31 maggio 2006

ŠTUDIJSKI CENTER NEDIŽA


Vuê, miercus 31, a Sant Pieri si presente il libri di Marco Stolfo "Lingue minoritarie e unità europea - La Carta di Strasburgo del 1981".
E je dal sigûr la ocasion par cognossi alc di plui su la nestre realtât di lenghe minoritarie.

29 maggio 2006

Elezions a Traversetolo

Ancje a Traversetolo si votave pe elezion dal Sindic: Alberto Pazzoni e la coalizion dal Centriçampe a àn tornât a vinci. Achì i risultâts

28 maggio 2006

Cul Barbe Cocul: Polente e Fric...o










Vuê o ai stât a Rocca Bernarda, parsore Iplis li che Barbe Cocul al veve il so chioscut dal Frico e di altris specialitât furlanis.
E po e jere ancje Maira...

27 maggio 2006

Cunvigne di Toponomastiche a Branc, ultimis zornadis



Si siere la Cuarte Cunvigne di toponomastiche di Branc, tra liendis e archeologjie. Vuê aes 18.30 si presente il libri sui cognons di Tavagnà, scrit di Walter Ceschia. Doman, domenie ultime dì par viodi la mostre.

te foto la dot. Sabrina Sguazzero

26 maggio 2006

Cjasesole: fieste dal sport, ma no dome


A tachin vuê a Cjasesole di Maian trê zornadis di fieste e sport, ma no dome.
Come ogni an Dario e la pro loco a organizin il torneu di balon che al va indevant fin domenie. Ma chest an a fasin ancje une mostre di Monica Zumino e une dimostrazion cui arcs. E po si mangje ancje ben!

25 maggio 2006

Furlan, lenghe vive


Al è stât publicât e presentât tal salon dal consei de Provincie di Udin pardabon plen di int, l'ultin libri curât di William Cisilino: Friulano lingua viva. Come che al à dit il prof. Giovanni Frau che al à presentât la publicazion "Cheste e je scuasit une piçule enciclopedie che e fotografe e e conferme la vivarositât de nestre Marilenghe". Cui che al volès vê une copie (insegnants, operadôrs culturâi e jo lu consei ancje a ministraôrs locâi...) al pues telefonâ al 0432/279978 o mandâ une mail di richieste al Ufici pe lenghe furlane de Provincie.

24 maggio 2006

Maian colôr di Rose

La corse rose a passarà doman joibe ai 25 ancje par Maian. Chi in bande e je la mape de tape. Se a cjase o vês une bandiere dal Friûl meteitle fûr! Fasìn viodi a dute Italie e al mont des bicicletis la nestre acuile zale che svole sul blu.
Saveviso che trente agns indaûr, tal 1976 il Zîr di Italie, lu à vinçût un talian? A jerin i agns di Eddy Merckx (il canibal), ma in chel an lu à vinçût Felice Gimondi.

Achì la descrizion dal percors di doman.

23 maggio 2006

Fieste sportive sui prâts di Gardo

Dai 2 ai 4 di Jugn dal 2006 grande fieste dal Sport a Puint de Ledre. Il SuperPresident de Maianese Renzo Gardo al à inmaneât la prime edizion dal Green Fest Sport (... e cumò viodìn cui che mi fâs inmò la osservazion che jo o feveli dome furlan!).
Si pues rivâ ancje cu lis tendis tancant di joibe dopomisdì.
Tant sport, ligrie, voie di divertîsi e... tante sunete (....sperìn...)!

Par informazions clamait Mirto Sodorman 347/9526761

22 maggio 2006

La Pro Majano e scree une mostre


Sabide ai 27 di Mai dal 2006, aes 18.00, li de Sale "Ciro di Pers" dal Minicipi, e sarà la scree de mostre personâl di Remigio Giorgiutti. La mostre e je sigûr biele, stant che l'artist al lavore pardabon une vore ben. Achì in bande un so cuadri: a mi mi plâs, voaltris ce disêso?

21 maggio 2006

La Fieste dai Motârs

A fasin tante confusion pal Sunsplash, ma no stin a dismenteâsi dal BIKERFEST, che ca di cualchi setemane al varà la sô edizion n. 20.
Achì al è dut il program.

Grazie Moreno e Carla, lis animis maianesis di cheste fieste!

Un "Mandi ilegâl" a ducj!

20 maggio 2006

Onde Mediterranee a Gurize


A Gurize e je proviodude pe setemane che e ven (26 e 27 di Mai) une biele iniziative che e met a confront la culture, la musiche, lis lenghis di Friûl, Corsiche e Catalogne. Un biel progjet interculturâl e un program interessant che si pues viodi te pagjine web di Onde Mediterranee.

19 maggio 2006

Toponomastiche locâl a Branc


Dai 19 ai 28 di mai a Branc di Tavagnà si fevelarà di toponomastiche locâl, archeologjie e liendis: Par savê alc di plui, continue a lei achì...
Tes zornadis a intervignaran une vore di esperts (te foto il Sindic di Tavagnà e la dot.e Sabrina Sguazzero), ve chi il program de cunvigne

18 maggio 2006

Il Guvier Prodi


Berlusconi al à passadis lis consegnis a Prodi che al è deventât Premier. Intant che a firmavin cjartis, di fûr a vevin i lôr cjanuts che a fasevin cognossince (te foto).
Ce us semeial il gnûf Guvier?
Jo no soi par nuie content... Ma cualchidun, che si clame Ricky e al fâs cafè, no nus vevial dite che il ministri furlan al jere garantît?...

17 maggio 2006

Sabide ai 20: Biel conciert in Mont a Buie!

Se cualchidun si vise, cu la colaborazion dai Musicologi tal mês di Novembar dal 2004 in Auditorium o vin fat un concierton cui Kosovni Odpadki, un grup musicâl de nestre regjon che al sune in maniere formidabile: te lr musiche dutis lis lenghis di chest cjantonut tal cûr de Europe tal mieç di trê confins! Ben, sabide ai 20 di Mai in Mont a Buie, te fieste dal Taur, a sunaran inmò! Une robe di no pierdi!

Il cuel dal Fum: la letare sul gjornâl

Îr sul Messaggero e jere une letare li che Armando Aita Picco si lamentave dal intervent di ricualificazion dal cuel dal Fum, che par lui invecit al è stât "sbancât" e no "ricualificât".
Secont me nol à ducj i tuarts a lamentâsi, ma no mi plâs la polemiche che e je stade impiade: mi par esagjerade. Ciert al è un intervent che al è stât fuart, ma al coventâve fat un percors che al permetès di lâ sù sul cuel ancje in maniere plui dolce. Dopo, jo no soi un tecnic e duncje no sai in ce maniere che a son stât fats i lavôrs... ciert al è che, par judicâ, si varà di viodi cuant che a saran finîts e no vê il preconcet che dut al è mâl.
Pal probleme des plantis (te foto une gjinestre, cuntun clic parsore de foto e devente grande), se al è stât fat un dam o fâs une propueste: stant che si varan di meti jù gnovis plantis o disarès che e sarès une robe di tignî in considerazion di fâ une sorte di zardin botanic cun plantis locâls, salacor fasint un progjet cuntun tecnic botanic, che nus dîsi cemût fâ ancje un percors che al vedi une valence didatiche pes scuelis che a son li dongje. Duncje no fâ une plantumanzion di vivâr, ma creâ une sorte di zardin didatic cun plantis dal puest e che salacor a vedin ancje la funzion di tignî la tiere par che nol slachi jù dut a bas (che tra l'altri, o pensi che al sedi za stât tignût cont tal progjet...). Ce us semeie cheste idee?
ps: par viodi altris opinions, lait achì

16 maggio 2006

Vinars al è Consei Comunâl

Cheste setemane al sarà il secontConsei Comunâl dopo des elezions: vinars aes 18.30.
O ai voie di marcâ doi ponts al ordin dal dì: la formazions des comissions consiliâr e la modifiche de Comunitât Colinâr, che daûr de riforme regjonâl e sarà trasformade in ASTER.
Tornant aes comissions, ancje daûr di ce che mi àn domandât, jo o sarai President de Comission Culture, de Comission Teritori e Ambient e component de Comission Paritetiche pai Rapuarts cui Comuns di Traversetolo e San Zenone.
Chest al è ce che si proponarà.

15 maggio 2006

Ce balon cun chel balon!

Par furtune al è sierât il campionât. L'Udin al è salvât, ma cun dut chel gjespâr des scomessis, o soi propit ingomeât!
La Juve e je campion di Italie... Ce braure!
Lait a lei ancje cheste:robis di no crodi...
Par television o ai ancje sintude une declarazion dal President dal Bologne ae trasmission di Simona Ventura, li che al incusave i responsabii dal scandul di vê ruvinât une des pocjis robis che a tignivin dongje i talians: Il Balon e ancje la nazionâl.
Al à parfin butât li la pussibilitât di no mandâ la Nazionâl ai Mondiâi di Gjermanie: une soluzion che la FIGC e varès di pensâ, par no fâsi ridi di dut il mont. Mandìn la Nazionâl Primevere, pluitost!

13 maggio 2006

♪♪♪ Trentetre ♪♪♪ Trentetre ♪♪♪ papapapa ♪♪♪

Ai 13 e 14 di Mai e je la adunade dai Alpins a Asiago: la numar 79.
Dut al è pront par fâ fieste.
Salacor, se cualchidun al va, nus contarà alc ancje a noaltris che o restìn a cjase.

12 maggio 2006

Serade in Cjargne

O soi juste tornât di Soclêf, li che cun cualchi amì o vin stât a cjatâ Renzo Tondo, rivât di Rome. Al è impuartant vê un contat diret cun Montecitorio: par savê cemût che e je lade frache achì.

11 maggio 2006

Il ricuart dal Taramot a Maian

Stant che cualchidun al à volût comentâ cemût che a son ladis lis robis, o fâs cheste riflession.
Se lis robis no son ladis dutis ben si à di vê la onestât di dîlu.
Cualchi problemut al è stât e si lu à viodût: di chest mi scusi e o ringrazii ducj i volontaris che, fasint ancje plui di ce che e varessin dovût, a àn pardabon lavorât tant par cheste ricorence.
In efiets, pal avignî, mi auguri ancje jo che ciertis robis e magagnutis no si ripetin, ancje par rispiet dai ospits, di chei che (di bant e cence domandâ nuie!) ti dan une man te organizazion e di dut ce che Maian al à vût di bande de gjenerositât di tante buine int.
Prin di dut: plui comunicazion par fâ partecipâ la int.
O aprofiti par tornâ a dî "Grazie" a dutis lis personis di cûr che a àn fat risurî il Friûl e Maian!

10 maggio 2006

Un salût ai miei arlêfs

Vuê al è miercus e par 3 mês e je stade la zornade che o fasevi scuele di furlan in Societât Filologjiche Furlane: e je stade une biele esperience e o speri di podê continuâ ancje pal avignî. O ringrazii la Societât Filologjiche e in particolâr Monica, Laura, Feliciano e ducj i miei arlêfs: e je stade une gran biele classe. Us disarai che o ai un pocjie di nostalgjie...
O aprofiti par scrivius un biel pinsîr che un siorut di Canosa di Puglia, che al vignive a lezion, al scrit tal so teme, brâf Antonio!:

Co mi jevi la matine, o ciali ator la mont e il plan:
une vôs dal cûr mi dîs "Sta content tu sês furlan!"

09 maggio 2006

Librut pai fruts (ma ancje pai grancj)


Trê peraulis: Burlaç, Nêf, Vierte. Ma no dome. E cussì vie pai proverbiâi lavôrs di Primevere, metint ordin ancje in librarie, al pues vignî fûr di cjatâ cualchi publicazion che si crodeve dismenteade.
La associazion culturâl “El Tomât” di Buie e je di tancj agns in ca impegnade te promozion de lenghe furlane e di cualchi an ancje pai fruts cuntun progjet editoriâl indreçât propit ai plui piçui.
In suplement al periodic che al puarte il non de Associazion, a son stâts distribuîts trê libruts ilustrâts, nassûts des mans e de fantasie di Laura Nicoloso e Elisabetta Ursella di Buie.
La mestre Nicoloso e insegne tes scuelis di Bordan, li che e met adun la passion pe lenghe furlane intun confront cun plui lenghis.
Elisabetta invecit e disegne. Dopo vêlu fat par cualchi an ator pe Europe, e je tornade in Friûl e te sô Buie ancje par dâ lûs a di cheste iniziative editoriâl.
E duncje cul test di une e i colôrs di chê altre e je nassude une golaine pe infanzie che no je ni flabe, ni conte, ma peraule piturade.
Come che si lei ancje te presentazion de professore Silvana Schiavi Fachin, “i suns, lis inmagjinis, di frut, ti jentrin dentri, ti restin tal çurviel e no tu lis dismenteis”.
Cussì, tes aventuris di Frutin, il protagonist di chescj incjants disegnâts, Laura e Elisabetta a menin par man il piçul letôr (e parcè no ancje i plui grancj), par tornâ a discuvierzi une realtât che te presse dai timps di vuê e cor il risi di pierdisi vie.
Si sint la poesie de maravee che te semplicitât de realtât e pant la grandece dal creât e la bielece de novitât scuvierte dai fruts.
Burlaç, Nêf e Vierte, al è facil intuîlu, a fevelin di stagjons diviersis, ma che tal stes timps a son compagnis: compagnis tai voi dai plui piçui, te lôr curiositât, tal cjalâ chel particolâr plui picinin che al fâs speciâl ancje “il cjanut tal so cusso” intant che “si tapone i voi cu la code”; o pûr “il moscardin” che “al duar te buse de glove grande dal rôl dai pravìs”; o inmò “Frutin” che “si inçopede tun farcadiç, tes manutis un maçut di violis”.
Si disvilupin cussì lis zornadis di Frutin, il piçul protagonist che, compagnât des besteutis, dai profums, dai colôrs e dai suns di une nature di scuvierzi dì par dì, si confronte cui particolârs par costruî la sô memorie te inocence de curiositât dai agns plui verts.
E pâr scuasit di strani intune ete fate di tecnologjie, cheste maniere di contâ cun semplicitât, cun timps che a semeavin dismenteâts la vite, la nature e lis stagjons.
Piçui cuadris par stiçâ chê curiositât, li che “il suns de lenghe si mude in sens e il sens in emozion e che e fâs gjoldi la voie di cognossi prime di deventâ cognossince”.
Frutin al vîf intun mont che forsit si sin dismenteâts di preseâ e lu fâs par ducj i fruts che come lui a tornaran a viodi e a sintî un furlan sclet, cjalt e incjantadôr midiant des peraulis di Laura e i disens di Elisabetta.
E la lenghe furlane e torne a jessi mari.

08 maggio 2006

Pre Bepo Marchet: 23_07_1902 - 08_05_1966

Vuê son 40 agns che al è mancjât Giuseppe Marchetti, pre Bepo, un dai plui grancj inteletuâi furlans dal '900. O ai vût mût di fevelâ cun Meni Zannier e tai prossims dîs, us contarai ce che mi à dite. Une robe us anticipi: int come Giuseppe Marchetti a coventarès tant ancje e soredut vuê.

07 maggio 2006

Une novitât a Montecitorio

Vêso mai vude voie di fevelâ cuntun parlamentâr, ma no savevis cemût fâ par fâi savê la vuestre opinion? Cumò o podês fâlu: ancje Renzo Tondo al à apene screât il so blog! Une maniere gnove e clare par metisi a disposizion de int!
Lait a viodi il BLOG DI RENZO TONDO

te foto, Renzo Tondo cu la nestre mitiche Renute!

Un simbul de ricostruzion: Il Domo di Vençon

Intun filmât fat de Universitât di Udin e che si pues viodi in internet, al è stât riprodusût ce che al è sucedût al Domo di Vençon in chê sere dai 6 di Mai dal 1976 aes 21.06: 50 e rots seconts che no finivin mai: discjame il video. Us consei di scoltâ l'audio cuntun pâr di auricolârs.
Inmò grazie a dute la int di cûr che e à regalât ae mê gjenerazion un Friûl che al è nomenât par dut il mont come un model e mi fâs sintî braurôs di jessi furlan. Un pinsîr lu dedichi par ducj i Sindics di chê ricostruzion che e àn dimostrât che cu la volontât si rive a fâ dut: ancje a fâ tornâ a nassi une Regjon.
Un "Mandi" ancje ae siore Luciana Bonatti Mora, che in chês gnots e à lavorât cence polse intun dai plui dificii compits: vê cure par ducj i 131 muarts di Maian e ricognossiju par podê informâ lis fameis che a vevin pierdût i lôr parincj.

06 maggio 2006

Maian: teatri di esportazion

Sul Messaggero (pagjine 17 culture e spetacui) di vuê e je cheste notizie sul gnûf spetacul teatrâl di Andrea Collavino (Academie Nico Pepe): grazie a Cuç pe segnalazion.
Richter al è un spetacul che al cjape dentri ancje doi atôrs de compagnie teatrâl di Maian: Ivan Zucchiatti e Mauro Vignuda.
Chest spetacul - si lei tal articul - al nas dal progjet di CollinaEcultura, il coodernament culturâl de Colinâr: in sene doman ai 7 di Mai aes 20.30 tal auditorium des scuelis di Dignan.
O soi content che il progjet, che al viôt l'intervent di Paolo Patui tant che consulent e coordenadôr, al vedi tignût cont de propueste che o vevi fat inmò in chê volte: dedicâ un laboratori teatrâl par fâ un test par ricuardâ il Taramot.
Tra i altris temis al è Zelig par furlan, cul intervent di Claudio Moretti. Ma cheste e je une altre storie che o contarìn plui indevant...

Friûl resurît: 1976-2006

Cjalâ denant, ma cuntun ricuart par chei che 30 agns indaûr come vuê a son stâts puartâts vie e no son plui...
Mi plâs cheste poesie dal gno amì Roberto Ongaro:

RICUARDE FURLAN
Lis cjasis sdrumadis a nulivin di muart,
ferîts di ogni bande, berghei, polvaron,
la int disperade e sgjerfave tra i claps,
scunide, avilide, cun disperazion.

Parsot e rugnave, feride, la tiere,
scjassant il Brancot ogni cualchi minût,
maseriis e sanc a passavin pes stradis,
il mont al diseve "Il Friûl al è pierdût!"

No vevin fats conts cu la antighe Gjernazie
di int di fature, usade al sudôr,
usade a lis vueris, a lis invasions,
che cence vaî e sopuarte il dolôr.

Tornâts di ogni dontri a la tiere dai vons,
un clap dongje l'altri, sudant ogni dì,
i fîs di chê tiere cetant sfortunade,
il vieri Friûl a àn fat resurî.

05 maggio 2006

No Passport (n)eurodram shakespearian a Tarcint

Vuê ai 5 di Mai aes 20.30 tal Centri Ceschia di Tarcint, al sarà in sene inte suaze de rassegne teatrâl Riflessi Autoreggenti, inmaneade di Servi di Scena, Petit Soleil e Hybrida il spetacul “No Passport (n)eurodram shakespearian” di Wanda Monaco Westerståhl cu la regjie di Fabio Accada. In sene ancje Alessandro Gallo.

04 maggio 2006

Mostre di Franco Maschio a Colorêt

Dai 5 ai 20 Mai a Colorêt in Cjistiel e sarà la mostre di Franco Maschio. Cuale opare us plasie di plui?

03 maggio 2006

Mulin Cocconi a Ospedalêt di Glemone

A Glemone, o miôr a Ospedalêt (inte foto il lagut de frazion), al è un museu un tic particolâr: tal Mulin Cocconi e je la sede dal Ecomuseu des Aghis che al prudele il patrimoni naturalistic dal teritori, cun particolât atenzion al teme de Aghe e dal Mulin. Par cui che al à gust di savê al di plui ancje par vie che e je aromai rivade la biele stagjon e al è plui facil rivâ a fâ une biele gjite, ve chi une robe di lei.

02 maggio 2006

Adriano Piuzzi Assessôr: COMPLIMENTS!

Il President Strassoldo al à nomenât assessôr Adriano Piuzzi!
Tancj compliments!
No sai parcè ma cheste robe mi à fat plasê dopli: il prin motîf parcè che e ven premiade une persone (za premiade dal eletorât) che cuant che e cjape un impegn, no mole fin che no à mantignût lis promessis (in politiche a 'ndi fossin come lui, invezit di predicjâ e vonde...); il secont motîf al è che a plui di cualchidun i è vignût il mâl di stomi pe bile.
Ma no stin a preocupâsi: come al solit in tancj a saran a montâ sù sul cjar dal vincidôr! Dopo dut, ancje Maian al è in Italie...

1976-2006: 30 agns dal Orcolat

Cheste e je la setemane dai 6 di Mai: sabide a saran 30 agns che la tiere e à scjassât, fasint gambiâ muse a dut il Friûl. Culì o ai voie di ricuardâ cun chei che a jerin, chê pagjine dolorose chê e à fat vaî tantis personis, ma che nus à fat cognossi ancje trop ben che e pues vê e pandi la buine int par judâ chei altris.
O aprofit ancje par saludâ un gno amì che nol è plui, ma che o ai vût mût di cognossi dopo tancj agns che al jere rivât pe prime volte di Traversetolo a Maian propit in chei agns. Al tornave simpri ogni an. E a Maian al sarès tornât ancje cheste volte, se masse adore il destin no lu ves puartât vie lui.
Mandi Armando, no tu jeris Furlan, ma tu âs volût ben al Friûl e ai Furlans, insegnantnus tant. Grazie

(ps: altris fotografiis a son su www.natisone.it che o ringrazii)

Societât Operarie


Domenie ai 30 di Avrîl e je stade la assemblee de Societât Operarie: isal stât cualchidun che al podi contânus alc di ce che al è stât dit?

01 maggio 2006

Mandi Elio Bartolini

Vuê o vierç i gjornâi e une notizie mi fâs dismenteâ dut il rest: al è muart Elio Bartolini. Tes peraulis di Mario Turello e Paolo Patui il ricuart di un nestri grant.
E il Friûl cumò al è plui puar.

Subliminâl jo
A ce altessis mai lampie par tonâ
dopo tant
e ce abîs spalanchino
daur chist rompi e crevâ.

Panolis j si disevin di frus
masanadis di chêi di là su,
e pore nô no ‘n vevin pi.

Pore ‘n vin ué che j vivin cloteant
tal grisul vultissâts cuintre un cîl neri
gualivo
spetant alc come un lamp
spetant alc come un ton
in ta la nestre misure colmâde.

Io sublime
A quali altezze mai lampeggia per rompere il tuono / dopo tanto / quali abissi si spalancano / dietro questo rombo e spezzare. // Pannocchie dicevano da bambini / macinate da quelli di lassù, / e paura noi non ne avevamo più. // Paura abbiamo oggi che viviamo zoppicando / avvolti in un brivido contro un cielo nero / compatto / aspettando qualcosa come un lampo / aspettando qualcosa come un tuono / nella nostra misura consumata.

Bon Prin di Mai!


Vuê e je la fieste dai lavoradôrs. Ma si sêso mai domandâts parcè?
Ve chi la rispueste.