30 aprile 2008

28 aprile 2008

La Balconete. Un slambri di critiche teatrâl

di Elio Varutti
Di Nadâl, une cene plurilengâl
Tal Gnûf Teatri "Giovanni da Udine" di Udin ai 10 di Avrîl dal 2008, opare di Paolo Patui

Chest spetacul lu àn za viodût a Sant Denêl, Dartigne, Pontebe, Sant Vît dal Tiliment, Çarvignan, Cormons e Udin. Fat dal Centri Servizis e Spetacui Teatri stabil di inovazion dal Friûl Vignesie Julie "La lungje cene di Nadâl" e sta dentri chest pinsîr dal autôr: "Mi soi doprât sul teme de lenghe furlane tal teatri". Al à dit cussì Paolo Patui su chest test produsût intal an passât, fevelant cul regjist Gigi Dall’Aglio. Patui al à voltât e adatât in marilenghe "The Long Christmas Dinner", opare dal dramaturc american Thornton Wilder. La comedie, dal 1931, e veve vût une gruesse fortune intai teatris americans.
Il lavôr di Patui al è sul Nûfcent in Friûl, lant daûr ae vite di une famee di un paisut dongje Cividât. Lui di robis di teatri si intint. Nassût tal 1957, Patui si è laureât in Letaris modernis a Triest, cuntune tesi di Storie dal teatri, dute pontade su la figure dal autôr cjargnel Luigi Candoni, publicade tal 1987. Al à tacât a cjapâ premi di teatri tal 1979. Daspò al à lavorât pe Biennâl di Vignesie e pe RAI cun Elio Bartolini, par rivâ tal 2000 a scrivi "Bigatis: storie di donne friulane in filanda".
Cussì e je saltade fûr la idee di cheste "Lungje cene di Nadâl", un spetacul pulît, che al dure pôc di plui di une ore e mieçe. Il lavôr al è stât metût adun dal Centri Servizis e Spetacui Teatri Stabil di Inovazion dal Friûl Vignesie Julie. La sene e tache cu la famee che si tire dongje pe cene di Nadâl tal 1918. Lis lenghis feveladis tal palc a son il furlan, il sloven des Valadis dal Nadison (dome cualchi peraule, cualchi mût di dî), il talian e il dialet venit dai udinês. Il contest al è chel plurilengâl e plen di morbin. Come che al è scrit intai ats dal Consei de Europe dal 2000, la tindince plurilengâl e met l’acent su la integrazion di plui ocasions. Za il lengaç di cheste cjase al è un miscliç di sloven, di furlan e di talian. Daspò i atôrs a àn di meti ordin in chestis esperiencis linguistichis in maniere oblicue, prontant une competence comunicative cul public. Al sarès di fâlu viodi a scuele, tant che al è biel e impuartant pe storie.
Barbe Romeu (un madressût Fabiano Fantini) che al è stât emigrant in Americhe, al fevele furlan, cun cualchi peraule par inglês, come che e capite di sintî intai Fogolârs furlans de Americhe, dal Canadà o de Australie. La sô e je une figure ancestrâl. Si pues cjatale in ogni famee.
Dopo de cene ae fin de Vuere Grande, si passe al taramot dal 1928 e ancje par chel dal 1976, cence dismenteâsi dal fassisim, de vuere partigjane, cu la copadice di Purçus. Daspò e ven il timp de Ricostruzion, cul "Piano Marshall" e i soldâts americans che e puartavin lis "ciunghis". A son jenfri dal at unic ancje lis lotis pe autonomie furlane, pe universitât dal Friûl, ma ancje i sassinaments dai carabinîrs di Petean e dal maressiâl des prisons Santoro, copât dai teroriscj a Udin tal 1978.
Dut al è ben struturât. E i batimans a vegnin fûr a sene vierte, oltri che ae fin dal spetacul. A vegnin ben ancje lis imagjinis registradis di Cjaurêt, dal Orcolat e des cenis za fatis di cheste famee che e si clame Scarbolo, che a passin tal mûr de cjase. Po dopo la regjie e je chê dal mestri Gigi Dall’Aglio, un om di culture di Parme, che al à lavorât vie pe Italie e ancje tal forest, par inglês, par francês. Al è za stât regjist di "Bigatis" e al à fat spetacui in finlandês, in lenghe arabe classiche e par "parsi", fevelât tal Iran.
La schirie di atôrs (un plui brâf di chel altri) che a lavorin tal palc e cjape dentri Maria Ariis, Andrea Collavino, Sandra Cosatto, Stefania Del Bianco, Fabiano Fantini, Guido Feruglio, Rita Maffei, Riccardo Maranzana, Roberto Sferzi e Adriana Vasques, che e sune ancje il piano dal vîf, su composizions fatis a pueste dal mestri Davide Pitis.
Ancje lis vistiduris e lis senis a àn la lôr impuartance tal spetacul e a son opare di Emanuela Dall’Aglio. I zûcs des lûs a son di Alberto Bevilacqua e dute la produzion e je stade metude adun cul jutori dal Ent Regjonâl Teatrâl, de Fondazion Crup e des Provinciis di Udin e di Pordenon.
Pensait che il regjist Gigi Dall’Aglio (un dai plui brâf che o vin in Italie) al è sigûr di dî che Patui al è il plui brâf autôr di teatri di cumò, no dome culì te Patrie, ma di dut il Bielpaîs. Alore Bepi Agostinis, chel che al cjapave sù firmis pal Teatri Stabil dal Friûl, intun dibatit public fat dal Erdisu, te sale de Universitât di Viâl Ongjarie a Udin ai 19 di Març dal 2008, al à dit che i vin bielzà il dramaturc pal teatri stabil dal Friûl. Angela Felice, professore e storiche dal teatri furlan, invezit e à dit di jessi di une impinion contrarie. No si pues meti un oblic di fâ doi o trê spetacui par an, parcè che il teatri nol va ben fat cussì. Cheste e je la sô conclusion. Intant Patui al scrîf.

27 aprile 2008

Trofeu Rocco a Maian

Ve chi une imagjin dal Trofeu di balon pai zovins "Nereo Rocco". Di cualchi an ancje Maian al ospite cheste biele manifestazion sportive che e nas a Gradiscje dal Lusinç.
Te foto (grazie a Ranieri), di çampe a drete, si viôt il president de ASD Majanese Renzo "Gardo" Natolini; il vicesindic di Forgjarie Enrico Frucco e l'assessôr comunâl al sport di Forgjarie Marco Chiappolino, zovin e a la prime esperience in zonte comunâl. O aprofiti par fâur i auguris di bon lavôr a ducj i doi.

Consei comunâl

Lunis ai 28, aes 18.30, al sarà consei comunâl.
Chest al è l'ordin dal dì.
Jo purtrop par cuestions di vore no rivarai a jessi. Mi displâs parcè che cuant che cirche 2 setemanis indaûr si veve tacât a pensâ a ce date che e podeve lâ ben par chest consei, jo o vevi za anticipât al sindic che i "lunis", fint a Mai, a jerin par me un probleme parcè che o ai un impegn che no pues rimandâ e o vevi domandât par plasê di no fâ di lunis.

26 aprile 2008

La Afds e fâs 50

50 agns a son un aniversari impuartant e la Associazion furlane dai donadôrs di sanc e fâs fieste a la grande cul Congrès di dutis lis associazions di Italie.
Ve ca il calendari dai apontaments che a son tacâts joibe cu la conference stampe a Palaç Belgrât a Udin.
La fieste si siere domenie cu la Zornade dal donadôr.
Se o podês, deventait donadôrs ancje voaltris: une gote di solidarietât e regale un mâr di vite a cui che al à dibisugne!

Sience furlane

Cinc trasmissions di divulgazion sientifiche in lenghe furlane
E tache domenie ai 27 di Avrîl, a lis 10.15, su RAI 3 (sede regjonâl dal F-VJ) la serie televisive “Sience Furlane”. Una novitât inte ufierte comunicative in lenghe furlane, di fat il program al è il prin esperiment televisîf di divulgazion sientifiche in marilenghe. Une sfide impuartante pe continuitât de nestre lenghe e culture, che e pues dâsi dome se i aspiets plui impuartants de modernitât, come lis siencis, a vegnin coltivâts e divulgâts par furlan, doprant i mieçs di comunicazion plui adats. A garantî la cualitât de operazion e je la SSTeF (Societât Sientifiche e Tecnologjiche Furlane), che e ten adun ricercjadôrs, docents e professioniscj interessâts a lis tematichis de sience e de tecnologjie modernis, e al lôr disvilup e difusion in lenghe furlane. Tes cinc puntadis di “Sience Furlane”, che a durin sù par jù 12 minûts, Giorgio Cantoni al intervistarà cualchidun di chescj esperts par frontâ argoments come lis neurosiencis, la realtât virtuâl, la meteorologjie, lis siencis biologjichis e altri. A vierzi lis trasmissions, ambientadis intune librarie di Udin, Giusy Gubiani che e introdûs i temis e i autôrs. In sierade une bibliografie e une sitografie, utilis par cui che al volès profondî i argoments tratâts intes intervistis. Lis novitâts de trasmission però no integnin dome i contignûts ma ancje il lengaç, si à cirût di fat di ufrî une ocasion di divulgazion de lenghe furlane contemporanie intal grant public, cualificade di une terminologjie specifiche e insiorade di neologjisims necessaris a lis gnovis esigjencis espressivis. I tescj di “Sience Furlane” a son di Paolo Cantarutti, la realizazion tecniche di Alphavideo.

Sience Furlane, calendari des puntadis:
- domenie 27/04/08: “Viaç in 3D te Basiliche di Aquilee”, interviste al inz. Domenico Visintini;
- domenie 04/05/08: “Fenomens meteorologjics violents e cambiaments climatics”, interviste ai dot. Fulvio Stel e Dario Giaiotti;
- domenie 11/05/08: “Il cancar dal cjastinâr e lis curis biologjichis”, interviste al prof. Romano Locci;
- domenie 18/05/08: “Storie de vît in Friûl”, interviste al prof. Enrico Peterlunger;
- domenie 25/05/08: “Sintiments religjôs intal çurviel”, interviste al prof. Franco Fabbro.

25 aprile 2008

Zornade impegnative...

Vuê si siere la campagne eletorâl di Udin. Ta cheste fase conclusive, mi soi dedicât al relax cuntun pocje di tele.
E o speri propit che il gno amì Simone al rivi a jentrâ in Consei comunâl! E o fâs i compliments ancje a Michele Basso e a Marco Lenna che a àn cjapât un biel pac di preferencis! E cumò viodìn ce che al fâs Cainero!

22 aprile 2008

Un an cence pre Toni

Te gnot tra i 22 e i 23 di Avrîl dal 2007 nus lassave pre Toni (te foto), muart su la place di Visepente che al veve dome 66 agns. Par ricuardâlu, doman e sarà une messe te frazion di Basilian e domenie ai 27 di Avrîl a lis 6 di sere il grup di Glesie Furlane i dedicarà une cunvigne a Vençon. Par savê di plui, fracait chi.
E par vê il pdf dal numar monografic de Patrie dal Friûl che i vin dedicât l'an passât, fracait chi.

21 aprile 2008

Il Sfuei di Tavagnà

Us feveli di un progjet che o vin a pene presentât a Tavagnà: si trate dal Sfuei di Tavagnà (te foto la prime pagjine), un insert informatîf dut par furlan.
Par discjamâ il pdf, fracait chi.
Ce us parial?

19 aprile 2008

Farcadice in Canadà

Vuê mi è rivât l'invît pe proiezion dal ultin episodi di Farcadice di Luca Peresson e Carlo Della Vedova che cheste volte a son lâts in Canadà.
La proiezion e sarà lunis ai 28 di Avrîl a Feagne.
Par viodi ben l'invît, fracait chi.

18 aprile 2008

Il cjistiel di Susans

Come che o podês lei sul blog de Ninine, ta cheste domenie al sarà pussibil visitâ i cjistiei de nestre regjon.
Jo o segnali il cjistiel di Susans (te foto), un dai plui biei de zone che come architeture al riclame une vile dai Medici in Toscane.
Buine gjite a ducj!

Par rivâ a Susans: fracait chi.

Al torne Fuarce Furlans

Su Radio Communicar Fm o podês tornâ a scoltâ la trasmission par furlan fate dai amîs di Colonia Caroya.
Un mandi a Claudio Roya, Marta Copetti, Daniel Cagnelutti e "Lito" Carrizo.
Apontament sabide aes 12.30 ore argjentine (17,30 ore furlane) su Radio Communicar Fm e lunis aes 13.00 ore furlane su Radio Onde Furlane.

17 aprile 2008

Dotôr Renato

Un "Brâf" a Renato Cracina (te foto), gnûf dotôr cun tesi par furlan a Gurize e ancje condutôr dal gnûf notiziari su RadioRai par furlan.

16 aprile 2008

Novitâts in ufici tecnic

Dopo la lungje corse eletorâl (inmò compliments a Renzo e a Adriano), o feveli di une gnove che e je za stade tratade sul blog di Intesa per Majano: il responsabil dal ufici tecnic si è dimetût.
No mi son claris lis motivazions, ma te riunion de comission ambient di usgnot o pensi che al vignarà fûr cualchi element in mert.

15 aprile 2008

Il President de Provincie di Udin

E dopo de elezion dal regjon, si contin lis schedis pe elezion dal President de Provincie di Udin: ve ca i risultâts.

Chi il risultât di liste tal coleç di Sant Denêl.

Il President de Regjon

E vuê si torne a tacâ, scrutinant prin lis schedis pe elezion dal President de Regjon: ve ca i risultâts.

In particolâr, ve ca i risultâts par Maian.

13 aprile 2008

Procès Somsi

Intun coment, Fausto Floreani nus informe de sentence dal procès che al rivuarde la Somsi di Maian. Ve ca il coment in cuistion.
La notizie e je ripuartade ancje sul gjornâl di îr.

12 aprile 2008

Lait a votâ

Si è sierade la campagne eletorâl e come che al è just, ancje jo di sabide fint lunis o rispietarai la regule di no fevelâ di elezions ta chestis zornadis, fintremai che no si savaran i risultâts.
Cun di plui, ta chest fin di setemane, a restaran visibii dome i posts di joibe indevant. Forsit cheste sielte e podarès someâ ecessive, ma o preferìs fâ cussì.
Dut câs, l'archivi al reste acessibil.
Prime di sierâ cheste campagne eletorâl o fâs però une ultime racomandazion indipendentementri des vuestris opinions politichis: LAIT A VOTÂ!
O vin vût tant di spietâ prime che tal 1946 ducj a podessin esercitâ chest dirit e forsit cumò a cualchidun, massime pai zovins, al somee une robe naturâl. Ma no je cussì.
Cualchi volte si à la tentazion di dî "Nol covente: tant nol gambie nuie, a decidin simpri chei"... clamaitmi idealist, ma jo o soi convint che se no si va a votâ si fâs un plasê a chei che no àn rispiet dai citadins e dai nestris dirits. Par chest us torni a dî a ducj: LAIT A VOTÂ!
E stant che a saran tantis schedis, par no fâ confusion, cjalait achì.

11 aprile 2008

Al torne Alc&Cè

Ve chi, in regâl cu la Vite Catoliche, il gnûf numar di Alc&cè, il gjornalut par fruts dut in marilenghe curât de brave Erika Adami, realizât cul contribût de Direzion centrâl Istruzion, culture, sport e pâs de Regjon Friûl-Vignesie Julie.
Chest colp si fevele dal bosc dai lôfs. A tornin i Gnognosaurs, Sclisignûf e Alan l’acuilot nostran cu lis lôr aventuris divertentis a fumets; cence dismenteâ i zûcs. E po tantis ideis pal timp libar.
Par sugjeriments e curiositâts sul gjornalut, si pues scrivi une e-mail a Erika Adami, coordenadore de riviste, ae direzion: adami@lavitacattolica.it

Par discjamâ il pfd, ancje dai numars passâts: fracait chi

10 aprile 2008

Il 5 par MIL ae Patrie

Ancje chest an, come l'an passât, cuant che tu âs di fâ la declarazion dai redits, tu puedis decidi di regalâ il 5 par mil a un ent.
Dânus une man: no ti coste nuie, al baste dome meti tes caselis il riferiment de Patrie dal Friûl.
Scrîf 01299830305.

LOTANT PAR UN FRIÛL PLUI FURLAN, TU STÂS MIÔR ANCJE TU!

Riedo Pup al diseve:
«A son sfueis che a àn un intent sôl: dâi vôs a la int, sintî, racuei e documentâ lis propuestis, lis richiestis e lis protestis dai furlans. A son gjornâi che a fasin vitis a vivi, a stentin a rivâ, ma no molin. A son come poleçuts denant dai falcuçs, ma no si rindin. A son e a vuelin restâ a servizi dal Friûl e a muerin pluitost di metisi al servizi de poiane».
(gjavât fûr dal libri «Magari Ancje» ed. «La Vita Cattolica», 1983)

Grazie pal to contribût!

Il Diari di Tosoni

Ve ca la cuviertine dal Diari, cuindisinâl jessût îr e che o podês discjamâ in version pdf fracant achì.

Simone e Federica a Udin

Di lui us ai za fevelât, ma stant che al à publicât il so santut (te foto), velu chi une altre volte: se o fos a stâ a Udin o votarès par Simone Bressan (PdL)!
Ma a chei di çampe o consei Federica Angeli (liste çampe Arc di Sant Marc).

Sperìn che tal prossin consei comunâl di Udin a rivin a jentrâ ducj i doi: al sarès un ben par dute la citât.

09 aprile 2008

Il Comitât 482 te Rêt

O segnali la iniziative dal Comitât 482 che si met in linie cun pagjine web (te foto) e blog.
Une vore di documents, informazions e segnalazions di bande dal coordenament che al met adun associazions, ents e singui citadins che a àn a cûr la tutele dai dirits linguistics di furlans, slovens e todescs de nestre regjon.

08 aprile 2008

Interviste a Claudio Violino

O segnali une interviste di Claudio Violino (te foto) sul portâl www.lenghe.net.
E domenie o lunis, su la schede pe elezion dal Consei regjonâl, segnait Lega Nord e dongje scrivêt VIOLINO.

Il Moviment Friûl e i candidâts Presidents de Regjon

Us segnali cheste iniziative dal Moviment Friûl che al domande un incuintri confront cui candidâts ae Presidence de Regjon. Tal prin coment us met il comunicât che mi à mandât il segretari Marco De Agostini. Apontament li di Caucigh a Udin in vie Glemone aes 17.15 di doman miercus ai 9 di Avrîl.

E la ligrie e je a Vissandon


Domenie o jeri a Vissandon, miôr cognossude ancje cul non di Uosjinton (Washington) parcè che i abitants di li a fevelin cul "sji". Ise vere Ninine?

06 aprile 2008

Vignesie Julie, la regjon inventade

O segnali chest biel libri curât di Roberta Michieli e Giuliano Zelco: Vignesie Julie, la regjon inventade.
Un libri di lei, parcè che la storie di chest teritori masse voltis nus è stade contade come che ur comodave ai sorestants. Ma probabilmentri la veretât e je une altre...
Grazie a Roberta, a Giuliano e a ducj chei che a àn lavorât.

05 aprile 2008

Cristina Mauro e Stefano Montello a Maian

Usgnot in auditorium, ancje il comun di Maian al ricuarde la Fieste de Patrie dal Friûl e lu fâs cuntun biel spetacul musicâl di Cristina e Stefano dai FLK: viaggio notturno.
Apontament aes 20.45 in Auditiorium.

04 aprile 2008

Cun Piuzzi par Fontanini President

Îr di sere o ai stât a Sant Denêl a un comizi di Pietro Fontanini cui candidâts conseîrs pe Provincie di Udin: Pietro Bosari (Udc), Mauro Fornasiero (Lega Nord) e Adriano Piuzzi (Pdl) (te foto).
Al à viert Bosari, che al à fevelât de sô esperience aministrative, ma le à fate un tic lungje e no mi à entunsiasmât. Po dopo al à cjapât la peraule Fornasiero che al jere pardabon emozionât, ma mi à fat simpatie: e je la sô prime corse eletorâl impuartante e tal so program e je la intenzion di puartâ dedizion e impegn te azion aministrative cuntun voli pai plui debui.
Ma i intervents che mi à plasût di plui a son stâts chei di Adriano Piuzzi e Pietro Fontanini.
O pensi che cuant che un candidât al presente no dome un curriculum e une esperience, ma ancje la passion e la voie di fâ inmò tant come lui, no esistin discors di part: Adriano Piuzzi al è une garanzie par dute il nestri teritori, parsore dai schieraments, un om di votâ sedi di chei di centridrete, sedi di chei di centriçampe. Sociâl, politichis pai zovins, atenzion pal mont des ativitâts produtivis, pal teritori in gjenerâl e ancje une conferme par un impegn a pro de lenghe furlane, che la Provincie e à simpri vût ta chescj ultins agns "e che e à di restâ un pont impuartant tal program" al à dit Piuzzi.
A la fin il candidât president Pietro Fontanini al à fat il so intervent: par furlan.
Un che al à fat il sindic, il president de Regjon e il parlamentâr nol à bisugne di tancj coments: prime al à ricuardât la fieste dai 3 di Avrîl e il significât, ripuartant lis peraulis di pre Checo. Dopo al à fat un resonament gjenerâl su la situazion politiche metint in evidence la situazion di gjenerâl dal stât e po al è jentrât te cuestion provinciâl: da la voie di tornâ a partî dopo un episodi no facil, a la necessitât di otimizâ la azion de provincie in setôrs delicâts come chel de scovacis ("La nestre e je brave int e e pues dâ risultâts bogns cu la racuelte diferenziade: par chest e va premiade e ce che si sparagne al va tornât a la int che e varà di paiâ mancul tassis pes scovacis", al à dit Fontanini) o chel dal lavôr e de formazion.
La conclusion: "Fuarce Friûl"!
A la fin mi soi tirât dongje e o ai vût mût di fevelâ cun lui de cuestion dai sportei linguistics e si è dimostrât interessât e al à preseât lis mês peraulis.
Sì, o soi propit convint e content di votâ pe provincie: Adriano Piuzzi par Pietro Fontanini president.

03 aprile 2008

La nestre Fieste Nazionâl: vierzìn i voi!

Ai 3 di Avrîl di ogni an si celebre la fieste de Patrie dal Friûl, ricuardant la nassite dal Stât Patriarcjâl di Aquilee.
Il contest
L’Imperadôr Indrì IV, tornant di Canossa, li che i jere stade gjavade la scomuniche di Pape Gregori VII, al ven salvât dal so amì Siart di Beilstein, Patriarcje di Aquilee, che lu jude a scjampâ de vuaite dai nobii che lu menaçavin. Par ringraziâlu de fedeltât e dal jutori prestât, ai 3 di Avrîl dal 1077 l’Imperadôr Indrì IV al firme la bole imperiâl che e conferìs al Patriarcje Siart il podê temporâl: pe prime volte la aree, che e cjape dentri i teritoris dal Friûl, Cjargne, Cjadovri, e ancje zonis che vuê a son in Austrie, Slovenie e Istrie, e je governade di une autoritât locâl e autonome che e à sede a Aquilee.
Lis funzions dal Patriarcjât
Il storic Gian Carlo Menis, te sô “Storie dal Friûl”, al scrîf «Si costituive cussì un vast e compat teritori che al veve di sotstâ ae uniche jurisdizion feudâl dal Patriarcje. Intune peraule al vignive fondât chel “principatus Italiae et Imperii”, politic-eclesiastic, che al sancive une realtât sociâl za consolidade mediant di un lunc procès storic e che, di li indevant, par trê secui e mieç, e varès unît i furlans in formis simpri plui elevadis di vite civîl».
Il Parlament dal Friûl, un dai prins in Europe
Il Stât Patriarcjâl si à di ricuardâlu ancje par un altri impuartant orghin istituzionâl: Il Parlament dal Friûl che al clamave adun rapresentants de glesie, de nobiltât e dai comuns. No je date precise che e documenti la fondazion di cheste istituzion, volude dal Patriarcje ancje par limitâ lis pressions de nobiltât. Ma al è sigûr che il Parlament dal Friûl al nassè ben prime dal 1215, cuant che in Ingletiere e fo scrite la Magna Charta Libertatum, il document che al fasarès tacâ la ete de democrazie parlamentâr.
Ma in Friûl o sin rivâts almancul 20 agns prime!
Il 3 di Avrîl in dì di vuê
Ricuardâ une date al à un valôr simbolic, ma no si pues fermâsi a une semplice celebrazion. Al à di jessi un moment par resonâ su la nestre storie, cence nostalgjiis anacronistichis, ma cu la cussience che il Stât Patriarcjâl al rapresente il prin e il plui lunc (al durà fintremai al 1420) esempli di autoguvier dal nestri teritori.
Ve chi ce che al diseve ancje Pre Checo Placerean.

02 aprile 2008

Curiositâts: candidâts zovins e furlans

Come che o ai za dit se o fos a stâ a Udin o darès la mê preference a Simone Bressan (liste PdL), un gno amì che come me ancje se nol è di çampe, al pense che la tutele de lenghe furlane e sedi une robe juste. Mi à plasût che al à preparât ancje i santuts par furlan.
Une altre candidade, simpri mê amie, ma di chê altre bande e je Federica Angeli (liste çampe Arc di Sant Marc). Ancje jê e à fat i santuts par furlan. E no dome e pense e e dîs che la tutele linguistiche e je une robe impuartant: ancje lu dimostre cui fats e cun fuarce. E par chest o segnali une iniziative che e je previodude par vinars ai 4 di Avrîl: fracait chi par lei il program. Brave Federica!
Dut câs, o fâs une racomandazion finâl. Se tu sês un eletôr di Udin e tu âs a cûr la tutele de lenghe furlane ancje pal to comun, tu âs 2 sieltis intes elezions comunâls: se tu sês di centridrete vote Simone Bressan; se tu sês di centriçampe vote Federica Angeli (liste çampe Arc di Sant Marc).

Ringraziaments transoceanics




Vuê Luca mi à fat une biele sorprese publicant il video dal Sindic di Sant Durì: une biele sodisfazion personâl. Grazie Luca.
Ma il grazie e un cjâr salût lu mandi ancje e soredut al siôr Sindic di Sant Durì e a ducj i furlans argjentin di là jù.

01 aprile 2008

Ce sdrondenade...

O rivi dome cumò a scrivi alc. Par dut il dì o ai scugnût cirî di ripiâmi di ce che o ai let sul gjornâl di vuê... sperant che al fos un pes di Avrîl.
Parcè che par me nol è just e no condivît ce che Renzo Tondo (te foto) vuê al à dit a proposit di lenghe furlane.
Secont me, i bêçs pe tutele de lenghe furlane no son bêçs strassâts. Tantis realtâts europeanis ancje se a son plurilengâls, a son un grum svilupadis dal pont di viste economic, culturâl e turistic: Catalogne, Paîs Basc, Lussemburc, Irlande, Gales, e vie indevant. Pal svilup economic il plurilinguisim nol è avonde, ma dal sigûr al jude: e za chest al varès di fâ rifleti su la sô impuartance, e su chê des risorsis di investî parsore. No par câs, i paîs a pene nomenâts a investissin une vore di plui di bêçs di ce che no fâs la nestre regjon. Investî risorsis tal pluirilinguisim no dome al cree puescj di vore leâts in maniere direte a chest cjamp, ma al met in vore un circul virtuôs che al zove ae inovazion e al svilup di un indot une vore larc. Intune economie globalizade come la nestre, il plurilinguisim al rapresente un vantaç che al permet di caraterizâ i prodots cence il pericul di omologâsi: par fâ un tant no coventin finanziaments a ploie, ma une politiche linguistiche serie. Ve che alore, investî ta chest cjamp, plui che util, al somee necessari.
E no baste dome la famee. Daûr di diviersis ricercjis di nature sociolinguistiche, tai ultins agns la lenghe furlane e à pierdût l’un par cent dai fevelants ogni an. Il furlan al à pierdût plui teren tai ultins cuarante agns che no tai cuatri secui prime. Chest al dipent massime dai gambiaments radicâi che a àn segnât tal stes periodi no dome la societât furlane, ma il mont intîr. In dì di vuê i mieçs di comunicazion a àn une presince mai cussì fuarte, la scolarizazion e rive pardut e i percors formatîfs a domandin timps simpri plui luncs, cualsisedi ativitât e à di passâ par procès che a domandin un ûs grandonon di documents e materiâi scrits. Tune realtât come cheste, pensâ che une lenghe e puedi sorevivi cence une sô presince publiche e uficiâl te scuele, tai mieçs di comunicazion, te aministrazion publiche e je, te miôr des ipotesis, pure utopie e, te piês, une semplice façade par platâ la volontât di copâ une lenghe.

O scuen ametilu: o soi restât mâl pes declarazions che o ai let... cussì mâl che il Luca, mi à dedicât ancje un post...