarà chest l'unic event de serade: dopo agns e torne la formazion complete dai Mitili FLK, il grup musicâl che al à rivoluzionât il panorame musicâl furlan dai agns 90.
Un mandi particolâr a Stiefin Montello (te foto)!

10 settembre 2009

Il blog di Gianfranco Pintore

Come che o ai dit plui voltis, di cuant che mi dedichi a la cuistion furlane, ai temis de tutele linguistiche o ai tacât a vierzi i miei orizonts plui che no prime. Di fat o ai vût il plasê di cognossi tant int impegnade e interessante in Friûl e fûr dal Friûl. Ma cemût? A lei cierte stampe, nô furlans o saressin int sierade, che e cjale dome il cjampanili, che no sa ce che al è il mont... e vie indevant cun tantis co****dis dal gjenar: par furtune i fats a cjacarin in maniere difarente.
Tra i tancj contats, l'ultin par ordin di timp al è stât Gianfranco Pintore (te foto, fracait chi par lei un pocje di biografie), gjornalist e scritôr de Sardegne, che si zonte cussì ai contats che za o ai cun chê regjon.
Chê altre dì o ai vût il plasê e l'onôr di viodi publicât sul so blog (http://gianfrancopintore.blogspot.com) il gno post che al cjapave il titul di une famose frase di Gandhi: fracait chi.
Un grazie e un mandi a Gianfranco Pintore e a ducj i amîs de Sardegne.

09 settembre 2009

Sabide damistiche

Probabilmentri ducj o vês let de imprese dal President Tondo che al à fat une sfide damistiche bessôl cuintri 25 di lôr a Udin in place Sant Jacum(risultât: 21 vinçudis, 2 pierdudis e 2 paregjadis).
O jeri ancje jo chê sabide, ma ni come zuiadôr (avonde scjars) ni come dipendent regjonâl. O ai dome volût condividi une biele sabide cui amîs dal Circul damistic di Tumieç e cussì e je stade.
Un mandi in particolâr a Romeo e Zuan (chi in bande la foto di grup).

08 settembre 2009

Ce us vevio dit? Al veve reson Gandhi

Ce us vevio dit? Al veve reson Gandhi (te foto): di fat dopo dai atacs vergnosôs de stampe taliane e talianone, ve chi che a tachin a vignî fûr lis falopis, fiis de arogance e de ignorance: intun comunicât dal Comitât 482 si cjatin bielis osservazions al fat che i bêçs pe lenghe furlane a son strassâts.
Un pâr di esempli su ducj: lis traduzions di Brecht e Beckett, che tai ultins dîs a son stadis ripuartadis dai "famôs" articui, a son stadis fatis tai agns 70 e cence contribûts publics de clape culturâl Aquilee di Gianni Nazzi: come che al dîs il comunicât "Gli autori dell’inchiesta, che per svolgerla sono venuti in Friuli, avrebbero almeno potuto guardare la data di edizione scritta sui due libri. Dobbiamo forse desumere che non abbiamo mai avuto in mano quello che hanno addirittura additato a simbolo dello spreco e del ridicolo?
O forse era tanto difficile trovare degli sprechi che hanno dovuto inventarseli... "
Une domande mi ven: ma se un mi acuse di vê fat robis che a la fin si dimostre no jessi veris, puedial jessi cuerelât?
Tal prin coment, dut il comunicât.
Fuarce Friûl! Fuarce Furlan!

04 settembre 2009

Prime ti ignorin, dopo ti ridin, dopo ti combatin. Dopo tu tu vincis!

No vevi voie di scrivi. Une detule e dîs che "al è dibant fermâsi a resonâ cul mus: si piert timp e si infastidìs la bestie".
Ma mi è tornade sot dai voi une frase di une persone speciâl, che no fevelave dibant.
"Prime ti ignorin, dopo ti ridin, dopo ti combatin. Dopo tu tu vincis!" al diseve Gandhi.
Po ben, se al ves vût la pussibilitât di vivi fint vuê o pensi che nus fasarès presint che o sin dongje de vitorie!
Di fat si è discjadenât un atac frontâl, vergognôs cuintri de lenghe furlane, che o riten il spieli di un popul e par chest l'atac al rive dret al Friûl e ai Furlans.
No dome a son cierts politics che si pierdin a criticâ iniziativis che invezit tal rest de Europe a son cjapadis come model (cjale il Grant Dizionari Bilengâl Talian Furlan che la universitât di Stocolme e doprarà tant che implant informatic par un vocabolari talian svedês). Un intervent che al è stât finanziât cun fonts destinât a la politiche linguistiche (sul Messaggero Veneto dai 04.09.2009, Sergio Cecotti, za president de Regjon, al declare «anche prendendo l’anno di massimo finanziamento, stiamo parlando di meno del 0,0003% del Pil. I politicanti che impiegano quote significative del loro tempo a prendersela con un presunto spreco dell’ordine del decimo di millesimo di punto percentuale vanno classificati nella categoria dei buffoni»).
E no je dome la politiche (cul "p" minuscul) che e çavarie. Sedi "L'Espresso" sedi "Io Donna" (insert dal Corriere della Sera) a àn armât la sclope de maleinformazion e a àn tacât a trai cuntri dal Friûl, dai Furlans, de lenghe furlane. A sedi bogns, ancje se un gjornâl come che Diu comande nol varès di jessi justificât, si podarès dî "Bon dai, a àn lis redazions lontanis, magari no cognossin la nestre realtât e a son colâts tal erôr e a jerin in buine fede". Ma chest resonament inte ete de informazion globâl nol varès nancje di jessi... Cun di plui cuant che, intune inchieste che e ricuarde la interogazion fate di un politic in consei regjonâl che e acusave di strassarie il za nomenât Gdbtf, il gjornalist si "dismentee" di scrivi ancje che il dut si è sierât cuntune grande "bufule di savon" e cun tant di dimostrazion che il lavôr al è sot paiât e invezit lis risorsis par progjets simii di altris bandis a son une vore plui altis, la cualitât di cierts articui si comente dibessole...
Cence contâ che a son agnorums che la Europe e puarte indevant la difese dai dirits linguistics ricognossint lis lenghis dai popui (al esist ancje l'Eblul, un ufici european pe tutele des lenghis mancul pandudis), e plui di cualchi volte e à riclamât la Italie pes inadempiencis in chest cjamp (no stin nancje a fevelâ dai "grancj finanziaments" a la Leç 482/99, che di grant a àn dome une continue e drastiche riduzion).
Po ben, propit parcè che il stât talian si conferme di jessi une vore indaûr su chestis cuistions (par dî la veretât, no dome su chest...) jo no mi sint di vê tant ce fâ fieste: dopo mai che il President de Republiche al sofle parcè che si varès di ricuardâ in maniere degne i 150 agns de unitât di Italie. Mi sarès plasût che cu la stesse fuarce lui, che al è il so garant, al ves domandât il rispiet de Costituzion de Republiche taliane (comprindût l'art 6: la Republiche e tutele cun normis di pueste lis minorancis linguistichis).
Mi consoli duncje tornant a Gandhi, parcè che dopo agns che tal rest di Italie a ignoravin (e forsit in tancj ancjemò vuê no san) dulà che al jere il Friûl, continuant a viodi che in tancj no pierdi ocasion par riditi e sbeleâti, cumò a àn tacât a combatinus cun tristerie: po ben, come che o vin tignût dûr fin cumò (al è agnorums che a disin che il Furlan al sarès sparît e invezit o sin inmò chi), tignìn dûr inmò un moment parcè che il prossim pas al è dongje e al è chel che al conte: la vitorie!

PS: tra l'altri, i concuistadôrs talians a son rivâts tal 1866 tal Friûl Centriocidentâl intant che tal Friûl Orientâl fint al 1918 e jere la Austrie... ma tant chest nol impuarte: cuant che si trate di celebrâ la Italie "una d'arme, di lingua, d'altare" dut al è permetût e ancje i numars e lis datis a valin un tant al kg.

02 settembre 2009

L'Udin al à un gnûf abonât

A jerin agnorums che no lu fasevi: nancje no mi visi cuant che o ai vût la ultime volte l'abonament dal Udin. E chest an o ai decidût di tornâ e fâlu in curve!
Ve chi la tessarute!
Us segnali ancje une trasmission: si clame Sportissimo Club (fracait il link) e e va in onde sedi su TNE sedi in streaming sul sît de Auc. Un mandi a Gianluca Bertozzi e a la mitiche Marina Presello!
Alè Udin e fuarce che o vin di rivâ almancul a 14.000 abonaments (al è timp fint ai 13 di Setembar)!

01 settembre 2009

Ce nervôs!!!

Maledete la ore che lu ai viodût!!! E cumò o scomet che plui di cualchidun al va a tirâ fûr dal scansel il so "Rubik cube"!