30 aprile 2009

Mi presenti, o soi Gioele

Mandi, mi presenti: o soi Gioele.
O soi rivât vuê matine prime des 7 a Sant Denêl: mê mari Sonia vuê e fâs 30 agns e alore o ai pensât di fâi un biel regâl di 3 kg e mieç!
Par dî la veretât, mi soi fat un tic spietâ, ma cuant che o soi rivât, invezit di cridâmi pal ritart, a son stâts ducj contents: gno papà Cris, i miei nonos (ancje se a vevin i voglons sglonfs...)!
Ce volêso fâ? Lis personis impuartantis si fasin spietâ... ;)
Mê mari mi à dit che o ai ancje un barbe e une agne, ma o no ju ai inmò viodûts parcè che a varessin di vignî sot sere: chel pandolon di gno barbe al à di lâ a vore... propit furlan! =)
Po ben, cumò lassaitmi fâ un pisul che o soi jevât a buinore vuê...

28 aprile 2009

Benvignût Mattia

E intant, vuê matine, in anticip sui programs, al è rivât Mattia che nol è il fi di mê sûr e gno cugnât, ma il fi di Alessia e dal Gnut, il President de Pro Majano: tantis congratulazions!
Benvignût Mattia: salude la mame e viôt di to pari! eheh

25 aprile 2009

Sant Marc

Vuê o sin ai 25 di Avrîl. Stant che in Italie, la politiche e somee no vê nuie di miôr ce fâ che stâ a barufâsi su cheste date, jo o ricuardi Sant Marc te zornade dal so martiri (us fâs ancje presint che a son doi agns dal funerâl di pre Antoni).
O pensi che ducj o savedis che Sant Marc al è cognossût pal Leon e par jessi il patron di Vignesie.
Ma ce che forsit no ducj a san al è che Sant Marc nol à mai viodude Vignesie, ma Aquilee sì.
Di fat, come che si lei tal sît de Basiliche di Sant Marc a Vignesie, il vanzelist Marc al ven mandât di Pieri a puartâ il so vanzeli di Rome a Aquilee.
Li al cognòs Ermacure, so dissepul, che al deventarà il prin Vescul di Aquilee. Dopo vê consegnât il so vanzeli a la comunitât aquileiese, Marc al decît di tornâ a Rome: lu fâs compagnât di Ermacure. E propit dilunc di chest viaç, cuant che al rive te lagune al à une vision de citât che inmò no esisteve e che e deventarà Vignesie.
Rivâts a Rome, tor dal 50 dopo di Crist, Ermacure al torne a Aquilee e Marc al continue bande Alessandrie di Egjit, citât che e à vût un leam impuartanton cu la stesse Aquilee.
Come che o disevi, Marc al ven copât ai 25 di Avrîl e lis sôs relicuiis a restaran a Alessandrie fint al 828 d.C. cuant che i venezians lu trafuaran e lu puartaran a Vignesie, passe 7 secui dopo che al veve stât, di vîf, a Aquilee.
Auguris a ducj chei che si clamin Marc.

24 aprile 2009

Sunade des Buteghis viertis

Us segnali une sagrute di paîs: la sagre di Sant Marc a Savonelis, dongje Sant Denêl, sabide 25 di Avrîl. Tal dopomisdì si podarà ancje scoltâ chei des "Buteghes viertes" che a fasaran une sunade di 1 orute se il timp al è biel.
Ve chi ancje il lôr sît internet: http://www.buteghesviertes.net/ e chi sot un lôr video zirât su la gjostre des "Pidadis tal cûl".

23 aprile 2009

A doi agns de muart di pre Antoni

Vuê, cun pre Roman e lis peraulis che al à scrit su La Patrie di Avrîl, o ricuardi pre Antoni (te foto), mancjât ai 23 di Avrîl dal 2007.
A son bielzà doi agns che pre Antoni al à lassade la sene di chest mont. O volìn ricuardâlu e onorâlu ancjemò cuntun tocut dal De Senectute, vore che lui al steve svilupant prime che la muart lu brincàs. L’an passât o vin metût l’inizi de riflession. Cheste volte o metìn la fin. Si trate naturalmentri di une opare no finide o, al sarès miôr dî, apene scomençade. La finâl, cence puntegjature, le lassìn come che le veve lassade lui.
Pe leture integrâl dal De Senectute o rimandìn i amîs de Patrie dal Friûl al libri, fresc di stampe, che Glesie Furlane e à burît fûr cun chê di onorâ la memorie dal amì pre Antoni, propit in ocasion dal secont aniversari de sô muart.
pre Roman


Ve chi la ultime part dal De Senectute che Glesie furlane e presentarà domenie che e ven, ai 26 di Avrîl a lis 6 di sere a Vençon.

Cundut a chel, però, e cence savê ce che mi puartarà l’avignî (di sigûr no grancj salustris), o soi a dî che ancje la malatie, il mâl fisic e morâl, i moments negatîfs de vite a àn une lôr impuartance e un lôr valôr. No dome par fâti cognossi la realtât interie de vite, ma ancje par temprâti, par rinditi plui fuart, plui essenziâl, plui sapient, plui realtîf. Par fâti gjoldi di plui di chês speris di lûs tra un burlaç e chel altri che la vite ti regale e par judâti a capî in profondiutât e no par proforme chei che a tribulin e a cainin dongje di te. Il dolôr ti dà umiltât e caritât, passience e sapience, profonditât e compassion. O disarès che al rive a tirâ fûr di te e di chei dongje di te lis miôr cualitâts, cu la cuâl che tantis voltis la salût e la furtune matereâl ti rint insensibil, superficiâl, egoist e malpazient. Cul dolôr tu cressis e tu madressis, cul ben tu riscjis di restâ frut, cun dutis lis pecjis dai fruts. Tantis voltis mi domandi se o varès fat dut ce che o ài fat se o ves vude salût. O varès corût di plui, consumât di plui, ma forsit o varès strassade la vite in maniere stupide. Par chel o dîs, cu lis lagrimis tai vôi e strengint i dincj: “Grazie, Signôr, ancje dal mâl

21 aprile 2009

Mandi Dino

Ju clamin riferiments. A son personis che tu ciris cuant che ti ven un pocje di pôre, cuant che ti ven il dubi, cuant che tu disis: "E cumò?". Tu sâs che a son li, che tu puedis domandâur un parê e tu sâs che tu ju cjatis, simpri. O miôr, tu crodis... parcè che invezit il destin al è scrit e tu no tu puedis evitâlu. Cul timp tu ciris di usâti a fâ i conts cun lui, a dâti une reson...
Ma inevitabil al ven il moment che ti rive la seglotade di aghe glaçade e tu ti domandis "Ma parcè?", ogni volte che al sucêt.
Ti reste il vueit, tu stâs mâl, no tu sâs ce dî: dome grazie pal ben che ti àn regalât.
Mandi Dino.

17 aprile 2009

La Patrie tal Friûl Orientâl

La Associazion Culturâl - Grop di Ricercje “I Scussons” di Romans dal Lusinç, adun cu la redazion, e presente il gnûf numar de riviste “La Patrie dal Friûl” che e sarà distribuide al public presint in sale. Ta chest numar si fevele di “Erois furlans” come bons. Faidutti, l’on. Bugatto, Zuan Minut (impuartants protagoniscj dal Friûl orientâl) e tancj altris, ma ancje di tante atualitât, viodude simpri cuntun voli furlanist “par un Friûl plui furlan”. A intervignaran Carli Pup, component de redazion gjornalistiche di Radio Onde Furlane, colaboradôr de riviste e autôr dal libri “Memoriis platadis”; Germano Pupin, president de Associazion Culturâl - Grop di Ricercje “I Scussons” e jo, vicediretôr da “La Patrie dal Friûl”. L’apontament al è par miercus ai 22 di Avrîl a lis 20.30 li de Sale Consiliar intal Municipi di Romans dal Lusinç, in vie la Centa 6 a Romans (daûr de glesie). I organizadôrs de serade a ringraziin la Aministrazion comunâl pe concession de Sale. Cun di plui us visi che dai 16 di Avrîl, sul sît www.lapatriedalfriul.org a son disponibii i contignûts dal numar di Març dedicât a Internet. La Patrie dal Friûl si pues vêle par abonament o lant a comprâle tes miôr ediculis e librariis.

16 aprile 2009

Lade strucje

Usgnot o jerin in tancj: il Friuli al jere plen. E in tancj, a la fin dal prin timp, o crodevin che si varès podût puartâle a cjase: 3 a 1 tai prins 45 minûts e l'Udin al veve za paregjât il risultât de partide a Breme.
Magari cussì no, tal secont timp o sin... lâts in vacje e ancje une buine dose di sfighe (un pâl, rimpai che no jerin mai a favôr, diretôr di gare avonde discutibil...) no nus à judâts.
Po ben, amen, nol jere destin ancje se une ocasion cussì, forsit, si podeve sfrutâle in maniere difarente, magari cence cjapâ 6 gôi in 2 partidis (che al vedi vude reson il Dree?).
Dut câs al è di dî GRAZIE a cheste scuadre che nus à regalât bielis emozions in Cope.

15 aprile 2009

AmarAmor

La compagnie teatrâl de Pro Majano, C'eraunasvolta, e presente il so ultin spetacul: AmarAmor.
L'apontament al è par Sabide ai 18 di Avrîl a lis 20.45 li dal Auditorium comunâl.
Par info e prenotazions dai puescj, clamait in Pro Majano, tel. 0432 959060.

13 aprile 2009

Pascute motare


Visualizzazione ingrandita della mappa

Vuê, anticipant il consei di exanba, o vevin programât di fâ Pascute e invezit di lâ a fâ cori i ûfs pai prats, jo e la Ninine o sin lâts a fâ une corse in moto. Destinazion: Lesis, frazion di Claut, un paradîs tal mieçs des Dolomitis furlanis (chi o podês viodi l'itinerari che o vin fat).
Par rivâ sù o vin fat une polse a Barcis, sul lât, ma nancje di meti cun ce che o vin cjatât un tocut plui in sù: un prât e un riul cuntune aghe clare e frescje di no crodi! O vevi za stât a Claut une volte sole cuant che o jeri frut par une gare di pes (tra l'altri propit li che o vin stât vuê), ma mi sa che o ai di tornâ inmò.
Nuie ce dî: la zornade e je stade splendide cuntun soreli che nus à compagnâts dute la strade (e no dome noaltris, stant che a jerin tantis lis motos ator pes stradis).
E a pene che o ai lis fotos, us fâs viodi ancje cualchi cerce di panorame.

12 aprile 2009

Buine Pasche

I agns passâts (2006, 2007, 2008) o ai fat i auguris cun ironie. Chest an o preferìs segnalâus il sît de Protezion Civîl Regjonâl che e à ativât un cont corint pal Abruç: cussì o speri che e podedi jessi une buine Pasche ancje pai taramotâts.

11 aprile 2009

Cors di lenghe furlane a Tavagnà

Ripensant a cualchi mês indaûr, o publichi vulintîr chest comunicât.
Il sportel linguistic dal Comun di Tavagnà al organize “Cemût si scrivial?”, un cors di lenghe furlane (nivel base) par imparâ a lei e a scrivi par furlan.
Il cors al tacarà martars ai 21 di Avrîl dal 2009 a lis 20.00 soresere te sale de Universitât de Tierce Etât in vie Mazzini, 3 a Felet (jentrade di bande di Vie Udin, sot des scuelis mediis). Al durarà 20 oris dividudis in 10 lezions tignudis di Stefania Garlatti Costa e Matteo Fogale (www.serling.org).
Obietîfs dal cors a saran: rinfuarcî lis abilitâts di produzion orâl; meti a fûc lis cognossincis de grafie uficiâl de lenghe furlane e des struturis gramaticâls de lenghe furlane; furnî e potenziâ lis abilitâts di comprension e produzion scrite cun leturis, detâts e traduzions. I students a àn di vê almancul une buine cognossince passive de lenghe furlane. Il cors al è cence spese e al larà indenant fin al mês di Jugn. Si domande par plasê di iscrivisi dentri di vinars ai 17 di Avrîl dal 2009. Par savê il calendari precîs, par altris informazions e iscrizions clamait il Sportel de Lenghe Furlane dal Comun di Tavagnà 0432/577355 mail: lenghe.furlane@comune.tavagnacco.ud.it o la biblioteche comunâl 0432/572854.

10 aprile 2009

09 aprile 2009

Une poesie par Fabio Quagliarella

Usgnot l'Udin al zuie a Breme cul Werder: o sin tai cuarts di finâl!
Fabio Quagliarella (te foto) vuê sul Messaggero Veneto al declare che se o passìn la cualificazion "O voi in television e o lei une poesie par furlan"!
Compliments a Quagliarella pe promesse e cu la sperance che i coventi, cumò o voi a cirî une biele poesie che mi plasarès di zirâi...
Segnalait chi ancje voaltris une poesie par Quagliarella!

Mi pâr che e fos une che e diseve cussì:

Co mi jevi la matine,
cjali ator il mont e il plan,
une vôs tal cûr mi dîs,
sta content tu sês furlan!

08 aprile 2009

Intervent di Dree Valcic

Ve chi une mail che mi è rivade di Dree Valcic, gjornalist dal Gazzettino e che dispès nus da une man ancje su La Patrie.
In realtât al varès vût di jessi un coment a chel di îr, ma mi è someât plui just dedicâ un post dut so, stant la luciditât dal resonament e de autorevolece de firme! Ancjemò grazie al Dree Valcic e buine leture!

Mandi Christian, o ai let ce che tu âs scrit su lis peraulis di Tesini e Travanut par la fieste dal 3 di Avrîl. O jeri a Buie e o soi stât atent a lis presencis e ai discors. O soi sclet: e jere clare la rapresentance de Leghe Nord, ancjetant clare la assence di chei altris partîts, escludude la rapresentativitât istituzionâl di Molinaro e Martines. Cheste la fotografie, po dopo al ven il resonament. Che nol pues no scomençâ dal "effetto Serracchiani", ultime divinitât scuvierte dal Pd che su la sô figure, IMAGJIN, dut il partît al va daûr, contenton di contâ alc a nivel nazionâl e forsit ancje di fâ une europarlamentâr. La Debora, cence nissune tristerie, e rapresente dut il contrari di un partît di çampe cun lidrîs te cuistion furlane, ma chest nol è un probleme gno. Al massim e divente un trâf tal voli di cui che tal pd si proclame almancul un tic autonomist. E Tesini, Travanut and Company no son mai stâts di chê bande. Simpri daûr di Zvech, Maran e dai lôr discors triestins.
Chest a çampe. Viodìn la Leghe: che e sedi stade presinte al è un ben, come il discors di Ballaman in Consei regjonâl. E sarès ben biele se no fos cussì. Cun ce muse podaressino presentâsi ai lôr eletôrs furlans? A son avonde lis sbandadis in cjase “carroccio”, viôt cualchi declarazion dai pordenonês, di Razzini a Monfalcon su la lenghe o il cinidôr di Seganti cuant che si cjacare di Friûl. Sul front di Forza Italia e di An, ma bisugnarès aromai dî dal Pdl, al continue UN ASSORDANTE SILENZIO.
Il plui impuartant segnâl de zornade, al è vignût invezit propit di Fontanini (te foto) che al à dât un assist al vicesindic di Udin che al varès ancjemò di dîi grazie, cuant che lu à invitât a organizâ a Udin la prossime fieste de Patrie, ricognossint a la citât il destin di capitâl dal Friûl.
Ultime robe, no sai se o vês let il comunicât stampe di Valeria Grillo su la manifestazion. O sin al deliri pûr, cun Trieste che e je deventade “città veneta”, e pûr cualchidun al cole e i da credit.
mandi
Dree Valcic

07 aprile 2009

Doctor Sandri & Mister Tesini

Ce si disial cuant che un prime al dîs une robe e po dopo a 'nt dîs une altre dal dut contrarie? Che al à cualchi problemut, se no di personalitât, almancul di coerence.
E cussì îr mi à tocjât di lei lis declarazions di Alessandro Tesini (te foto) che, cuant che al jere President dal consei 2 agns indaûr a diseve bielis peraulis pe fieste dai 3 di Avrîl, vuê che nol à plui la vetrine (crisi di astincence mediatiche?) al è dispost a dî dut il contrari: ce che no si fâs par vê un titul sul gjornâl...
Po ben, par furtune no son ducj come lui e ancje Paolo Menis, sabide a la presentazion dal nestri Speciâl dedicât ai erois furlans, e Vincenzo Martines, domenie in place a Buie, (ducj i 2 dal Pd e no de Leghe Nord) a àn spindût peraulis positivis a pro de Fieste de Patrie dal Friûl (sul sît di lengheNet il resocont de manifestazion).
Chestis a àn di jessi ocasions di union e no di strumentalizazion politiche che a puartin dome a dividi (e a indebolî) i Furlans.

06 aprile 2009

Taramot in Abruç

Ducj aromai o savarês za dal taramot che al à scjassât l'Abruç. Ancje jo, tal gno piçul o ai voie di jessi dongje al dolôr di chei che a àn patide cheste disgracie.
O segnali ancje il sît de Protezion Civîl regjonâl par stâ inzornâts su la situazion: fracait chi.

03 aprile 2009

Fieste dal popul Furlan

Come che us disevi chê altre dì, vuê a son 932 agns de istituzion dal Stât Patriarcjâl di Aquilee e dut il Friûl al celebre la sô fieste.
Us segnali il blog dal comitât 842: fracait chi.
Auguris a ducj i Furlans che a son ancje fûr de Patrie.

02 aprile 2009

Interviste dal Dree

Sul gjornâl di îr e je vignude fûr une interviste che us ripropon. Us visi ancje che Sabide o sarìn a Buie a li dal Museu de Medaie di Buie par presentâ il speciâl sui erois furlans: nestri ospit al sarà Carli Pup, colaboradôr e autôr dal libri “Memoriis platadis”. A parteciparan ancje l’on. Pietro Fontanini President de Provincie di Udin; Lorenzo Zanon, President de Agjenzie Regjonâl pe Lenghe Furlane; Claudio Marcuzzo, Sindic di Buie; e William Cisilino, president dal Istitût Ladin Furlan “pre Checo Placerean”.

01 aprile 2009

Ancje jo us saludi

Mandi a ducj. Come che al à fat il Dree, ancje jo o ai decidût di sierâ barache. Aromai al è di cualchi timp che no rivi plui a garantî la frecuence di publicazion che o volarès. Par chest, prime di saludâus ducj cun chest post, o ai volût propit spietâ di publicâ il program de Fieste dai 3 di Avrîl: une date simbul pe nestre Patrie e che e restarà la ultime testemoneance par chei che pal avignî ur capitarà di passâ par chi.
O sieri ringraziant ducj i letôrs che mi àn tignude compagnie fint vuê e o aprofiti par fâ a ducj voaltris une ultime segnalazion: fracait chest link...