30 novembre 2007

Sant Andree, il purcit su la bree

AI 30 DI NOVEMBAR

Ogni cuâl trat mi capite di fermâmi a fâ cuatri cjacaris cun chei che a àn viodudis cori plui stagjons di me e dispès lis contis che a legrin chescj incuintris a tachin cu la classiche formule "Mi visi che…". Un panin cul salam al ufrì la ocasion par tornâ cul ricuart a etis aromai lontanis, une vore duris ma ancje bielis par chel che lis à vivudis, forsit parcè che leadis cetant a un periodi de vite cuant che il jessi gaiarins al prevaleve ancjemò su lis preocupazions che in curt a varessin vût il sorevint.

"In campagne, cuant che l'unvier al clucive sot di une coltre penze di nêf, pocjis a jerin lis ocasions di fâ fieste.
La vuere e jere finide di pôc, ma la bataie cuotidiane par sbarcjâ il lunari no veve voie di cognossi nissun armistizi.
Une des pocjis ecezions si presentave tor dai ultins dîs di novembar.
In particolâr la tradizion contadine e fissave pal trente, un di chei apontaments plui bramâts di dut l'an e su la bocje al coreve cun suturne sacralitât il sproc "Sant Andree, il purcit su le bree!".
Tant che ogni so predecessôr, dut câs, il protagonist de zornade di chel an al spietave cence savê il so destin tal piçul cjôt insom dal curtîl. Anzit, vadì che si visave cun tant agrât di chê buinore cuant che un contadin si veve sistemât il cjapiel e cuntune vosone al veve confermât "O cjol chel!", contentant il frut che lu compagnave e che pie no pie al rivave sore dal sierai li che une scrove e tignive a ments la sô fiolance colôr di rose.
Di chel dì indevant al jere stât tirât sù cun dutis lis graciis, figotât e sossolât. In curt al varès scuviert il parcè di tante atenzion.
Forsit al veve tacât a nasâ puce di stiç di cuant che par doi dîs lu vevi tignût a dizun.
Chei vogluts neris mi fissavin cun fâ interogatîf intant che o sieravi la puartele dal cjôt. Aromai al jere scûr e il frêt, che al becave, al prometeve un altri regâl cjandit, dopo des sblancjadis dai dîs passâts. Il cîl al mantignì lis promessis dopo cene, cuant che o cjalavi de mê cjamarute chei cuatri mûrs che a clucivin pe ultime gnot chel ospit toful di chel an. E intant che il mulin dal cîl al tacave a masanâ gjenerôs flocs cjandits, o sintì za in chê volte une grande nostalgjie.
I glons des cjampanis mi derin la buine gnot e mi indurmidii sintint i miei ducj cjapâts tal finî i ultins preparatîfs par l'indoman.
Come simpri la cjase e jevà une vore adore. Il businôr de cusine, propit sot de mê cjamarute, cun dolcece mi tirà fûr de val dai insiums.
O cognossei clare la vôs dal vieri purcitâr dal paîs che, cu la solite baldance di chei che a àn une considerazion masse grande de lôr part, al jere par preparâ i siei fiers dal mistîr.
Une curiositât sadiche mi tirà fûr des coltris e, cence volê fâmi viodi, mi fasei fûr cirint di vualmâ lis lamis che a lusivin ordenadis cuntune cure scuasit chirurgjiche su la taule de cusine. Intant che o rimiravi chel glaçât e signestri campionari di art purcitarie, un "Bundì!" al segnalâ che il gno tentatîf di no jessi scuviert al jere falît e ancje par me al jere rivât il moment di cjapâ part al rituâl.
Cence grant entusiasim o cjapai l'invît a preparâmi. Cuant che o foi vistût, o lei jù pe gulizion. No vei il timp di gjoldimi la scudielone di lat, che za mi cjatai te nêf fin tai zenoi dut cjapât tal me compit: tignî la cuarde che in curt e varès menât, cence tante creance, il purcit viers la sô "fieste".
Che semplice incarghe mi semeà di fondamentâl impuartance, dât che o jeri il vuardian dal unic imprest che al varès permetût di tacâ la "cerimonie".
Cence visâmi plui de maluserie dai miei insiums, o stavi braurôs e dret tant che un pichet denant dal cjôt in spiete di consegnâ al vieri purcitât, al pai e a so fradi la gruesse soie.
Ogni braure e svant si sdrumarin cuant che o sintii il rugnâ dal grant nemâl. O cirii di fâ une timide resistence intal moment che o scugnii consegnâ la cuarde ai grancj, ma lis mês manutis fredis a molarin prest denant de fuarce dal barbe.
O restai glaçât te nêf, che cence remission e continuave a vignî jù.
O varès volût scjampâ a pene che il trement berghelâ de bestie al sbregà l'aiar, ma o restai di clap, fermât di un assurt sens dal dovê che mi impedive di bandonâ il lûc des operazions.
Di bot al fo un cidinôr che mi insuspietì.
Cuant che o viodei jessi dal cjôt i miei a mans scjassant e blestemant come pocjis voltis ju vevi sintûts, o sintii une strane gjonde. Jo, la mame e la agne o lerin dongje a chei oms e, viodût chei segns che a vevin intor, no mi coventà scoltâ lis spiegazions di gno pari par capî che no jerin rivâts adore te lôr intenzion e il purcit sflacjôs al veve resistût cun fuarce a chel tentatîf di menâlu al creatôr.
I trê si netarin di corse e intant che i doi fradis a faserin viodi di vê cualchi dubi tal tornâ a frontâ subit la bestie che seont lôr e veve mostrade une fuarce sore nature, il vieri purcitâr, ferît plui tal orgoi che tal fisic, al le dret tal lûc dal duel.
"A cost di strissinâlu di bessôl, cumò lu sistemi jo!".
Al fruçâ il cjapiel sul cjâf, al sparì tal scûr dal cjôt, lassantnus dongje de cjalderie, li che di timp e jere daûr a bulî la aghe.
La lote e continuà par cetancj minûts jenfri blestemis e rugnadis, fintremai che di gnûf al tornà il cidinôr dentri chei cuatri mûrs.
Di bot une sagome e jessì de puartele dal cjôt, lant tal mieç dal curtîl.
Si fermà a pôcs metris di nô cul cjapiel butât un tic a drete e il voli braurôs di cui che intun bot al jere rivât adore a svindicâ cetantis gjenerazions suinis.
Al rugnâ sodisfat, scjadenant il bonspirt dai presints.
Purtrop par lui e fo une glorie efimare, che e scugnî rassegnâsi a niçulâ jù dai luncs raclis di faiâr ben in rie tal camarin di cjase mê.
Se mi visi ben, no crôt che il vieri purcitâr al sedi plui jentrât intun cjôt cence la juste assistence."

Chel panin cul salam al veve un gust diviers dal solit…

29 novembre 2007

I Savoia a domandin un risarciment

Come che nus ricuarde il nestri Trentespagnolets e ancje Brâf furlan, i Savoia (puarins) a àn domandât un risarciment di 260 milions di euros...
A cheste domande, a mi mi ven dome une rispueste: cheste chi sot...

28 novembre 2007

Gambiaments in consei

Sul Messaggero di vuê al è un articul che al fevele di Giovanna Iesse (te foto), conseîr comunâl di Maian, elete te liste La nuova Majano, come esponent de "Margherita". Dopo de fusion dal Partît Democratic, stant che i ecuilibris di centriçampe si son spostâts une vore a çampe cu la predominance dai Ds, Giovanna Iesse e jes dal Grup Intesa per Majano par fâ un grup par so cont. E vuê tal articul (che us met come prin coment) e fâs une declarazion curiose...

27 novembre 2007

Contribûts par Maian

O ai savût che tai ultins riparts a son stâts di pôc assegnâts de Provincie di Udin chescj contribûts:
Assessorât ae politichis sociâls e pai zovins
al Comun di Maian (tot: 18300 euros) par:
Centri sociâl di Deveà: 2900 euros
Centri sociâl di Cjasesole: 2900 euros
Centri sociâl di Pêrs 2500 euros
Centri sociâl di Farle 2500 euros
Centri sociâl di Sant Salvadôr 2500 euros
Centri sociâl di Trivià 2500 euros
Centri sociâl di Susans 2500 euros

ae Parochie di Ss. Pieri e Pauli (Maian): 2500 euros

e dal assessorât al turisim ae Pro Majano: 9.000 euros.

O torni a dî ce che o ai dit ancje in consei comunâl: grazie a Adriano Piuzzi, assessôr aes Politichis sociâls e pai zovins de Provincie di Udin, par dut ce che al à fat fint cumò pal nestri comun e pes associazions dal nestri teritori.

26 novembre 2007

Peraulis crosadis a Felet

Peraulis Crosadis: par imparâ zuiant
A Tavagnà un imprest didatic par furlan

La aministrazion comunâl di Tavagnà e à realizât un impuartant imprest ludic didatic par svicinâ i plui piçui al ûs de lenghe furlane a scuele: Peraulis crosadis e altris zûcs enigmistics.
Come che si lei te prefazion dal librut, patrocinât ancje de Agjenzie regjonâl pe lenghe furlane, “Ai 26 di Setembar dute Europe e à celebrât la Zornade europeane des lenghis e duncje ancje chês locâls. Fint dal 2001 (che al è stât l'an european des lenghis) il Consei de Europe al à volût dedicâ cheste zornade di fin Setembar a chest impuartant argoment, marcant a clâr trê principis di fonde: “la Europe e je plurilengâl e lu sarà simpri; l'aprendiment des lenghis al ufrìs une oportunitât ai citadins; ognidun al è in stât di fâlu”.
La finalitât di chest progjet e je propit chê di judâ i fruts a incressi la lôr paronance de lenghe furlane.
Il librut al è stât distribuît ai arlêfs des classis tierce, cuarte e cuinte des scuelis primariis dal comun (plui di 330 fruts) parcè che, come che al à vût dit Mario Pezzetta, sindic di Tavagnà e promotôr de iniziative, “Dome tacant dai plui zovins si pues garantî un avignî ae lenghe furlane che e rapresente un element identitari tra i plui impuartants de nestre comunitât, cu la sperance che e deventi simpri di plui ancje ocasion di confront e contat tra lis tantis culturis che a vivin sul nestri teritori”.
La publicazion e je nassude di une sinergjie tra il Sportel pe lenghe furlane dal Comun di Tavagnà e la cjase editore Kappavu che e à curât la realizazion de publicazion che si presente cu la ambizion di podê jessi di esempli ancje par prossimis esperiencis similârs.
“Intun mont che al devente simpri plui piçul midiant des gnovis tecnologjiis” al continue Pezzetta “Ancje il Vieri Continent al à di frontâ il pericul de omologazion des culturis. Chest progjet al nas propit par fâ rifleti su la impuartance de difese de nestre lenghe e de nestre tradizion, no par sierâsi tal nestri “curtîl”, ma te convinzion che dome valorizant il "particolâr" si pues pandi une culture de integrazion tra lis identitâts diferentis presintis in Europe e duncje ancje tal nestri comun”.
Lis primis reazions a son stadis une vore positivis e ancje i insegnants des classis, che a àn ricevût il libretut, a àn preseât il progjet che si presente come un imprest util par imparâ zuiant, come che al è just che a fasin i fruts.

Info:
lenghe.furlane@comune.tavagnacco.ud.it oppure tel 0432/577326

25 novembre 2007

Zornade cuintri de violence su lis feminis

Vuê o dedichi ancje jo un pinsîr a la zornade internazionâl cuintri de violence su lis feminis.
Lis statistichis a disin che in Italie une femine su trê e patìs violence (lei dut l'articul sul Corriere).
Sperant che nol vedi mai di coventâ, o segnali a dutis lis feminis che a lei chest blog, un servizi che ur dâ la pussibilitât di cjatâ cualchidun che lis scolti. No stait a tignî dentri ciertis robis brutis che us àn fat: ancje se al pues semeâus dificil, insormontabil, o vês di denunciâ cui che us à fat e us fâs dal mâl.
Parcè che se cualchidun al alce lis mans (no dome tal sens fisic: tantis altris a son lis formis di violence) su lis feminis, nol merte nissun dûl o justificazion... nol merte nancje di jessi clamât om.

24 novembre 2007

La agonie de politiche

E je cuasi miezegnot e su telefriuli e je la regjistrazion dal consei provinciâl di vinars su la mozion di sfiducie a Strassoldo.
O ai scoltât tancj intervents populiscj, int che e berghelave e cjâf grup di partît che come il leghist che par sputanâ Strassoldo, cavalcant la onde de moralizazion, si invente un ricat, smentît di ducj: figure di cjocolatin.
Chel document firmât di Strassoldo e Tavoschi al è stât un erôr e une robe che no veve di jessi fate, ma rivâ a tirâ ledan ta chê maniere, propit no mi à plasût.
Mi àn plasût i intervents di Adriano Piuzzi e Fabio D'Andrea, che a àn condanât l'episodi dal pat Strassoldo-Tavoschi, ma a àn difindût l'ent Provinciâl e il lavôr fat fint cumò.
Udc e Lega Nord spacadis vinars in consei, vuê si son dimetûts l'assessôr Decorte dal Udc e i assessôrs di AN...
E pal moment dut rinviât al prossim consei provinciâl (altris 15 dîs?...).
Al reste il fat che chest episodi al restarà tai libris come il paradigme de sconfite de politiche. Su ogni front.

23 novembre 2007

Pasolini domenie a Felet

Domenie a lis 20.45 tal auditorium di Felet apontament cu la musiche, la poesie e i colôrs cul spetacul Pieripauli di Loris Vescovo, Claudia Grimaz, Ermes Ghirardini e Alfredo Pecile.

JENTRADE LIBARE!

Altris info, sul sît dal comun di Tavagnà

Par viodi la cartuline dal conciert plui grande, fracait achì.

22 novembre 2007

Snaidero viers il NO

Îr al è stât celebrât 1 an di vite de Fondazion Rino Snaidero.
Ma ce che forsit al interessave di plui il mont de politiche e jere dal sigûr la sielte di Edi Snaidero (te foto).
Al è probabil che Edi Snaidero al disi di NO a la candidature pes regjonâls.
E zire vôs che lui al ves za decidût di timp, ma che cualchidun i vedi dit di spietâ prin di anunciâ la rinuncie.
No si trate cussì une persone par ben che e veve pensât di impegnâsi (intun prin moment forsit pardabon) intun mont che nol è propit il so.
Dute cheste vicende e je stade gjestide une vore mâl e plui di cualchidun al varès di sintîsi in debit cun Edi Snaidero pe maniere che al è stât strumentalizât.
Tra l'altri cumò o sin di gnûf te situazion di partence.
Ce si spietial a formalizâ une volte par dutis la candidature di Renzo Tondo per regjonâls 2008?

21 novembre 2007

Consei comunâl e gnûf cjâfgrup

Lunis che al ven al sarà consei comunâl. Nol è inmò stât convocât, ma aromai si trate dome di definî la ore.
La cuestion politiche plui interessante e sarà la presentazion dal gnûf cjâfgrup di Forza Italia, ancje se no sai fint cuant che si doprarà chest non...
Stant che Gaggiano al à dit che lui al à fat il grup di An, lui al fasarà il cjâfgrup di se ste e duncje la sielte par Forza Italia il cercli si strenç...

ps: dopo che o ai fat il post, ve ca la convocazion...

19 novembre 2007

Disasi dai zovins

E à tignût banc tai ultins dîs une cuestion che secont di me e à cualchi veretât e cualchi strumentalizazion.
E je vere che a son ciertis situazions che a van tignudis sot voli: baste dome lei i fats di cronache sucedûts a Maian tal ultin an... nancje chi o sin plui intune realtât bucoliche: ma lu sino mai stâts? Situazions dificilis a son simpri stadis.
Chest al è avonde lapalissian e se si reste sul gjenerâl al è facil dî robis scontadis e colâ te retoriche.
Ma se si va tal particolâr al è ancje il risi di pescjâ une "buiace" se no si dâ argomentazions particolârs e precisis. Duncje il mert di cui che al à stiçade la cuestion al è chel di vê dât la ocasion di fevelâ di un aspiet de nestre societât; la pecje e sta tal vê trat cussì, avonde malut, forsit parcè che al jere nervôs: magari la dì dopo no le varès frontade ta chê maniere.
Jo o pensi che cualchi volte si esagjere tal volê meti une "cjampane di veri" sui zovins: si fevele di "disasi dai zovins" che no san dulà lâ. Secont me nol è il "puest" che al risolf il probleme, ma a son i rapuarts che a àn di nassi tra di lôr. ASD Majanese (comprindût il grup di zovins che no son dome une scuadre, ma ancje un grup di amîs), ma ancje Libertas, ma ancje dutis lis altris associazions (ancje la Pro Maian, ma ancje lis realtâts plui piçulis) a son daûr a fâ un lavoron ecezionâl che probabilmentri nancje il comun al rivarès a fâ bessôl cui centris di agregazion e altris iniziativis similârs propit parcè che intune associazion e je une struture e un sisteme di rapuarts che al garantìs i iscrits. Nol è un câs che i "centris di agregazions" o "centris sociâi" che a funzionin di plui ancje a Maian e frazions a son in man a Associazions o comitâts une vore atîfs: duncje, come che o disevi, nol è un puest che al risolf il probleme, ma lis personis che lu fasin funzionâ.
Ma il discors al è pardabon masse dificil di risolvi in pocjis riis, e o speri che la discussion che e ven no vedi di ridusisi a un "gjalinâr di barufis". Par plasê.

18 novembre 2007

Zornade in ricuart des vitimis de strade



Un pinsîr par chei che no son plui, ma ancje par chei che a son restâts, ma che no rivin a dismenteâju...
Par fermâ la stragje stradâl, precedence a la vite: simpri!

Domenie cun pre Toni e la sô sapience



Par furtune che al è Marino che sul so blog al continue a dâ vôs a pre Antoni Beline:

Un popul cence storie nol va indenant; al va indenant il cuarp ma no il popul. Si pues fâ di mancul di lâ a messe e no crôt di blestemâ, ma cence culture e cence religjon no si va indenant. La religjon e je alc di plui profont dal lâ a scuele.

(pre Toni Beline)

17 novembre 2007

Gnot di amôr



Îr o ai stât a cjatâ Sdrindule, che o saludi e o ringrazii pe simpatie e pe disponibilitât.
O ai comprât il Cd cu lis sôs cjançons e lui mi à regalât il test di chê sô plui biele, chê che e restarà come "Stelutis alpinis":

Gnot di amôr
peraulis e musiche di Sdrindule

Gnot e dì
jo ti viôt chi cun me,
ma ce frêt di bessôl chi tal jet:
jo o crodevi di vêti par me dute la vite.
O vevi un agnul poiât chi sul cûr
mi diseve “cun te o soi sigûr",
"tenmi strete plui strete, di amôr o mûr”.

Tu la sole, la prime, l'amôr,
o ai passât masse timp di bessôl,
jo ti cjali tai voi e o capìs no tu puedis lassâmi.
Une gnot che no conte par te,
une vite che e va vie cun te,
e tu agnul dal gno Paradîs cence di me.

E tu vâs vie cence dîmi nuie,
al reste il cjalt dal to cuarp
ta chel jet, jo no ai plui nuie:
jo ti prei, Signôr, jude il gno dolôr.

O vevin scrit su chel arbul tal viâl
“jo e te” cuntun segn sul cûr.
O vevin dit une dì “O tornarìn, o sarìn insieme”.
Sì chel segn lu veve il gno cûr
e chel viâl al fâs pôre, al è scûr,
nancje il cjant di un amôr che al dîs “Jo o mûr”.

E tu vâs vie cence dîmi nuie,
ilusion di un moment, di une gnot, di une bausie...
jo le spieti ca, ma no tornarà.

note:
la version trascrite e rispiete lis regulis gramaticâls de lenghe furlane, po dopo, come che al sucêt tal fevelât ciertis elisions a son naturâls e duncje no stait a bruntulâmi se ce che al è scrit no lu sintîs tal cjantât.
O ringrazii Sdrindule che mi à dât il permès di meti la cjançon in rêt: un regâl pai furlans di dut il mont!
Cui che al volès comprâ il Cd al pues lâ a cjatâlu a cjase a Pagnà in "via della motta, 5/c", ma se lu visais par telefon, us spieghe cemût rivâ:
Sdrindule 0432/661325
o mandâ une mail a:
dipetardo@libero.it

16 novembre 2007

Il Diari di Tosoni

Al è disponibil on-line il Diari di Novembar, diret di Mauro Tosoni.

Plantis sul Cuel

Stant che in setemane o vin vût la gnove jentrade di Il Giustiziere come comentadôr, no vin fevelât dome di sport e "passetimps" no masse salutârs, ma ancje di ecologjie.
Par chest i ai prometût che o varès fevelât dal Cuel dal Fum, che al è un pôc che no trati sul blog.
Lant a cjalâ indaûr, mi soi impensât che za cualchidun al veve fevelât di speciis vegjetâls in pericul e vuê o propon une discussion "verde": ce proponêso par inverdî il Cuel dal Fum?


Ps1: ancje se l'assessôr ai LLPP Zucchiatti al dîs che no nus lei simpri, stait trancuii che ducj i sugjeriments i saran recapitâts, stant che dal sigûr al è za stât visât.
Ps2: rivìno a discuti cence scanâsi? ;-)

15 novembre 2007

La Pro Majano e ringrazie i colaboradôrs

La associazion Pro Majano e fasarà fieste sabide ai 17 di Novembar li dal ristorant Staderie di Sant Denêl.
Il motîf: ringraziâ i 100 e passe colaboradôr che a àn judât il Gnut e la Pro Loco in dutis lis ativitâts di chest ultin an.
E a son stadis propit tantis:
  • il Festival;
  • Friuli Doc;
  • la cene furlane a Traversetolo;
  • l'apontament dai vins a Lignan e vie indevant cu lis tantis iniziativis dal Gjal.
Par sabide o soi stât invidât ancje jo: mi à fat plasê e o ringrazii il president pal invît e par vê decidût di dedicâ un spazi ae promozion de lenghe furlane dentri de ultime mostre dal artesanât. E di chest o mandi un grazie sincîr ancje a Marco Serafin.

13 novembre 2007

Ridistrubuzion des deleghis

Cu la jentrade di Stefano Tuti, no vin vût dome un gambi di personis in zonte (ancje se cualchidun al lasse intindi che lis novitâts no si fermin achì).
Dut câs, pal moment e je stade fate ancje une ridistribuzion des deleghis.
Prime di lâ indevant, o aprofiti par fâi di gnûf i compliments e i auguris di bon lavôr a Stefano, cu la sperance che lu fasedin lavorâ te maniere miôr (e a lunc) e che nol vedi di passâ ce che o ai passât jo.
Tornant a la cuestion de ridistribuzion, lait a viodi lis gnovis deleghis: fracait achì

12 novembre 2007

Ring

Forsit al è miôr continuâ la discussion ta chest post, tra "paladins de justizie somarie e i difensôrs dal spirt alcolic" che chi a varàn il spazi par sbrocâsi... Thermorichieste sodisfate (o speri).
A mi chest scuintri nol è che mi interessi plui di tant: o ai masse difiets par metimi a judicâ chei altris, però o soi curiôs di viodi fint dulà che e rive la discussion... magari o lassi un coment ancje jo... ma no cumò.

11 novembre 2007

Sant Martin

Vuê o ai stât a Deveà, che e je la fieste di Sant Martin come ogni an...
La corse, lis cjastinis, i ufiei, i fruts e il soreli, ma nol jere Feliciano daûr dal banc...
Di là sù però un tai di ribuele lu à bevût cun noltris.

Furlan di Aldo

Finalmentri che al è vignût fûr il gnûf CD di Aldo Rossi, cumò si pues cerçâ une altre cjançon di chest so ultin lavôr in marilenghe: FURLAN!
Di po Aldo, ma dulà si puedial vignî a scoltâti une sere?

I 60 agns di messe di don Remigio

Vuê il nestri plevan, don Remigio Tosoratti (te foto), al fâs i 60 agns di messe. Al è rivât a Farle 28 agns indaûr.
Auguris!

10 novembre 2007

Auguris a la Ninine

Duncje, stant che e je rivade la segnalazion, o speri di rimediâ pal ritart: auguris Ninine! :-)
Te foto no sarà une torte cu lis cjandelutis, ma a mi chest mi plâs un casin!

Gjeometrie invernâl

Vuê o jeri tal curtîl e cjalant la tasse dai lens, mi è vignude voie di fotografâ chel rai di lûs che al bateve propit li.
Cussì, cjapade la machinute fotografiche o ai fat cualchi foto: ce us semeial?

gjeometrie invernâl 01
gjeometrie invernâl 02
gjeometrie invernâl 03
gjeometrie invernâl 04
gjeometrie invernâl 05
gjeometrie invernâl 06

Un grazie al gno pari che al à intassât i lens.
Ps: sì, sì... lu sai... l'Unvier al tache a Dicembar, ma mi pareve plui adat chest non pluitost che cjalâ sul Lunari... e po, cemût di disial? No esistin plui lis stagjons di mieç... :-)

Resocont de mission "consegnìn il document a Barroso".

Îr vinars dopomisdì, finît di vore, o soi lât a Torean li de Fiere par consegnâ il document che il comitât 482 al à preparât par Barroso (te foto).
O soi rivât e o ai viodût i Roseans (cun cualchi scrite antislovene di masse, ma dut câs a jerin alì e duncje brâfs); il comitât NO-TAV e il comitât CUINTRI des CASSIS DI ESPANSION sul Tiliment. Ducj presints e duncje ducj brâfs.
Ma di fûr parcè che la sigurece ju à fats restâ tal plaçâl dal Ent Fiere.
Il Comitât 482 al à decidût di cjapâ une altre strade.
O soi lât bande de jentrade e, rivât li, o ai domandât dulà che o podevi cjatâ Barroso.
La conference stampe e jere finide: Barroso inavicinabil. Ancje cualchi gno amì gjornalist che al veve viodude la conference stampe mi à confermât che nol à podût lâi dongje.
Alore mi soi cjalât ator e o ai domandât dulà che a jerin: a gustâ parsore, ma l'acès a la sale al jere improibît a ducj.
O ai svicinât l'agjent de polizie che al jere a fâ planton su lis scjalis che a menavin disore e mi à dit (PAR FURLAN: i ten a marcâ che il poliziot al jere furlan e une vore zentîl) che nol podeve fâmi passâ, ma in chel al passave un responsabil de organizazion e mal à fermât.
Jo o ai spiegât a chest siôr (Marco Baldacci, responsabil dal cerimoniâl) che o vevi di consegnâ chest document al president Barroso. Mi à dit che o podevi dâi il document a lui e che jal varès fat vê lui. Cussì o ai fat: al è lât parsore li che al jere Barroso a gustâ.
Po dopo, jo o speri che nol sedi finît te prime scovacere, ma par sigurece il stes document al è stât trasmetût ancje par pueste eletroniche ae segretarie di Barroso.
Dut câs o fâs une amare considerazion, la stesse che o ai fat cuant che o soi vignût vie: o vevi lassâts i trê comitâts tal plaçâl fûr de Fiere (no sai trope int che e jere, ma no jere une fole stratosferiche)... cuant che o soi vignût fûr no ai cjatât plui nissun... o ai domandât a un pâr di amîs dal Tiliment e mi àn dit "O vin smontât dut parcè che nus àn dit che Barroso al è za lât vie". Al jere dentri a gustâ... e forsit nol saveve nancje che di fûr fint chê ore (a jerin 3 cuant che o soi montât in machine par vignî a cjase) a jerin di fûr 3 comitâts...

08 novembre 2007

Paolo Ciani nol rispiete la libertât di espression

Îr o vevi publicât su chest blog un coment che o vevi fat sul blog di Paolo Ciani a proposit dal teme sigurece.
O sieravi il coment disint "Sperìn che lu publichi prin di altris coments, parcè che se no mi podarès vignî cualchi suspiet che su chel blog di Paolo Ciani no dutis lis vôs a àn la stesse libertât di espression".
Cumò o ai la conferme: su chel blog no dutis lis vôs a àn la stesse libertât di espression parcè che Paolo Ciani no mi à permetût di comentâ sul so blog. Si clamie censure? No sai, ma un che si svante di jessi om di "Valôrs, principis e coerence", tal gno câs al à dimostrât che la libertât di espression no je un valôr e un principi che lui al garantìs a ducj. Duncje ancje la coerence e cole... come che tra l'altri o vevi za vût mût di dimostrâ a proposit dal esempli sul rispiet e la aplicazion des normis europeanis.
Volêso lis provis?
I coments su la pagjine in cuestion a àn passât il numar 50 di un toc. Jo o jeri intervignût la prime volte cuant che a 'nd jerin dome 40.
Alore o ai provât a tornâ a comentâ.
Lu ai fat 3 voltis: 2 cul gno non e scrivint par furlan e 1 volte doprant un pseudonim e scrivint par talian.
Cheste la prime volte: se o fracais su la imagjin si lei ben la ore (10.24 pm) e ancje il coment che al veve di jessi prime dal gno (che al è tal blog di Paolo Ciani). Si lei ancje che il coment al è in spiete di moderazion: foto numar 1.
La seconde volte o ai tornât a meti il coment origjinari di chê altre sere (a son passadis 24 oris de sere prime che o vevi scrit e inmò nol è stât publicât: alore o ai dit "O torni a meti simpri chel"). Come che o viodês francant su la imagjin, il blog al dîs che il coment al à di passâ sot de "moderazion": a jerin lis 10.26 pm, juste doi minûts dopo dal prin tentatîf, ve chi la foto numar 2.
La tierce e ultime volte, come che o viodês fracant su la tierce imagjin chi sot, o ai doprât un pesudonim: mi soi firmât come "antonio" e o ai doprât une mail inventade sul moment e che o scanceli parcè che, fatalitât, al esist un siôr che al veve chê mail e che si è ancje rabiât, juestementri, e i domandi scuse (chest al insegne che internet al è un biel imprest, ma che si à di stâ une vore atents, ducj). La ore e jere 10.34 pm de stesse zornade, juste 10 minûts dopo dal gno prin intervent di îr di sere: ve chi la foto numar 3.
Bon, dopo dute chest lavorâ, îr o soi lât a durmî e vuê buinore o ai viodût il risultât e us al mostri
ta cheste ultime schermade fotografade si viôt benon che il coment di antonio des 10.34 (un coment fat doprant un pseudonim) al è stât publicât: ve chi la foto numar 4 e numar 5 (in chest câs o ai doprade la numar 5). Come che intant a son stâts publicâts ancje altris coments. Invezit i miei coments scrits par furlan inmò no so stâts publicâts.
No fâs nissun coment, parcè che i fats si comentin di bessôi.
Cheste e je la maniere che Paolo Ciani al dopre par fâ informazion. A cjase sô al è libar di compuartâsi come che al vûl, ma par plasê al sarès il câs alore di evitâ di presentâsi come om di valôrs, se nol lasse a ducj la pussibilitât di fevelâ. E i ten a marcâ il fat che o sai che ancje altris personis a àn comentât dopo che o vevi scrit jo: chei coments a son publicâts i miei invezit no.
Chei coments a jerin par talian, i miei par furlan.
Alore mi ven di pensâ che Paolo Ciani al à scrit sul gjornâl "AMO IL FRIULANO": al ame cussì tant il furlan che al à volût tignî dome par se i miei coments, e duncje jo no soi stât censurât ma o soi dome stât "tutelât" di Paolo Ciani, che al à tignût sierât in cjase i miei coments par furlan. In efiets, cheste al è un ategjament "coerent" cu la politiche linguistiche di AN: secont di lôr la lenghe furlane e varès di jessi sierade in cjase e no doprade in maniere publiche. E di fat i miei coments no son stâts publicâts.
Forsit al sarès il câs di sostituî i ponts esclamatîfs cun cualchi pont di domande ta cheste foto...

O ringrazii la Apple parcè che cul Mac o ai scuviert une funzion che e permet di fotografâ la imagjin: la ore di creazion dal file di imagjin e risulte clare e duncje o pues mandâ copie des fotos a cualsisedi tecnic informatic che al vedi voie di verificâ se a son veris.

A proposit... i coments cumò a ce numar sono rivâts? Lait a controlâ... magari dopo cheste denuncie a son stâts publicâts ancje i miei...

Scusait se o soi stât lunc ma e je une robe che e mertave un tic di timp.

07 novembre 2007

Code di paie?

Chest al è il coment che o vevi lassât sul blog di Paolo Ciani (te foto), promotôr di une iniziative secont me avonde discutibil te forme.
O vin ducj a cûr la sigurece, ma la politiche no varès di provocâ ta cheste maniere.
Ve chi il coment (scrit tor miezegnot):

"Cheste iniziative mi fâs pôre, no tant pal fat che e sedi suntun sît web, ma parcè che e ven di un politic conseîr regjonâl che al varès di cognossi la vie istitituzionâl par risolvi problematichis dal gjenar. La nestre regjon e à dibisugne di une classe politiche e no di “oms de strade sticeboris”. O fâs apel al sens di responsabilitât e rispiet des istituzions che a varessin di jessi intun esponent di AN par che cheste iniziative e vegni sierade il prin pussibil.

Ps. Mi fâs plasê che il conseîr regjonâl Ciani si visi che e esisti la comunitât europeane che e fâs diretivis che a àn di jessi aplicadis tai stâts membris de Europe. Però i ricuardi al conseîr regjonâl Ciani che no esistin dome diretivis sul teme de sigurece (argoment une vore impuartant, come tancj altris): e je ancje la “Cjarte europeane des lenghis regjonâls o minoritariis (1992)” e la “Convenzion cuadri pes minorancis nazionâls (1995)”. Cun chest o vuei dome fâ viodi che e je une diference tra informazion e rispiet des normis e invezit comunicazion strumentâl che e puarte a fâ passâ dome di ce che si à voie di mostrâ. E ancje la maniere di cheste iniziative par frontâ la cuestion “sigurece” mi puce une vore di strumentalizazion.
Christian Romanini Conseîr comunâl di Maian (FI) che no je la targhe de citât di Florence, ma la sigle di Forza Italia che no mi pâr che al sedi un partît comunist."

Purtrop no lu vevi salvât e duncje ce che o ai scrit chi parsore al è ce che mi visavi: no mi spietavi che o varès scugnût spietâ par viodilu publicât. Duncje cualchi peraule e podarès jessi divierse, ma la sostance mi semee di vêle salvade.
Cuant che lu ai publicât tor miezegnot (i coments fint a chel moment a jerin 40), mi è rivât un messaç che mi diseve che il gno coment al veve di jessi valutât prin di jessi visibil. Sperìn che lu publichi prin di altris coments, parcè che se no mi podarès vignî cualchi suspiet che su chel blog di Paolo Ciani no dutis lis vôs a àn la stesse libertât di espression.

Mandi Giorgio Ferigo

Vuê aes 14.30 a Comelians al è il funerâl civîl di Giorgio Ferigo, miedi, scritôr, musicist, insome grant protagonist de vite culturâl in Cjargne e no dome.
Come che tai ultins timps al sucêt masse dispès, si cjatìn a saludâ une altre grande figure che e lasse un vueit ancje par chei che come me no àn vût la furtune di cognossilu di persone. Ma nol covente tant par rindisi cont che, se in tancj a sintin la necessitât di ricuardâlu, forsit vuê il Friûl al è pardabon plui puar.
De sô muart nus àn visât Aldo e Rof, e di lui mi à fevelât par telefon Marino, lui lu àn ricuardât Renzo Tondo, Dree, il brâf furlan, i gjornâi, lenghenet, friultv, friulnet, Alessandro Tesini,...

ma forsit la maniere miôr o pensi che e sedi chê di ricuardâlu cussì...

Cungjò, Giorgio Ferigo

Ve chi la sô "Il Soldatin"

06 novembre 2007

Us spieti vinars al conciert dai FLK

Come che us ai za visât, VINARS ai 09 al sarà il conciert dal FLK aes 20.45 li dal Auditorium comunâl di Felet.

JENTRADE LIBARE!

Altris info, sul sît dal comun di Tavagnà

Par viodi la cartuline dal conciert plui grande, fracait achì.

05 novembre 2007

Serade garibaldine

Trancuii, trancuii! Ancje se il titul al è un tic particolâr, in realtât vinars ai 09 di Novembar aes 20.45 al sarà presentât un libri-vuide par lâ a cjaminâ in Cjargne. Il pretest par tirâ dentri Garibaldi al è dome che di lâ tai lûcs li che a son passâts chei cuatri diaui partîts di Maian che a àn fat part dai Mil.
Chi in bande la locandine de serade: fracait parsore par viodile plui in grant.

PS: "gesta del gruppo di garibaldini majanesi"? E varessino di jessi braurôs?... Stant che sul comodin o ai un libri di pre Josef "Bepo" Marchet, o soi lât a lei il cjapitulut che al fevele juste dai garibaldins furlan (pagjine 70 di Cuintristorie dal Friûl, ed. La Grame 2005, ma il libri al met adun scrits che a jerin stât publicâts su La Patrie dal Friûl dai 16 di Novembar dal 1950 al Prin di Zenâl dal 1952 e po tornade a publicâ come libri plui indevant in altris edizions).
Pre Josef Marchet al scriveve cussì:
"Cualchi furlan scjampât di chenti al fo a batisi a S.Martin o in Sicilie cun Garibaldi (19 di numar) o in cualchi altri sît: e di chescj, se di va a scrusignâ tes cjartis des autoritâts de glesie, si cjate che a jerin robate, cence religjon, scostumâts, fanatics; se si crôt ae leterature patriotiche a jerin "purissimi martiri". Ognidun che al vebi un freghinin di çucje al capìs subit cemût che a vadin cjapadis chestis definizions e si fâs di bessôl une idee di ce int che e jere".

Achì us met 2 articui che o ai scrit su pre Bepo tal 2006:
sul MV
e
sul Friuli

PS2: e jo o voi a scoltâ un pocje di musiche!

04 novembre 2007

Domenie cun pre Toni



Par furtune che al è Marino che sul so blog al continue a dâ vôs a pre Antoni Beline:

I furlans in chest moment di bondance, a pensin plui a mangjâ e a balâ che no aes robis spirituâls.
Ma jerino miôr i ebreus, che a pene che Mosè al à girât il voli, a àn metude sù, in plen desert, la discoteche dal “Vidiel di aur”?


(pre Toni Beline)

03 novembre 2007

Felet: sunâ par furlan al è sunâ european!

Us segnali chescj 2 apontaments cu la MUSICHE inmaneât dal Comun di Tavagnà
(JENTRADE LIBARE).

Vinars ai 9 di Novembar aes 20.45
li dal Auditorium di Felet (Tavagnà)
Bentornâts FLK!
Dopo 7 agns il grup che al à segnât in maniere decisive il senari de musiche furlane al presente il gnûf disc cuntun conciert di no pierdi

Domenie ai 25 di Novembar aes 20.45
li dal Auditorium di Felet (Tavagnà)
Pieripauli
Ai 2 di Novembar dal 1975 si distudave une des vôs plui fuartis dal “Secul curt”. Tra musiche, poesie e colôrs al torne a vivi Pier Paolo Pasolini

Lenghe locâl e lenghe universâl.
La musiche e rapresente une des formis di “resistence” plui dopradis des lenghis minoritariis. La Europe e je plene di esemplis e ancje la lenghe furlane no mancje di proponi une varietât e une vivarositât di dut rispiet. Il progjet Suns al nas par meti adun une rêt di comuns a pro de promozion musicâl furlane.
Pe ocasion il Comun di Tavagnà-Sportel pe lenghe furlane al à metût adun doi apontaments che ben a rapresentin la sene musicâl dai ultins agns.

US SPIETI!

Par viodi la locandine in grant: fracait achì!

02 novembre 2007

Pieripauli 02/11/1975-02/11/2007

PPP
Fint che al jere vîf, al deve fastidi a plui di cualchidun.
32 agns indaûr lu àn copât.
Cumò che nol è plui vîf, al continue a dâ fastidi a plui di cualchidun.
Ma no puedin plui copâlu.

"A vignarà ben il dì che il Friul al si inecuarzarà di vei na storia, un passat, na tradizion!..."
[furlan di Pier Paolo Pasolini]

Il gnûf Cd di Aldo Rossi

Ve chi il promo dal gnûf disc di Aldo Rossi. Par savê cemût vêlu, fracait achì.

01 novembre 2007

Fieste de Lega Nord a Pêrs

Mi è rivât chest invît. O ringrazii e o visi ancje voaltris. A Pêrs la Lega Nord e à decidût di fâ la sô
fieste sabide ai 3 e domenie ai 4 di Novembar.
Leint il manifest (fracait la imagjin par viodi plui grant) però no mi son plasudis un pâr di robutis.
La Lega Nord e à int valide come Stefano Tuti (che cumò al deventarà assessôr a Maian) e Claudio Violino, l'unic conseîr regjonâl leghist che o cognòs e che mi permet di saludâ e ricuardâ (o speri che altris no si sustin, se no ju ai nomenâts).
E propit ricuardant il grant impegn de Lega Nord pe tutele de lenghe furlane in consei regjonâl, de poie che mi à dât la Lega Nord in consei comunâl pe mozion a pro de tutele linguistiche di cualchi setemane indaûr, cumò o lei un manifest dome par talian... mi spietavi almancul in 2 lenghis...
Bon, a part chest, une altre robe no mi plâs: Sabide ai 3 "Faro Blu: canzoni e storie della tradizione lombarda"...
Ogni tant mi pâr che al sedi alc di masse lombart ancje te Lega Nord furlane... No ai nuie cuintri de Lombardie, ni nuie cuintri de Italie in se, ni cuintri nissun altri, ma mi plasarès che si cjalàs un tic di plui a ce che o vin noaltris che al à plui dibisugne di jessi valorizât. Chest al è un difiet che a àn un pôc ducj i partîts (fale il Moviment Friûl, clâr), ma de Lega Nord un si spietarès simpri une atenzion ae identitât locâl: chê lombarde cul Friûl no centre tant...
Però mi complimenti pe sielte de fantate: almancul ZULEIKA, la miss cjameseverde, e je furlane di Aquilee!