31 agosto 2008

Scuele furlane

Timp indaûr o vevi publicât une frase di pre Antoni Beline che us torni a segnalâ chi.
Par furtune a 'nd è mestris e insegnants che a lavorin par une scuele plui furlane, e vuê us presenti ancje jo Lorele la Morete (te foto), une insegnante di Codroip che cualchi dì indaûr e à screât ancje un blog che si clame propit Scuele furlane.
Compliments e bon lavôr.
Ps. Se us interesse di lei cualchi biele considerazion su la scuele, scrite di pre Antoni Beline, no stait a dismenteâsi di "Une scuele pai furlans".


30 agosto 2008

Piçule (ma grande) olimpiade a Maian

Îr a palaç Belgrât, tal salon dal consei de Provincie di Udin, si è tignude la conference stampe dal meeting di atletiche lizere inmaneât de associazion Libertas di Maian. L'apontament pe edizion numar 17 e je par sabide ai 6 di Setembar tal stadi di Maian.
Un event internazionâl pardabon impuartant che al ospitarà delegazions sportivis di dute Europe: Cravuazie, Romanie, Ongjarie, Ingletiere, Umbrie, Trevîs, Gurize, Republiche Cece, Slovachie, Marchis, Padue, Belun, Udin, Gjermanie, Serbie, Slovenie, Pordenon, Triest e Vignesie. Ma ancje la Guinee ecuatoriâl.
Par plui informazions, fracait chi.

28 agosto 2008

Farcadice a Maian

Dopo de serade sul Pisperc (isal stât cualchidun che nus conti cemût che e je lade?), sabide ai 30 di Avost si davuelzarà la seconde serade di cine par furlan dedicât a Farcadice, i documentaris su la emigrazion furlane fats di Luca Peresson e Carlo Della Vedova.
Apontament a 9 di sere a Deveà: fracait chi par viodi il program de serade.

27 agosto 2008

Ator ator dal Tor

Dal Tor gnûf di Maian si à tant fevelât, let e scrit, ancje su chest blog.
Cumò o lassi fevelâ lis imagjins che mi somee la maniere miôr par fâ viodi ce che al nassarà parsore dal tor di cumò.

video

26 agosto 2008

O ai stât a fâ un zirut

Come che si sarês inacuarts, no soi stât tant presint parcè che mi soi lât a fâ un zirut par stacâ.
Il viaç che o ai fat al è stât te storie, sù par jù, 2 mil agns indaûr.
E o aprofiti par ringraziâ la persone che mi à regalât il biliet (te foto).
Par viodi un piçul video, fracait chi...

22 agosto 2008

Lis contis di Corona

Ve chi un biel libri che o ai a pene finît di lei: autôr Mauro Corona.
Se o sês inmò in vacance, o ancje no, us al consei.

18 agosto 2008

Grant finâl pirotecnic di Maian

E come ogni an, ancje îr di sere, ultime dal Festival di Maian 2008, o vin viodût i fûcs!
Compliments al Gnut e a dute la Pro Majano!
Grazie!
Ve ca sot une cerce:

video

14 agosto 2008

La Patrie e puarte ben: Chiara di aur!

La Patrie dal Friûl e puarte ben ai atletis impegnâts a lis Olimpiadis di Pechin. E madaiis.
La prime le veve concuistade Davide Rebellin, nomenât te interviste a Franco Pellizzotti tal numar di Avost dedicât al Sport (viôt cuviertine). Ma il vêr colpat al rive cumò cun Chiara Cainero (te foto) che, intervistade prime de partence par Pechin, e à vinçût la medaie di aur tal skeet, prime femine furlane a montâ sù sul scjalin olimpic plui alt di cheste specialitât.
Insumis, un biel segnâl di bande de riviste dute in lenghe furlane, ancje se cumò la sperance di dute la redazion e je chê di fâ fieste in curt par un sucès di une scuadre nazionâl furlane!

Toquiño



e te version taliane
 Toquinho - Acquarello

13 agosto 2008

Une altre buine gnove dal President

A continuin lis buinis gnovis: dopo une prime cjapade di posizion dal President (te foto) che al à dit che al difindarà la gnove leç sul furlan e la circolâr dal ministeri de istruzion publiche segnalade îr, ve ca che vuê il President al declare che al sarès ben che une cuote dai insegnants des scuelis a varessin di jessi di marilenghe furlane. E lu declare sul Corriere della Sera: fracait chi par lei dut l'articul.

12 agosto 2008

Buine gnove di bande dal Guvier

Dopo di une prime buine gnove di bande dal President che al à dit di volê difindi la gnove leç sul furlan, ve chi vuê che e ven fûr sul Gazzettino une altre biele indicazion di bande dal Guvier di Rome: come che si lei ancje sul blog dal Comitât 482 il Ministeri de Istruzion Publiche e à mandât fûr un bant pes scuelis li che une des indicazions e je propit chê di aplicâ il principi dal ûs veicolâr par insegnâ a scuele la lenghe furlane (e chês altris de 482/99) e i contignûts.
Compliments a la Ministre Mariastella Gelmini (te foto).

11 agosto 2008

Ocje in bocje

Domenie o ai stât al Festival a la degustazion.
Ancje se la mê diete si fonde sul frico e la cjar purcine, o ai volût provâ "la ocje in bocje", serade di degustazion realizade come chês altris in colaborazion cul ristorant La Staderie di Sant Denêl.
Biel e bon dut, ancje i vins... ce baline!

10 agosto 2008

La Patrie olimpioniche

Se o sês abonâts, us à di jessi za rivade a cjase la Patrie dal Friûl dal mês di Avost, dedicade al Sport.
Ta cheste presentazion jo invezit us feveli di une robe che mi sta tant a cûr, ven a stâi il comunicât di Glesie Furlane, che pal moment e frene cui che al veve tante gole di molzi pre Antoni Beline di dopo muart. In buine sostance dopo che al à lassât cheste tiere, il so non al è lât su la bocje di tancj che a àn nasât l'afâr di sfrutâ in maniere comerciâl i siei scrits: e alore jù ducj a domandâ di voltâ par talian i libris di pre Antoni "par fâ cognossi i siei scrits a ducj".
Intun prin moment ancje jo o vevi valutade cheste necessitât, ma dopo pensant a pre Antoni mi soi dit: "Pre Antoni al saveve scrivi par talian miôr di ducj chei che cumò a domandin di voltâlu dal furlan al talian. La sô sielte di scrivi par furlan e à une motivazion precise: cussientizâ i furlans che la nestre lenghe e je buine par dutis lis situazions e duncje ancje pe leterature, che cun pre Antoni e à tocjât nivei une vore alts. Pre Antoni al à scrit par furlan, pai furlans, par che a cjapin cussience dal valôr de nestre lenghe".
O soi dal dut dacuardi cul comunicât di Glesie Furlane e Patrie dal Friûl, che o cjatais achì.
E mi displâs che ancje int che e jere dongje di pre Antoni no vedi capît (o no à volût capî...) chest resonament che al è a la fonde dal so lavôr.

I premis Pro Majano

Cualchi zornade indaûr a son stâts consegnâts i Premis Pro Majano, pe solidarietât, pal artesanât e pes ativitâts produtivis.
Te foto un moment de Premiazion, di çampe a drete: Nadia Mansutti, Adriano Piuzzi, Romolo Mansutti, Marco Serafini, Remo Mansutti, Giancarlo Spizzo, Mauro Pighin, Romano Ciani e Stefano Tuti.

09 agosto 2008

Polimiche sui coscj dal asîl nît

Sul gjornâl o ai let un intervent dal sindic di Sant Denêl, Gino Marco Pascolini, che al acuse di iregolaritât i asîi nît dai comuns dongje.
Par savê di ce che al fevele, lait a viodi tai coments...

08 agosto 2008

Gardaland!

O vevi pensât di lâ fint a Arcore, ma rivât a Pescjere dal Garde o ai viodût il cartel par Gardaland... no jeri mai stât e alore o ai decidût di lâ a viodi.
Cuant che o voi par montâ sul tronc dal Colorado boat, casualmentri o bechi la Ninine cu la sô amie Barbara (te foto).
E cussì, o sin partîts jù pal riul di aghe: une figade!!!
O soi vignût a cjase di sere content come un frut!

05 agosto 2008

Alc di lei, MajanoNuova/bis

Juste su chest blog e jere rivade la domande di publicâ dute MajanoNuova on line... dit e fat: la Pro Majano e à metût il pdf de riviste che o podês discjamâ sul vuestri computer.
Compliments al Gnut e a la redazion di MajanoNuova!

Maurizio Vandelli a Maian

Gnove frescje frescje a pene savude: Maurizio Vandelli (te foto) al torne a Maian cul Festivalshow (frache chi par viodi ducj i ospits)!
Apontament vinars ai 8 di Avost tal cjamp sportîf in place!
Jentrade libare.
Un altri biel colp tal Festival di Maian 2008: compliments al Gnut e a dute la Pro Majano.

Gjate e Tv

Cui che nol à un gjat o une gjate, nol pues capî... a son cussì e vonde!

04 agosto 2008

O ai propit bisugne di feriis

Eh sì: cuant che si è stracs la uniche maniere di recuperâ e je chê di polsâ... e jo (te foto) o ai propite bisugne di un tic di vacancis...
Cun vuê o soi a cjase par cualchi zornade!

03 agosto 2008

Cun Mauro Corona a Valbrune

Îr di sere, come che al à visât ancje il President, o ai stât a sintî Mauro Corona (te foto intant che mi autografe un so libri) che al fevelave di Julius Kugy, alpinist gurizan nassût 150 agns za fa.
Ancje se Thermo al insist che o ai puartât la ploie, jo no 'nd ai becade... o ai testemonis!

02 agosto 2008

La nuditât

La nuditât e je une forme di art.
E propit par chest mi soi decidût, dopo tant timp, a cjapâ ancje jo cheste strade. I ai pensât parsore une vore, ma a chest pont rivât l'Istât, o pensi che e sedi rivade la ore... Dopo dut lu àn fat tancj altris prin di me: Agnelli, Ferrara... e duncje parcè no ancje jo?
Par rispiet dai plui piçui però o ai ancje decidût di filtrâ i acès e duncje par chei che a àn voie di viodimi come che "mame mi à fat": fracait chi.

Donazion di plasme estive

E dopo de donazion presidenziâl, ve chi la tierce donazion consiliâr di chest an... Come che o fâs di cualchi timp, o soi tornât a donâ plasme.
E je simpri tante dibisugne e massime di Istât al è impuartant lâ a donâ sanc (o plasme come tal gno câs).
Come che al dîs ancje il President, e je une buine azion par 2 motivazions: tu fasis dal ben a chei altris, ma tu ti fasis dal ben ancje a ti parcè che tu ti mantegnis controlât.
Cemût fâ par donâ sanc? Se no us fasin cuintri indicazions, la sere prime mangjait lizêr e bevêt tante aghe.

Fontanini in visite a Sant Tomâs

Ta chescj dîs al è stât in visite a Sant Tomâs il President de Provincie di Udin Pietro Fontanini (te foto). Cun lui l'assessôr Provinciâl Adriano Piuzzi che lu à compagnât a cognossi il sît dal Ospizi di Sant Zuan. Tal prin coment, il resocont dal incuintri cu la zonte comunâl e i esperts che a son daûr a lavorâ li.
O soi content parcè che o viôt che al cres l'interès par un sît une vore impuartant ancje se cualchidun al continue a jessi convint che al sedi un "côl di claps"... (ancje tra i aministradôrs che a son sentâts in consei comunâl...).

01 agosto 2008

A mi mi ricuarde alc...

Su la stampe di chescj dîs al à tignût banc il câs di Vittorio Sgarbi, ex assessôr a la culture di Milan, revocât dal Sindic Moratti. Ogni tant il prof. Sgarbi al passe la rie, ma no si pue dineâ che al sedi une persone inteligjente e di une culture di nivel, discutibil sì, ma cun capacitâts.
Tornant al câs, il Tar al à dât reson a Sgarbi, revocât cence motivazion.
Cheste vicende mi ricuarde une altre revoche, ma che e à vût une altre conclusion... prin di dut parcè che jo no ai fat nissun ricors, stant che no mi somee che i tribunâi a sedin la sede miôr pe politiche.
Dut câs chest fat di cronache mi da une piçule sodisfazion morâl: provìn a gambiâ i nons... O pensi che si varès podût vê ancje chi cualchi biele sorprese.
Ancje jo o condivît la sielte che al à fat Sgarbi e mi sarès compuartât compagn, ma mi ven di fâmi une domande: ancje jo aio di lâ a fâ il Sindic in Sicilie?
:-)

Inmò compliments a Luca e Carlo

Nus àn dit che Farcadice, la serie di documentaris su la emigrazion furlane (Colonia Caroya, Charleroi, Umkomaas e Toronto), aromai si sierave.
Sperìn che il gnûf ricognossiment che a àn ricevût a Bardonecchia (Piemont) al zovi a fâur gambiâ idee. Pal moment, inmò tancj compliments a Luca e Carlo (te foto) e 2 grazie: un come "Christian" par vêmi dât la pussibilitât di partecipâ a une part di chest progjet e un come "furlan" par vêmi regalât une testemoneance inestimabil su la storie de mê int.
Par cui che al è interessât a viodi i documentaris, usgnot a Trep te cuarte fieste dal Emigrant e sarà la proiezion vierte par ducj. Si tache cuant che al va jù il soreli.