31 gennaio 2008

Sistemazion dal monument dal taramot

Vuê o ai voie di fevelâ di une cuestion une vore delicade che e cjape dentri aspiets emotîfs e di ricuart.
A Maian in vie Rome, di front de farmacie, agns indaûr al è stât realizât un monument par ricuardâ lis diviersis vitimis che li a son stadis par cause dal taramot dai 6 di Mai dal 1976.
Di fat, ta chê aree al jere un dai doi condominis che a son colâts ta chê sere. Par volê de fameis la zone e je stade dedicade ae lôr memorie cu la costruzion di un monument che al presente diviers simbui: la aghe che e rapresente la vite, i mûr che a simbolizin l'edifici ceh al jere prime, une frase di Pasolini e vie indevant.
Cul timp chest monument al à tacât a vê cualchi problemut e dopo che il comun al à za proviodût ae sistemazion dal implant idraulic, cumò e sarès la ocasion par dâi une sistemade complessive.
O vin fat une comission e nus àn dit cuâl che al sarès l'intervent, che mi cjate dacuardi su cuasi dut.
I lavôrs (in dut 30.000 euros) a previodaressin la sistemazion dal implant di iluminazion (cuasi 15.000 euros), la sistemazion dal vert e la rifrescjade dai mûrs perimetrâi.
Come che o ai za dit, mi semee just meti a puest chel simbul che al à chê di ricuardâ i tancj muarts che a son stâts a Maian ai 6 di Mai dal 1976 (in dut 131, il secont numar di vitimis dopo Glemone). Cun di plui o pensi che al sedi impuartant fâ capî e insegnâ ai fruts des scuelis ce che al è sucedût e parcè che al è stât fat chest monument.
Mi è vignude cualchi perplessitât cuant che o ai sintût che si volarès meti une lapide in piere di Torean (alte 60 cm, lungje 520 cm e di spessôr 3 cm) cui nons dai 131 muarts incidûts (cu lis letaris dai nons altis 3 cm). Il cost di cheste lapide al varès di jessi di 5000 euros (1/6 dal totâl de spese: intun prin moment a vevin pensât di fâle di bronç, ma e sarès vignude a costâ inmò di plui) e e varès di jessi metude li che al è il salt di aghe. Tal cimitieri di Maian, intune capele, e je une lapide similâr cun za ducj i 131 nons des vitimis.
O ripet: o soi convint ancje jo che chest spazi al vedi di jessi mantignût in ordin, ma secont me forsit si podarès valorizâ la memorie in maniere plui eficace cun altris iniziativis e no tornant a scrivi in nons suntun piere, che tra l'altri e je za presinte tal cimitieri. Pluitost o condividarès di plui un panel (magari cuntune planimetrie e lis didascaliis) che al fasi capî lis motivazions e la simbologjie doprade pe realizazion dal monument stes.
Cumò o volarès sintî di bande dai letôrs se a condividin cheste sielte, parcè che se ancje mi soi declarât perplès su cheste sielte, se mi ven motivade e mi jude a capî, o pues simpri sclarîmi lis ideis e magari valutâ in maniere divierse cheste part di intervent.

(te foto: i funerâi fats tal cimitieri di Maian juste cualchi zornade dopo de scosse sismiche)

30 gennaio 2008

Grazie a Glesie Furlane

O aprofiti par ringraziâ la Associazion Glesie Furlane che e à regalatât un carton di libris a la biblioteche comunâl dal gno paîs.
I titui regalâts a son a son passe 30 e pal plui a son libris che al veve scrit pre Antoni.
Cumò ancje i utents de nestre biblioteche a podaran cjatâ e lei i siei pinsîrs e lis sôs riflessions.

29 gennaio 2008

Il libri di Romanin, che no soi jo

Doman e je la presentazion dal libri di Romanin.
Ancje se al semearès che e fos publicitât autopromozionâl, achì si fevele di Fulvio Romanin, chel cence "i" parcè che al è origjinari di Fors Davôtri e no di Dartigne come gno nono e i Romanini di Borc di Clame.
Tornant al libri, ve ca la date, il puest e l'orari de presentazion:

Circul Arci ZOO
Vie Fiume 13 UDIN
Miercus ai 30 di Zenâr aes 9 di sere.

Ce si puedial anticipâ?
Ben, il titul al è NIARI ("neri" come che lu disin a Fors Davôtri), sottitul "Two pulp tales" (La Comugne, ed. Kappavu).
A son dôs contis noir cuntun ritmi coinvolzent, cinematografic. La lenghe dal autôr e je sflandorose, e passe dal talian al furlan te varietât di Fors Davôtri cun incursions di slang, regalant une gnove consapevolece al fevelâ miscliçât de ere globâl.
Leturis di Stefania Nonino e Giorgio Romanin.

26 gennaio 2008

O soi di Farle


Intant che voaltris o cirîs di induvinâ cui che al è chel cul cartel picjât te schene, jo o fâs i compliments al neodotôr di Farle laureât a la Bocconi di Milan!
Brâf paisan! E se tu sês colegât, fasiti vîf! :-)

24 gennaio 2008

E vie nô...

Tal ultin consei comunâl e je stade votade une mozion di censure a la zonte comunâl pe cuestion dal Cipaf: la perimetrazion (individuazion urbanistiche de zone di conferî al Consorzi, ndr), domandade dal Consei a metât dal 2007, no je stade presentade te riunion dal Cipaf dai 12 di Dicembar dal 2007 e cussì o sin restâts fûr. L'assessôr ai LLPP Aldo Zucchiatti (te foto) al à fat la relazion su ce che al è sucedût.
La votazion de mozion di censure a la zonte e je stade cussì: 8 contraris, 7 favorevui (minorance e Casciano), 1 astignût (jo).

Ce sorte di cine

Come che o savês, o soi daûr a preparâmi par jentrâ tal magjic mont di aur dal cine.
Par tacâ a cjapâ confidence cun chest ambient, mi soi butât a viodi un cine che al passarà te storie (chi in bande il manifest, ndr)...
Bon bon, forsit le ai dite masse gruesse.... ma o soi inmò che o rît: "Spider porc, spider porc... il soffitto tu mi sporc..."

23 gennaio 2008

Compliments a Maria Marceddu

La mê vicine di cjase, Maria Marceddu e je deventade presidente regjonâl dai Circui dai Sarts in F-VJ.
O soi propit content par jê e o soi convint che e lavorarà benon!
Marie e je ancje tal diretîf dal Circul di Udin, li che l'an passât e je deventade vicepresidente!
Brave Marie e bon lavôr!!!

22 gennaio 2008

Un Tubet che al cjante

Ve ca une biele trasmission suntun argoment che al posarès semeâ contraditori: hiphop e il furlan. Gego che su SunsAtor di Massimo Garlatti Costa al interviste DjTubet (Mauro Tubetti di Nimis) e Dlh Posse.

DjTubet part1


DjTubet part2


DLH Posse

Stelutis alpinis


Torzeonant te grande Rêt, ogni volte tu cjatis alc di biel. O ringrazii chest Ma7174 che su youtube al à metût un biel video cu la cjançon Stelutis Alpinis di Arturo Zardini.
Us met achì il video e il test di cheste splendide poesie in musiche dedicantle a ducj i furlans che a son ator pal mont.

Stelutis alpinis
Se tu vens ca sù tes cretis,
là che lôr mi àn soterât,
al è un splaç plen di stelutis:
dal gno sanc al è stât bagnât.

Par segnâl, une crosute
e je scolpide li tal cret:
tra chês stelis e nas la jerbute,
sot di lôr jo o duar cuiet.

Cjol, sù, cjol une stelute:
je e ricuarde il nestri ben.
Tu i darâs une bussadute,
e po platile tal sen.

Cuant che a cjase tu sês sole
e di cûr tu preis par me,
il gno spirt ator ti svole:
jo e la stele o sin cun te.

21 gennaio 2008

Gjernazie maladete

Cheste me à mandade Marco De Agostini e le publichi vulintîr:

Cheste e je la traduzion furlane di un “lament” in lenghe siciliane di un poete di Acireale dal votcent, Lionargo Vigo, une “poesie-cjantade dedicade ai puars criscj de ducee di Bronte”. De poesie si cjatin almancul dôs versiôns parcè cuant che fo publicade e fasè scandul e dutis lis copiis a forin secuestradis.
E trate de indole dal popul sicilian che al sta simpri a lamentâsi cuintri i potents e il guvier ma tal moment di gambiâ lis robis si tire indaûr, ancje parcè al è cinichementri cunvint che “ si scuen gambiâ dut par no gambiâ nuie”, cence rivâ a capî che cul so imobilisim al devente manutengul de sô disgracie. Il racli al podarès jessi ancje un mieç no violent. La poesie-cjançon e je un invît a no spietâ che a sedin chei altris a mudâ lis robis par nô, ma a cjapâ in man lis brenis dal nestri destin.

Gjernazie maladete

Tu ti lamentis, ma ce ti lamentistu?!
Cjape un racli e scusse i dincj.

Un sotan, za timp, intune place,
al preave Crist in crôs e i contave:
“Crist, il gno paron mi strapace,
mi trate come un cjan di strade,

mi gafe dut cu la sô manate,
nancje la mê vite al dîs che e je mê,
distermine Gjesù cheste gjernazie maladete,
distirpile Gjesù, fâlu par me,
fâlu par me".

Tu ti lamentis, ma ce ti lamentistu?!
Cjape un racli e scusse i dincj.

Crist al rispuindè de crôs:
“Ti si sono, par câs, crevâts i braçs?
Cui che al vûl justizie se fasi di bessôl,
nissun aromai le fasarâ mai plui par te.

Se tu sês un om e no tu âs ancjemò pierdude la reson,
scolte ben cheste mê sentence,
parcè che jo inclaudât in crôs no sarès
se o vès vût fat ce che o sugjerîs a te.

Achì jo inclaudât in crôs no sarès”!

Tu ti lamentis, ma ce ti lamentistu?!
Cjape un racli e scusse i dincj!!!



E nô furlans? Cuant cjaparìno sù un racli?

(libare traduzion di Marc De Agostini)

20 gennaio 2008

Une fevelade cun Marco De Agostini

Vuê o ai stât a Grau. No soi un che al frecuente chel paîs: o soi om di tiere (miôr se cuntun tic di culine) e no di mâr.
Ma cheste volte mi soi mot parcè che mi à cirût Marco De Agostini, (te foto cul so cjan, intant che al ten di voli Triest vie mâr) segretari politic dal Moviment Friûl.
Mi à fat plasê.
Mi à fat plasê parcè che nol capite ogni dì che un segretari politic ti ciri parcè che al à voie di fevelâti e di cognossiti.
Mi à fat plasê parcè che al jere un pôc di timp che o vevi cheste curiositât di cognossi il Moviment Friûl, che fint cumò o vevi let dome sui gjornâi o sintût di tiercis personis.
O vin fat une lungje fevelade di politiche, dal Moviment Friûl, de storie di chest partît, di cemût che al è vuê il Friûl... e vie indevant.
Plui che altri jo o ai scoltât, stant che Marco De Agostini a 'nd à viodudis tantis e la peraule no i mancje: dal sigûr un bon oratôr che al à ce dî.
Mi à ancje segnalât il sît dal Moviment Friûl cul stampon di document programatic pal 2008.
Fevelant, il discors al è lât su cemût che i zovins a viodin il Moviment Friûl. Jo mi riten zovin, ma no pues fevelâ a non di ducj i zovins: i ai dome dit che personalmentri e coventarès plui informazion adiriture su la storie dal Moviment Friûl e su la ativitât stesse dal partît. E par comunicâ al covente doprâ i imprescj di vuê. Al à preseade cheste critiche, almancul mi semee.
Mi sa che a saran inmò moments di incuintri...

De profundis

Dal sigûr la grandece di un libri no si le misure cul numar des pagjinis, ni cui centimetris dal volumut stampât.
E il "De profundis" di pre Antoni Beline al è un grant libri, ancje se ti sta intune sachete.
Scrit dal 2003, cuant che pre Toni al à tacade la sô "Viacrucis" de dialisi, il "De profundis" nol è dome il diari di un malât, ma la confession sclete di un predi, ma prin di dut di un om, che si cjate, pe enesime volte denant de malatie, cirint chel lusorut par saltâ fûr di chel scûr che al semee a glotiti, cuant che e tache a smavîsi la salût e tu sintis a clopâ la vite.
Tai siei resonaments fins e profonts e ven fûr come simpri la scletece, la umanitât, ma ancje la grande sapience dal teolic che al compagne i siei discors cun citazions cultis, riferiments de scrituris sacris, ma ancje ripuartant lis peraulis de int semplice, confermant inmò une volte la grandece di chest grant om di glesie e di culture, che però al saveve fevelâ al popul cul cûr in man.
Il "De profundis" al è un libri che ti sglonfe il cûr e che ti fâs rifleti su la vite.

Al scrîf pre Toni (pagjine 176):
"O pensi a mê none cjargnele, femine fuarte e sfurtunade, che e veve la usance di meti la clocje a cloci i ûfs in cjase, di pôre dal cagnaus. E contave lis zornadis e, sul spirâ dal timp, e leve ogni dì a sclusignâ par viodi se di viodeve cualchi moviment di sorte. A pene che il poleç al dave il colput par dentri e al segnave il scus, jê e spesseave a rompilu par deliberâlu. Ma la prime becade al veve di dâle lui, se no al voleve dî che l'ûf al jere clop o che il poleç al jere muart dentri. Saltâ fûr di cheste aventure al come saltâ fûr dal scus e imparâ a sgjerpedâ. La prime becade, il prin colp, la prime volotât e convinzion a à di jessi la mê e di nissun altri. Se no e je violence, ancje se a fin di ben, e no mi zove. O ai di cjatâ dentri me chês motivazions umanis, psicologjichis, filosofichis, relogjosis che mi dan la fuarce di lâ indenant in serenitât e normalitât. Ducj chei altris, dal plui dongje al plui lontan, a puedin judâmi, ma no sostituîmi. O ai di jessi jo a dî di sì, a tornâ o almancul tentâ di fâ cressi lis plumis e lis alis par svolâ, par alçâmi parsore vie de prosaicitât e scuvierzi il gust di vivi, la furtune di esisti, la gracie di podê pensâ e operâ".

Pre Toni al à di vê patît tant te sô vite e cheste ultime scopule lu à segnât inmò une volte, ma i à ancje permetût di cognossi miôr trop che la int i voleve ben, stant che in ospedâl a levin in tancj a cjatâli.
Come che tancj a son lâts a compagnâlu in chê dì che al à bandonât cheste tiere.
Par informazions e par vê i libris di pre Toni, clamait pre Tonin Cjapielâr (Ruvigne - UD) 0432.957268 o pre Roman Michelot (Vilegnove di Sant Denêl - UD) 0432 956010

19 gennaio 2008

Risarciment pe tampieste

L'assessôr Stefano Tuti mi à mandât une mail par visâ che dopo de tampiestade dal mês di Lui dal 2007, la Regjon F-VJ cun DPGR 0419/Pres. e à stanziât contribûts pal risarciment dai dams a micro e piçulis impresis.
Vuê come vuê, cuntun decret di pueste, e je stade ricognossude come aree cjapade dal event dome la frazion di Pêrs.
I tiermins par presentâ domande a scjadin ai 23 di Fevrâr e par informazions si à di contatâ l'ufici tecnic (tel 0432/948455).


Il Diari di Tosoni ogni 15 dîs

Une setemane che e finìs cuntune biele notizie: Il Diari di Mauro Tosoni, cul 2008 al devente cuindisinâl. Ve ca la cuviertine dal gnûf cors che al puartarà la riviste ogni 15 dîs sot dai voi di ducj chei che a cirin informazion par furlan: fracait achì par vê il pdf.
Compliments al diretôr Tosoni e a dute la redazion.

Ve ca il messaç che si cjate te homepage dal Diari:

il Diari cuindisinâl
Come che o vevin anunciât, intal 2008 il Diari al saltarà fûr doi viaçs par mês. Par chest sucès i sin ricognossints ae Regjon, massime al assessôr Roberto Antonaz, che al à crodût intal progjet a prin colp. E cumò ae Agjenzie Regjonâl pe Lenghe Furlane (Arlef) che nus da i mieçs par fâ il grant salt. Graziis ancje a ducj chei che a fasin reclam par furlan e nus permetin di dâ fûr a gratis il sfuei. Ma massime, graziis ai tancj furlans che a cjolin sù il gjornâl tai bars, tes buteghis e tai uficis publics dulà che al ven distribuît: cence la lôr fam di furlan, il sium di un gjornâl di croniche in marilenghe al sarès restât intun scansel.

18 gennaio 2008

Puare Italie

Vuê mi soi jevât adore parcè che o vevi un grop che no mi faseve durmî.
Plui o pensi a lis primis pagjinis dai gjornâi di chescj dîs e plui mi ven stomi.
Mi ven stomi a pensâ a ce nivel che al è il dibatiment politic in Parlament, a trop in bas se la classe politiche taliane e je rivade. Parcè disio cussì?
No ai voie di fâ il populist e o cirarai di motivâ cheste afermazion cun dâts di fats.
Tachìn de cuestion dal Pape: al è sucedût ce che al è sucedût, ma un dai aspiets plui avilents al è il compuartament di un grant numar di politics che si son metûts a comentâ in maniere ofindude il scandul che il Pape nol à podût fevelâ (achì o cjatais dut il so intervent). A àn tirât in bal la cuestion religjose. Ma se ducj chescj politics a son cussì scandalizâts parcè che la massime autoritât dal Catolicisim e je stade contestade intune Universitât statâl, dulà jerino cuant che il Dalai Lama al è vignût in Italie? Parcè nissun aial dit nuie cuant che il mont politic si è cuasit vergognât di cheste visite e no àn dit une peraule parcè che a vevin pôre di fâ displasê a la Cine (la gnove frontiere dal marcjât globâl li che tancj dirits umans a son inmò une utopie dineade)?
W la Laicitât dal Stât: libare glesie in libar stât! L'unic intervent che mi à plasût al è stât chel di Renzo Tondo che sul blog di Vanni Lenna al à dit che jessi laics al significhe vê rispiet des ideis di chei altris, e no vênt pôre.
Seconde cuestion e rivuarde il câs Mastella: parcè dute cheste solidarietât a un ministri (chel de Justizie, migo un cualsisei!) che dopo dut al è indagât par reâts a rivuardaressin la malepolitiche e i rapuarts no nets tra podê politic e societât. Fint che un procès nol passe in judicât ogni incuisît al à di jessi considerât inocent, ma ta chestis ocasions, propit parcè che la cuestion e je delicade, la politiche e varès di stâ tal so puest e lassâ che la magjistrature e fâsi il so, cence scandalizâsi se e incuisìs un politic: un bon tasê nol fo mai scrit! Ancje se al sarès ben che cierte magjistrature e evitàs il sensazionalisim e lis indagjins spetacul... Un dai principis di fonde par un stât democratic e libar e je la division dai podês: li che podê legjislatîf (che al fâs lis leçs: il Parlament), podê esecutîf (che al met in vore lis leçs: il Guvier) e podê judiziari (che al fâs punìs chi che nol rispiete lis leçs: la Magjistrature) a son e a àn di restâ indipendents un di chel altri. Ma propit par tutelâ chest dirit di indipendence ognidun di chescj podês al varès di controlâ che i siei esponents a lavorin in maniere corete, cjastiant cui che al comet erôrs. A chest proposit tal prin coment o met un biel editoriâl jessût sul Gazzettino îr a firme di Paolo Pombeni.
Tierce cuestion: lis scovacis di Napoli... ma us ricuardi che ancje chi in Friûl la situazion e sta lant a Patràs...
Dut chest mi fâs rifleti sul faliment dai partîts, che a varessin di vê un rûl fondamentâl pe formazion de classe politiche, in maniere che une persone che e à voie di cjapâsi sù un puest di podê, e vedi i juscj imprescj par lavorâ tes istituzions. Invezit o ai come la impression che tantis voltis, masse, un al pues vê la ocasion di stâ intune istituzion dome parcè che al è un sioron e no parcè che al à fat un percors politic dal A al Z. Cussì o vin deputâts, senatôrs, presidents di regjon e e jù jù a cjadene fint a altris incarghis publichis di nivel plui o mancul alt che no son mai jentrâts intun consei comunâl, ma si cjatin catapultâts tal mont de grande politiche dome parcè che magari a àn un 730 che ur permet di paiâsi la campagne eletorâl. E cussì al sucêt che invezit di viodi di ce che al covente al paîs, il probleme principâl al devente "tirâ jù la piel" al aversari politic, fâi i dispiets e vie indevant... E mi ven simpri plui il dubi che cheste e sedi democrazie: o viôt simpri plui tant int inadeguade al rûl che e à... e prin o dopo il sisteme al colasse... o sino za rivâts al colàs? O ai pôre de rispueste!

17 gennaio 2008

Consei Comunâl

Se martars ai 22 di Zenâr no vês nuie ce fâ, aes 10.00 di buinore al è consei comunâl! Mah?!
La convocazion mi è rivade juste vuê e a pene che e sarà publicade ancje sul sît dal comun, us fasarai il link: velu ca.
Intant sul blog di Intesa per Majano al è un post che al presente ancje l'ordin dal dì e che us met tal prin coment.
A son ancje incazât pe ore de convocazion. E no àn ducj i tuarts!
Ancje a mi no mi plâs tant cheste ore par un consei comunâl che di solit al ven fat dopomisdì o sotsere.

16 gennaio 2008

Il Pape

Pape Ratzinger (te foto gjavade fûr di wikipedia) no mi sta tant simpatic: Zuan Pauli II cuant che tal 1992 al è stât a Udin al à saludât il popul furlan doprant la nestre lenghe vierzint il so discors disint «Fradis furlans, us saludi te vuestre marilenghe e us invidi a tignî dûr cu lis tradizions, la fede cristiane e i valôrs dal fogolâr, e a fâju cressi tal cûr dai vuestris fîs». Pape Benedet XVI invezit chest Istât passât al à pensât di tornâ a introdusi l'ûs dal latin, come che al jere prin dal Concili Vatican II (1962-1965), tornant cuasi a meti une bariere tra il popul e la glesie, cuasi che al volès tornâ indaûr ai timps dal Concili di Trent (1545-1563) cu la liturgjie in lenghe latine: cui isal in stât di capî dute une messe par latin in dì di vuê? E ce sens varessial? (ve chi il test intîr de letare apostoliche di Pape Benedet XVI).
Magari e sarà ancje une vision semplicistiche, ma no jessint un teolic ma un dal popul, mi plâs resonâ par cuestions semplicis.
Dit chest, o fâs une riflession su la cuestion che di cualchi zornade e à tignût e e ten banc sui gjornâi: il Pape nol larà plui ae Universitât La Sapience di Rome a fevelâ pe scree dal an academic.
Secont me e je une sconfite par ducj. Ma no parcè che la Universitât e à di vê une sotanance tai confront dal Vatican: o soi un convint sustignidôr de laicitât des istituzions statâls e dal principi che e vedi di jessi une "libare glesie intun stât libar".
Ce che mi à avilît al è il fat che e sedi mancjade une ocasion di sane dialetiche tra sogjets che le puedin ancje pensâ in maniere difarente.
A àn fat mâl a domandâ che il Pape nol intervegni, al à fat mâl il Pape a rinunciâ a la visite ae Universitât, a àn fat mâl i politics a cjapâ la ocasion par creâ inmò tension, a àn fat mâl i gjornâi a dâ dute cheste rilevance a un episodi che al è deventât un câs mediatic li che si à cjalât plui al contor che a la sostance: che si vedi vude voie di creâ la enesime barufe? No lu sai, ma il suspiet mi reste...
Tornant a la cuestion, la universitât e varès di jessi il lûc dal resonament e dal confront des ideis: ducj a varessin di vê il dirit di esprimi la lôr idee, lis lôr teoriis e ducj a varessin il dirit di contestâ in maniere pacifiche e dialetiche ce che no condividin. Invezit ce che o ai viodût jo al è stât un stiçâ une polemiche pardabon puare dal pont di viste inteletuâl, uman e democratic.

A vore

Vuê o soi tornât a vore dopo de malatie. Al jere un biel toc che no stavi tancj dîs a cjase malât. E cumò si torne a partî: o amet di vê la furtune di fâ un mistîr che mi plâs.

15 gennaio 2008

Vuê, tra îr e doman

Par me il Friûl al è cussì: une tiere che e pues vinci la sfide dal gnûf, cence pierdi il leam cu la tradizion. Ve chi alore che l'artesanât dai ucefuarpis di Resie al sta dongje dal "mouse" dal gno Mac (foto fate cuntun videofonin).
E no je dome une cuestion di economie, parcè che forsit ae fonde e je propit une cuestion di culture, tal sens plui larc dal tiermin: cognossi ben lis lidrîs par vê ramacis che a sflorissin fuartis.
Parcè che se no va di nissune bande, se no si sa di dulà che si ven.

14 gennaio 2008

Previsions pes regjonâls

Intun post precedent, Thermo al domande se al à di fâ une prevision pes regjonâls... cumò che ancje il parlamentin regjonâl di Forza Italia al à fat il non di Renzo Tondo (e jere dome che ore!) o podìn fâ cualchi resonament di plui, ancje se al è inmò cualchi passaç di fâ (v. i aleâts)....
Fuarce Thermo, chest post al è par te: o tirât il clap, platistu la man?

Din a Grignani ce che al è di Grignani

Di cualchi timp si sint a cjantâ Laura Pausini cheste biele cjançon. Però e je une cover e chi sot us met la version origjinâl di Gianluca Grignani, che o preferìs... e voaltris?

13 gennaio 2008

A Sant Jacum

Usgnot passade mi soi let un librut di pre Toni "A San Jacum, là che al finìs il mont" (ed. La Grame, 2004).
A son passaçs pardabon biei di chest pelegrinaç fat cui amîs di Glesie Furlane tal Fevrâr dal 1996 a Sant Jacum di Galizie dilunc dal cjamin dai pelegrins che almancul une volte ("o di vîfs o di muarts"...) a àn di lâ "là che al finìs il mont".
Al è un librut svelt e gustôs che al da un esempli fuart dal scrivi di pre Toni: argoments storics, teologjics, pagjinis di diari intimis e sinceris scritis come che al saveve lui, in maniere semplice e direte che ti rivin dretis tal cjâf e tal cûr.
O ripuarti une riflession fate intant che al passave la Catalogne, in visite al Santuari di Montserrat.

Al scrîf pre Toni (pagjine 43):
"No si pues vinci nissune bataie, ni di ordin militâr, ni di ordin culturâl, cence lis mans alçadis. (Il riferiment al è al cjapitul 17 dal libri dal Esodi: la bataie di Refidim, cuant che Mosè al ten i braçs alçâts judât di Aron e Cur, intant che Gjosuè al scombat cuintri di Amalec te plane pe liberazion dal popul ebraic, ndr.).
Tant a dî che no baste la fuarce militâr o economiche o tecnologjiche par che un popul al puedi vê avignî. E covente la fuarce de fede, de religjon, de culture, dal spirt. Un popul grant e fuart cence idealitât al devente debul; un popul piçul, cuntune grande cjarie spirtuâl e ideâl al devente fuart.
Il popul catalan, a diference dal nestri, al à vude la fortune di une grande disponibilitât di mieç economics. Un grant puart, une grande industrie, un grant teritori, un grant numar di int. E in plui al à vude de sô bande la glesie, che e à savût cumbinâ religjositât e culture, libris pe anime e libris pe ment. Jentrant tal curtîl de badie, si viôt une grande lapide là che la nazion catalane e ringrazie la comunitât benedetine di Monserrat par vê difindude cun fuarce e coerence la identitât culturâl catalane. Tant a dî: nô o vin fate la nestre part là jù, ma o fasevin pôc o nuie se voaltris, ca sù, no tignivis lis mans alçadis".

Par informazions e par vê i libris di pre Toni, clamait pre Tonin Cjapielâr (Ruvigne - UD) 0432.957268 o pre Roman Michelot (Vilegnove di Sant Denêl - UD) 0432 956010

Fuarce Udin di Jaio

Jaio, il Furlanâr al è propit une des bielis sorpresis de blogosfere in marilenghe.
E dopo de biele "Pastorele" di Nadâl, ve ca un altri so video dedicât al Udin: jo lu met achì juste vuê che e je Domenie, sperant che al puarti ben pe partide Casteddu-Udin di dopomisdì.

12 gennaio 2008

Ti fasarìn savê...

Eh sì: no ai savût resisti... o ai stât a fâ la selezion pal cast di "Come di Dio comanda" di Gabriele Salvatores.
Dut in cuarante minûts: prime une schede di compilâ e po un tic di code par fâ lis fotos che a son ladis te schede. Cumò o ai dome di fâ inmò une piçule formalitât e po viodìn se mi clamin.
Une strane sensazion. Dopo dut nissun mi à domandât nuie però un tic di emozione le ai provade distès. Lis ripresis a varessin di tacâ a metât di Fevrâr, ma pal moment no mi àn dit nissune date.
Di ce che mi risulte e je stade un biel pocje di int e duncje o consei a ducj chei che no àn inmò stât di presentâsi joibe: nol coste nuie e cuant tornie a capitâ une ocasion cussì? A cirin comparsis (duncje al sarà dificil vê une grande visibilitât), ma il regjist al è Gabriele Salvatores migo "baubaumiciomicio" e za podê dî "O jeri ancje jo" e sarès une biele sodisfazion.
Mi plasarès jessi clamât.

Cors di lenghe furlane

Chest an o tignarai un cors pratic di lenghe furlane par imparâ a lei e a scrivi par furlan.
La Societât Filologjiche Furlane mi à domandât se o vevi plasê e mi à afidât il cors te sede di Udin, tal Palaç Mantica in vie Manin, 18.
Il cors al è gratis e al è di 24 oris in dut.
Lis 12 lezions a saran cun chest calendari, ogni Lunis des 17.00 aes 19.00:
Fevrâr 4, 11, 18, 25
Març: 3, 10, 17, 31
Avrîl: 7, 14, 21, 28

Par iscrivisi o podês clamâ Elena De Sanctis, Ufici formazion de Sff tel. 0432/501598 int. 3 che us disarà cemût fâ.
A la fin dal cors, chei che a varan frecuentât almancul il 70% des oris a ricevaran un atestât di frecuence.
Us spieti e visaitsi che i puescj a son limitâts (max. 20 iscrits).

Gabriele Salvatores a Maian

Come anticipât, vuê e joibe che e ven, des 14.00 aes 20.00 a Maian al sarà il casting pal prossin film di Gabriele Salvatores "Come Dio Comanda".
In spiete dal casting, ve ca la sene iniziâl di un dai plui biei films che o vedi viodût: Mediterraneo (premi Oscar 1992).

11 gennaio 2008

Faber

Ai 11 di Zenâr dal 1999 si studave la grande vôs di Fabrizio De Andrè. Ma par furtune al continue a sunâ.
Mandi, Faber: tu mancjis!



70 mil voltis grazie!

Al sarà stât pal salt di an, al sarà stât pe influence, ma mi soi dismenteât dal rituâl ringraziament ai letôrs, vint passât lis 70.000 visitis di cuant che o ai screât il blog.
Lu fâs cumò disint grazie ai fedelissim che a lein e a comentin, a chei che no àn voie di scrivi ma no pierdin une rie, a chei che a doprin il blog par segnalami ativitâts e a àn gust di publicizalis ancje achì, a chei che no i tegnin a passâ al viodi il blog "ma dome cuant che ju visin e dome di râr", a chei che a domandin se cheste e je une ativitât legâl, a chei che mi menacin e mi fasin scrivi dai avocats, ai avocats che mi scrivin...
A ducj un bon an e un grazie di cûr.
Cu la sperance che almancul tal 2008 la libertât di espression e continui a jessi garantide!

10 gennaio 2008

55 agns insiemit

Veju ca: biei come doi fantats ancje se vuê ai 10 di Zenâr dal 2008 a son 55 agns che a son maridâts!
Ide e Fausto Minisini di Sant Salvadôr a son i nonos di gno cugnât Cris Tabacâr, i gjenitôrs di bande di mame Bruna!
A Ide e a Fausto i miôr auguris par un bon aniversari!

09 gennaio 2008

Frank e Elton di scoltâ

Tra i regâi di Bambin Gjesù o ai cjatât ancje un biel Cd dopli: My way - the best of Frank Sinatra.
Achì us met une des mês preferidis, ancje se nol bastarès il spazi par meti dutis chês che mi plasin:


La Befane invezit mi à puartât un altri biel Cd: The One di Elton John.
Achì us met il video de cjançon che e da il non al album, ma ancje chi tantis a son chês bielis.

08 gennaio 2008

Sandri incjadenât

Trancuii, trancuii: no feveli di un rapiment!
Dome che la fiere mi è lade jù e mi soi metût a passonâ par internet lant a cjatâ i miei amîs che a àn un blog.
E leint chel di Sandri, il gno secont mestri di furlan (la prime e je Linda, che o saludi), mi soi inacuart che ancje lui al è restât ingherdeât te Eletrocjadene dai Corona's.
Leint lis rispuestis o ai fat un salt cuant che o ai let che il prin blog che al lei al è propit il gno!
Mi à fat plasê!
Però cumò o ai un motîf di plui par stâ atent, che se no il mestri mi cride!
Un mandi a Sandri e a Teresa che a son in Catalogne.

te foto: Sandri Carrozzo intune presentazion de Odissee, la prime version complete in lenghe furlane dal poeme epic di Omêr. Une biele conference e public content a Tavagnà chest Istât passât.

07 gennaio 2008

Lunari 2008

Mi àn a pene puartât il Lunari 2008 fat de Pro Majano.
Propit biel!
Chest an al è dedicât ai Cjistiei de zone Culinâr, cu la consulence sientifiche di Giorgio Baiutti e lis fotos storichis dal font Brisighelli dadis dai Museus di Udin.
Dongje di chest teme principâl o vin ancje la ricercje di Roberto Ongaro "Une scuele, un non", une rubriche in lenghe furlane su lis biografiis dai personaçs che a àn dât il non a lis scuelis superiôrs di Udin e provincie.
Compliments al president de pro loco pe biele idee e a cui che lu à judât a realizâ chest biel progjet.
O speri che se cualchidun al à di fâ cualchi critiche (come che al è just e di dirit: si varès podût meti dentri alc di plui par furlan, par esempli pal 2009 o scrivarès i nons dai Mês dome par furlan) almancul si eviti di dî "Ma ce centrino i cjistiei cun Maian?..."

Aument in buste dai Parlamentârs

Di cualchi zornade si sint a fevelâ che cualchi deputât al vedi scrit al President de Cjamare par domandâ un adeguament dai stipendis come chei dai senatôrs. Di fat, l'an passât il Senât nol veve dit di no ai auments, invezit Montecitorio si veve oponût. Ma cumò cheste diference, secont cualchidun, no je juste e cualchi deputât al à domandât di parificâ aumentant la sô buste.
Fûr di Montecitorio, a pene che e à tacât a zirâ la vôs, cualchi citadin si è sustât e al à provât un tic a protestâ. Jo o pensi che cui che al à un incaric al vedi dirit di jessi retribuît, ma o soi ancje convint che intune situazion di dificoltât dal stât, al sedi impuartant che la nestre classe dirigjent e vedi di limitâ i coscj de politiche e evitâ chescj auments.
Intant che cualchidun al protestave, in chel al jessive di Montecitorio un dai firmataris de letare de domande di aument dal stipendi.
Chi sot, in esclusive, o vin un filmât cu lis declarazions di un di chei parlamentârs intant che la int e protestave...

06 gennaio 2008

Cine a Maian

Gabriele Salvatores al zirarà un film in Friûl: Come Dio comanda. Ancje Maian al è stât sielt pes ripresis e la produzion e cîr int par partecipâ al film.
Achì us met la mail che mi à mandât l'assessore Garzitto, dulà che o podês cjatâ lis istruzions par partecipâ a la selezion.

Pignarûl


Par chei che no podaran viodilu dal vîf, velu ca, sperant che chest an al tiri ben... il fum.

05 gennaio 2008

Alduti on the air

Il gno amì "masse furlan pai cjargnei" e "masse cjargnel pai furlans" a 'nd à simpri une pronte. Cun joibe passade al à tacât une trasmission su Radio Sorriso.
Ben Aldo! O soi propit content ancje se cumò o ai sta atent a ce che o scrivarai te recension dal CD ;-)

02 gennaio 2008

01 gennaio 2008

Bon 2008

Cin cin e buine fortune a ducj! Che al sedi un an plen di sodisfazions, pâs e salût par voaltris e pes personis che o volês ben!