Vive Farle, vive il Cuar

Zornade di 3 a 1.

Par ripiâsi de sacodade cjapade a Gjenue dal Udin cuintri de Samp, mi consoli cul 3 a 1 dal Farle sul Cjasesole e il sucès tal torneu di balon dai Borgs di Maian.

Compliments ai Farlats!

E duncje, "Vive Farle, Vive il Cuar e la roie dal Mulinâr..."

Colaborazion cun Colonia Caroya

Come che us ai anticipât la setemane passade, o vin tacât une piçule colaborazion cun Colonia Caroya, in particolâr cul program Fuarce Furlans di Radio Fm Comunicar (te foto, la redazion).
O feveli al plurâl parcè che o scuen ringraziâ Luca Peresson, Venusia Dominici e Sonia Romanini che mi àn compagnât te realizazion di cheste idee nassude "vie Internet" cun Claudio Roya (chel tal mieç te foto).
Si trate di une selezion des Flabis di Fedro voltadis pai Furlans di pre Antoni Beline. Fracait chi chest link par scoltâ la prime pontade.
L'apontament al è par 15 setemanis ogni sabide tor 5 e mieze dopomisdì in direte in streaming o par radio su Radio Onde Furlane in repliche di lunis.

Fieste dal Faf

Ancje in vacance si à un pinsîr pai amîs e duncje ve ca la segnalazion di vuê.
Une des robis di no pierdi par cheste fin di Istât e je la Faf.ieste, la fieste dai Fantats furlans a Feletis.
Fracait ca par savênt di plui.

INZORNAMENT SUI ORARIS: stant che e mancjave la ore de fieste, fracait chi par viodi ducj i oraris.

Polse

O ai decidût di fâ un tic di vacance. Ma no stait a vê pôre... no soi tant distant!
Mandiiiiiiii =)

Probleme di bolps

Ancje vuê sul Messaggero Veneto si fevele di bolps maladis: un probleme che al va indevant di diviers timp ancje chi a Maian.
Isal cualchi letôr che al sa alc di plui? Tal prin coment us met l'articul di vuê.

Alè Udin

Al tache il campionât e a mi no mi reste che berghelâ:
Alè Udin!
Un mandi a ducj i amîs de Auc e in particolâr a Gianluca!
Fuarce Udin!!!

Ps: Cualchi zornade indaûr e je stade fate la presentazion dal Udin in place domo: par savênt di plui, fracait chi.

Fuarce Furlans di Colonia Caroya

Al è tant che no feveli di lôr: il program Fuarce Furlans al va in onde di Colonia Caroya in Argjentine su lis frecuencis di Radio Fm Comunicar. Tra i condutôrs o vin Marta e Daniel. O aprofiti ancje par saludâ il gno amì Claudio Roya.
Us consei di scoltâ la trasmission di doman Sabide ai 22 di Avost che e va in onde a lis 5 dopo misdì (ore furlane) in streaming sul sît de Radio (fracait chi) o su lis frecuencis di Radio Onde Furlane te repliche di lunis: o podaressis cjatâ cualchi sorprese...
Restait in scolte e un mandi di cûr a ducj i furlans di Colonia Caroya.

Inzornament di Domenie ai 23 di Avost: se no vês scoltât la trasmission in direte, o podês cjatâ chi la pontade di Sabide: fracait chi. Buine scolte!

Benvignût al gnûf Vescul di Udin

Udin al à un gnûf Vescul: Bons. Mazzocato (te foto) che al rive de diocesi di Trevîs (lait a lei sul sît de Vite Cattoliche).

Mi somee un ticut strani che la diocesi furlane cheste volte no vedi rivât a esprimi un sucessôr furlan. Bon, no mi somee il câs di fâ polemiche su di chest stant che ancje il Beât Betrant nol jere furlan e pûr al è stât un dai Patriarcjis plui impuartants de storie di Aquilee.

Cumò i tocje a Bons. Mazzocato puartâ indevant cheste ereditât e mi auguri dome che nol vedi pôre di judâ i Furlans a difindi la nestre identitât: a chest proposit mi à plasût une vore l'intervent dal President Fontanini che al à fat un precîs riferiment al Patriarcjât di Aquilee.

Mandi e benvignût in Friûl!

Mandi Fernanda

Mi plasin i libris di Ernest Hemingway, di Jack Kerouac e lis cjançons di Fabrizio De Andrè... No pues no jessi displasût pe notizie de muart di Fernanda Pivano (te foto).
No soi jo la persone plui adate par piturâ il profîl di cheste grande femine di culture. O pues dome dî: mandi Fernanda e grazie par dut ce che tu nus âs fat cognossi.

Lotarie di Maian: estrazion

Ve ca in numars che a vincin i premis de lotarie di Maian:

1° ESTRAT Scooter Motom Trancity 250 cc 16933
2° ESTRAT Set zardin Green 19804
3° ESTRAT Condizionadôr Iatu 6014
4° ESTRAT Minimoto eletriche Coolthings 3271
5° ESTRAT Fotocjamare digjitâl Fujifilm Q1 16398
6° ESTRAT Fontane Zen 35740 5968
7° ESTRAT Cjaruç puarte imprescj 6576
8° ESTRAT Registradôr+letôr MP3 Acer 11322
9° ESTRAT Ombren zardin orientâl 17143
10° ESTRAT Ombren zardin orientâl 5207

Bon complean!

Vuê e fâs i agns la mê mame Denise! Augurons!

In memorie di Giorgio Ferigo

Domenie passade al varès finît 60 agns. E invezit al è cuasit 2 agns che nus à lassât.
In tancj, come Aldo Rossi, lu ricuardin e jo us segnali la associazion che e pueste il so non: http://www.giorgioferigo.nete/ cuntune pagjine di cjargne culture dedicade al Povolâr Ensemble.
Se no vês stât ai Colonos domenie passade, us consei di lâ a Comelians ai 20 di Avost, joibe che e ven (fracait chi par viodi la locandine).
Mandi Giorgio.

Flum de Lune pe Stelute

La Patrie sot dal ombrelon

E je rivade par pueste la copie dal ultin numar de Patrie dal Friûl che chest mês e fevele dal mâl dal modon. Buine leture a ducj!

Ce campion!

Velu Gioele, il gno nevodut che vuê al à esordît cu la dame li dal Festival: chi impegnât cun Romeo!

Mai plui

Ancje chest an o ai voie di ricuardâ chest aniversari: ai 6 di Avost dal 1945 Hiroshima e jentrave te storie. Purtrop.

Zelig a Maian

Miercus al rive a Maian Punto Zelig, il spetacul comic che al à vût tant sucès par television.
A chest proposit us segnali che in Pro Majano a son inmò a disposizion i biliets: fracait chi par viodi.
O zonti ancje une biele iniziative che o ai sintût su Radio Spazio 103, che e met a disposizion 2 biliets... cemût fâ par vinciju?
Doman, martars ai 4 di Avost, o vês di sintonizâsi su lis frecuencis di Radio Spazio 103 des 9 fin 11 di buinore pe trasmission "Cafè 103 estate": cuant che a daran il "VIE" o varês di clamâ il 0432.512661. I plui svelts si puartaran a cjase 2 biliets par om.

Lignan

Al sarà stât parcè che e jere la prime domenie di Avost, al sarà stât parcè che al jere un soreli che al disfave ancje il savalon, al sarà stât parcè che il mâr al jere un figade, ma vuê a Lignan al jere plen di int.
E ancje jo mi soi butât tal mieç des ondis che a increspavin la aghe: masse biel!

Robis di mats

O premet che no ai viodût il post in cuistion e duncje no sai ce che realmentri e à scrit Flavia, la assessore a la culture di Sant Denêl e blogger. Duncje comentâ cence vê elements nol è just parcè che no sai se e à ofindût cualchidun, se e à doprât peraulatis o altri.
Jo stes o ai vût ce discuti cun jê par posizions che e veve cjapât e no simpri o condividi ce che e scriveve.
Ma ce che o ai let sul gjornâl e il fat che al sedi stât ancje sierât il so blog, mi somee propit ecessîf. Mi somee une grande sconfite di ducj.