28 luglio 2007

Il Gjal ti mostre la Lenghe

Vuê al tache il Festival di Maian: inaugurazion aes 18.00 in place!
O aprofiti par fâ cualchi ringraziament:
a Daniele Stefanutti e a Marco Serafini che a àn decidût e mi àn domandât di preparâ un "spazi dedicât" par promovi l'ûs de lenghe furlane dentri de Mostre dal Festival, là sù des scuelis: o vin preparât une zone specifiche cul jutori di Regjon-Silce, Arlef, Provincie di Udin, Universitât dal Friûl-Cirf, CFL2000, Aziendis Sanitariis 4 e 5, Comun di Tavagnà, La Patrie dal Friûl, Glesie Furlane, Societât Filologjiche Furlane, Istitût Ladin Furlan "pre Checo Placerean", La Grame, Il Tomât di Buie, I colonos, Friulpoint, ILFurlanist, Fantats Furlans, Union Scritôrs Furlans, Radio Onde Furlane, Il Friuli, La Vita Cattolica, Radio Spazio, Il Diari, il Comitât 482, Roberto Ongaro, Dree Venier, Sandri Di Suald (Adsglen) e a mê sûr Sonia che mi à dât une man tal alestiment.
O ringrazii ducj chei che mi àn dade une man cu la lôr adesion.
Mi displâs che il Comun di Maian nol sedi presint ta chest spazi cul so sportel pe lenghe furlane: dut câs o podês cjatâlu intal pont informâtîf de aministrazion comunâl.
Par vignî a viodi, o vês di jentrâ in mostre, lâ a drete, fâ lis scjalis e o sês rivâts.
Us spieti ducj!

23 luglio 2007

Lamborghini a Udin

Ve ca cualchi imagjin des Lamborghini a Udin. Un grazie a Venut che mi à mandât il video: e je une cerce, ma plui che buine!


E chescj ju ai fats jo a Maian: prime si partìs...


Dopo si torne...


E ae fin si salude ducj fin a la prossime volte!



Compliments inmò a chei che a àn lavorât par puartâlis a Maian.

22 luglio 2007

Lamborghini a Maian

Bon, va ben, o vês reson: o jeri un tic a plen, ma volêso meti la sodisfazion?
Compliments a Daniele, a Dario dai Ols e a dute la Pro Loco pe biele inizitive.

20 luglio 2007

Tiliment, a ce pont sino?

Nol è tant che o vin fevelât di Tiliment: us met chi il volantin de cunvigne di vinars ai 27 di Lui, inmaneade de Associazion Assieme per il Tagliamento.
Fracait la foto par viodi miôr.

19 luglio 2007

Ent pe protezion dai animâi

Vuê us presenti une associazion che si clame Enpa e che si ocupe di protezion dai animâi. Di Istât o sintìn di cjans che a vegnin sbandonâts su la strade di int che e à di lâ in feriis (cui saressino i bastarts?), ma la Enpa no viôt dome di cjans. Di fat l'om al è cussì coion che masse voltis nol à dûl e al maltrate ancje altris bestiis: provait a lei achì.
Us met achì i recapits de sede di Udin, cussì se o savês di int che e maltrate lis bestiis o podês segnalâ:
Enpa Udine
Via Savorgnana 20
33100 Udine (UD)
Tel. 0432/506607
Fax. 0432/506607
CCP. 17257338

O doprâ cheste modulistiche par fâ un espost.

18 luglio 2007

Dimissions

Cheste e je la letare che o ai mandât in Comun:

Ae atenzion dal Sindic dal Comun di Maian
Dimissions di cjâf grup e president des comissions

Cun cheste letare o comunichi lis mês dimissions di cjâf grup dal grup consiliâr FI-AN-UDC e de presidence di dutis lis comission che o ai.
Lis motivazions a son avonde claris, almancul par me: dopo des umiliazions vudis pai fats ben cognossûts di ducj e dopo des elezions 2006 o vevi acetât cuintri voie la incarghe di cjâf grup, te sperance e ilusion che lis robis a podessin gambiâ. Cussì nol è stât e o preferìs passâ la man a cui che al vignarà dopo di me.
O resti conseîr comunâl di maiorance par rispiet dai eletôrs che mi àn dât fiducie cu la lôr preference.
Mandi

Christian Romanini

17 luglio 2007

Scandai dal mês

Une novitât: cun vuê o screi la funzion dai scandais (te colone in bande a çampe). Il prin al è dedicât a la Zonte Comunâl. O podês dâ la vuestre preference dome a un dai components dal esecutîf: jo o ai za votât.
O vês timp fin ae fin dal mês.

ps: o speri che i interessâts a vedin il bon gust di no votâsi...

Fuarts chescj fantats furlans!

Ve chi lis fotos di sabide di sere a Sant Vît par Musikemate. A jerin ancje i Fantats Furlans cul lôr bancut. Luca (dongje di me cu la maiute nere) nus à clamâts par une minicerimonie di premiazion. O ai ancje protestât parcè che mi à improibît di partecipâ: uff, no dome minorizât dal pont di viste linguisti, ma cumò ancje discriminât tai quiz... :-P
Cun noaltris ancje il grant Aldo Rossi, un pêl mancul "fantat" ma pardabon masse fuart!
Achì la foto di grup e cu la Ninine (di non e di fat): ma cui isal chel vuarp che al continue a dî che i zovins no son braurôs di jessi furlans?
Mandiiiiiiiii!

16 luglio 2007

O soi publicist!

Lu comunichi cuntun tic di ritart parcè che lu ai savût dome vuê. Dai 28 di Jugn dal 2007 o soi iscrit al ordin dai gjornaliscj publiciscj regjonâl!
O soi propit content: o ringrazii dute la redazion dal setemanâl IL FRIULI e in particolâr il diretôr Giovanni Bertoli, il gno riferiment in redazion Alessandro Di Giusto curadôr de pagjine "Marilenghe" e Massimo Duca che 2 agns indaûr mi à presentât in redazion.
O dedichi cheste tape de mê vite a la mê famee e a pre Toni Beline, il gno diretôr da "La Patrie dal Friûl", vôs libare plui di me.
La sodisfazion e je inmò plui grande parcè che par deventâ publiciscj si scuen colaborâ cuntune testade gjornalistiche e scrivi un numar definît di articui che dopo a vegnin valutâts: jo o soi deventâ publicist scrivint dome par furlan e jessint paiât pal gno lavôr in marilenghe.
O pensi che cheste e sedi une buine rispueste par chei che a disin che il furlan nol covente, che nol è util o che e je dome une robe folcloristiche. Jo al è di plui di 2 agns che o ai decidût di pontâ la mê cariere professionâl su la lenghe furlane e cheste e je une altre tessarute che si zonte tal mosaic dal gno lavôr.

(cumò però o ai di lâ a paiâ la cuote anuâl di iscrizion al ordin... sigh) ;-)

15 luglio 2007

Letare vierte dal prof. Gianfranco D'Aronco

Al è un periodi di letaris pesantis! Sabide il prof. Gianfranco D'Aronco al à publicât une letare vierte sul MV. Destinatari: Riccardo Illy.
Risultât? Vuê in prime pagjine, simpri sul MV, la rispueste di Illy.
Compliments al prof. Gianfranco D'Aronco: la rispueste di Illy mi semee une vore impuartante.

14 luglio 2007

Robis di no crodi

Îr il MV al à publicât une mê letare par furlan. O ai rispuindût a un ciert Rimati che al veve scrit cualchi zornade prime a proposit di inglês e furlan. Tai coments us met lis dôs letaris.

13 luglio 2007

Vescul Fedêl e Straulin a Perpignan


Marco nus mande chest video di Perpignan in France: esibizion dal vîf di Vescul, Fedêl e Straulin. La cjançon, riprendude cuntun videofonin, e je "Il cîl" di Loris Vescul.
Grazie a Marco pal contribût.

10 luglio 2007

Te Glesie Mari di Aquilee cul esempli di pre Toni

Glesie Furlane, la associazion di predis e laics che di agns si impegne par puartâ ancje te glesie la lenghe furlane, e ricuarde i Sants Ermacure e Fortunât, patrons dal Friûl.
Lu fasarà domenie ai 15 di Lui te Basiliche Mari di Aquilee aes 7 sore sere. La funzion e sarà celebrade di bonsignôr Adelchi Cabass vicjari gjenerâl de Diocesi di Gurize.
E sarà la ocasion no dome par memoreâ i doi martars aquileiês, ma ancje par fâ il pont de situazion de glesie furlane in gjenerâl e ricuardâ pre Antoni Beline, mancjât ai 23 di Avrîl dal 2007.
“Si cjatarìn chest an cence pre Antoni, savint però che il so spirt nus cjale” a declarin chei di Glesie Furlane “Nus à lassâts prin di viodi autorizât il Messâl Roman par furlan e nô o vin la ereditât e il dovê di bati su cheste strade: ai fedêi o darìn fûr il so testament spirtuâl”.
Di fat pre Antoni Beline e Glesie Furlane al è di doi agns che a spietin la autorizazion par podê doprâ il Messâl Roman voltât par furlan daûr de Editio typica III. La traduzion però inmò no je stade autorizade di bande de Conference episcopâl taliane “Parcè che i Vescui nus àn dit che prime al à di jessi finît di voltâ chel dal latin al talian: une motivazion banâl e dispotiche!” e denuncie Glesie Furlane “E pensâ che ducj i problemis a podaressin jessi risolts ancje dai nestris Vescui dal Friûl Brollo, D’Antoni e Poletto che a àn dute la autoritât par permeti aes lôr Diocesis di podê doprâ il test furlan: invezit nuie! A spietin Rome e dut ce che al è stât fat al è stât regalâi une copie al Pape, ma cheste no je une cuestion che e rivuarde il Pape: dome la Cei o i nestris Vescui furlans a puedin dâ la autorizazion. Cheste situazion e je vergognose e injustificade: si viete al popul furlan di vê la peraule dal Signôr te nestre Marilenghe!”.
Ma intant che i Vescui de Regjon a rivaran a mans scjassant, cence vê mantignût l'impegn, i predis di Glesie Furlane a puartaran chel distès il Messâl Roman par furlan a Aquilee, par condividi in comunion cu la int furlane i tescj che pre Toni al veve tant lavorât par puartâju dal latin al furlan.
Cheste situazion inacetabile e ven amplificade inmò di plui de notizie resinte che Pape Benedet XVI al à dât la autorizazion a recuperâ il rît tridentin di Pio V (secul XVI), tornant cussì al ûs dal latin tes funzions. Une contradizion temporâl e teologjiche che e conferme che e je vite dure pe lenghe furlane: intant che il latin al cjape la strade principâl, puartant l'orloi indaûr di cuatri secui prime dal Concili Vatican II che al veve puartât la funzion intune dimension di condivision comunitarie cul popul, al popul stes i ven dineât il dirit di podê preâ il Signôr te sô Marilenghe “Cuasi che la religjon no fos part de vite cuotidiane, ma un moment par gjavassi de realtât di ogni dì e doprâ une lenghe foreste tant che il latin e no il furlan” a sierin chei di Glesie Furlane “pre Antoni tal so testement nus à lassât cheste racomandazion che o intindìn rispietâ fin sul ultin: Vivêt di furlans, vivêt pal vuestri ben, vivêt pal ben de glesie, vivêt pal ben dal nestri Friûl”.

Sabide Musikemate a Sant Vît dal Tiliment

Sabide o voi a Sant Vît dal Tiliment cui amîs dal FAF, ancje se mi àn gjavât la pussibilitât di vinci un premi tai concors dal mês: zarde (par rispiet dai letôrs o eviti di meti la peraule che e fasarès rime e che e rindarès di plui la esclamazion)! Dut câs o ai partecipât chel distès e cumò viodìn cemût che e je lade.
Cui che al vûl bevi une bire in compagnie, che al vegni jù!
Par discjamâ il program, fracait achì.

09 luglio 2007

Spietant il Festival

Al mancje pôc al inizi dal Festival di Maian, inmaneât de Pro Loco.
Intant però, ancje grazie al jutori di Dario dai Ols e dai amîs di Cjasesole, a tachin i apontament che a anticipin la fieste grande. Di fat sabide ai 21 e domenie ai 22 al è previodût il Radun des Lamborghini: il Taur e la Acuile.

Radio Onde Furlane e ricuarde Gregoricchio

Tal palinsest estîf di Radio Onde Furlane (fm 90 mhz, in Cjargne 90.2) al varà spazi un radiodrame di Gianni Gregoricchio (a drete, intun dissen di Gianni Di Lena), “Îr e doman” realizât dal autôr tai agns '80. La riproposizion dal lavôr al è un omaç al scritôr, che nus à lassâts tal Zenâr passât, che al veve colaborât plui voltis cu la emitent furlane, soredut pe realizazion di radiodramis. “Îr e doman” gjavât fûr de conte omonime Il radiodrame, in sedis pontadis, al larà in onde trê voltis par setemane (lunis, miercus e vinars) aes 10.30, tacant di lunis ai 9 di Lui.
Prime di tacâ, propit lunis al sarà ancje un intervent di Paolo Nicli, atôr e regjist dai Servi di Scena, che al à colaborât cun Gianni Gregoricchio.

08 luglio 2007

Muris in curt

La Associazion Muris in Festa mi à segnalât une biele iniziative cinematografiche se si fasarà a Muris. Al è un concors par films curts che al à chê di promovi la produzion cinematografiche amatorîal.
Achì o podês discjamâ il regolament dal concors e la schede di iscrizion.
Il tiermin par partecipâ al è ai 27 di Avost.
Par informazions: scrivêt une mail a Diana o clamait il cell. +39 338 6301137.

44 (mil) gjats in file par 6...

Grazie a ducj i letôrs (44.000 contats intun an e mieç no son pôcs!) e ancje a chei che a varessin volût fâmi sierâ il blog! Ma cumò, par furtune, al è un parê legâl dal Ufici regjonâl che mi conferme la legjitimitât di ce che o fâs.
Par chest o ringrazii il Comun di Maian, il sindic e la zonte comunâl, par jessisi disturbâts e vê contatât la Regjon.

07 luglio 2007

Sardegne Friûl

Tai ultins timps o ai cognossût diviersis personis che e vegnin de Sardegne.
Maria Marceddu e je di Farle e duncje e je la prime des cognossince. Ma dopo al a son rivât Mannu e Mannoni, i doi presidents dal Circul dai Sarts di Udin (li che Marie e je vicepresidente); Ivo Murgia (blogarin cognossût in rêt); Mauro Pili (za president de Sardegne e deputât cognossût midiant di Renzo Tondo); e ultin ma no par impuartance Diego Corraine (linguist esperts di politiche linguistiche e o ai tornât a viodi cun plasê juste la setemane passade.
A ducj chescj miei amîs e a ducj i letôrs dal blog o dedichi "Nanneddu meu", une biele cjante popolâr che nus fâ preseâ la bielece de musiche e de lenghe de Sardegne. Mandi e buine scolte a ducj. A si biri.


NANNEDDU MEU
Nanneddu meu su mundu est gai,
a sicut erat non torrat mai.

Semus in tempos de tirannias,
infamidades e carestias;
commo sos populos cascan che canes
gridende forte "cherimus pane".

Famidos nois semus pappande
pane e castanza, terra cun lande;
terra ch'a fangu, torrat su poveru
senz'alimentu, senza ricoveru.

Cussas banderas numeru trinta
de binu bonu mudana tinta;
appena mortas cussas banderas
non pius s'osservan imbriagheras.

Semus sididos, issa funtana
pretende s'abba parimus ranas.
Abbocaeddos, laureados,
buzzacas boidas e ispiantados.

Adiosu Nanni, tenet'a contu,
fache su surdu, ghettad'a tontu;
e tantu l'ides: su mundu est gai
a sicut erat non torrat mai.

Letare vierte al grup regjonâl di Forza Italia

Stant che des mês bandis al è di mode, mi è vignude ancje a mi chê di scrivi une letare.
O volarès ringraziâ il cons. reg. Massimo Blasoni par vêmi dade la ocasion di jessi scoltât inte fase di predisposizion di un dissen di leç a pro de tutele de lenghe furlane.
O ai domandât une copie de version finâl de propueste e dopo cualchi zornade che e je stade depositade e a sun di domandâle, o soi rivât a vêle e le ai lete.
Mi rint cont de dificoltât di meti dacuardi plui sensibilitâts: di chês plui sietichis a chês plui convintis che il furlan e il patrimoni linguistic de regjon a son è une ricjece (se nol fos clâr, a mi mi plasarès che si ves plui fuarce tal tutelâ la lenghe furlane, tacant de scuele). Mi à fat plasê che e sedi stade cjapade cheste iniziative e che almancul cualchidun ogni tant si vise di sintî un pôc ancje chei che no àn un rûl apicâl dentri dal partît. Di chest, ancje se il gno parê al conte in maniere relative, o doi at e o ringrazii Massimo Blasoni pe sensibilitât dimostrade.
Su lis tematichis che a rivuardin la politiche linguistiche nol è mai stât fat un resonament razionâl e aprofondît dentri dal nestri partît (o ricuardi e o ringrazii ancje l'on. Renzo Tondo pe cunvigne fate a Sant Denêl tal Novembar 2006 cun Mauro Pili, ma in chê volte i conseîrs regjonâi no jerin): ogni tant si lei cualchi articul sul gjornâl, ma nol è misteri che plui di cualchidun al manifesti posizions une vore contrariis. Cheste ultime iniziative di Massimo Blasoni e podeve jessi une buine ocasion, che però e je stade mancjade inmò une volte, stant che di ducj i conseîrs regjonâi che a jerin invidâts a lis riunions (e in pôc timp a son stâts fats plui incuintris), l'unic presint al è stât Massimo Blasoni, che lis veve convocadis. Mi àn insegnât che in politiche cui che al è assent al à simpri tuart...
Mi rint cont che a son tancj i problemis, lis necessitâts, lis domandis, e, parcè no, ancje i interès che ognidun al à, ma, stant ancje lis reazions pesantis provocadis de PDLR de Zonte Illy, forsit al jere il câs di frontâ ancje cheste tematiche.
Ancje noaltris operadôrs linguistics o vin fat sintî la nestre opinion criticant in maniere pesante lis sieltis di Illy e de sô Zonte Regjonâl. Idem, ma in maniere plui analitiche, si è esprimût ancje il Comitât 482 come che o podês lei ta chest document che al è stât dât martars ai 26 di Jugn ae Comission VI.
Ancje jo o jeri martars ai 26 di Jugn a TS, come puartevôs de Associazion e de Riviste "La Patrie dal Friûl" e il gno intervent al è stât une vore critic cuintri de Zonte Illy.
Conseîrs regjonâi di Forza Italia, us ricuardi l'apel che al è stât preparât dal Comitât 482 e che us invidi a lei e magari a sotscrivilu (baste mandâ une mail al comitât cun non-cognon-comun di residence): jo lu ai fat. Us ricuardi che il comitât 482 al è trasversâl e al cjape dentri esponents di ogni colôr politic, ma, come che o ai vût za dit, achì si fevele di un interès gjenerâl che al va parsore dai schieraments.
Mi auguri che in fase di discussion in Consei ancje Forza Italia si meti de bande de tutele de lenghe furlane, parcè che se o vin voie di continuâ a svantâsi di jessi il partît des riformis, no podìn acetâ di jessi conservadôrs in teme di politiche linguistiche: la nestre regjon e à bisugne di no pierdi altri timp e riformâ, inzornantlu, il cuadri legjislatîf in argoment e no metisi de bande de Zonte Illy che e je daûr a compuartâsi no dome di conservadore, ma adiriture di reazionarie, puartant indaûr la situazion a prime de leç regjonâl 15/96, de leç 482/99 e cuintri dute la normative europeane che cumò e je in vore.
Conseîrs regjonâi di Forza Italia, us domandi di rifleti su chest argoment e di difindi i dirits linguistics dai furlans: chest nol è un argoment che interesse il passât, ma la identitât de nestre int di vuê e ancje tancj zovins a sintin che cheste no je une robe che e sa di mufe, ma e rapresente une oportunitât di no pierdi. Su chest o fasarai di dut par difindi cheste posizion e mi rint inmò disponibil a fevelâ cun voaltris par aprofondî la cuestion, se o volarês fâlu.
Dut câs, come che o disevi, juste chê altre dì, o ai let la propueste di leç che Forza Italia e à presentât in regjon pe tutele de lenghe furlane.
No soi par nuie content.
O torni a dâ at a Massimo Blasoni e lu ringrâzii inmò di jessi stât l'unic a vê volût scoltâ e frontâ chest teme, ma cumò di front a ce che o ai let o ai provade une profonde delusion par vie che mi semee une vore dongje a chê che e à presentade la Zonte regjonâl.
Adiriture al ven dineât che il furlan al sedi un dirit, e al reste dome "è consentito" (art.6): e di chest o vevi preât za tal incuintri dal grup di lavôr che al fos modificât. Invezit no sai cemût, mal soi tornât a cjatâ tal test. Parcè, se o vevin decidût insiemit di meti a puest la definizion?
No stoi a fâle tant lungje su dutis chês altris osservazions che o vevi proponût e che a son stadis ignoradis.
O pues dome dî che su cheste cuestion Forza Italia e podeve vê la ocasion di dimostrâsi fuarce di riforme, ma ae fin si è fermade su posizion di fuarte conservazion di un "status quo" che al presente no dome problemis di aplicazion de norme in vore, ma adiriture e volarès limitâle inmò di plui.
O cjapi at, o rispieti ma no aprovi, ancje se la mê opinion no sai ce pês che e pues vê: forsit nissun...
Mi auguri che il grup ristret de comission VI al partorissi un dissen di leç plui fuart, ma lis premessis a son avonde brutis.
Po dopo in consei, o volarès capî ce che al fasarà il grup consiliâr di Forza Italia, considerât che nissun altri conseîr al à volût firmâ la propueste di Blasoni e adiriture, come che o ai za dit, no si è nancje presentât ae taule di lavôr par preparâle.
O resti a disposizion par aprofondî lis tematichis di politiche linguistiche dentri di Forza Italia parcè che mi rint cont che a 'nd è tante bisugne, ma pal moment mi sint une vore bessôl.
Mandi e bon lavôr.

Un furlan american

Us presenti un gno amì di "di là de grande aghe". Forsit cualchidun za lu cognòs: dut câs us visi che al à viert ancje lui un blog par furlans de diaspore.
A lui e a ducj i furlans ator pal mont, o dedichi cheste.

George McAnthony invezit al è di Bozen in Sud Tirôl: e di bon rapresentant di une zone plurilengâl, al à fat il sît par talian, todesc e inglês.

06 luglio 2007

Cauntri rôts, teic mi ôm, tu de plais, ai bilôn... (bis)

Sì sì, lu sai: le ai za metude, ma a mi mi plâs masse...

Azion a Spilimberc!

Îr di sere o ai stât a Spilimberc, ae cunvigne inmaneade dai conseîrs regjonâi Bruno Malattia e Piero Colussi: le mille parole del friulano. (1000? Ma ce dal diaul significhial?... E chei chi a volevin dâ di intindi che e jere une iniziative a pro dal furlan: nancje lis simiis no doprin cussì pocjis peraulis: compliments, biele considerazion che a àn de lenghe furlane... e clarementri chescj 2 politics achì a àn fevelâti rigorosementri par talian).
Jo o ai stât a dâ fûr volantins: chest achì.
O scuen ringraziâ i organizadôrs, in particolâr i conseîrs Bruno Malattia e Piero Colussi, parcè che îr di sere nus àn fat capî cemût che a intindin "difindi" la lenghe furlane.
Lu àn fat fevelant dome par talian (o citi Malattia): "il friulano non serve, serve altro... le risorse per il friulano non ci sono... e poi cosa vogliono questi friulanisti? non mi piace questa parola: tutte quelle che finiscono in "-isti" nascondono un qualcosa di negativo".
Lu àn fat doprant e strumentalizant i poetis clamâts a recitâ la lôr poesie par furlan.
Lu àn fat dimostrant che par lôr la lenghe furlane e je une robe dal passât, puare, ferme e al limit che e pues jessi doprade dome par poesie e leterature. Par lôr il furlan no je une lenghe di ogni dì... (jo no ai nuie cuintri de poesie, anzit, ma trope int scrivi o adiriture leie di poesie?).
Lu àn fat doprant il non di Pieri Pauli Pasolini, pre Bepo Marchet e pre Toni Beline che a son stât nomenâts e che secont me, îr di sere di son ribaltâts te tombe.
Mi à plasût l'ex on. Roberto Visentin (te foto al è chel in pîts e Malattia chel sentât) che a proposit de peraule "friulanisti", i à dit a Malattia: "Consigliere Malattia, io non mi ritengo friulanista, per rispetto dei friulanisti. Ma le ricordo che ci sono anche altre parole che finiscono in -isti: per esempio, lobbisti!". Cuant che i à dit cussì, Malattia al à sbassât il cjâf: code di paie?
Cun cheste o sieri, e stant che sedi a Malattia e Colussi ur plasin lis metaforis e lis espressions intarìn plui a fevelâ par furlan, no sintarìn plui nissune varietât, altri che balis!coloridis dal furlan "dai nonos", alore ur dîs: cun voaltris, conseîrs Malattia e Colussi, o podìn metile a suiâ cuant che o vin voie, parcè che fasint come che o volaressis voaltris, no sintarìn plui a fevelâ nissune varietât, anzit no sintarìn plui a fevelâ par furlan: altri che balis!
O ai sintût Bruno Malattia (te foto piçule) che si svantave di vê fat, no tant timp indaûr, une azion enologjiche in difese dal Tocai cuintri dal Friulano.
Ben o pues dî "VIVE LA COERENCE", îr di sere al à fat compagn: une azion cuintri dal furlan.

Ah, ultime robe: mi soi ancje cjapât un invît a lâ a cagâ, anzit par talian "Vai a cagare" di un lôr assistent!
Cheste e je la civiltât di chei che si proferissin personis civîls, anzit "Cittadini".

05 luglio 2007

Riunion Anci Zovins F-VJ

Ve ca une foto di grup de ultime riunion dal coordenament Anci Zovins F-VJ che e je stade îr di sere a Udin.
Fâ part di chest grup al è une vore interessant parcè che tu ti rindis cont che dut il mont al è paîs, o miôr, dut il mont al è comun. Dispès i conseis comunâi e ancje chês altris istituzions a viodin i conseîrs e i assessôrs zovins come "elements di disturp" par vie che la politiche (chê cu la p minuscule) e à i siei timps e no si à di rompi i tabars. E alore se a puedin, ti metin i bastons tra i rais e no je une cuestion di partît, ma di gjenerazions.
Dut câs, a part cheste considerazion un tic grise, cuant che o voi aes riunions mi divertìs une vore parcè che si cognòs ancje altris realtâts e dal sigûr il confront al è simpri costrutîf.
Te foto piçule lis nestris dôs sorestantis, Elia Vezzi (a çampe: vive la classe!), za sindic di Paluce, e Isabella De Monte (a drete), za vicesindic di Pontebe. O soi content che a coordenâ il nestri grup a sedin dôs feminis e dutis dôs che a rapresentin la mont!

04 luglio 2007

Marino Plazzotta su pre Toni


Chest filmâl al fevele de presentazion dal ultin libri di pre Toni (te foto, la ultime cuviertine de Patrie, mês di Jugn 2007 dedicât a pre Toni). Par viodi ancje la seconde part, lait sul blog di Marino Plazzotta, che al è il siôr che al fevele.

03 luglio 2007

Presentazion in Universitât

Isal eficaç il lengaç publicitari par promovi la lenghe furlane? Trop isal impuartant investî te promozion de lenghe? Il furlan isal daûr a scomparî parcè che leât a strent dome al mont dal passât e de tradizion o isal une lenghe che e pues esprimi cualsisei concet? E ancjemò… il furlan isal eficaç te publicitât? Aial di jessi promovût cu lis gnovis tecnologjiis? Rapresential une oportunitât lavorative? Isal just insegnâlu ai fruts?…"
Par rispuindi a chestis domandis e cjapâ sù lis prospetivis pussibilis, cun cheste iniziative si è sielzût di da vôs ae int.
Il progjet de campagne di comunicazion F=MC2 Furlan = Mieç di comunicazion al cuadrât, inmaneât dal Cirf de Universitât dal Friûl, al à ufiert la oportunitât di indagâ fra i spetatôrs dai cines de regjon, no dome il gradiment pe campagne promozionâl ma ancje i aspiets de percezion personâl de lenghe furlane, dal so ûs e de sô promozion ufrint indaûr une realtât interessante e vivarose, buine di vierzi, massime ai esperts, prospetivis gnovis di progjetazion.
Apontament in sale Florio a Udin ai 10 di Lui aes 11.00.

02 luglio 2007

Salûts dal Tiliment

Il meditefughe al è tornât e mi à mandade une foto. Stant che al jere un pôc che no lu sintivi, cuant che le ai viodude o ai capît: al veve fat une fughe sul Tiliment. Ve chi il nestri biel flum che chel svelt di Moretton & Co al volarès jemplâ di ciment: robis di mats! Ma che si vergogni e che al vadi a butâ il ciment a cjase sô! Vergogne!
E ce che mi fâs zirâ i cjarsons al è il fat che ancje a Maian al à cualchidun che i ten il dêt tal cûl par cuatri carantans di contribûts che ur à prometût. Ce puaretât! Ce si disial a cui che al met in bande i siei principis dome par tornecont economic? Un patrimoni come il Tiliment nol pues jessi svendût par nissun presit!
NO CIMENT TAL TILIMENT!!!

01 luglio 2007

Pre Toni ricuardât in consei comunâl

Tal ultin consei comunâl o ai volût ricuardâ pre Toni Beline e o scuen ameti che vie pe sentade no soi stât dome jo a fâ riferiment a chest grant personaç dal nestri Friûl.
Us met achì il gno intervent che al à viert l'ultin consei comunâl (intant che o fasevi chest intervent, e je stade distribuîde a ducj i conseîrs une copie dal ultin numar da “La Patrie dal Friûl”):

"O volarès domandâ dome cualchi minût par ricuardâ une figure fondamentâl par dut il Friûl e i furlans: pre Toni Beline, mancjât ai 23 di Avrîl dal 2007.
Pre Toni cualchi volte al vignive ancje a Maian a cjatâ une sô sûr che e je nestre concitadine.
La muart di chest predi, inteletuâl, furlanist e lasse un grant vueit no dome par chei che lu àn cognossût, ma soredut par dut il popul furlan che, ancje se no ducj si rindin cont, al è restât plui puar.
La maniere piês par ricuardâlu al sarès limitâsi a sempliç discors di circostance, dismenteantsi di ce che al à dit, scrit e puartât indevant.
Ta chest moment storic li che ancje in Regjon si à tacât a discuti di gnovis leçs che in cualchi câs (baste viodi la propueste 257 de Zonte Illy) a pucin di vecjo plui di chês che a son za in vore, al sarès stât impuartant vêlu inmò cun nô cu lis sôs riflessions e invîts a no vergognâsi de nestre identitât furlane e tant mancul de nestre lenghe, invidantnus a jessi braurôs di ce che di plui fuart e biel o vin te nestre culture: la nestre lenghe furlane.
O ai vude la furtune di cognossilu di persone tai ultins mês de sô vite e mi auguri che il testament che nus à lassât al podedi jessi pardabon chê semence che e cressarà simpri plui ancje cumò che lui al à lassât cheste esistence terene. In cheste ete globalizade e cu la tendince a omologâsi, ducj, ancje i singui comuns e i singui conseîs comunâi a àn il dovê di difindi la identitât de nestre int, tacant dai plui piçui za tes scuelis, parcè che al è di bant cjalâsi ator pal mont se no si cognòs di dulà che si ven. Dal sigûr, cjapant cussience de nestre realtât nus sarà ancje plui facil frontâ lis grandis sfidis ator pal mont.
Come che al à dit ancje di resint il president de Sardegne Soru “No capìs parcè che noaltris o vin la responsabilitât di protezi un nuraghe, di protezi e salvâ cualchi piere di une citât puniche e magari o vin di lâ a pierdi une robe vive tant che la lenghe, che e fevele di nô cetant plui di un muret punic: e fevele di un popul e di une storie cent mil voltis di plui di cuatri pieris metudis in rie”. E o soi convint che ancje pre Toni le varès pensade te stesse maniere ancje se noaltris no vin i nuraghis, parcè che no je une cuestion ni di colôr politic ni di origjins, ma di valôrs di fonde di un popul, che al sedi sart o furlan, ma tal stes câs popui cuntun element identitari ben definît, ma in pericul.
Grazie par chest spazi che mi è stât dât in memorie di pre Toni Beline".

Fieste li di Gardo

Finît di gustâ li di pre Meni, o ai stât a saludâ Renzo che al sierave la stagjon agonistiche 2006/07 cuntune biele fiestone tal so parc.
Ae cerimonie al à puartât il salût de Aministrazion Aldo Zucchiatti, pe Figc Silvano Del Pin e po ae fin Renzo mi à fat fevelâ ancej me, che no me spietâvi.
Come che o ai dit ancje li, o pensi che no conventin tantis cjacaris par ringraziâ Renzo par ce che al fâs "pe" e "cu la" ASD Majanese. O ai ricuardât une robe che spes mi dîs "O scuen ringraziâ chei che mi stan doncje parcè che se no fossin ducj chei colaboradôrs che mi judin, no si rivarès a fâ nuie" al dîs simpri Renzo.
E se ogni volte che si va aes manifestazions de associazion e si respire simpri un bon aiar di "famee" o pensi che al vedi propit reson Renzo: e duncje brâfs a ducj chei de Maianese (atletis, dirigjents, alenadôrs). Ma soredut brâf Renzo che ju sa tignî dongje e no si dismentee mai di dî "Grazie".
Chei che a san vuidâ un grup e lu fasin cun inteligjence e capacitât a son cussì: grande iniziative, grande gjenerositât e grande ricognossince pai colaboratôrs!
Grazie Renzo par dut ce che tu fasis!

Fieste li di pre Meni

Pre Meni Zannier ogni an, pe ultime sabide di Jugn, al fâs un gustâ li che al invide tant int. Di cualchi an o ai il plasê di partecipâ ancje jo. Mi à fat plasê scoltâ Enzo Driussi che, cjapade in man la armoniche al à cjantât par un biel toc.